မၢတ်ႈထႄႇ 19

ၸဝ်ႈယေႇသူႉသင်ႇသွၼ်လွင်ႈၽူဝ်မေးပႅတ်ႈၵၼ်

(တူၺ်း၊ မႃႇ 10:1-12)

1 ယေႇသူႉၼၼ်ႉ မိူဝ်ႈဢၼ်ႁေႃးလၢတ်ႈတေႇသၼႃႇၼၼ်ႉ တင်းသဵင်ႈတင်းမူတ်းယဝ်ႉၸိုင်၊ ၸင်ႇၽၢတ်ႇသေမိူင်းၵႃႇလီႉလႄးလႄႈ ၵႂႃႇၵႃႈတီႈလႅၼ်လိၼ်မိူင်းယူႉတႃႉ၊ ၽၢၵ်ႇပုၼ်ႉၼမ်ႉႁွင်ႈယေႃးတၢၼ်ႇဢေႃႈ။- 2ၵူၼ်းဢၼ်ၸူႉဢၼ်တုမ်ၼမ်ၼႃႇ ၸွမ်းပႃႈလင်မၼ်းၸဝ်ႈၵႂႃႇလႄႈ မၼ်းၸဝ်ႈႁႂ်ႈၶဝ်ၸိုၼ်ႈၶဝ်ၶႅၼ်းၵႃႈတီႈၼၼ်ႈဢေႃႈ။

3ၵမ်းၼၼ်ႉ ၽႃႇရီႉသႄးတင်းလၢႆ မႃးတီႈမၼ်းၸဝ်ႈသေလႄႈ ၼင်ႇႁိုဝ်တၵ်းလႆႈၸၢမ်းတူၺ်းယႃႉယူၵ်ႉမၼ်းၸဝ်ႈၸိုင် လဝ်ႊထၢမ်လႄႈဝႃႈ၊ ၵူၼ်းထုၵ်ႇလီပႅတ်ႈမေးမၼ်းၵွပ်ႈပိူဝ်ႈတၢင်းဢၼ်ၽိတ်းပိူင်ႈ ၵူႈၸိူဝ်ႉၵူႈပိူင်ၼၼ်ႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 4မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ သူဢမ်ႇယၢမ်ႈလႆႈၽတ်းၵျၢမ်းလိၵ်ႈဢၼ်ဝႃႈ၊ မိူဝ်ႈၵေႃႇၸႃႉႁူဝ်ပိုင်းၼၼ်ႉ၊ ၸဝ်ႈဢၼ်ၽၢၼ်ႇသၢင်း ႁဵတ်းပဵၼ်ၼၼ်ႉ ၽၢၼ်ႇသၢင်းႁဵတ်းပဵၼ်ၵူၼ်းၸၢႆး တင်းၵူၼ်းယိင်း သွင်ၵေႃႉၵူၺ်းဢေႃႈ။- 5ၵွပ်ႈပိူဝ်ႈလွင်ႈတၢင်းၼၼ်ႉလႄႈ ၵူၼ်းၸၢႆးတၵ်းလႆႈၽၢတ်ႇၵၼ်တင်း ပေႃႈမႄႈမၼ်းသေလႄႈ ၸပ်းၸွမ်းၽၢႆႇမေးမၼ်းသေယဝ်ႉ၊ ၶဝ်သွင်ၵေႃႉၼၼ်ႉ တၵ်းလႆႈပဵၼ်ၼိူဝ်ႉပဵၼ်လိူတ်ႈ ဢၼ်လဵဝ်ၵၼ်ဢေႃႈ၊ ဝႃႈၼင်ႇၼႆၼၼ်ႉႁိုဝ်။- 6ပိူဝ်ႈၼႆလႄႈ ၶဝ်ၼၼ်ႉ ပဵၼ်သွင်ၵေႃႉဢမ်ႇၸႂ်ႈ၊ ပဵၼ်ၵေႃႉလဵဝ်ၵူၺ်းဢေႃႈ။ ၵူၼ်းယႃႇပေႁႂ်ႈဢဝ်လွင်ႈတၢင်းဢၼ်ၽြႃးပဵၼ်ၸဝ်ႈ ဢဝ်ၽၢၵ်ႈဢဝ်ႁွမ်းၵၼ်ၼၼ်ႉ ၽၢတ်ႇၵၼ်ယၢၼ်ၵၼ်၊ ဝႃႈၼင်ႇၼႆဢေႃႈ။

7ၶဝ်ၼၼ်ႉၵေႃႈ လဝ်ႊလၢတ်ႈလႄႈဝႃႈ၊ ပေႃးပဵၼ်ၸိူဝ်ႉၼင်ႇၼႆၸိုင်၊ ႁဵတ်းသင်လႄႈ မူဝ်းသေႇၸီႇယၢင်ႇဝႆႉႁႂ်ႈပၼ်လိၵ်ႈ ဢၼ်ပုတ်းဢၼ်ၶၢတ်ႇသေလႄႈ ပႅတ်ႈမေးၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 8မၼ်းၸဝ်ႈၵေႃႈလၢတ်ႈလႄႈဝႃႈ၊ ပိူဝ်ႈဢၼ်ႁူဝ်ၸႂ်သူ ၵႅၼ်ႇၶႅင်လႄႈ မူဝ်းသေႇၸီႇယၢင်ႇဝႆႉ ဢၶႂၢင်ႉဢၼ်လႆႈ ပႅတ်ႈမေးဢေႃႈ။ မိူဝ်ႈၵေႃႇၸႃႉႁူဝ်ပိုင်းၼၼ်ႉ ဢမ်ႇပဵၼ်ၸိူဝ်ႉၼင်ႇၼၼ်။- 9ၵဝ်ပိင်းၺၢပ်ႈဝႆႉတီႈသူၸမ်ႉ၊ လိူဝ်သေၵွပ်ႈပိူဝ်ႈတၢင်းဢၼ် ၽိတ်းပိူင်ႈၼၼ်ႉၵူၺ်း၊ ၵေႃႉဢၼ်ပႅတ်ႈမေးမၼ်းသေလႄႈ သမ်ႉဢဝ်တၢင်ႇၵေႃႉထႅင်ႈၼၼ်ႉ ၽိတ်းပိူင်ႈမေးမၼ်းဢေႃႈ။ ၵေႃႉဢၼ်ဢဝ်မေးဢၼ်ပႅတ်ႈၼၼ်ႉၵေႃႈ ၽိတ်းပိူင်ႈမေးပိူၼ်ႈဢေႃႈ၊ ဝႃႈၼင်ႇၼႆဢေႃႈ။

10တပႄးၸဝ်ႈတင်းလၢႆၵေႃႈ လဝ်ႊလၢတ်ႈလႄႈဝႃႈ၊ ပေႃးလွင်ႈၽူဝ်လွင်ႈမေးပဵၼ်ၸိူဝ်ႉၼင်ႇၼၼ်ၸိုင် ဢမ်ႇလီဢဝ်ၵၼ်ယဝ်ႉ၊ ဝႃႈၼင်ႇၼႆဢေႃႈ။- 11မၼ်းၸဝ်ႈၵေႃႈလၢတ်ႈလႄႈဝႃႈ၊ ၵႂၢမ်းၼႆႉၸိုင် ၵူၼ်းၵူႈၵေႃႉဢမ်ႇႁပ်ႉတုင်းဢဝ်လႆႈ။ ၶဝ်ၸိူဝ်းဢၼ်လႆႈဢၶႂၢင်ႉၼၼ်ႉၵူၺ်း ႁပ်ႉတုင်းဢဝ်လႆႈဢေႃႈ။- 12မီးၶဝ်ၸိူဝ်းဢၼ် ပဵၼ်ၵူၼ်းတွၼ်ၵႃႈၼႂ်းတွင်ႉမႄႈမႃးဢေႃႈ။ ၶဝ်ၸိူဝ်းဢၼ် ပိူၼ်ႈမႄးႁဵတ်းဢဝ်လႄႈ ပဵၼ်ၵူၼ်းတွၼ်ၼၼ်ႉၵေႃႈ မီးဢေႃႈ။ ၶဝ်ၸိူဝ်းဢၼ်သင်ႇသွၼ်တူဝ်ၸဝ်ႈၵဝ်ႇလႄႈ ပဵၼ်ၵူၼ်းတွၼ်ပုၼ်ႈမိူင်းၵၢင်ႁၢဝ်ၸဝ်ႈၼၼ်ႉၵေႃႈ မီးဢေႃႈ။ ၵႂၢမ်းၼႆႉၸိုင် ႁႂ်ႈၵေႃႉဢၼ်ႁပ်ႉတုင်းဢဝ်လႆႈၼၼ်ႉ ႁပ်ႉတုင်းဢဝ်သေၵမ်းလူၺ်ႈ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉပၼ်တၢင်းလီတီႈလုၵ်ႈဢွၼ်ႇ

(တူၺ်း၊ မႃႇ 10:13-16။ လူႉ 18:15-17)

13မိူဝ်ႈၼၼ်ႉ ၼင်ႇႁိုဝ်မၼ်းၸဝ်ႈတၵ်းဢဝ်မိုဝ်းတၢင်ႇလႄႈ ပၼ်တၢင်းလီၸိုင် ၶဝ်ဢဝ်လုၵ်ႈဢွၼ်ႇတင်းလၢႆ မႃးတီႈမၼ်းၸဝ်ႈဢေႃႈ။ ၵူၺ်းၵႃႈ တပႄးၸဝ်ႈတင်းလၢႆ တၢင်ႇဢပႅတ်ႈတီႈၶဝ်ၼၼ်ႉဢေႃႈ။- 14ယေႇသူႉၵေႃႈလၢတ်ႈလႄႈဝႃႈ၊ ပၼ်ဢၶႂၢင်ႉတီႈလုၵ်ႈဢွၼ်ႇၸိူဝ်းၼၼ်ႉတႃႉ။ ယႃႇပေႁၢမ်ႈတၢပ်ႈႁႄႉၶႅၼ် လွင်ႈဢၼ်ၶဝ်တၵ်းမႃးတီႈၵဝ်ၼၼ်ႉ။ မိူင်းၵၢင်ႁၢဝ်ၸဝ်ႈပဵၼ်မိူင်းၶဝ်ၸိူဝ်ႉၼင်ႇၼႆၼၼ်ႉဢေႃႈ၊ ဝႃႈၼင်ႇၼႆဢေႃႈ။- 15မၼ်းၸဝ်ႈဢဝ်မိုဝ်းတၢင်ႇၵႃႈၼိူဝ်လုၵ်ႈဢွၼ်ႇၸိူဝ်းၼၼ်ႉယဝ်ႉၸင်ႇ၊ ၵႂႃႇသေၵႃႈတီႈၼၼ်ႈဢေႃႈ။

သထေးၵူၼ်းၼုမ်ႇၵေႃႉၼိုင်ႈ

(တူၺ်း၊ မႃႇ 10:17-31။ လူႉ 18:18-30)

16လိုၼ်းၼၼ်ႉ ၵူၼ်းၵေႃႉၼိုင်ႈ သုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈ လဝ်ႊထၢမ်လႄႈဝႃႈ၊ သြႃႇၸဝ်ႈ၊ ၼင်ႇႁိုဝ်တၵ်းလႆႈထႃႇဝရႃႉဢသၢၵ်ႈၸိုင်ၵဝ်ၶႃႈတၵ်းလႆႈႁဵတ်းတၢင်းလီဢၼ်လႂ်ၶႃႈ၊ ဝႃႈၼင်ႇၼႆဢေႃႈ။- 17မၼ်းၸဝ်ႈၵေႃႈလၢတ်ႈလႄႈဝႃႈ၊ ႁဵတ်းသင်လႄႈမႂ်းထၢမ်လွင်ႈဢၼ်မျၢတ်ႈဢၼ်လီၼၼ်ႉ တီႈၵဝ်ၼင်ႇႁိုဝ်။ ဢၼ်မျၢတ်ႈဢၼ်လီၼၼ်ႉ မီးသူႇလဵဝ်ပႃးလဵဝ်ၵူၺ်းဢေႃႈ။ ပေႃးမႂ်းၶႂ်ႈၶဝ်ႈၼႂ်းတၢင်းဢၼ် ဢသၢၵ်ႈလိပ်းၼၼ်ႉၸိုင်၊ ၵမ်ၵျၢင်ႉပိင်းၺၢပ်ႈၸဝ်ႈတင်းလၢႆတႃႉ၊ ဝႃႈၼင်ႇၼႆဢေႃႈ။- 18မၼ်းသမ်ႉၶိုၼ်းလဝ်ႊထၢမ်လႄႈဝႃႈ၊ ပိင်းၺၢပ်ႈဢၼ်လႂ်ၶႃႈ၊ ဝႃႈၼင်ႇၼႆယဝ်ႉၸင်ႇ၊ ယေႇသူႉၵေႃႈလၢတ်ႈလႄႈဝႃႈ၊ ယႃႇပေဢဝ် ဢသၢၵ်ႈၵူၼ်းတၢႆ။ ယႃႇပေၽိတ်းမေးပိူၼ်ႈ။ ယႃႇပေလၵ်ႉဢုၵ်ႉၸႃႇၶူဝ်းလဵင်းပိူၼ်ႈ။ ယႃႇပေၶၢမ်ႇသၢၵ်ႈသေႇ ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။- 19ႁဵတ်းရူဝ်ႇသေႇၵူဝ်ယမ်ပေႃႈမႄႈတႃႉ။ ႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉ မိူၼ်ၸိူဝ်ႉၼင်ႇတူဝ်ၸဝ်ႈၵဝ်ႇတႃႉ၊ ဝႃႈၼင်ႇၼႆဢေႃႈ။- 20ၵူၼ်းၼုမ်ႇၼၼ်ႉၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ပိင်းၺၢပ်ႈၵႃႈမီးတင်းသဵင်ႈတင်းလူင်ၸိူဝ်းၼၼ်ႉၸိုင် ၵဝ်ၶႃႈၵမ်ၵျၢင်ႉၶႃႈယဝ်ႉ။ ယင်းလူဝ်ႇထႅင်ႈဢၼ်လႂ်ၶႃႈ၊ ဝႃႈၼင်ႇၼႆဢေႃႈ။- 21ယေႇသူႉၵေႃႈလၢတ်ႈလႄႈဝႃႈ၊ ပေႃးမႂ်းၶႂ်ႈပဵၼ်ဢၼ်ၸေးၸုမ်ႇၸိုင် ၵႂႃႇၶၢႆဢုၵ်ႉၸႃႇၶူဝ်းလဵင်းမႂ်းသေလႄႈ ပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ႉၸိုင် တၵ်းလႆႈၽၼ်ႇတႃႇ ၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ ႁဵတ်းၸိူဝ်ႉၼင်ႇၼၼ်ႉယဝ်ႉၸင်ႇ၊ မႃးလႄႈၸွမ်းပႃႈလင်ၵဝ်တႃႉ၊ ဝႃႈၼင်ႇၼႆဢေႃႈ။- 22ၵူၼ်းၼုမ်ႇၼၼ်ႉ ငိၼ်းၵႂၢမ်းၼၼ်ႉသေယဝ်ႉ၊ ပိူဝ်ႈဢၼ်မၼ်းပဵၼ်ၵေႃႉဢၼ်ၸၢင်ႈမီးဢုၵ်ႉၸႃႇၶူဝ်းလဵင်းၼမ်ၼႃႇလႄႈ မီးတင်းၸႂ်ဢၼ်ဢမ်ႇသိူဝ်းဢမ်ႇပျေႃႇဢွၵ်ႇၵႂႃႇသေဢေႃႈ။

23 ယေႇသူႉလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵူၼ်းမၢၵ်ႈၵူၼ်းမီးၶဝ်ႈၼႂ်းမိူင်းၵၢင်ႁၢဝ်ၸဝ်ႈ ယၢပ်ႇလူင်ယၢပ်ႇလၢင်ဢေႃႈ။- 24ၵဝ်သမ်ႉဝႃႈတီႈသူၵမ်းၼိုင်ႈၸမ်ႉ၊ ၵလႃးဢုၵ်ႉလၼ်ႈႁူးၶဵမ်ငၢႆႈသေ ၵူၼ်းမၢၵ်ႈၵူၼ်းမီးၶဝ်ႈၼႂ်းမိူင်းၽြႃးပဵၼ်ၸဝ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။- 25တပႄးၸဝ်ႈၸိူဝ်းၼၼ်ႉ ငိၼ်းသေယဝ်ႉ၊ ၵႂင်ၸႂ်ယုင်ႈၸႂ်ၼႃႇလူင်လၢင်လႄႈဝႃႈ ပေႃးပဵၼ်ၸိူဝ်ႉၼင်ႇၼႆၸိုင် ၽူႈလႂ်တၵ်းႁွတ်ႈထိုင် တၢင်းဢၼ်ၵႄႇၶျွတ်ႈဢဝ်ၼၼ်ႉလႆႈၶႃႈ၊ ဝႃႈၼင်ႇၼႆဢေႃႈ။- 26ယေႇသူႉၵေႃႈတူၺ်းၶဝ်ၼၼ်ႉသေလႄႈ လၢတ်ႈလႄႈဝႃႈ၊ လွင်ႈတၢင်းၼႆႉၸိုင် ၵူၼ်းဢမ်ႇတၢတ်ႈၼိူင်ႇလႆႈ။ ၼႂ်းဝႃႈၼၼ်သေၵေႃႈ ၽြႃးပဵၼ်ၸဝ်ႈတၢတ်ႈၼိူင်ႇလွင်ႈတၢင်း တင်းသဵင်ႈတင်းလူင်လႆႈယူႇဢေႃႈ၊ ဝႃႈၼင်ႇၼႆဢေႃႈ။

27မိူဝ်ႈၼၼ်ႉ ပေႇတရူႉၵေႃႈ လဝ်ႊလၢတ်ႈလႄႈဝႃႈ၊ ႁဝ်းၶႃႈၼႆႉ ၸုၼ်ႉပႅတ်ႈၵႃႈဢၼ်မီးတင်းသဵင်ႈတင်းလူင်သေလႄႈ ၸွမ်းပႃႈလင်ၸဝ်ႈႁဝ်းၶႃႈယဝ်ႉ။ တၵ်းလႆႈဢၵျူဝ်းဢၼ်လႂ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 28ယေႇသူႉၵေႃႈ လၢတ်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၼႂ်းၶိင်ႇၵႃႇလႃႉဢၼ်မႄးႁဵတ်းဢၼ်မႂ်ႇ တင်းသဵင်ႈတင်းလူင် မိူဝ်ႈဢၼ်လုၵ်ႈၵူၼ်းၼင်ႈၵႃႈၼိူဝ်ပလၢင်ႇ ဢၼ်မီးမုၼ်ၽုင်းၼၼ်ႉ၊ သူၸိူဝ်းဢၼ်ၸွမ်းပႃႈလင်ၵဝ်ၼႆႉ တၵ်းလႆႈၼင်ႈၵႃႈၼိူဝ် ပလၢင်ႇသိပ်းသွင်ဢၼ်သေလႄႈ ၸီႇယၢင်ႇၵူၼ်းဢီႉသရေႇလႃႉ သိပ်းသွင်မဵဝ်းဢေႃႈ။- 29ၽူႈလႂ်သေဢမ်ႇဝႃႈ၊ ၵေႃႉဢၼ်ၸုၼ်ႉပႅတ်ႈႁိူၼ်း၊ ပီႈၼွင်ႉၸဵမ်ယိင်းၸဵမ်ၸၢႆး၊ ပေႃႈမႄႈ၊ လုၵ်ႈမေး၊ ႁႆႊၼႃးတင်းလၢႆ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ၼၼ်ႉ၊ ၵေႃႉၼၼ်ႉတၵ်းလႆႈဢၵျူဝ်းပဵၼ်ပုၼ်ႈၼမ်ၼႃႇလႄႈ ၶၢမ်ႇဢမူၺ်ႇထႃႇဝရႃႉဢသၢၵ်ႈဢေႃႈ။- 30ၶဝ်ၸိူဝ်းဢၼ် တူၵ်းဢွၼ်တၢင်းၼမ်ၼႃႇ တၵ်းတူၵ်းလိုၼ်းဢေႃႈ။ ၶဝ်ၸိူဝ်းဢၼ်တူၵ်းလိုၼ်းၼမ်ၼႃႇ တၵ်းတူၵ်းဢွၼ်တၢင်းဢေႃႈ။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 19: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക