Uñedye' 13
13
Bernabé judyeyaꞌ muꞌ Saulo yụꞌtac in cạyacsity p̂eyacdyeꞌ Jenꞌsiꞌ in
1Daiꞌ muꞌĉan Antioquíaĉantyiꞌ anicjetety Jesucristo in. Pạrej muꞌĉantyiꞌdye in jasoꞌmitity p̂eyacdyeꞌ Jenꞌ in judyeyaꞌ jịꞌchiyacsity p̂eyacdyeꞌ chimeꞌ in, tịj muꞌin: Bernabé, judyeyaꞌ Simón, Negro yocsiꞌ tịj muꞌ, judyeyaꞌ Lucio, Cireneĉantyiꞌ muꞌ muntyiꞌ, judyeyaꞌ Saulo, judyeyaꞌ muꞌ Maneán, yiriꞌyaꞌ jiquej p̂añity muꞌtum Herodes Antipas,#13:1 Uts Herodes Antipas uts nash ạvaꞌ muꞌ tashchety Herodes, muꞌ jiꞌujacsity miquiꞌmuntyiꞌ in. Galileaĉantyiꞌ ayoꞌ, meꞌ meꞌ muꞌin jịꞌchiyacsity in. 2Yirisĉan mạyedyeꞌ muꞌin timaꞌquevaꞌte Jenꞌ in, yịñijdyeꞌtum in Jenꞌsiꞌyaꞌ vej muꞌ. Vatyquej jéyacsiꞌ Jenꞌsiꞌ Ạꞌedyeꞌ muꞌ, yiꞌ:
—Yụꞌtacsejamꞌ miꞌin Bernabé judyeyaꞌ Saulo, yụ́dyety raꞌ úñity in, ĉaĉaij na yụ aty meꞌ tsimꞌtacsiꞌ —yiꞌ.
3Mọꞌdyes qui muꞌin chum cọdaqui Jenꞌcheꞌ in yịñijdyeꞌtum in muꞌsiꞌyaꞌ vej, chat qui yụꞌtaqui un in Bernabécheꞌ judyeyaꞌ Saulocheꞌ, chat qui jutacsi in cạyacsi Jenꞌsiꞌ p̂eyacdyeꞌ in.
Voroꞌtacsi in Chipreĉan
4Meꞌdye sacjeꞌ in Bernabé judyeyaꞌ muꞌ Saulo, Jenꞌsiꞌ Ạꞌedyeꞌ jutacsiꞌ, Seleuciave jịjcaij in. Muꞌve p̂aiꞌte in marĉantyiꞌ covamba, Chipreve qui jịjcaij in, marĉansiꞌ poc̣hoꞌ. 5Salaminayaꞌ muꞌyaꞌ sojquiti in, muꞌĉan voroꞌtacsi in Jenꞌsiꞌ p̂eyacdyeꞌ muꞌ junanaj chuc vajmuꞌyaijĉan judío in. Chimeꞌdye muꞌ Juan Marcos cäc̣häꞌ jịjcacsi nọ́tacsi muꞌ.
6Sapaꞌjeꞌ in mọꞌ jac, muvetaque venjoij in, Pafos chaꞌsheꞌ in. Muꞌĉan dạquicte in yirity judío, cọcojsiꞌ buꞌyity muꞌ, Barjesús tịj muꞌ, yocsiꞌ tịj muꞌ Elimas griegosĉan p̂eyacdyeꞌ. Väñätucsity muꞌ, jeñej buꞌyity jasoꞌmitity p̂eyacdyeꞌ Jenꞌ, meꞌ buꞌyi yuꞌti. 7Penꞌdyeꞌ na muꞌ Sergio Paulo tịj muꞌ, muꞌĉantyiꞌdye ayoꞌ. Muꞌ na ayoꞌ anic muꞌ dyijyedyeꞌtumtyiꞌ, mọꞌdyes qui muꞌ jiꞌvorvacsi Bernabé Saulotum, mạꞌjeꞌ seꞌvepte Jenꞌsiꞌ p̂eyacdyeꞌ muꞌ. 8Muꞌ na cọcojsiꞌnaquity muntyiꞌ fạ́quepte Jenꞌsiꞌ p̂eyacdyeꞌ muꞌ, jam muꞌ mạꞌjeꞌ paj qui anicyi Jenꞌcheꞌ muꞌ ayoꞌ. 9Mọꞌ qui Jenꞌsiꞌ Ạꞌedyeꞌ muꞌ játŝuti muꞌ Saulo, Pablo yocsiꞌ tịj muꞌ. Jämꞌtute muꞌ cạvete Elimas fạraꞌjeĉunꞌte jéte:
10—Där ac̣hiꞌc̣hity mi, väväjñity mi, Sọyoty buꞌyi ạvaꞌ mi, anic fạ́queꞌ mi räj rụijsis dyijyedyeꞌ. Camanꞌ buꞌyiꞌ mạꞌjeꞌ yụꞌtyem Jenꞌsiꞌ p̂eyacdyeꞌ muꞌ paj qui väñädyeꞌ buꞌyiꞌ jiꞌshupbitem. ¿Junꞌsiꞌ bu raꞌ farajjem joꞌmes dyijyedyeꞌ aꞌc̣his? 11Q̂uinꞌ chat raꞌ muꞌ Jenꞌ jämꞌsiꞌ vaꞌtacdyeꞌ jiꞌtŝuyin mi, tofej raꞌ jadyiqui mi, mijam raꞌ méquiꞌ nạijbite mi tsunsiꞌ mạijquedyemꞌ —jajiti Pablo.
Meꞌĉandye tomaj tyeiꞌ vej muꞌ, quevte qui muntyiꞌ tyi chuc raꞌ yemeꞌ cạbajte jiꞌmiꞌebajte. 12Muꞌ na ayoꞌ aty mọꞌ cạveꞌ meꞌ buꞌyiꞌ, q̂uinꞌdyem anicjete Jenꞌ, anic där äjjepte Ayoꞌsiꞌ jiꞌchäyitidyeꞌ muꞌ.
Pablo judyeyaꞌ Bernabé Antioquíaĉan in, Pisidiaĉansiꞌ bäꞌyedyeꞌ
13Aty meꞌsiꞌ muꞌ Pablo penꞌdyeꞌtumdye muꞌ yoctyiꞌ marĉantyiꞌ covamba p̂aiꞌte in, muꞌcheꞌ nobi in, nopej mar jịjcaij in. Pergeyaꞌ sojquiti in, Panfiliaĉansiꞌ jac. Muꞌĉan muꞌ Juan Marcos farajjeyacsetaqui, Jerusalénĉan jijtuban caꞌñibun.#13:13 Ọij Antioquía yocsiꞌ bäꞌyedyeꞌ Pisidiaĉan, jam ọ́ves bäꞌyedyeꞌ, yóĉandyemꞌ tiyaccyiꞌ miꞌedyeꞌ in. 14Pablo judyeyaꞌ Bernabé shupqui in Pergeĉantyiꞌ in, yejĉoij miꞌi in Antioquíaĉan venjoij in, Pisidia tịj jacsimꞌ. Chaꞌsheꞌ in mọꞌ mạyedyeꞌ jịꞌjutyitidyes ĉọ́queꞌ in vajmuꞌyaijĉan judío in, siti in bäꞌyi in. 15Muꞌĉantyiꞌ in p̂eyeꞌ in Jenꞌsiꞌ sánacdyeꞌ muꞌ, yụꞌtacdyeꞌĉansiꞌ sánacdyeꞌ p̂eyeꞌ in, judyeyaꞌ muꞌinsiꞌ in jasoꞌmititysiꞌ p̂eyacdyeꞌ Jenꞌ in. Jiꞌmeꞌsiyaqui in, chat qui muꞌĉantyiꞌ ĉọjcaquity in jutete in yirity muꞌĉantyiꞌ paj qui jéyacsi Pablo judyeyaꞌ muꞌ Bernabé, yi muꞌ:
—¿Itŝiꞌ p̂eyacdyeꞌ u miꞌin jiꞌmaꞌyacsis chätidyeꞌ tsun? Mọꞌyaꞌ jụijyaꞌ p̂eyacdyeꞌ tutiñeꞌ, paj qui voroꞌyi miꞌin jítiĉaꞌ q̂uinꞌdye miꞌin —jéyacsi.
16Sacyi muꞌ Pablo, cheꞌjeyaqui un muꞌ paj qui c̣huꞌc̣huijve in. Yi jéyacsi:
—Chätidyeꞌ, Israeltyiꞌ vóshiꞌ miꞌin, judyeyaꞌ yoctyiꞌ muntyiꞌ chimeꞌ miꞌin irijyity Jenꞌcheꞌ miꞌin, seꞌvaĉamꞌ miꞌin. 17Tsuntyiꞌ Jenꞌ Israeltyiꞌ vóshiꞌ tsun, muꞌdye tsimꞌtacsi vóshiꞌvun tsun jiquej, judyeyaꞌ jiꞌdayacsi muꞌin in, muꞌĉan shashdyi in yoctyisĉan bäꞌyedyeꞌ Egiptoĉan. Aty meꞌsiꞌ därsiꞌyaꞌ ferdyeꞌ muꞌ Jenꞌ jiꞌshupcacsi Egiptoĉantyiꞌ in. 18Cäjyasĉan qui jac bäꞌyi in, vạjpedyeꞌ quiꞌtac yómodyeꞌ muꞌĉan dyichjeyacsebi aꞌc̣his dyijyedyeꞌ muꞌin. 19Tasjeyacsi jịꞌmotsacsi Canaánĉantyiꞌ muntyiꞌ in, yävätidyeꞌ ñuruꞌ jịꞌmotsacsi in. Soꞌmacseban jac vóshiꞌvunsiꞌ tsun muꞌĉan qui bäꞌban in. 20Anic daiꞌ yómodyeꞌ vóshiꞌvun tsun jiquej, vạjpedyeꞌ quiꞌ cien ĉanamꞌ quiꞌtac yómodyeꞌ junꞌ quiꞌ chuc aty Canaánĉan jämꞌ bäꞌyi in, chat qui muꞌ Jenꞌ q̂uinꞌdyemꞌ yụꞌtyeyacsi jịꞌcäts yụꞌtacsity muntyiꞌ in, muꞌin qui ayoꞌbuꞌyi in.
Cächquejĉoij muꞌin in junꞌ quiꞌ chuc naꞌi muꞌ Samuel, muꞌ chimeꞌ jasoꞌmitity p̂eyacdyeꞌ Jenꞌ. 21Aty meꞌsiꞌ muꞌin muntyiꞌ in cọdyete in muꞌ Samuel paj qui muꞌ yụꞌtyeyacsi yirity anictyity ayoꞌ jacchety, meꞌ cọdyete in. Jụjyi muꞌ Jenꞌ, meꞌdye jayuꞌti Saúl, Cistyiꞌ ạvaꞌ muꞌ, Benjamíntyiꞌ vóshiꞌ muꞌ. Vạjpedyeꞌ quiꞌtac yómodyeꞌ meꞌquiꞌ ayoꞌbuꞌyi muꞌ Saúl. 22Aty meꞌsiꞌ jajiꞌshupjun Jenꞌ muꞌ Saúl, David qui muꞌ jayuꞌti muꞌ qui ayoꞌbuꞌyi muꞌindyes in. Jamaꞌjotyiti muꞌ Jenꞌ yi jap̂iijti: "Uts David, Isaítyiꞌ ạvaꞌ muꞌ, cạvete yụ anic maꞌjotyete yụ, muꞌ raꞌ chäquibun yụ räj dyijyedyeꞌ yụ", yi Jenꞌ. 23Chimeꞌdye muꞌ Jesús vóshiꞌ muꞌ Davidtyiꞌ, muꞌ Jenꞌ jayuꞌti paj qui muꞌ jiꞌc̣honacsi Israeltyiꞌ vóshiꞌ in. Jesúsyaꞌ muꞌ Jenꞌ jịꞌcätsaqui p̂eyacdyeꞌ muꞌ yụꞌtyeyacsis jiquej. 24Jambiꞌdyemꞌ tiyacchuiꞌ voroꞌtacsi muꞌ Jesús, tashcheꞌ muꞌ Juan atsij, voroꞌtacsi muꞌ räj Israeltyiꞌ vóshiꞌ in, jéyacsi muꞌ: "Dyijyevac juchajcheꞌ miꞌin judyeyaꞌ jiꞌchojtiĉamꞌ." 25Aty c̣hẹiꞌyaiꞌ tupudyeꞌ muꞌ Juansiꞌ sänꞌdyes raꞌ muꞌ, yi jéyacsi: "Yụ jam Jiꞌc̣honacsity Muntyiꞌ, jam meꞌ yojdyemꞌ ĉútiĉaꞌ yụ miꞌin, jábiyaꞌdye raꞌ atsij muꞌ. Anic mujuꞌchaty muꞌ, uyaꞌyaꞌ yụ, mijam yụ tupuj c̣hacjepte yujches coꞌsis muꞌ", yi jiquej muꞌ Juan —jéyacsi muꞌ Pablo —.
26Chätidyeꞌ, Abrahamtyiꞌ vóshiꞌ miꞌin judyeyaꞌ yoctyiꞌ muntyiꞌ chimeꞌ miꞌin irijyity Jenꞌcheꞌ miꞌin, seꞌvaĉamꞌ. Miꞌindyes chimeꞌ ọij jiꞌc̣honacsis p̂eyacdyeꞌ. 27Muꞌin na Jerusalénĉantyiꞌ muntyiꞌ in ayoꞌtumdye muꞌin mijam méquiꞌ chị́yete muꞌin in, muꞌ nash Jesús Jiꞌc̣honacsity Muntyiꞌ, mijam méquiꞌ chiqueꞌ in mọꞌ sánacdyeꞌ jasoꞌmititysiꞌ p̂eyacdyeꞌ Jenꞌ jiquej in. Meꞌ tsanꞌ räjĉan mạyedyeꞌ jịꞌjutyitidyesĉan in p̂eyeꞌ in mọꞌ sánacdyeꞌ, jam qui namꞌ chiqueꞌ in mọꞌ p̂eyeꞌsiꞌ in, jätäjyiꞌ raꞌ mọꞌ. Mọꞌdyemꞌ sánacdyeꞌ jịꞌcätseꞌ in aty jiꞌijateyaꞌ in Jesús. 28Meꞌ tsanꞌ jam dạcbite sänꞌdyedyes juchaj in cọdyete qui namꞌ in muꞌ Pilato paj qui muꞌ sänꞌdyeꞌ soꞌmete. 29Meꞌdye jịꞌñibeꞌcate in ijate in, meꞌdye räj jịꞌcätseꞌ Jenꞌsiꞌ sánacdyeꞌ muꞌ p̂eijtes muꞌ Jesús. Aty jiꞌmeꞌsiyaqui chat jịꞌchabajte croshchety in judyeyaꞌ qui nạ́te in. 30Jenꞌ qui namꞌ muꞌ jajiꞌtsaꞌibun, 31daiꞌ mạyedyeꞌ bäꞌyetaqui úcheꞌ jaccheꞌ judyeyaꞌ jiꞌcaviti muꞌinyaꞌ in cäc̣häꞌchutetyyaꞌ in, muꞌin jịjcatety in muꞌ Jesús yạjquiꞌyaꞌ jiquej in mọꞌ Galilea, muꞌtum in Jerusalénĉan qui jịjcaij in. Muꞌin cạvete in judyeyaꞌ jịꞌchiqueyacsity muntyiꞌ in p̂eijte in muꞌ Jesús.
32Mọꞌdyes atsij tsun úyaꞌ, jämꞌsiꞌ p̂eyacdyeꞌ tuiꞌ tsun miꞌindyes, ĉaĉaij na mọꞌ p̂eyacdyeꞌ Jenꞌ yụꞌtyeyacsis vóshiꞌvun tsun jiquej, p̂eijtes muꞌ Jiꞌc̣honacsity Muntyiꞌ. 33Mọꞌdye p̂eyacdyeꞌ jịꞌcätseꞌ muꞌ Jenꞌ tsundyes q̂uinꞌ, ĉaĉaij na muꞌ jajiꞌtsaꞌibun Jesús. Muꞌdye p̂eijte mọꞌ sánacdyeꞌ Salmosĉansiꞌ päräꞌ, mọꞌ yiꞌ:
"Mi nash Ạvaꞌ yụ,
q̂uinꞌ aty jịꞌtsaꞌebadyeye mi."
34Chimeꞌdye sánacdyeꞌĉan muꞌ yi junꞌ chuc muꞌ raꞌ jajiꞌtsaꞌibun muꞌ Jesús, mijam raꞌ cuvij sänjan mijam raꞌ focoiꞌ aꞌ muꞌ. Yi sánacdyeꞌĉan muꞌ:
"Yụ raꞌ jịꞌcätseꞌ miꞌindyes mọꞌ jämꞌsiꞌ p̂eyacdyeꞌ ĉụiꞌsiꞌ yụ,
mọꞌ yụꞌtyeyetes jiquej yụ David,
miꞌindyes raꞌ cạ̈tsiꞌ mọꞌ."
35Yocsiꞌ sánacdyeꞌ yiꞌ:
"Mi raꞌ jam junꞌ farajjibutiꞌ mi aꞌ yụ paj jam focoiꞌ,
ĉaĉaij nash yụ jutactyiꞌ ĉụiꞌtyiꞌ mi,
tsimꞌtactyiꞌ mi", yiꞌ mọꞌ sánacdyeꞌ.
36Chätidyeꞌ, ọij sánacdyeꞌ jam David p̂eijte. Tsạꞌdyemꞌ jiquej muꞌ chiquete Jenꞌ, jäquiꞌve qui namꞌ muꞌ säñi, nạ́te in vóshiꞌvuntum muꞌ, muꞌsiꞌ qui namꞌ aꞌ muꞌ räj focoiꞌ, meij mọmoꞌ jịjcaiꞌ muꞌ. 37Muꞌ na jajiꞌtsaꞌibuntyiꞌ Jenꞌ jam muꞌ meꞌ, jam mus focoiꞌ aꞌ muꞌ. 38Chätidyeꞌ, jemoñeꞌ miꞌin räj chị́yetiñeꞌ jämꞌ ọij p̂eyacdyeꞌ, junꞌ chuc muꞌ Jenꞌ vayacjibunac raꞌ juchaj miꞌin Jesúsyaꞌ, anicjetinte jụijyaꞌ miꞌin. 39Meꞌ tsanꞌ mọꞌ yụꞌtacdyeꞌ Jenꞌsiꞌ jasoꞌmitis Moisés jiquej, mọꞌ jam tupuj jiꞌc̣honsinꞌ juchajyaꞌ tsun, Jesús qui namꞌ tupuj jiꞌc̣honacsi jụꞌñity chuc anicjetety in. 40Areꞌĉa miꞌincheꞌ tŝọiꞌ junꞌ chuc yiꞌ ọij sánacdyeꞌ jasoꞌmititysiꞌ p̂eyacdyeꞌ Jenꞌ jiquej in, yiꞌ:
41"Miꞌin äcäijjebitintety Jenꞌsiꞌ p̂eyacdyeꞌ muꞌ,
jämꞌ seꞌvevac q̂uinꞌ miꞌin.
Äjyi raꞌ miꞌin säñi miꞌin,
yụ raꞌ jịꞌcaveyeyac därsiꞌ tsäquiꞌsis,
meꞌ raꞌ tsanꞌ chap jínac in mijam raꞌ tupuj anicyi miꞌin,
tsạꞌdyemꞌ miꞌin q̂uinꞌ yụ raꞌ meꞌjeyac", yiꞌ sánacdyeꞌ.
Jämꞌ raꞌ dyijyi miꞌin paj qui jam meꞌ miꞌin —jéyacsi Pablo.
42Pablo judyeyaꞌ muꞌ Bernabé aty raꞌ shupjan in vajmuꞌyaijĉan judío in, chat qui muꞌin muntyiꞌ in jam judío in cọdacsi in paj qui quivij caꞌñibun in yocsiꞌ mạyedyeꞌ jịꞌjutyitidyesĉan, paj qui chịmoꞌdye jiꞌseꞌveyacseban in. 43Aty jiꞌmeꞌsiyaqui tsudyujñitidyeꞌ in, daiꞌ judío in judyeyaꞌ yoctyiꞌ chimeꞌ muntyiꞌ in jụjjeyacsebity in judíos jiꞌchäyitidyeꞌ muꞌin, damꞌ mọmoꞌ cäc̣häꞌchucsi in muꞌ Pablo judyeyaꞌ muꞌ Bernabé. Muꞌin jéyacsi in: "Räjĉan raꞌ cäc̣häꞌchutinte Jenꞌ, muꞌ ñịbeꞌjisinꞌtyiꞌ tsun", jéyacsi in.
44Cuvij chaꞌshebanꞌ in mọꞌ mạyedyeꞌ jịꞌjutyitidyes, arajdye tas muꞌin bäꞌyedyeꞌĉantyiꞌ muntyiꞌ in tsudyujñiti in, mạꞌjeꞌ seꞌvepte Ayoꞌsiꞌ p̂eyacdyeꞌ in. 45Muꞌin na judíoty ayoꞌ muꞌin, aty meꞌ cạvacsi in daiꞌ muntyiꞌ seꞌvete in muꞌ Pablo, mọꞌjete jịꞌfajqueyete in. Vorjiti muꞌtum in ñiñete in. 46Muꞌ na Pablo judyeyaꞌ Bernabé mijam muꞌin quijnacsi in, jéyacsi mọmoꞌ in:
—Tupuj tsanꞌ tsun tashcheꞌ jéyac judío miꞌin Jenꞌsiꞌ p̂eyacdyeꞌ muꞌ. Miꞌin na ĉụiꞌ vaꞌquecbitinte p̂eyacdyeꞌ muꞌ, mijam mạꞌjeꞌ Jenꞌyadyety miꞌin. Q̂uinꞌ raꞌ chat tsun farajjeyac miꞌin, muꞌin qui raꞌ jam judío in voroꞌtacsi tsun. 47Meꞌ raꞌ ĉaĉaij na jịꞌcätsepte tsun Jenꞌsiꞌ p̂eyacdyeꞌ soꞌminsiꞌ tsun, meꞌ yiꞌ sánacdyeꞌ muꞌ:
"Yụ yụꞌtyeye paj qui mạijchucsebim ĉojtyiꞌ muꞌin jam judío in,
cạyacsi ram jiꞌc̣honacdyedyes p̂eyacdyeꞌ,
voroꞌtacsi ram räj paiꞌtyity úchety in,
meꞌ tsanꞌ dyụ́tsedyeꞌvety in", yiꞌ sánacdyeꞌ —jéyacsi Pablo.
48Muꞌin na jam judío in aty seꞌvepte p̂eyacdyeꞌ in, maꞌjotyepte in Ayoꞌsiꞌ p̂eyacdyeꞌ muꞌ, judyeyaꞌ anicjete Ayoꞌ in, jụꞌñity chuc tsimꞌtactyiꞌ in, muꞌin raꞌ Jenꞌyadyety in. 49Meꞌdye paiꞌ bäꞌyedyeꞌ bäꞌyity in yejĉoij jiꞌtseꞌepte in Ayoꞌsiꞌ p̂eyacdyeꞌ muꞌ. 50Muꞌin na judío in yocve muꞌin dyijyi in, sac jaꞌyacsi muꞌĉantyiꞌ fer buꞌyity muntyiꞌ in judyeyaꞌ mọꞌin jedyeꞌtumsiꞌ p̂en in dyijyis tsanꞌ Jenꞌcheꞌ in, muꞌin judío yi in paj qui fạ́cacsi in muꞌ Pablo judyeyaꞌ Bernabé. Tiyacchuiꞌ jịꞌñibeꞌcacsi in jiꞌcavꞌcacsi in. 51Muꞌ na Pablo Bernabétum chischisjeyactaqui in yujches jac muꞌin, mọꞌ muꞌinsiꞌ jịꞌĉocdyes muꞌin vaꞌcac bäꞌyi muꞌĉantyiꞌ in. Iconioĉan qui roiꞌjeꞌ in. 52Muꞌin na Antioquíaĉantyiꞌ anicjetety Jesucristo in jämꞌ muꞌin maꞌjoij in, Jenꞌsiꞌtum Ạꞌedyeꞌ bäꞌyi in.
നിലവിൽ തിരഞ്ഞെടുത്തിരിക്കുന്നു:
Uñedye' 13: CAS
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright 2017 Nuevo Testamento en Chimane
Jen'si' P̂eyacdye'
