Romaĉantyidyes 10
10
1Vojity, ĉojtyiꞌĉan nash yụ anic fer dyijtucsi yụ muꞌin chätidyeꞌ yụ Israeltyiꞌ vóshiꞌ in, yụ fer cọdyete Jenꞌ muꞌindyes in paj qui c̣hoñi in. 2Yụ nash chị́yacsi, muꞌin fer dyijtute tsanꞌ Jenꞌ in ĉojtyiꞌĉan muꞌin, cäj qui namꞌ dyijtute in jam rụij. 3Muꞌin jam chịj in junꞌ chuc muꞌ Jenꞌ rụij yụꞌtacsi muntyiꞌ in, ĉụiꞌsimꞌ dyijyedyeꞌ cạiꞌ in, jeñej aty raꞌ tsanꞌ rụij yuꞌti Jenꞌyaꞌ ĉúti u in ĉụiꞌsiꞌyaꞌ dyijyedyeꞌ in, jam qui namꞌ méquiꞌ mọꞌ chiquepte in Jenꞌsiꞌ dyijyedyeꞌ muꞌ. 4Cristo aty jịꞌmotseꞌ mọꞌ yụꞌtacdyeꞌ, mọꞌ jam rụij yụꞌtacsis Jenꞌyaꞌ, muꞌ qui Jenꞌ rụij yụꞌtacsi tyi chuc anicjete in.
C̣honꞌdyedyes räj muntyiꞌ tsun
5Chimeꞌdye muꞌ Moisés p̂eyacsi muꞌin yity dyijyity in jeñej aty raꞌ tsanꞌ rụij yụꞌtac u in mọꞌyaꞌ yụꞌtacdyeꞌyaꞌ ĉútity in. Yi muꞌ: "Tyi chuc chiqueꞌtyiꞌ räj yụꞌtacdyeꞌ in, mọꞌ raꞌ tsạꞌchucsiꞌ", yi. 6Yocvedye shupquiꞌ anicyedyeꞌ. Yiꞌ yocsiꞌ sánacdyeꞌ, p̂eyeꞌ junꞌ chuc raꞌ muꞌ Jenꞌ rụij yụꞌtacsi muꞌin anicjetety in, yiꞌ: "Jam raꞌ yi mi: ¿Tyi buty raꞌ mạyedyeꞌcheꞌ jịjcaij?" (Yiꞌ mọꞌ, jam jemonac muꞌcheꞌ jäĉajte in muꞌ Cristo.) 7"Chimeꞌdye jam raꞌ yi mi: ¿Tyi buty raꞌ chạij säñitysiꞌĉan ĉärꞌtacdyeꞌ? (Yiꞌ mọꞌ, jam jemonac muꞌĉan quevjajte in muꞌ Cristo, aty itŝij muꞌĉan.) 8Meꞌdye yiꞌ mọmoꞌ sánacdyeꞌ: "P̂eyacdyeꞌ Jenꞌsiꞌ muꞌ anic vejyaꞌ míyaꞌ, mọꞌ p̂eyeptes mi, judyeyaꞌ meꞌchupte ĉojtyiꞌĉan mi", yiꞌ sánacdyeꞌ. Mọꞌ p̂eyacdyeꞌ voroꞌtacsejas tsun yiꞌ junꞌ chuc jemoñeꞌ anicjeja Jenꞌ. 9Tyi chuc p̂eijte muꞌ Jesús yi: "Muꞌ Jesús anictyity Ayoꞌ tsun", judyeyaꞌ chimeꞌ anicyi ĉojtyiꞌĉan muꞌ, junꞌ chuc muꞌ Jenꞌ vañinjebajte jiquej, muꞌ nash raꞌ c̣hoñi. 10Jemoñeꞌ ĉojtyiꞌĉan anicjeja Jenꞌ paj qui muꞌ rụij yuꞌsinꞌ judyeyaꞌ p̂eyacdyeꞌyaꞌ muꞌ jiꞌjäcja Jesucristo, chat qui raꞌ muꞌ Jenꞌ jiꞌc̣honsinꞌ tsun.
11Yiꞌ sánacdyeꞌ: "Tyi chuc anicjete in muꞌin raꞌ jam junꞌ fibidyes shupqui in." 12Ọij p̂eyacdyeꞌ räjdyes muntyiꞌ in, Jenꞌ räj vaj cäts cạvacsi muntyiꞌ in, paj tsanꞌ judío in judyeyaꞌ paj tsanꞌ jam judío in. Muꞌ nash ayoꞌbuꞌyi räjdyes muntyiꞌ in, judyeyaꞌ ñịbeꞌjeyacsi jụꞌñity chuc cudyitity muꞌcheꞌ in, därsiꞌ ñịbeꞌyedyes muꞌ soꞌmacsi. 13Mọꞌdye p̂eyeꞌ sánacdyeꞌ yiꞌ: "Räj muꞌin cudyitity Ayoꞌcheꞌ tsun paj qui muꞌ jiꞌc̣honacsi, muꞌin raꞌ c̣hoñi in." 14Yụ raꞌ jéyac, ¿junꞌ bu raꞌ tupuj cudyiti muꞌcheꞌ in, jambiꞌ anicjeteyaꞌ Jenꞌ in? ¿Junꞌ bu raꞌ tupuj anicjete in, jambiꞌ seꞌvaquiyaꞌ p̂eijteyaꞌ in? ¿Junꞌ bu raꞌ tupuj seꞌvaqui in, jam tyi voroꞌtacsiyaꞌ? 15¿Junꞌ bu raꞌ tupuj voroꞌtacsi in, jam tyi jutacsi jụijyaꞌ muꞌin voroꞌtacsity in? Muꞌindye p̂eyacsiꞌ mọꞌ sánacdyeꞌ yiꞌ: "Där maꞌjodyeꞌtum tiĉunac in muꞌin tuiꞌtyiꞌ in jämꞌsiꞌ p̂eyacdyeꞌ Jenꞌsiꞌ muꞌ", yiꞌ.
16Muꞌin qui namꞌ jam räj chiqueꞌ muꞌin in mọꞌ jämꞌsiꞌ p̂eyacdyeꞌ Jenꞌsiꞌ muꞌ. Mọꞌdye p̂eyeꞌ muꞌ Isaías yi muꞌ jiquej: "Tsuntyiꞌ Ayoꞌ, ¿tyidyemꞌ raꞌ anicjeꞌ in ọij p̂eyacdyeꞌ mi, mọꞌ voroꞌtacsis tsun?" yiꞌ sánacdyeꞌ. 17Mọꞌdyes jemoñeꞌ tashcheꞌ chum raꞌ seꞌvejaꞌ mọꞌ p̂eyacdyeꞌ p̂eijtes muꞌ Cristo, chat q̂uinꞌdyemꞌ raꞌ tupuj anicjejaꞌ.
18Yụ raꞌ jéyac: ¿Judío in areꞌ jambiꞌ seꞌveꞌ in mọꞌ Jenꞌsiꞌ p̂eyacdyeꞌ muꞌ? Aty tsanꞌ seꞌve in. Cạ̈tsiꞌ mọꞌ sánacdyeꞌ yiꞌ:
"Paiꞌ voroꞌtacsi in,
yóquiꞌvedyemꞌ ọij jac o,
meꞌquiꞌ buꞌyi seꞌvacsebi p̂eyacdyeꞌ in", yiꞌ sánacdyeꞌ.
19Quivij yụ raꞌ jéyac: Muꞌin Israeltyiꞌ vóshiꞌ in ¿jam buty chiqueꞌ jiquej in junꞌ chuc mọꞌ Jenꞌsiꞌ p̂eyacdyeꞌ muꞌ, jedyeꞌ buty cạiꞌ mọꞌ p̂eyacdyeꞌ seꞌves in? Chịj tsanꞌ in. Mọꞌdye p̂eyeꞌ Moiséssiꞌ sánacdyeꞌ muꞌ, yi muꞌ Jenꞌ:
"Yụ raꞌ tsimꞌtacsi yoctyiꞌdye muntyiꞌ in jam yụty tsimꞌtactyiꞌ jiquej in,
meꞌ tsanꞌ jam dyijtuctyiꞌ yụty in,
muꞌin raꞌ ñịbeꞌjeyacsi yụ,
paj qui muꞌin tsimꞌtactyiꞌ yụ in,
paj qui muꞌin jiꞌyoquiti ĉojtyiꞌĉan muꞌin,
paj qui dyijtubudyiĉaꞌ yụ miꞌin", yi muꞌ Jenꞌ.
20Isaías jiquej jam damꞌ quijnacdyeꞌtum p̂eyepte jiquej ọij Jenꞌsiꞌ p̂eyacdyeꞌ muꞌ, p̂eyacsiyaꞌ muꞌin jam judío in, yi muꞌ:
Meꞌ tsanꞌ jam quivin yụ in muꞌin jam judío in,
daquin qui namꞌ yụ in,
meꞌ tsanꞌ jam cudyiti yụ́cheꞌ in,
yụ qui namꞌ jiꞌnaijti muꞌinyaꞌ in", yi muꞌ Jenꞌ.
21Isaías chimeꞌdye p̂eyacsi muꞌin judío in, yi: "Dyutsetsenꞌ mạyedyeꞌ fayacsi tsanꞌ yụ muꞌin in, muꞌin qui namꞌ tyucjeꞌ chun in fáquintyiꞌ yụ in, jam méquiꞌ chäquin yụ in", yi muꞌ Jenꞌ.
നിലവിൽ തിരഞ്ഞെടുത്തിരിക്കുന്നു:
Romaĉantyidyes 10: CAS
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright 2017 Nuevo Testamento en Chimane
Jen'si' P̂eyacdye'
