Acts 14
14
Павел пӑ Варнава Икония вошән
1Иконияйән ԓын и йӑха иудейәт пойәкщәты хота ԓŏксәӈән пӑ щиты пŏтәртсәӈән пӑ щи арат ар иудейәт пӑ грекәт эвәԓсәт.
2Ԓын айкеԓәна ӑт эвәԓты иудейәт пӑ хӑнам йохәт йэщаԓт па рут йох сӑмԓаԓ йŏвра хўщсэԓ пӑ ԉикмәԓтсэԓ.
3Пӑ хŏты, ԓын щита йӑм хўват усӈән. Ԓын Турәм Куща эԓты хӑрщийа пŏтәртсәӈән, Хŏй Ԓўв йӑмәԓ йасәӈ ныты урәӈән, ԓын йошԓәнән йэмәӈ посәт пӑ вантыԓԓаӈәԓ верәт верәс.
4Щи кўтән вошән мир кӑтна ортәсәс: итԓаԓ иудейәт пеԓа усәт, киметԓаԓ пӑ – апостоләт пеԓа.
5Хун пӑ па рут йох пӑ иудейәт ԓыв кущайԓаԓ пиԓән ԓын пеԓайән ӑратсәт, ԓынан йэԓапты пӑ кевән йовәԓты урәӈән,
6ԓын, щит эԓты хуԓман, Ликаония мўв вошӈәна, Листрайа пӑ Дервияйа, пӑ щи ԉэпән уԓты куртәта мӑтсәӈән,
7пӑ щита Йӑм Айкеԓ тутԓысӈән.
Павел пӑ Варнава Листра вошән
8Листрайән и мŏԓты, вевтам кўрпи ху опсәс, пӑтлам хот уш эԓты кўрԓы питман ус, пӑ нэмәԓты пŏрайән ӑт шушиԓыйәс.
9Ԓўв Павел пŏтрәпса хуԓәнтәс. Павел ԓўв пеԓайәԓ ӑӈкәрмаԓ йўпийән, кащаԓәсԓы, ԓўв тўмтака йиты кеша эвәԓты щир тӑйәԓ,
10сыйәӈ тўрән йастәс: «Нӑӈена йастәԓәм Турәм Куща Иисус Христос нэм урәӈән: нӑӈ кўрӈиԓана тўӈа нŏх ԓойа». Щӑԓта ԓўв и щишән нŏх ԓойәмтәс пӑ шушиԓыты питәс.
11Мир пӑ, щит шийаԓәмаԓ кемән, мўй Павел верәс, ԓўв тўр сыйәԓ сыйәӈа версәԓы, Ликаония йасәӈән пŏтәрман: «Ԓуӈхәт хŏйат хŏрасән мўӈ хŏщайэв иԓ эсԓәщсәт».
12Щӑԓта Варнава Зевса айәԓтса, Павел пӑ Ермийа#14:12 Ермий - ԓўв Гермес па, йис грек мир хŏща мет ун Зевс нэмпи ԓух айкеԓ туты ŏт; айәԓтса, ԓўв йасәӈ хŏща кущайа ус.
13Вошеԓ йэԓпийән Зевс ԓух хот ус, пӑ ԓўвеԓа йир верты ху, пушас ова хор мисәт пӑ сэвәм хŏрамәӈ лыптәт тўвман, мир пиԓән йирасты ўтщийәс.
14Туп апостолӈән Варнава пӑ Павел, щит хуԓман кемән, ԓын сŏхԓән лакки мӑншисԓән пӑ, мир хŏща ӑратман, такан сыйәӈ тўрән пŏтәртсәӈән:
15«Йох! Мўй нын верԓәты? Мин па – нын хŏрпан хŏйатӈән, пӑ нынана Йӑм Айкеԓ пŏтәртԓәмән, нын тӑм йурԓы ԓуӈхәт эԓты Ԓыԓәӈ Турәм пеԓа ат керԓәсты, Хŏй турәм хӑр пӑ мўв, пӑ щарәс, пӑ хŏԓ щит, мўй ԓыпиԓаԓән уԓ тыйәԓтәс,
16Хŏй хӑщәм ишән мирәта иса ԓыв йушԓаԓән йӑхты эсԓыйәс,
17Ԓўв эԓтайәԓ йӑм верәтән айкеԓ мӑты щикуш ӑт вŏԓыԓыйәс, турәм хӑр эԓты мўӈева йэрт пӑ ԓэвмаӈ пŏра мийԓыман, щӑԓта ԓэтŏтән пӑ кашән мўӈ сӑмԓув вŏԓәтман, ус».
18Щиӈәԋща, щит пŏтәртман, ԓын ўрайән мир хŏща щимәщ нŏмәс такапсәтән: ԓынана йир ӑт ат версәт пӑ кашәӈ хŏйат йŏхи ат мӑнәс. Щи кўтән ԓын щита уԓман, хŏйатәт утәԓтәсӈән,
19Антиохия пӑ Икония эԓты тухәԓ иудейәт йŏхәтсәт пӑ, хун апостолӈән хӑрщийа пŏтәртсәӈән, ԓыв мира ԓын эԓтан пўӈԓа мӑнты номәс такапсәт, пŏтәртман: «Ԓын нэмәԓтты тўӈа–щира йасәӈ ӑт пŏтәртԓәӈән, туп иса олмащиԓӈән». Щӑԓта, мир хущмеԓ йўпийән, Павел кевән щӑх йовәԓтса пӑ вош ким пелка таԓса, ԓўвеԓ пӑрәма нумәссэԓ, щишән.
20Хун пӑ утәԓтәты йохәт ԓўв пўӈԓәԓән ӑктәщсәт, ԓўв нŏх ԓойәс пӑ воша мӑнәс, кимет хӑтәԓән пӑ Варнава пиԓән Дервияйа мӑнәс.
Павел пӑ Варнава Сирияйән уԓты Антиохияйа йŏхԓы керԓәты вер
21Йӑм Айкеԓ тӑм вошән пŏтәртман пӑ йӑм арат утәԓтәты хŏйат Турәм Куща урәӈән мŏщатман йўпийән, ԓын йŏхԓы Листра, Икония пӑ Антиохия вошәт мŏхты мӑтсәӈән,
22утәԓтәты йох сӑм такапман, эвәԓты щирән уԓты таӈман пӑ утәԓтәман, ар шук тўвман, мўӈева Турәм Хон Уԓәпсайа ԓŏӈты мосәԓ.
23Павел пӑ Варнава кашәӈ пойәкщәты хŏйатәт ӑктәщиты щир кеша уна уԓты йох пŏтсәӈән пӑ, вўщԓыман пойәкщәсӈән пӑ Турәм Кущайа мӑсԓән, Хойа ԓыв эвәԓсәт.
24Йухәт, Писидия мŏхты мӑнман, Памфилияйа йŏхәтсәтән,
25пӑ, Турәм Куща йасәӈ Пергияйән пŏтәртман йўпийән, Атталияйа охәԓсәӈән;
26Щиԓта пӑ Антиохияйа хопән мӑтсәӈән, хŏта Турәм йӑма щи вер пеԓа эвләптыман усайӈән, мўй тӑԓаӈа версәӈән.
27Щи йŏхәтман пӑ пойәкщәты мŏхет йӑха ӑкәтман йўпийән, ԓын хŏԓ иса пŏтәртсәԓән, мўй ԓын пиԓәнән Турәм верәс пӑ мўй щирән Ԓўв эвәԓты вер ов па рут мира пел пўшсәԓы.
28Пӑ щита утәԓтәты йохәт пиԓән йам арат сыс усӈән.
നിലവിൽ തിരഞ്ഞെടുത്തിരിക്കുന്നു:
Acts 14: ХБ
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Institute for Bible Translation, Finland
