Uñedye' 11
11
Pedro jịꞌchiqueyacsi muꞌin Jerusalénĉantyiꞌ anicjetety Jesucristo in
1Muꞌin qui in Jenꞌtyiꞌ jutactyiꞌ muꞌ, räjtumdye Judeaĉantyiꞌ anicjetety Jesucristo in chị́qui in muꞌin jam judío in aty muꞌin jụjyaque Jenꞌcheꞌ in. 2Pedro Jerusalénĉan jịjcaij. Aty venjoij muꞌĉan, muꞌin judío anicjetety Jesucristo in fạraꞌjeĉunꞌte in. 3Pedro jéte in:
—¿Junꞌ dash cạ̈näꞌnacsim muꞌin jam judío in? ¿Junꞌ dash jebetacsim chimeꞌ mi? —jéte in.
4Chat qui muꞌ Pedro räj jéyacsi junꞌ chuc cạ̈näꞌnacsi muꞌ, jéyacsi:
5—Jopeĉan nash yụ cọdaqui Jenꞌcheꞌ, muꞌ qui Jenꞌ jiꞌcaviyin yụ yiris jịꞌcavacdyeꞌ. Cạveꞌ vatyquej yụ yiris jedyeꞌ jịꞌĉojtuyeꞌ yụ mạyedyeꞌches jijtuij, jeñej buꞌyi yirity tyäꞌväty, sababa buꞌyi quipdyivevej, joꞌmety chạij yụ́yaꞌ tŝọij. 6Anic jämꞌ cạvi yụ, mọꞌĉan yoc yoc jebacdyeꞌ ayij in, vajru vajedyedyeꞌ in judyeyaꞌ jaijtyiꞌ chimeꞌ in. 7Chat qui yiris seꞌve p̂eyacdyeꞌ yụ, jin yụ: "Tạij mi Pedro, ujacseva mọꞌin in, chat qui raꞌ jebacsim", jin yụ. 8Yụ qui vorjete: "Jam raꞌ yụ junꞌ meꞌ Ayoꞌ, jam yụ jämꞌdyeyaꞌ jebeiꞌ joꞌmes jam jebacsis tsun judío tsun", yi yụ. 9Quivij seꞌveꞌ yụ p̂eyacdyeꞌ yiꞌ jin yụ: "Jam raꞌ äcäijjeyacsim jebacdyeꞌ mi, a nash yi Jenꞌ paj qui tupuj jebacsi miꞌin", yi jin yụ. 10Chibin quimꞌ jiꞌcaviyin yụ, chat qui cạc juban mạyedyeꞌcheꞌ jịjcaban.
11Ĉụiꞌdye vátyequej shupqueti in chibin Cesareaĉantyiꞌ muntyiꞌ in, jutactyiꞌ Cornelioty paj qui yụ́yaꞌ atsij in, acaꞌĉan venchuij in. 12Jenꞌsiꞌ Ạꞌedyeꞌ jin yụ paj qui jịjcacsi yụ: "Mijam raꞌ yocve dyijyi mi", jin yụ. Cesareaĉan qui roiꞌjeꞌ yụ, penꞌdyetucsi yụ uts in jäbäntyity rụiꞌcuꞌ in anicjetety Jesucristo chimeꞌ in. Venjoij muꞌĉan tsun, chụiꞌ buꞌyi siti tsun Corneliosĉan acaꞌ muꞌ. 13Jin muꞌ tsun junꞌ chuc muꞌ cạvete yirity anjer rụiꞌcujcuij acaꞌĉan muꞌ, jajiti ca: "Jutacseva muntyiꞌ in paj qui Jopeve jịjcaij in, paj jäcte in muꞌ Simón, Pedro yocsiꞌ tịj muꞌ. 14Muꞌ raꞌ jin mi junꞌ buꞌyi chuc raꞌ tupuj c̣hoñi mi räjtumdye chätidyeꞌ mi", yi ca muꞌ anjer jajiti Cornelio. 15Tiyacchuiꞌ yụ voroꞌtacsi acaꞌĉantyiꞌ in, jịꞌtŝocsiꞌ vatyquej Jenꞌsiꞌ Ạꞌedyeꞌ muꞌ, yojdyemꞌ tsun tashcheꞌ jiquej u jiꞌtŝusinꞌ judío tsun jiquej. 16Yụ qui dyijtupte Ayos p̂eyacdyeꞌ muꞌ, yi muꞌ: "Juan ojñiꞌyaꞌ chojtyinac miꞌin, q̂uinꞌ raꞌ chat jiꞌtŝunac Jenꞌsiꞌ Ạꞌedyeꞌ muꞌ", yi muꞌ. 17Anic jorojĉanjisinꞌ Jenꞌ soꞌmacsi Ạꞌedyeꞌ muꞌ muꞌin jam judío in, yojdyemꞌ soꞌmisinꞌ tsun jiquej u, yoquiꞌdyemꞌ anicjejayaꞌ Jesucristo u. Mọꞌdyes yụ jam junꞌ dyäcjeĉunꞌbite Jenꞌsiꞌ dyijyedyeꞌ muꞌ —yi muꞌ Pedro jéyacsi.
18Seꞌveptemꞌ p̂eyacdyeꞌ in muꞌin Jerusalénĉantyiꞌ anicjetety Jesucristo in, tyäpäꞌ tyeij muꞌin in, aty jam jätäjyeban quivij in. Timaꞌquete quimꞌ Jenꞌ in, yi in:
—Jaij meꞌ, muꞌ Jenꞌ soꞌmacsi muꞌin jam judío in paj qui muꞌin chimeꞌ dyijyi juchajcheꞌ in paj qui räjĉan Jenꞌyaꞌ bäꞌyi in —yi in.
Anicjetety Jenꞌ in Antioquíaĉantyiꞌ in
19Aty ijateyaꞌ in muꞌ Esteban chat tiyacchuiꞌ jịꞌñibeꞌcacsi in muꞌin anicjetety Jesucristo in. Meꞌdyes qui ĉaꞌjoij in, yạjquiꞌ in Jerusalén, paiꞌ junanaj ĉụiꞌ jịjcaij yocsiꞌĉan bäꞌyedyeꞌ in, pạrej Feniciaĉan jịjcaij in, judyeyaꞌ pạrej Chipreĉan jịjcaij in, pạrej na Antioquíaĉan jịjcaij in. Meꞌ meꞌ jịjcaij in voroꞌtacsi Jenꞌsiꞌ p̂eyacdyeꞌ in, judío qui na mọmoꞌ jéyacsi in, muꞌin na jam judío in jam jéyacsi in. 20Meꞌ tsanꞌ meꞌ atsij qui namꞌ pạrej Chipreĉantyiꞌ anicjetety Jesucristo in judyeyaꞌ Cireneĉantyiꞌ chimeꞌ in, muꞌin Antioquíaĉan jịjcaij in, muꞌinmun voroꞌtacsi in jam judío in jéyacsi in mọꞌ p̂eyacdyeꞌ p̂eijtes muꞌ Jesús, Ayoꞌ tsun. 21Jenꞌ nọ́tacsi ferdyeꞌyaꞌ muꞌ, daiꞌ muꞌyaꞌ camanꞌyeban in dyijyeban Jenꞌcheꞌ in, jụjjebajte in Ayoꞌ tsun.
22Muꞌin Jerusalénĉantyiꞌ anicjetety Jesucristo in chị́qui in aty meꞌ muꞌin in Antioquíaĉan in, jutete qui in muꞌ Bernabé paj qui muꞌve cạvacsequi. 23-24Anic na muꞌ jämꞌyity muntyiꞌ, fer anicjetety Jenꞌ chimeꞌ judyeyaꞌ Jenꞌsiꞌtum Ạꞌedyeꞌ bäꞌyity muꞌ. Dạcacsequi muꞌ anicjetety Jenꞌ in, cạvacsi muꞌ Jenꞌ anic nọ́tacsi muꞌin, mọꞌdyes qui där maꞌjoij muꞌ. Yi jéyacsi: "Jam raꞌ méquiꞌ miꞌin farajjetinte Ayoꞌ tsun, yejĉoij ramꞌ ĉojtyiꞌĉan miꞌin cäc̣häꞌchutinte muꞌ" jéyacsi. Meꞌdye qui muꞌin yejĉoij cächquejĉoij in jụjjete Jesucristo in.
25Sacjebanꞌ muꞌ Bernabé, Tarsove qui jịjcaij muꞌ queviĉajte muꞌĉan Saulo. 26Muꞌĉan dạcajte, Antioquíaĉan jijtuban Saulotum. Pärenꞌdye muꞌin in jịꞌchiyacsi muꞌĉantyiꞌ anicjetety Jesucristo in, yiris yómodyeꞌmun muꞌĉan meꞌ buꞌyi in, daiꞌ muntyiꞌ jịꞌchiyacsi in. Muꞌĉan Antioquíaĉan yóĉandyemꞌ tiyacchuti tịj soꞌmacsi muꞌin anicjetety Jesucristo in jéyacsi in Cristoty in, jéyacsi in.
27Aty meꞌsiꞌ pạrej jasoꞌmitity p̂eyacdyeꞌ Jenꞌ in atsij in, Jerusalénĉantyiꞌ muꞌin in, Antioquíaĉan venjoij in. 28Yirity Agabo tịj muꞌ, muꞌ soꞌmactyiꞌ p̂eyacdyeꞌ Jenꞌsiꞌyaꞌ Ạꞌedyeꞌ muꞌ. Sacyi muꞌ mọꞌ jịꞌchiqueyacsi p̂eyacdyeꞌ, jéyacsi: "Räj buꞌyiꞌ raꞌ jac chiqueꞌ raꞌ dáquis in." Anicdye meꞌ, aty muꞌ ayoꞌbuꞌyi muꞌ Claudio jiquej, muꞌ mujuꞌchaty ayoꞌ, Romaĉantyiꞌ, cạ̈tsiꞌ mọꞌ p̂eyacdyeꞌ. 29Mọꞌdyes muꞌin Antioquíaĉantyiꞌ anicjetety Jenꞌ in dyijyi in dyimꞌte querec̣ha in anicjetetydyety Jenꞌ in Judeaĉantyiꞌ. Meꞌdye räj anicyity Jenꞌcheꞌ in yụꞌte in junꞌ quiquij chuc tupuj yụꞌte in, meꞌ meꞌ vajmuꞌyaꞌjete querec̣ha in. 30Chat qui juteyacsi in muꞌin ĉọjcacsity anicjetety Jenꞌ in Judeaĉantyiꞌ in. Bernabé judyeyaꞌ Saulo muꞌin cạyacsi in.
നിലവിൽ തിരഞ്ഞെടുത്തിരിക്കുന്നു:
Uñedye' 11: CAS
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright 2017 Nuevo Testamento en Chimane
Jen'si' P̂eyacdye'
