မၢတ်ႈထႄႇ 24

ၸဝ်ႈယေႇသူႉႁေႃးလွင်ႈပိၵ်ႈမၢၼ်ႇၸဝ်ႈတေလူႉလႅဝ်

(တူၺ်း၊ မႃႇ 13:1-2။ လူႉ 21:5-6)

1မိူဝ်ႈဢၼ်ယေႇသူႉဢွၵ်ႇသေၵႃႈၼႂ်းပိၵ်ႈမၢၼ်ႇၸဝ်ႈလႄႈ ၵႂႃႇယူႇၼၼ်ႉၸိုင် တပႄးၸဝ်ႈတင်းလၢႆ သုတ်ႉၸပ်းသုတ်ႉၸူးတီႈမၼ်းၸဝ်ႈ ႁႂ်ႈလႆႈၼႄပျႃးတိူၵ်ႈပိၵ်ႈမၢၼ်ႇၸဝ်ႈၸိူဝ်းၼၼ်ႉ တီႈမၼ်းၸဝ်ႈဢေႃႈ။- 2မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ သူႁၼ်ၶိူင်ႈပိူင်တင်းသဵင်ႈတင်းလူင်ၸိူဝ်းၼႆႉယူႇ ဢမ်ႇၸႂ်ႈႁိုဝ်။ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵႃႈတီႈၼႆႈ ၵႃႈၼိူဝ်မၢၵ်ႇႁိၼ်လုၵ်းၼိုင်ႈ ဢမ်ႇလႆႈၵိုတ်းလႆႈၵျၢၼ်ႇဝႆႉ မၢၵ်ႇႁိၼ်ဢၼ်ယင်းဢမ်ႇလႆႈၶၢမ်ႇတၢင်းဢၼ် ၶျႃးတူၵ်းလႄႈမီးယူႇၼၼ်ႉသေလုၵ်ႈ၊ ဝႃႈၼင်ႇၼႆဢေႃႈ။

ၽေးတုၵ်ႉၶႃႉလႄႈၼိၵ်ႈၸၢၵ်ႈငႅၼ်းသႄး

(တူၺ်း၊ မႃႇ 13:3-13။ လူႉ 21:7-19)

3လိုၼ်းၼၼ်ႉ ၼႂ်းမိူဝ်ႈဢၼ်မၼ်းၸဝ်ႈၼင်ႈယူႇၵႃႈၼိူဝ်လွႆသၢၼ်ႇလုၼ်ႇယူႇၼၼ်ႉၸိုင်၊ တပႄးၸဝ်ႈတင်းလၢႆ သုတ်ႉၸပ်းသုတ်ႉၸူးတီႈမၼ်းၸဝ်ႈ ၼႂ်းတီႈဢၼ်ပိူၼ်ႈဢမ်ႇမီးၼၼ်ႉသေလႄႈ လဝ်ႊလၢတ်ႈလႄႈဝႃႈ၊ လွင်ႈတၢင်းၸိူဝ်းၼႆႉ တၵ်းပဵၼ်မႃးၶိင်ႇမိူဝ်ႈလႂ်ၶႃႈ။ လွင်ႈတၢင်းဢၼ်ၸဝ်ႈႁဝ်းတၵ်းမႃးလႄႈၵမ်ႇၽႃႇၼႆႉ တၵ်းသဵင်ႈၼၼ်ႉၸိုင်၊ တၵ်းမီးၼီႉမိၵ်ႈလၢၵ်ႈၶၼႃႇဢၼ်လႂ်ၶႃႈ။ ၸဝ်ႈႁဝ်းၶႅၼ်းတေႃႈလၢတ်ႈပၼ်တီႈႁဝ်းၶႃႈသေၵမ်းၶႃႈ၊ ဝႃႈၼင်ႇၼႆဢေႃႈ။- 4ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၼင်ႇႁိုဝ်ၽူႈလႂ်တၵ်းဢမ်ႇလႆႈပႅတ်ႉလႆႈလႅၼ်သူၸိုင် ႁဵတ်းသတီႉတႃႉ။- 5ၵူၼ်းၼမ်ၼႃႇ တၵ်းႁိမ်ဢဝ်ၸိုဝ်ႈသဵင်ၵဝ်သေလႄႈ ပေႃႇမႃးလႄႈလၢတ်ႈဝႃႈ၊ ၵဝ်ၼႆႉပဵၼ်ၸဝ်ႈၶရိၸ်ႈဢေႃႈ၊ ဝႃႈၼင်ႇၼႆလႄႈ ပႅတ်ႉလႅၼ်ၵူၼ်းၼမ်ၼႃႇဢေႃႈ။- 6သူတၵ်းလႆႈငိၼ်းလွင်ႈဢၼ်တိုၵ်းသိုၵ်းလႂ်၊ သတၢင်းသဵင်ၶၢဝ်ႇလွင်ႈဢၼ် တၵ်းတိုၵ်းသိုၵ်းလႂ်ဢေႃႈ။ ၼႂ်းဝႃႈၼၼ်သေၵေႃႈ ၼင်ႇႁိုဝ်တၵ်းဢမ်ႇမႆႈၸႂ်ၶီၸႂ်ၸိုင်၊ ႁဵတ်းသတီႉတႃႉ။ လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉ တၵ်းလႆႈပဵၼ်မႃးဢေႃႈ။ ၼႂ်းဝႃႈၼၼ်သေၵေႃႈ ဢမ်ႇပႆႇပဵၼ်တီႈသုတ်းတီႈၵွႆ။- 7ၵူၼ်းမဵဝ်းၼိုင်ႈလႄႈမဵဝ်းၼိုင်ႈ မိူင်းၼိုင်ႈလႄႈမိူင်းၼိုင်ႈ တၵ်းၶတ်းတႃႉၵၼ်ဢေႃႈ။ တၢင်းဢၼ်ဢိုပ်းတၢင်းၵိၼ်လႂ်၊ တၢင်းဢၼ်ပဵၼ်ၵႃႇလႃႉႁႃႈလႅင်မိူင်းလႂ်၊ တၢင်းဢၼ်ဢိင်ႇသၼ်ႇလႂ် တၵ်းပဵၼ်ၵူႈတီႈၵူႈလႅၼ်ဢေႃႈ။- 8လွင်ႈတၢင်းၸိူဝ်းၼႆႉ တၵ်းပဵၼ်ၵေႃႇၸႃႉငဝ်ႈႁၢၵ်ႈတုၵ်ႉၶႃႉတၢင်းၶီတၢင်းမႆႈဢေႃႈ။- 9ၶိင်ႇမိူဝ်ႈၼၼ်ႉၸမ်ႉ၊ ၶဝ်တၵ်းဢဝ်သူဢၢပ်ႈၵႃႈတီႈတၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉသေလႄႈ ဢဝ်တၢႆဢေႃႈ။ မဵဝ်းၵူၼ်းတင်းသဵင်ႈတင်းလူင် တၵ်းၸင်းသူ ၵွပ်ႈပိူဝ်ႈၸိုဝ်ႈသဵင်ၵဝ်ဢေႃႈ။- 10ၶိင်ႇမိူဝ်ႈၼၼ်ႉၸမ်ႉ၊ ၵူၼ်းၼမ်ၼႃႇ ၸႂ်တၵ်းလူႉလႄႈ ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ် တၵ်းၸင်းၵၼ်ဢေႃႈ။- 11မိၵ်ႉသႃႇပရေႃးၽႅတ်ႈၼမ်ၼႃႇ တၵ်းပေႃႇမႃးလႄႈ ပႅတ်ႉလႅၼ်ၵူၼ်းၼမ်ၼႃႇဢေႃႈ။- 12ၵွပ်ႈပိူဝ်ႈလွင်ႈတၢင်းဢၼ်ဢမ်ႇတြႃးၼမ်မႃးၵိုၼ်းမႃးလႄႈ တၢင်းႁၵ်ႉမႅတ်ႈတႃႇၵူၼ်းၼမ်ၼႃႇ တၵ်းၵေႇမၢင်ၵႂႃႇဢေႃႈ။- 13ၽူႈလႂ်သေဢမ်ႇဝႃႈ၊ ၵေႃႉဢၼ်မၼ်ႈၶိူင်ႇတေႃႇထိုင်ႁွတ်ႈတီႈသုတ်းတီႈၵွႆၼၼ်ႉ၊ ၵေႃႉၼၼ်ႉတၵ်းႁွတ်ႈထိုင် တၢင်းဢၼ်ၵႄႇၶျွတ်ႈဢဝ်ဢေႃႈ။- 14တြႃးသတၢင်းသိူဝ်းပျေႃႇမိူင်းၸဝ်ႈၼႆႉ တၵ်းလႆႈၶၢမ်ႇတၢင်းဢၼ် ႁေႃးလၢတ်ႈၵႃႈၼႂ်းမိူင်းလေႃးၵီႇၵူႈတီႈၵူႈလႅၼ် ပုၼ်ႈဢၼ်တၵ်းပဵၼ်သၢၵ်ႈသေႇ တီႈၵူၼ်းမဵဝ်းတင်းသဵင်ႈတင်းလူင်ဢေႃႈ။ ၼင်ႇၼၼ်ယဝ်ႉၸင်ႇ၊ တၵ်းပဵၼ်တီႈသုတ်းတီႈၵွႆဢေႃႈ။

တၢင်းဢၼ်ယႃႉလူႉဢၼ်လီႁင်ႈလီၵူဝ်

(တူၺ်း၊ မႃႇ 13:14-23။ လူႉ 21:20-24)

15ပိူဝ်ႈၼႆလႄႈ မိူဝ်ႈဢၼ် သူလႆႈႁၼ်လွင်ႈတၢင်းဢၼ်လီႁင်ႈဢဵတ်ႇသဵတ်ႇလႄႈ ၸၢင်ႈယႃႉၸၢင်ႈယူၵ်ႉ၊ ဢၼ်ပရေႃးၽႅတ်ႈ တၢၼ်ႇယေႇလႃႉ ဢဝ်လွင်ႈမၼ်းႁေႃးလၢတ်ႈဝႆႉၼၼ်ႉ ၸုၵ်းယူႇၵႃႈၼႂ်းတီႈဢၼ်မူတ်းၸၢင်ႇၼၼ်ႉၸိုင်၊ ႁႂ်ႈၵေႃႉဢၼ် လူတူၺ်းၵျၢမ်းလိၵ်ႈၼၼ်ႉ ႁူႉတႃႉ။- 16မိူဝ်ႈဢၼ်ႁၼ်ၸိူဝ်ႉၼင်ႇၼၼ်ၸိုင်၊ ႁႂ်ႈၶဝ်ၸိူဝ်းဢၼ်မီးၼႂ်းမိူင်းယူႉတႃႉၼႆႉ ပၢႆႈၶိုၼ်ႈၵႂႃႇၵႃႈတီႈၼိူဝ်လွႆပုၼ်ႉသေ။- 17ယႃႇႁႂ်ႈၵေႃႉဢၼ်မီးယူႇၵႃႈၼိူဝ်ၸွမ်ႁိူၼ်းၼၼ်ႉ လူင်းႁႂ်ႈလႆႈဢဝ်ၶူဝ်းဢဝ်လဵင်းၼႂ်းႁိူၼ်း။- 18ၵေႃႉဢၼ်မီးယူႇၵႃႈၼႂ်းတူင်ႈၼႃးၵေႃႈ၊ ယႃႇႁႂ်ႈၶိုၼ်းမိူဝ်းတၢင်းလင်ႁႂ်ႈလႆႈဢဝ်ၶူဝ်းၼုင်ႈတၢင်းမႆမၼ်း။- 19ဝၼ်းမိူဝ်ႈၼၼ်ႉ တီႈမႄႈယိင်းဢၼ်တူဝ်ဢမ်ႇသႃႇ ဢိၵ်ႇတင်းမႄႈယိင်းဢၼ်မီးလုၵ်ႈဢွၼ်ႇ ဢၼ်ဢမ်ႇၽၢတ်ႇၼူမ်းတင်းလၢႆၼၼ်ႉ တၵ်းမီးဢႃႉမင်ႇၵလႃႇဢေႃႈ။- 20လွင်ႈၼင်ႇႁိုဝ်ၶိင်ႇမိူဝ်ႈဢၼ် သူလႆႈပၢႆႈလႆႈၵႂႃႇၼၼ်ႉ တၵ်းဢမ်ႇလႆႈတူၵ်းမိူဝ်ႈၶိင်ႇၵတ်း ဢိၵ်ႇတင်းမိုဝ်ႉဝၼ်းၵမ်သိၼ်ၸိုင် သူးတွင်းတႃႉ။- 21လွင်ႈမၼ်းၸမ်ႉ တုၵ်ႉၶႃႉလူင်ဢၼ်ဢမ်ႇပႆႇတွၼ်ႉပဵၼ်သေပွၵ်ႈ ၸႃႉၸဵမ်မိူဝ်ႈၵမ်ႇၽႃႇၸႃႉတႄႇၼၼ်ႉ ႁၢၼ်ႉတေႃႇမိူဝ်ႈလဵဝ်ၼႆႉလႄႈ ၵမ်းလိုၼ်းၵေႃႈတၵ်းဢမ်ႇပဵၼ်ၼၼ်ႉ တၵ်းပဵၼ်ၼႂ်းၶိင်ႇၵႃႇလႃႉၼၼ်ႉဢေႃႈ။- 22ပေႃးဢမ်ႇႁႂ်ႈၶိင်ႇၵႃႇလႃႉၼၼ်ႉပွတ်းသေၸိုင်၊ ၽူႈလႂ်ဢမ်ႇလွတ်ႈလႆႈသေၵေႃႉသေၵူၼ်း။ ၵွပ်ႈပိူဝ်ႈၶဝ်ၸိူဝ်းဢၼ် လိူၵ်ႈၵဵပ်းဢဝ်ၼၼ်ႉလႄႈ ၶိင်ႇၵႃႇလႃႉၼၼ်ႉ တၵ်းပွတ်းဢေႃႈ။

23မိူဝ်ႈၼၼ်ႉ ပေႃးသေၵေႃႉသေၵူၼ်း လၢတ်ႈလႄႈဝႃႈ၊ တူၺ်းလူး၊ ၸဝ်ႈၶရိၸ်ႈမီးၵႃႈၼႆႈဢေႃႈ။ မီးၵႃႈၼၼ်ႈဢေႃႈ၊ ဝႃႈၼင်ႇၼႆၸိုင် ယႃႇပေယုမ်ႇ။- 24လွင်ႈမၼ်းၸမ်ႉ ၶဝ်ၸိူဝ်းဢၼ်ႁဵတ်းမိူၼ်ၼင်ႇႁၢင်ႈ ၸဝ်ႈၶရိၸ်ႈဢိၵ်ႇတင်းမိၵ်ႉသႃႇပရေႃးၽႅတ်ႈတင်းလၢႆၼၼ်ႉတၵ်းပေႃႇမႃးလႄႈ ပေႃးပႅတ်ႉလႅၼ်လႆႈၸိုင်၊ ၶဝ်တၵ်းၼႄပျႃးၼီႉမိၵ်ႈလၢၵ်ႈၶၼႃႇဢၼ်ယႂ်ႇ ဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆ ႁႂ်ႈလႆႈပႅတ်ႉလႅၼ်ၶဝ်ၸိူဝ်းဢၼ် လိူၵ်ႈၵဵပ်းဢဝ်ၼၼ်ႉဢေႃႈ။- 25တူၺ်းလူး၊ ၵဝ်လၢတ်ႈလွင်ႈတၢင်းၸိူဝ်းၼၼ်ႉဝႆႉ ဢွၼ်တၢင်းယဝ်ႉ။

26ပိူဝ်ႈၼႆလႄႈ ပေႃးၶဝ်လၢတ်ႈလႄႈဝႃႈ၊ မၼ်းၸဝ်ႈမီးၼႂ်းထိူၼ်ႇပုၼ်ႉဢေႃႈ၊ ဝႃႈၼင်ႇၼႆၸိုင်၊ ယႃႇပေဢွၵ်ႇၵႂႃႇၸူး၊ ပေႃးဝႃႈ၊ မီးၵႃႈၼႂ်းလုၵ်းတၢင်းၼႂ်းပုၼ်ႉ၊ ဝႃႈၼင်ႇၼႆၵေႃႈ၊ ယႃႇပေယုမ်ႇ။- 27လုၵ်ႈၵူၼ်းတၵ်းမႃးၸိူဝ်ႉၼင်ႇဢၼ်ၽႃႉမႅပ်ႈၽုတ်းမႃးတၢင်းဝၼ်းဢွၵ်ႇ လႅင်းၽႅဝ်ႁွတ်ႈတၢင်းဝၼ်းတူၵ်းၼၼ်ႉဢေႃႈ။- 28တီႈဢၼ်တူဝ်တၢႆမီးၼၼ်ႉ၊ လၢင်းတႃႉၶမ်းတင်းလၢႆ တၵ်းၸူႉၵၼ်တုမ်ၵၼ်ဢေႃႈ။

ၸဝ်ႈလုၵ်ႈၵူၼ်းတၵ်းႁွတ်ႈမႃး

(တူၺ်း၊ မႃႇ 13:24-27။ လူႉ 21:25-28)

29ဝၢႆးလင်တုၵ်ႉၶႃႉတၢင်းၽၢၼ် ၶိင်ႇၵႃႇလႃႉၼၼ်ႉၵမ်းလဵဝ်၊ ၵၢင်ဝၼ်းတၵ်းလပ်းသိင်ႇဢေႃႈ။ လိူၼ်တၵ်းဢမ်ႇပၼ်ဢၼ်လႅင်းမၼ်း။ လၢဝ်တင်းလၢႆတၵ်းတူၵ်းသေၵႃႈၼိူဝ်ၵၢင်ႁၢဝ်ဢေႃႈ။ တၼ်းၶူဝ်းၵၢင်ႁၢဝ်တင်းလၢႆၵေႃႈ တၵ်းသၼ်ႇၶွၼ်းဝႆဢေႃႈ။- 30မိူဝ်ႈၼၼ်ႉ ၼီႉမိၵ်ႈလၢၵ်ႈၶၼႃႇလုၵ်ႈၵူၼ်း တၵ်းထၢင်ႇသႃးမႃးၵႃႈၼိူဝ်ၵၢင်ႁၢဝ်ဢေႃႈ။ ၵူၼ်းၵႃႈၼိူဝ်လိၼ်မိူင်းတင်းသဵင်ႈတင်းလူင် တၵ်းလႆႈႁွင်ႉႁႆႈပွင်ႉၶၢင်းလႄႈ ႁၼ်လုၵ်ႈၵူၼ်းပႃးတင်းမုၼ်တၼ်းၶူဝ်း ဢႃႇၼူႉၽေႃႇမၼ်းၸဝ်ႈသေလႄႈ မႃးၵႃႈၼိူဝ်မွၵ်ႇၵုမ်ႈဢေႃႈ။- 31မၼ်းၸဝ်ႈတၵ်းပွႆႇၸႂ်ႉတမၢၼ်ႇမၼ်းၸဝ်ႈတင်းလၢႆမႃး ဢိၵ်ႇလူၺ်ႈၵၼ်တင်းသဵင်ၶရႃႇဢၼ်ယႂ်ႇၼႃႇလႄႈ ၶဝ်ၼၼ်ႉၵေႃႈ တၵ်းႁႂ်ႈၶဝ်ၸိူဝ်းဢၼ် လိူၵ်ႈၵဵပ်းဢဝ်ၼၼ်ႉ လုၵ်ႉသေၵႃႈတီႈ သီႇၸဵင်ႇပႅတ်ႇၼႃႈ တႂ်ႈၽႃႉၵၢင်ႁၢဝ်ၸူႉၵၼ်တုမ်ၵၼ်ဢေႃႈ။

ၵႂၢမ်းဢူႉပမႃႇလွင်ႈတူၼ်ႈမၢၵ်ႇလိူဝ်ႇ

(တူၺ်း၊ မႃႇ 13:28-31။ လူႉ 21:29-33)

32ဢဝ်တူၼ်ႈမၢၵ်ႇလိူဝ်ႇသၢင်းၽေႃး ႁဵတ်းဢူႉပမႃႇပုင်ႇသေလႄႈသွၼ်ဢဝ်တႃႉ။ မိူဝ်ႈဢၼ်ၵိင်ႇမၼ်းၶႃႊမၼ်းၼုမ်ႇလႄႈ ဢွၵ်ႇမႂ်မၼ်းယူႇၼၼ်ႉၸိုင်၊ သူႁူႉလွင်ႈဢၼ်ၸမ်တၵ်းႁွတ်ႈထိုင်ၶိင်ႇႁႅင်ႈဢေႃႈ။- 33မိူၼ်ၼင်ႇၼၼ် မိူဝ်ႈဢၼ်သူလႆႈႁၼ် လွင်ႈတၢင်းတင်းသဵင်ႈတင်းလူင်ၸိူဝ်းၼႆႉၼၼ်ႉၸိုင်၊ ႁူႉလွင်ႈဢၼ်ၶိင်ႇလုၵ်ႈၵူၼ်းႁွတ်ႈၸမ်မႃးၵႃႈတီႈႁိမ်းၽၵ်းတူယဝ်ႉၼၼ်ႉတႃႉ။

34ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ လွင်ႈတၢင်းတင်းသဵင်ႈတင်းလူင်ၸိူဝ်းၼႆႉ တၵ်းပဵၼ်မႃး ၸူဝ်ႈဢၼ်ၵူၼ်းဢၼ်မီးယူႇတေႃႈလဵဝ်ၸိူဝ်းၼႆႉ ဢမ်ႇပႆႇသဵင်ႈပႆႇမူတ်းဢေႃႈ။- 35ပိၵ်ႉသမ်ႉၽႃႉၵၢင်ႁၢဝ်တင်းလိၼ်မိူင်းၼႆႉ တၵ်းႁၢႆလၢႆသေၵေႃႈ၊ ၵႂၢမ်းၵဝ်ၼႆႉ တၵ်းဢမ်ႇႁၢႆလၢႆ။

ၽူႈလႂ်ဢမ်ႇႁူႉၶိင်ႇမိူဝ်ႈဝၼ်းၼၼ်ႉ

(တူၺ်း၊ မႃႇ 13:32-37။ လူႉ 17:26-30၊34-36)

36ၶိင်ႇၼႃႇရီႇဝၼ်းၼၼ်ႉၸမ်ႉ၊ ၽူႈလႂ်ဢမ်ႇႁူႉ၊ တမၢၼ်ႇၵၢင်ႁၢဝ်တင်းလၢႆ ဢမ်ႇႁူႉ၊ ၸဝ်ႈပေႃႈၵဝ်ပႃးလဵဝ်ၵူၺ်းႁူႉဢေႃႈ။- 37တၢင်းဢၼ်လုၵ်ႈၵူၼ်းမႃးၼၼ်ႉ တၵ်းပဵၼ်ၸိူဝ်ႉၼင်ႇဢၼ်ပဵၼ်ၼႂ်းၸူဝ်ႈပၢၼ် ၼူဝ်းဢႃႇၼၼ်ႉဢေႃႈ။- 38ၸိူဝ်ႉၼင်ႇဢၼ် ၵူၼ်းတင်းလၢႆၵိၼ်ယူႇ၊ ဢဝ်ၽူဝ်ဢဝ်မေးယူႇ၊ ဢၢပ်ႈပၼ်ၵၼ်ယူႇၼႂ်းၶိင်ႇမိူဝ်ႈဢၼ် တၢင်းဢၼ်ၼမ်ႉထူမ်ႈမိူင်း ဢမ်ႇပႆႇပဵၼ်တေႃႇထိုင်ႁွတ်ႈ ဝၼ်းဢၼ်ၼူဝ်းဢႃႇၶဝ်ႈၵႃႈၼႂ်းႁိူဝ်းသၢင်းၽေႃးၼၼ်ႉလႄႈ၊- 39ဢမ်ႇမီးသတီႉတေႃႇထိုင်ႁွတ်ႈတၢင်းဢၼ်ၼမ်ႉထူမ်ႈမိူင်းမႃး ပႄႇၽဵဝ်ႈပႅတ်ႈၵူၼ်းတင်းသဵင်ႈတင်းလူင်ၼၼ်ႉ၊ တၵ်းပဵၼ်ၼႂ်းတၢင်းဢၼ် လုၵ်ႈၵူၼ်းမႃးၼၼ်ႉဢေႃႈ။- 40မိူဝ်ႈၼၼ်ႉ ၵူၼ်းသွင်ၵေႃႉ တၵ်းမီးယူႇၵႃႈၼႂ်းတူင်ႈၼႃးဢေႃႈ။ တၵ်းသိမ်းဢဝ်ၵေႃႉၼိုင်ႈလႄႈ၊ ၵေႃႉၼိုင်ႈၸမ်ႉ၊ တၵ်းလႆႈၵိုတ်းဝႆႉယူႇဢေႃႈ။- 41ၵူၼ်းယိင်းသွင်ၵေႃႉ တၵ်းၶိုတ်ႈၶဝ်ႈယူႇတီႈလူၺ်ဢေႃႈ။ တၵ်းသိမ်းဢဝ်ၵေႃႉၼိုင်ႈလႄႈ၊ ၵေႃႉၼိုင်ႈၸမ်ႉ၊ တၵ်းလႆႈၵိုတ်းဝႆႉယူႇဢေႃႈ။

42ပိူဝ်ႈဢၼ်သူဢမ်ႇႁူႉလွင်ႈဢၼ် ၸဝ်ႈသူတၵ်းႁွတ်ႈမႃးၶိင်ႇၼႃႇရီႇလႂ်ၼၼ်ႉလႄႈ ပႂ်ႉထႃႈယူႇတႃႉ။- 43ပေႃးၸဝ်ႈႁိူၼ်းႁူႉၶိင်ႇၼႃႇရီႇ ဢၼ်ၽူႈလၵ်ႉတၵ်းမႃးၸိုင်၊ မၼ်းတၵ်းပႂ်ႉယူႇဢမ်ႇႁႂ်ႈလႆႈယႃႉလႆႈမူင်ႇႁိူၼ်းမၼ်းဝႃႈၼႆ၊ သူႁူႉယူႇဢေႃႈ။- 44ပိူဝ်ႈၼႆလႄႈ သူမႄးႁႅၼ်းဝႆႉတႃႉ။ လွင်ႈမၼ်းၸမ်ႉ လုၵ်ႈၵူၼ်းတၵ်းမႃးၶိင်ႇၼႃႇရီႇဢၼ်သူဢမ်ႇထၢင်ႇဢမ်ႇထိူမ် ၼၼ်ႉဢေႃႈ။

လုၵ်ႈၸၢင်ႈဢၼ်မီးသဵတ်ႈၸႃႇ

(တူၺ်း၊ လူႉ 12:41-48)

45ၶႃႈဢၼ်မီးသဵတ်ႈၸႃႇတင်းသတီႉလႄႈ ၸဝ်ႈမၼ်းၶၢၼ်းဝႆႉၵႃႈၼိူဝ်ၵူၼ်းႁိူၼ်းၵူၼ်းယေးတင်းလၢႆ ႁႂ်ႈလႆႈၽႄမႅင်ႇပၼ် တၢင်းၵိၼ်တၢင်းၶူပ်းတီႈၶဝ်ၼႂ်းမိူဝ်ႈဢၼ် ၶိင်ႇမၼ်းထုၵ်ႇၼၼ်ႉၸမ်ႉ ပဵၼ်ၽူႈလႂ်။- 46ၶႃႈဢၼ်ၸဝ်ႈမၼ်းၶိုၼ်းမႃးလႄႈ ထူပ်းႁၼ်မၼ်းႁဵတ်းၸိူဝ်ႉၼင်ႇၼႆယူႇၼၼ်ႉ မီးမင်ႇၵလႃႇဢေႃႈ။- 47ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၸဝ်ႈမၼ်းတၵ်းၶၢၼ်းမၼ်းဝႆႉ ၵႃႈၼိူဝ်ဢုၵ်ႉၸႃႇၶူဝ်းလဵင်းတူဝ်ၸဝ်ႈၵဝ်ႇ ၵႃႈမီးတင်းသဵင်ႈတင်းလူင်ဢေႃႈ။- 48ပေႃးဢမ်ႇၼၼ်ၸမ်ႉ၊ ပေႃးၶႃႈဢၼ်ႁၢႆႉၼၼ်ႉ ထၢင်ႇၼႂ်းၸႂ်လႄႈဝႃႈ၊ ၸဝ်ႈၵဝ်တၵ်းၼၢၼ်းမႃးဢေႃႈ၊ ဝႃႈၼင်ႇၼႆလႄႈ၊- 49ယႅၼ်ႉထုပ်ႉၶႃႈၼင်ႇၵၼ်ယူႇ၊ ၵိၼ်ႁူမ်ႈၵၼ်တင်းၵူၼ်းဢၼ်ၵိၼ်လဝ်ႈမဝ်းၵမ်တင်းလၢႆယူႇၸိုင်၊- 50ၸဝ်ႈမၼ်းတၵ်းႁွတ်ႈၽႅဝ်မႃး ၼႂ်းၶိင်ႇဝၼ်းဢၼ်မၼ်းဢမ်ႇမုင်ႈဢမ်ႇတူၺ်း၊ ၶိင်ႇၼႃႇရီႇဢၼ်မၼ်း ဢမ်ႇႁူႉဢမ်ႇငိၼ်းၼၼ်ႉလႄႈ၊- 51တႅပ်းမၼ်းႁဵတ်းသွင်ပွတ်းသေယဝ်ႉ၊ ဢဝ်မၼ်းဝႆႉလူၺ်ႈၵၼ်တင်း ၶဝ်ၸိူဝ်းဢၼ်ၸၢင်ႈထိမ်ႇၸၢင်ႈမႅပ်းတင်းလၢႆၼၼ်ႉဢေႃႈ။ တီႈၼၼ်ႈၸမ်ႉ၊ တၵ်းမီးတၢင်းဢၼ်လႆႈႁႆႈလႆႈႁွင်ႉ၊ တၢင်းဢၼ်လႆႈၵတ်းၶဵဝ်ႈၵတ်းၽၼ်းဢေႃႈ။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 24: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക