Uñedye' 19
19
Pablo Efesoĉan
1Muꞌ na Apolos taĉan muꞌ Corintoĉan muꞌ na Pablo majmichemꞌ jeꞌ sapaꞌjemcacsi miquiꞌmuntyiꞌ mụcuꞌ in shupquequi Efesoĉan. Muꞌĉan pạrej dạcacsi anicjetety Jesucristo in, 2jéyacsi:
—¿Tŝúnac caꞌ Jenꞌsiꞌ Ạꞌedyeꞌ muꞌ, yoquiꞌdyemꞌ anicjetinteyaꞌ Jenꞌ?
Vorjete in:
—Jam chịj tsun mijam seꞌveꞌ tsun vátyequej raꞌ mọꞌyamꞌ, vátyequej raꞌ itŝimꞌ —jéte in.
3Vorjeyacsi Pablo:
—¿Jedyeꞌ buty cạiꞌ mọꞌ jiꞌchojtacdyeꞌ miꞌin? —jéyacsi.
Vorjete in:
—Juansiꞌ jiꞌchäyitidyeꞌ muꞌ cäc̣häꞌchupte tsun meꞌdyes qui meꞌ jiꞌchojti tsun —jéte in muꞌ Pablo.
4Pablo qui jéyacsi:
—Juan jiquej chojtacsi muntyiꞌ in, mọꞌ jịꞌĉocdyes dyijyedyes juchajcheꞌ muꞌin, judyeyaꞌ jéyacsi chimeꞌ paj qui anicjete in muꞌ atsijtyiꞌ raꞌ muntyiꞌ, muꞌdye Jesús —jéyacsi Pablo.
5Aty mọꞌ seꞌvepte p̂eyacdyeꞌ Pablos in, chat qui jiꞌchojti in Jesússiꞌcheꞌ tịj muꞌ, Ayos tsun. 6Pablo muꞌincheꞌ yụꞌtaqui un muꞌ q̂uinꞌdyemꞌ tŝọcsiꞌ Jenꞌsiꞌ Ạꞌedyemꞌ. Tiyacchuiꞌ yoctyisĉan p̂eyacdyeꞌ p̂eyaqui in, judyeyaꞌ voroꞌtacsi p̂eyacdyeꞌ in soꞌmacsis Jenꞌ. 7Räjtum uts in araj jeñej yiriꞌtac päräꞌ jiyi rụiꞌcuꞌ in. 8Pablo voroꞌtacsi vajmuꞌyaijĉan judío in, chibin ịvaj jịꞌchiyacsi muꞌĉan. Jam noiꞌyedyeꞌtum jéyacsi, voroꞌti muꞌtum in mạꞌjeꞌ tsanꞌ jụj jaꞌyacsi mọꞌ p̂eyacdyeꞌyaꞌ Jenꞌsiꞌ muꞌ, p̂eyes ayoꞌbuꞌyidyeꞌ Jenꞌsiꞌ muꞌ. 9Muꞌyaꞌ qui namꞌ pạrej yäcäjjetyetety ĉojtyiꞌ in, jam mạꞌjeꞌ anicyi in, muntyisyaꞌ vej in ñiñepte in Jesússiꞌ majmi muꞌ. Meꞌdyes qui muꞌ Pablo yacchucsi, farajjeyacsebi vajmuꞌyadyeꞌ muꞌin, yocve qui jịjcaij muꞌ, cạcsi anicjetety Jesucristo in. Tiranosĉan qui acaꞌ jịꞌchiyacsi därsiꞌĉan vavdyeꞌ acas mọꞌ, yóĉandyemꞌ jiꞌchäyitidyeꞌ u muꞌin. Muꞌĉan qui muꞌ Pablo räjĉan mạyedyeꞌ jịꞌchiyacsi Jenꞌsiꞌ p̂eyacdyeꞌ muꞌ. 10Pablo voroꞌtacsi muꞌĉan päräꞌ yómodyeꞌ, mọꞌdyes qui muꞌin Asiaĉan bäꞌyity in räj seꞌvepte in Ayoꞌsiꞌ p̂eyacdyeꞌ muꞌ, judío in judyeyaꞌ jam judío in. 11Jenꞌ jasoꞌmiti ferdyeꞌ muꞌ Pablo paj qui tupuj meꞌ jịꞌcaveyacsi muntyiꞌ in, anicsis ferdyeꞌ jịꞌcaveyacsi. 12Chimeꞌdye pạrej quịꞌsiꞌ tocoꞌjepte in muꞌ Pabloty muꞌ, cạbibajte qui in, chat qui ĉọcsequi areꞌreijtyiꞌ muntyiꞌ in jiꞌtocoꞌtyeyacsi muꞌ quịꞌsiꞌ in, chat qui muꞌin chäĉän in areꞌreijtyiꞌ in, judyeyaꞌ qui meijyebanꞌ chimeꞌ sọyoꞌ in, tyi chuc sọyoꞌtumtyiꞌ in muꞌinsiꞌ shubanꞌ sọyoꞌ in.
Yävätidyeꞌyity ạvaꞌ Escevaty
13Muꞌyaꞌ jiquej pạrej judío in, paiꞌ ĉọcsequi in, ĉụiꞌ meijjetyetacsity sọyoꞌ yuꞌti in. Muꞌin chimeꞌ jiꞌĉujti in meijjetyetacsi sọyoꞌ in Jesússiꞌcheꞌ tịj muꞌ, Ayoꞌ tsun. Jämꞌdyeyaꞌ jéyacsi sọyoꞌ in:
—Yụ jéyac Jesússiꞌcheꞌ tịj muꞌ, muꞌ p̂eijtety Pablo, meijyebadac ọ́ĉan miꞌin muntyiꞌĉansiꞌ —jéyacsi in.
14Chimeꞌdye muꞌin meꞌ yi in Escevaty ạvaꞌ muꞌ. Muꞌ Esceva tashcheꞌ cudyitity Jenꞌcheꞌ, yävätidyeꞌ rụiꞌcuꞌ ạvaꞌ muꞌ. 15Ĉụiꞌ muꞌin Jesússiꞌcheꞌ tịj jéyacsi sọyoꞌ in vatyquej mọꞌ yiris voryiꞌ sọyoꞌ:
—Yụ chị́yete Jesús, chimeꞌdye muꞌ Pablo chị́yeteij, miꞌin na jam yụ chị́yeyac, ¿tyi buty miꞌin? —jéyacsiꞌ mọꞌ sọyoꞌ.
16Meꞌĉandye muꞌ sọyoꞌtumtyiꞌ muntyiꞌ siscajcacsi judyeyaꞌ chucsi räj jiꞌpenacsi. Muyayaj tŝọij in jorojyaꞌ jịjcaij ĉaꞌjoij cädäjmun in judyeyaꞌ räj areꞌreꞌ in, ñịbeꞌtum c̣hoñi in. 17Räj Efesoĉantyiꞌ muntyiꞌ chị́qui in, judío in judyeyaꞌ jam judío in, jämꞌ muꞌin noiꞌyi in, dadamꞌ qui mujuꞌchaꞌ timaꞌquete in muꞌ Jesús Ayoꞌ tsun.
18Chimeꞌdye muꞌin anicjetety Jenꞌ in daiꞌ atsij in p̂eyeꞌ juchaj muꞌin muntyisyaꞌ vej muꞌin. 19Chimeꞌdye yoctyiꞌ atsij in cọcojsiꞌ jiquej in, tuqui quirca in cọcojsiꞌnacdyes muꞌin, jiꞌcoꞌshayaqui in muntyisyaꞌ vej muꞌin. Anic där jiyiꞌ yaꞌiꞌsiꞌ mọꞌin quirca muꞌin, ĉanamꞌ quiꞌtac mir urucyaty querec̣ha, meꞌsiꞌ yaꞌiꞌ räjtumdye mọꞌin in. 20Meꞌ Jenꞌsiꞌyaꞌ ferdyeꞌ muꞌ dadamꞌ mọjoꞌchaꞌ jiꞌtseꞌeꞌ in Jenꞌsiꞌ p̂eyacdyeꞌ muꞌ, paiꞌ seꞌveꞌ in.
21Aty meꞌsiꞌ chat qui dyijyi muꞌ Pablo ĉọcsequi raꞌ muꞌin Macedoniaĉantyiꞌ in judyeyaꞌ Acayaĉantyiꞌ in, chat qui raꞌ muꞌve Jerusalénve jịjcaij muꞌ. Chimeꞌdye dyijyi yi muꞌ: "Aty Jerusalénĉan buꞌyiyaꞌ yụ, jäquiꞌve raꞌ jemoñeꞌ Romaĉan jịjcaij yụ." 22Chat qui muꞌ Pablo jutacsi Timoteo judyeyaꞌ Erasto, nọ́taquity muꞌ, Macedoniaĉan jịjcaij in. Muꞌ na Pablo taĉan chum Efesoĉan Asiaĉansiꞌ bäꞌyedyeꞌ.
Efesoĉantyiꞌ in ñur tyeij fạ́coij in
23Efesoĉantyiꞌ in ñur tyeij in, fạ́coij in, fạ́quepte in Jesússiꞌ majmi muꞌ. 24Yirity muntyiꞌ, Demetrio tịj muꞌ, muꞌ sac jaꞌyacsi muntyiꞌ in. Muꞌ ayoꞌ muꞌin jämꞌtyety jämꞌtacdyeꞌ in, plata jämꞌtyeꞌ in. Mọꞌin jämꞌtacdyeꞌ miquis acaꞌ in jiꞌyetyeꞌ in mọꞌ därsiꞌ acaꞌ Artemisas, jämꞌtacdyeꞌ muntyis muꞌin, meꞌ buꞌyiꞌ jämꞌtyeꞌ in jiꞌmincacdyes muꞌin, meꞌ querec̣haij in mọꞌyaꞌ jämꞌtacdyeꞌyaꞌ muꞌin. 25Meꞌdyes muꞌ Demetrio vajmuꞌyaꞌjeyacsi räj muꞌin carijtyety in mọꞌ jämꞌtacdyeꞌ, räjtumdye muꞌin carijtyety joꞌmes in. Jéyacsi muꞌ Demetrio:
—Chätidyeꞌ, miꞌin chịj ọij carijtacdyeꞌ tsun mọꞌ tsạꞌchusinꞌ tsun. 26Miꞌin aty cạvetinte Pablo, judyeyaꞌ seꞌveptinte p̂eyacdyeꞌ muꞌ, muꞌ yi mọꞌ jämꞌtyes muntyiꞌ in jam nash mọꞌ jenꞌ, jéyacsi muntyiꞌ in. Junanaj ĉụiꞌ jụj jaꞌyacsi muntyiꞌ in, jam Efesoĉantyiꞌ mọmoꞌ in, räj Asiaĉantyiꞌ jụj jaꞌyacsi in. 27Anic tsäquiꞌ buꞌyiꞌ mọꞌ tsundyes, mijam raꞌ méquiꞌ dyijtubusinꞌ in mọꞌ jämꞌtyejas tsun, areꞌĉa farajjeꞌ in aty qui raꞌ jam ĉúti in acaꞌcheꞌ mọꞌsiꞌ Artemisas. Q̂uinꞌ räj Asiaĉantyiꞌ in timaꞌqueꞌ in räj buꞌyiꞌ ọij jac meꞌ, areꞌĉa ac̣hiꞌ buꞌyiꞌ shupquiꞌ, areꞌĉa jam querec̣hayebajshaꞌ tsun —yi muꞌ Demetrio jéyacsi muntyiꞌ in.
28Muꞌin na vajmuꞌyaijtyiꞌ in, seꞌveꞌ mọꞌ p̂eyacdyeꞌ in, anic fuch tyeij in, uyaꞌquiꞌ äjyi in, yi in:
—Timaꞌquejaꞌ mọꞌ Artemisa, mọꞌcheꞌ nash ĉútiĉaꞌcheꞌ tsun Efesoĉantyiꞌ tsun —yi in.
29Räräꞌejoij äjnaqui in räj buꞌyi muꞌĉantyiꞌ in. Muꞌyaꞌ chimeꞌ päräꞌ penꞌdyeꞌ muꞌ Pablotyiꞌ, Macedoniaĉantyiꞌ muꞌin muntyiꞌ in, Gayo judyeyaꞌ Aristarco tịj muꞌin. Muꞌin fạ́coijtyiꞌ muntyiꞌ in ĉọcsequi in, tapyejoij in cạcsi in muꞌĉan tsudyujñitiĉan in. 30Mạꞌjeꞌ tsanꞌ muꞌ cäc̣henꞌyejoij Pablo sitacsi muꞌĉan, mạꞌjeꞌ p̂eyeyacsi muntyiꞌ in, muꞌin na anicjetety Jenꞌ in ñucjeĉunꞌte in. 31Chimeꞌdye pạrej muꞌĉantyiꞌ ayoꞌ in penꞌdyeꞌ muꞌ Pabloty, muꞌin juteyete p̂eyacdyeꞌ in, yiꞌ paj qui jam sitacsi. 32Muꞌin na tsudyujñitity in yejĉoij äjnaqui in fer p̂eyaqui in, paiꞌ paiꞌ p̂eyaqui in, yocsiꞌ yocsiꞌ p̂eyacdyeꞌ jiꞌjäqueꞌ in, yoctyiꞌ na yocsiꞌ jedyeꞌ jiꞌjäqueꞌ in, jam cäts dyijyedyeꞌ muꞌin, araj räj in mijam chịj in jedyedyes chuc vajmuꞌyaij in. 33Muꞌin na judío in jéte in muꞌ Alejandro jedyeꞌveiꞌ chuc vajmuꞌyadyeꞌ muꞌin. Tashcheꞌ muꞌin yụꞌte in paj qui tsanꞌ p̂eyacdyeꞌyaꞌ ñutsjetacsi judío in. Cheꞌjeyaqui tsanꞌ un muꞌ paj qui c̣huꞌc̣huijve in. 34Muꞌin na muntyiꞌ in aty chị́yete in judío muꞌ, mọꞌdyes qui jam junꞌ seꞌvaqui in, yejĉoij mọmoꞌ äjnaqui in fer p̂eyaqui yi in:
—Timaꞌquejaꞌ Artemisa, mọꞌcheꞌ nash ĉútiĉaꞌcheꞌ tsun Efesoĉantyiꞌ tsun —yi in.
Mijam yacchuiꞌ in mọꞌ äjnacdyeꞌ muꞌin, päräꞌ hora meꞌquiꞌ yi p̂eyaqui in.
35Muꞌ nọ́taquity muꞌin bäꞌyedyeꞌĉantyiꞌ ayoꞌ in, muꞌ qui chäjämꞌ tyäpäꞌteyacsi muntyiꞌ in, chat qui muꞌ jéyacsi:
—Seꞌvitiĉamꞌ yụ Efesoĉantyiꞌ miꞌin. Räj muntyiꞌ chịj in junꞌ chuc tsun Efesoĉantyiꞌ tsun ĉọjcabijaꞌtyiꞌ acaꞌ mọꞌsiꞌ Artemisas, mọꞌcheꞌ ĉútiĉascheꞌ tsun, judyeyaꞌ tsun chimeꞌ ĉọjcaja muꞌ mij, jọꞌchaijtyiꞌ mạyedyeꞌchety jiquej, muꞌ aꞌ buꞌyi Artemisaty. 36Jam tyi tupuj jumjebiꞌ ọijsiꞌ p̂eyacdyeꞌ mọꞌ. Jemoñeꞌ camꞌ miꞌin, jam raꞌ fibiꞌyi miꞌin. 37Anic fibimꞌ tucsi miꞌin uts muntyiꞌ in, itŝiꞌ juchaj muꞌin, mijam ac̣hiꞌtyeꞌ in jämꞌtacdyes acaꞌ mọꞌ, mijam aꞌc̣his p̂eyacdyeꞌ muꞌin jiꞌshupqueyeꞌ in Artemisa ĉútiĉaꞌcheꞌ tsun. 38Uts na Demetrio yojtumdyemꞌ carijtaquity u in, mọꞌyaꞌ jụijyaꞌ jiꞌmeꞌtacdyeꞌ muꞌin, aty mọꞌ mạyedyeꞌ carijtacdyedyes tupuj jiꞌmeꞌtac ayoꞌyaꞌ in. 39Mọꞌyaꞌ yocsiꞌ jedyeꞌ mạꞌjeꞌ yi miꞌin, jemoñeꞌ bistiñeꞌ tsudyujñitidyeꞌ muntyis in. 40Anic aꞌc̣his dyijyedyeꞌ mụiꞌ miꞌin, fibiꞌ mọmoꞌ äjnaqui miꞌin. Areꞌĉa tsäquiꞌ jiꞌmeꞌtac tsun Romaĉantyiꞌyaꞌ ayoꞌ. Cudyityisinꞌ p̂eyacdyeꞌ jụijyaꞌ in jedyeꞌveyejaꞌ chuc atsijaꞌ úĉan tsun, mijam tupuj vorjeyacsejaꞌ tsun —jéyacsi muꞌ nọ́taquity ayoty muꞌ.
41Aty meꞌ yíyaꞌ, chat qui jutacseban muntyiꞌ in paj qui jọban in acatuban in.
നിലവിൽ തിരഞ്ഞെടുത്തിരിക്കുന്നു:
Uñedye' 19: CAS
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright 2017 Nuevo Testamento en Chimane
Jen'si' P̂eyacdye'
