မၢတ်ႈထႄႇ 17

ၼႃႈၸဝ်ႈယေႇသူႉႁိူဝ်ႈႁိူင်း

(တူၺ်း၊ မႃႇ 9:2-13။ လူႉ 9:28-36)

1မိူဝ်ႈဢၼ်ပူၼ်ႉႁူၵ်းဝၼ်းယဝ်ႉ၊ ယေႇသူႉႁွင်ႉဢဝ်ပေႇတရူႉ၊ ယႃႇၵုပ်ႈတင်းယူဝ်းႁၢၼ်ႇ ဢၼ်ပဵၼ်ၼွင်ႉၸၢႆး ယႃႇၵုပ်ႈၼၼ်ႉလႄႈ ၵႂႃႇၵႃႈၼိူဝ်လွႆဢၼ်သုင်ၵႃႈတီႈဢၼ် ပိူၼ်ႈဢမ်ႇမီးၼၼ်ႉဢေႃႈ။- 2ၵႃႈတီႈၽၢႆႇၼႃႈၶဝ်ၼၼ်ႉ မၼ်းၸဝ်ႈမီးတင်းႁၢင်ႈၽၢင်ဢၼ်လၢၵ်ႇလၢႆးလႄႈ ၼႃႈမၼ်းၸဝ်ႈႁိူဝ်ႈလႅင်းၸိူဝ်ႉၼင်ႇၵၢင်ဝၼ်းဢေႃႈ။ ၶူဝ်းၼုင်ႈမၼ်းၸဝ်ႈၵေႃႈ ၽိူၵ်ႇၶၢဝ်ၸိူဝ်ႉၼင်ႇဢၼ်လႅင်းဢေႃႈ။- 3မူဝ်းသေႇတင်းဢေးလီႉယႃႉ ထၢင်ႇသႃးပေႃႇမႃးတီႈၶဝ်လႄႈ လၢတ်ႈၵႂၢမ်းတေႃႇၵၼ်တင်းမၼ်းၸဝ်ႈယူႇဢေႃႈ။- 4မိူဝ်ႈၼၼ်ႉ ပေႇတရူႉၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵႃႈတီႈၼႆႈ ပုၼ်ႈဢၼ်ႁဝ်းၶႃႈတၵ်းယူႇၸိုင်၊ လီၶႃႈဢေႃႈ။ ပေႃးၸဝ်ႈႁဝ်းမီးဢလူဝ်ႇၸိုင်၊ ၵဝ်ၶႃႈတၵ်းႁဵတ်းသုမ်ႉသၢမ်လင်၊ ပုၼ်ႈၸဝ်ႈႁဝ်းလင်ၼိုင်ႈ၊ ပုၼ်ႈမူဝ်းသေႇလင်ၼိုင်ႈ၊ ပုၼ်ႈဢေးလီႉယႃႉလင်ၼိုင်ႈၶႃႈဢေႃႈ၊ ဝႃႈၼင်ႇၼႆဢေႃႈ။- 5ၼႂ်းမိူဝ်ႈဢၼ်မၼ်းယင်းတိုၵ်ႉလဝ်ႊလၢတ်ႈၸိူဝ်ႉၼင်ႇၼၼ်ယူႇၼၼ်ႉ၊ မွၵ်ႇၵုမ်ႈဢၼ်ႁိူဝ်ႈလႅင်းၼၼ်ႉ မုင်းႁူမ်ႇၶဝ်လႄႈ၊ သဵင်ပဵၼ်မႃးၵႃႈၼႂ်းမွၵ်ႇၵုမ်ႈၼၼ်ႉလႄႈဝႃႈ၊ ၵေႃႉၼႆႉၸမ်ႉ၊ ပဵၼ်လုၵ်ႈဢၼ်ၵဝ်ႁၵ်ႉၼႃႇ၊ တီႈဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ။ ထွမ်ႇဢဝ်ၵႂၢမ်းမၼ်းတႃႉ၊ ဝႃႈၼင်ႇၼႆဢေႃႈ။- 6တပႄးၸဝ်ႈၸိူဝ်းၼၼ်ႉ ငိၼ်းသေယဝ်ႉ၊ လူမ်ႉဢူပ်ႇပူပ်ႇသေလႄႈ မီးၸႂ်ဢၼ်ၵူဝ်ႁႄၼႃႇလူင်လၢင်ဢေႃႈ။- 7ယေႇသူႉမႃးသေလႄႈ ဢဝ်မိုဝ်းတိူဝ်ႉၶဝ်လႄႈဝႃႈ၊ လုၵ်ႉတႃႉ။ ယႃႇပေၵူဝ်ပေႁႄ၊ ဝႃႈၼင်ႇၼႆဢေႃႈ။- 8ၶဝ်ႁႅၼ်တူၺ်းလႄႈ၊ လိူဝ်သေယေႇသူႉပႃးလဵဝ်ၵူၺ်း၊ ဢမ်ႇႁၼ်ၽူႈလႂ်သေၵေႃႉသေၵူၼ်း။

9ၼႂ်းမိူဝ်ႈဢၼ်ၶဝ်လူင်းသေၵႃႈၼိူဝ်လွႆမႃးယူႇၼၼ်ႉၸိုင်၊ ယေႇသူႉပိင်းၺၢပ်ႈဝႆႉတီႈၶဝ်လႄႈဝႃႈ၊ ၸူဝ်ႈဢၼ်လုၵ်ႈၵူၼ်း ဢမ်ႇပႆႇလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉၸိုင် ယႃႇပေလၢတ်ႈရူႇပႃႇရူင်ႇဢၼ်သူလႆႈႁၼ်ၼႆႉ တီႈၽူႈလႂ်သေၵေႃႉသေၵူၼ်း၊ ဝႃႈၼင်ႇၼႆဢေႃႈ။

10မိူဝ်ႈၼၼ်ႉ တပႄးၸဝ်ႈၸိူဝ်းၼၼ်ႉ လဝ်ႊထၢမ်လႄႈဝႃႈ၊ ဢေးလီႉယႃႉတၵ်းလႆႈမႃးဢွၼ်တၢင်းဝႃႈၼႆ၊ ႁဵတ်းသင်လႄႈ ၵူၼ်းထုတ်ႇၵျၢမ်းတင်းလၢႆ ဝႃႈၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 11မၼ်းၸဝ်ႈၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ ဢေးလီႉယႃႉတၵ်းလႆႈမႃးလႄႈ မႄးႁဵတ်းဝႆႉတင်းသဵင်ႈတင်းလူင် ဢမၢၼ်ႇၶၼ်ပဵၼ်ဢေႃႈ။- 12ၵဝ်ဝႃႈတီႈသူၸမ်ႉ ဢေးလီႉယႃႉႁွတ်ႈမႃးယဝ်ႉ။ ၵူၼ်းတင်းလၢႆဢမ်ႇႁူႉၸၵ်းမၼ်းလႄႈ ႁဵတ်းတီႈမၼ်းၵႃႈၼင်ႇဢၼ် ၶဝ်ၶႂ်ႈႁဵတ်းၼၼ်ႉယဝ်ႉ။ မိူၼ်ၼင်ႇၼၼ် လုၵ်ႈၵူၼ်းၵေႃႈ တၵ်းလႆႈၶၢမ်ႇၼႂ်းမိုဝ်းၵူၼ်းတင်းလၢႆဢေႃႈ၊ ဝႃႈၼင်ႇၼႆဢေႃႈ။- 13ၵမ်းၼၼ်ႉ တပႄးၸဝ်ႈၸိူဝ်းၼၼ်ႉ ႁူႉလွင်ႈဢၼ်မၼ်းၸဝ်ႈလၢတ်ႈလွင်ႈ ယူဝ်းႁၢၼ်ႇဢၼ်ပၼ်ပပ်ႉတီႉၸမ်ႇၼၼ်ႉဢေႃႈ။

ၸဝ်ႈယေႇသူႉႁေႃႈၽီမႃႈမူဢွၵ်ႇသေၸၢႆးဢွၼ်ႇ

(တူၺ်း၊ မႃႇ 9:14-29။ လူႉ 9:37-43)

14မိူဝ်ႈဢၼ် ၶဝ်ႁွတ်ႈထိုင်ၵႃႈတီႈဢၼ်ၵူၼ်းဢၼ်ၸူႉဢၼ်တုမ်မီးယူႇၼၼ်ႉၸိုင်၊ ၵူၼ်းၵေႃႉၼိုင်ႈ သုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈ ၶုပ်ႉၶဝ်ႇလဝ်ႊလၢတ်ႈလႄႈဝႃႈ၊- 15ၸဝ်ႈႁဝ်းဢဵတ်းလူလုၵ်ႈၸၢႆးၵဝ်ၶႃႈသေၵမ်းၶႃႈ။ မၼ်းၸပ်းတၢင်းပဵၼ်မႃႈမူလႄႈ လႆႈၶၢမ်ႇၼႃႇလူင်လၢင်ၶႃႈဢေႃႈ။ ၸၢင်ႈလူမ်ႉတူၵ်းၵႃႈၼႂ်းၽႆးလႂ်၊ ၵႃႈၼႂ်းၼမ်ႉလႂ် ၶိူဝ်းၶိူဝ်းယႂ်းယႂ်းၶႃႈဢေႃႈ။- 16ၵဝ်ၶႃႈဢဝ်မၼ်းမႃးတီႈတပႄးၸဝ်ႈႁဝ်းတင်းလၢႆလႄႈ ၶဝ်ဢမ်ႇပၼ်ၵတ်းယဵၼ်ၶျၢမ်းသႃႇလႆႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 17ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၵူၼ်းမဵဝ်းဢၼ်ဢမ်ႇမီးတၢင်းဢၼ်ယုမ်ႇမၢတ်ႈလႄႈ ၸၢင်ႈၶၢႆႉပုတ်ႈၼႆႉဢိူၺ်း၊ ၵဝ်တၵ်းလႆႈမီးယူႇလူၺ်ႈၵၼ်တင်းသူလၢႆၶိင်ႇလၢႆမိူဝ်ႈ။ တၵ်းလႆႈယိူၼ်ႉၶၢမ်ႇသူ လၢႆၶိင်ႇလၢႆမိူဝ်ႈ။ ဢဝ်လုၵ်ႈဢွၼ်ႇၼၼ်ႉ မႃးတီႈၵဝ်တႃႉ၊ ဝႃႈၼင်ႇၼႆဢေႃႈ။- 18ယေႇသူႉသင်ႇသွၼ်မၼ်းသေယဝ်ႉ၊ ၽီႁၢႆႉၼၼ်ႉဢွၵ်ႇသေၵႃႈၼႂ်းမၼ်းလႄႈ လုၵ်ႈဢွၼ်ႇၼၼ်ႉ ၶႅၼ်းမႃးၸႃႉၸဵမ်ၶိင်ႇၼႃႇရီႇၼၼ်ႉဢေႃႈ။

19မိူဝ်ႈၼၼ်ႉ တပႄးၸဝ်ႈၸိူဝ်းၼၼ်ႉ သုတ်ႉၸပ်းသုတ်ႉၸူးတီႈ ယေႇသူႉၼႂ်းတီႈဢၼ်ပိူၼ်ႈဢမ်ႇမီးၼၼ်ႉသေလႄႈ လဝ်ႊလၢတ်ႈလႄႈဝႃႈ၊ ႁဵတ်းသင်လႄႈ ႁဝ်းၶႃႈဢမ်ႇႁေႃႈၽီႁၢႆႉၼၼ်ႉဢွၵ်ႇပႅတ်ႈလႆႈၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 20မၼ်းၸဝ်ႈၵေႃႈလၢတ်ႈလႄႈဝႃႈ၊ ပိူဝ်ႈဢၼ်သူဢမ်ႇမီးတၢင်းဢၼ်ယုမ်ႇမၢတ်ႈလႄႈ သူဢမ်ႇႁေႃႈပႅတ်ႈလႆႈ။ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ပေႃးသူမီးတၢင်းဢၼ်ယုမ်ႇမၢတ်ႈ ထၢၼ်ႇၽၼ်းၽၵ်းၵၢတ်ႇမဵတ်ႉၼိုင်ႈၸိုင်၊ မိူဝ်ႈဢၼ်သူလၢတ်ႈတီႈလွႆၼႆႉလႄႈဝႃႈ၊ ၶၢႆႉတီႈမႂ်းတႃႉ၊ ဝႃႈၼင်ႇၼႆၼၼ်ႉ၊ မၼ်းတၵ်းၶၢႆႉဢေႃႈ။ ဢၼ်သူႁဵတ်းလႄႈ ဢမ်ႇပဵၼ်လႆႈၼၼ်ႉ ဢမ်ႇမီးၵႃႈသင်သေၸိူဝ်ႉသေပိူင်။- 21ၼႂ်းဝႃႈၼၼ်သေၵေႃႈ လိူဝ်သေၵွပ်ႈပိူဝ်ႈတၢင်းဢၼ်သူးတွင်းလႄႈ ၵမ်တၢင်းၵိၼ်ၼၼ်ႉၵူၺ်း၊ ၵွပ်ႈပိူဝ်ႈၵႃႈသင်သေဢမ်ႇဝႃႈ၊ မဵဝ်းၼၼ်ႉဢမ်ႇၸၢင်ႈဢွၵ်ႇ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉလၢတ်ႈလွင်ႈတၢင်းတၢႆၸဝ်ႈထႅင်ႈ

(တူၺ်း၊ မႃႇ 9:30-32။ လူႉ 9:43-45)

22ၼႂ်းမိူဝ်ႈဢၼ် ၶဝ်ယူႇၵႃႈၼႂ်းမိူင်းၵႃႇလီႉလႄးယူႇၼၼ်ႉၸိုင်၊ ယေႇသူႉလၢတ်ႈတီႈၶဝ်လႄႈဝႃႈ၊ လုၵ်ႈၵူၼ်းၸမ်တၵ်းလႆႈၶၢမ်ႇ တၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတင်းလၢႆဢေႃႈ။- 23ၶဝ်တၵ်းဢဝ်တၢႆဢေႃႈ။ မၼ်းတၵ်းလုၵ်ႉၶိုၼ်းၼႂ်းဝၼ်းဢၼ် ထူၼ်ႈထိုင်သၢမ်ဝၼ်းၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉၵေႃႈ မီးၸႂ်ဢၼ်လဵၵ်ႉၼႃႇလူင်လၢင်ဢေႃႈ။

လွင်ႈဢၼ်ထၢမ်းၶွၼ်ႇၵျွင်းပိၵ်ႈမၢၼ်ႇၸဝ်ႈ

24မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဝဵင်း ၵပိူဝ်ႇၼေႇဢုမ်ႇၼၼ်ႉၸိုင်၊ ၶဝ်ၸိူဝ်းဢၼ်ၵဵပ်းငိုၼ်း တီႉတြၵ်ႈမႃႉ#17:24 ငိုၼ်းတီႉတြၵ်ႈမႃႉ - ၶႂ်ႈဝႃႈငိုၼ်းၶွၼ်ႇၵျွင်းပိၵ်ႈမၢၼ်ႇၸဝ်ႈ။ၼၼ်ႉမႃးတီႈပေႇတရူႉလႄႈထၢမ်ဝႃႈ၊ သြႃႇမႂ်းဢမ်ႇပၼ်ငိုၼ်းတီႉတြၵ်ႈမႃႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 25မၼ်းၵေႃႈလၢတ်ႈလႄႈဝႃႈ၊ ၸႂ်ႈၶႃႈယဝ်ႉ၊ ဝႃႈၼင်ႇၼႆဢေႃႈ။ မိူဝ်ႈဢၼ်မၼ်းၶဝ်ႈၵႂႃႇၵႃႈၼႂ်းႁိူၼ်းၸိုင်၊ ယေႇသူႉႁႄႉလၢတ်ႈလႄႈဝႃႈ၊ သီႉမုၼ်ႇဢိူၺ်း၊ မႂ်းထၢင်ႇၸိူဝ်ႉၼင်ႇႁိုဝ်။ ၶုၼ်ႁေႃၶမ်းလေႃးၵီႇတင်းလၢႆ ၵဵပ်းဢဝ်ၶွၼ်ႇတီႈၽူႈလႂ်။ ၵဵပ်းဢဝ်တီႈလုၵ်ႈလၢင်းၶဝ်ႁိုဝ်။ ၵဵပ်းဢဝ်တီႈပိူၼ်ႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 26မၼ်းၵေႃႈလဝ်ႊလၢတ်ႈလႄႈဝႃႈ၊ ၵဵပ်းဢဝ်တီႈပိူၼ်ႈၶႃႈဢေႃႈ၊ ဝႃႈၼင်ႇၼႆဢေႃႈ။ ယေႇသူႉၵေႃႈ လၢတ်ႈတီႈမၼ်းလႄႈဝႃႈ၊ ပေႃးပဵၼ်ၸိူဝ်ႉၼင်ႇၼႆၸိုင်၊ လုၵ်ႈလၢင်းတင်းလၢႆၸမ်ႉ၊ လႆႈလွတ်ႈဢေႃႈ။- 27ၼႂ်းဝႃႈၼၼ်သေၵေႃႈ လွင်ႈၼင်ႇႁိုဝ် ၶဝ်တၵ်းဢမ်ႇလႆႈၽိတ်းပိူင်ႈၵွပ်ႈပိူဝ်ႈႁဝ်းၸိုင်၊ ၵႂႃႇၵႃႈတီႈၼွင်ပုၼ်ႉသေယဝ်ႉ၊ ၶျႃးမဵတ်းလႄႈ ဢဝ်ပႃဢၼ်လႆႈဢွၼ်တၢင်းၼၼ်ႉတႃႉ။ ပေႃးၽုၺ်ႇဢႃႈသူပ်းမၼ်းၸိုင်၊ တၵ်းထူပ်းသတႃႇတႄႇၶႅပ်းၼိုင်ႈဢေႃႈ။ဢဝ်ဢၼ်ၼၼ်ႉလႄႈ ပၼ်ပုၼ်ႈၵဝ် တင်းပုၼ်ႈမႂ်းတီႈၶဝ်ၼၼ်ႉတႃႉ၊ ဝႃႈၼင်ႇၼႆဢေႃႈ။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 17: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക