ယေႇၸၵျေႇလႃႉ 45
45
ၽႄမႅင်ႇပၼ်ဢမူၺ်ႇၵႂၢၵ်ႈလိၼ်ပုၼ်ႈထႃႇဝရႃႉၽြႃး
1မိူဝ်ႈဢၼ်သူ တူၵ်းၸႃႇၵွၵ်ႈသေလႄႈ ၽႄလိၼ်မႅင်ႇပၼ် ႁႂ်ႈလႆႈၶၢမ်ႇဢမူၺ်ႇၼၼ်ႉၸိုင်၊ သူတၵ်းလႆႈဢွၼ်ၵၼ်ဢဝ် ၵႂၢၵ်ႈလိၼ်ဢၼ်မူတ်းၸၢင်ႇၵႂၢၵ်ႈၼိုင်ႈ ႁဵတ်းတၢင်းပုၵ်ႈၸေႃႇ ဢၼ်ယုၵ်ႉယွင်ႈတီႈထႃႇဝရႃႉၽြႃးဢေႃႈ။ ၵႂၢၵ်ႈၼၼ်ႉၼႃႈယၢဝ်းမၼ်း တၵ်းလႆႈမီးသွင်မိုၼ်ႇပၢႆႁႃႈႁဵင်တႅၵ်ႈ၊ ၼႃႈပွတ်းမၼ်း မိုၼ်ႇၼိုင်ႈဢေႃႈ။ တၵ်းလႆႈပဵၼ်ဢၼ်မူတ်းၸၢင်ႇၵႃႈၼႂ်းၶွပ်ႇၼမ်ႉလႅၼ်လိၼ်မၼ်းၵႃႈမီးၼၼ်ႉဢေႃႈ- 2ၵႃႈၼႂ်းၵႂၢၵ်ႈလိၼ်ၼၼ်ႉ၊ ၵႂၢၵ်ႈသီႇၸဵင်ႇၶိုင်ႈ ဢၼ်ၼႃႈယၢဝ်းမၼ်း မီးႁႃႈပၢၵ်ႇတႅၵ်ႈၼၼ်ႉ တၵ်းလႆႈပဵၼ် ပုၼ်ႈထႃႇၼႃႉတီႈမူတ်းၸၢင်ႇ ဢေႃႈ။ ၵႃႈတီႈႁိမ်းႁွမ်းလဵပ်ႈႁွပ်ႈမၼ်းၼၼ်ႉ တၵ်းလႆႈမီးလိၼ်ဢၼ်ပဝ်ႇဢၼ်လၢပ်ႈ ႁႃႈသိပ်းသွၵ်ႇဢေႃႈ။- 3ၼင်ႇၼၼ်လႄႈ မႂ်းတႅၵ်ႈၼႃႈယၢဝ်းသွင်မိုၼ်ႇပၢႆႁႃႈႁဵင်၊ ၼႃႈပွတ်းမိုၼ်ႇၼိုင်ႈသေယဝ်ႉ၊ တၵ်းလႆႈပဵၼ်တီႈဢၼ်မူတ်းၸၢင်ႇ၊ တီႈဢၼ်တႄႇႁဵတ်းထႃႇၼႃႉတီႈမူတ်းၸၢင်ႇၼႃႇသေပိူၼ်ႈဢေႃႈ။- 4လိၼ်ဢၼ်မူတ်းၸၢင်ႇၼၼ်ႉ တၵ်းလႆႈပဵၼ်ပုၼ်ႈယိတ်ႈပရေႃးႁဵၵ်ႈဢၼ်ဝႃႈ ၶဝ်ၸိူဝ်းဢၼ်ပႂ်ႉထႃႇၼႃႉတီႈမူတ်းၸၢင်ႇလႄႈ သုတ်ႉၸပ်းသုတ်ႉၸူး ႁႂ်ႈလႆႈပွင်ႁဵတ်းဢမူႉ ထႃႇဝရႃႉၽြႃးၼၼ်ႉဢေႃႈ။ တၵ်းလႆႈပဵၼ်လိၼ်တီႈပုၼ်ႈဢၼ်ၶဝ်တၵ်းႁဵတ်းႁိူၼ်း ဢိၵ်ႇတင်း တီႈဢၼ်မူတ်းၸၢင်ႇပုၼ်ႈဢၼ်ၶဝ်တၵ်းတႄႇႁဵတ်းထႃႇၼႃႉတီႈမူတ်းၸၢင်ႇဢေႃႈ။- 5ၵႂၢၵ်ႈဢၼ်ၼႃႈယၢဝ်းမီးသွင်မိုၼ်ႇပၢႆႁႃႈႁဵင်၊ ၼႃႈပွတ်းမီးမိုၼ်ႇၼိုင်ႈၼၼ်ႉ တၵ်းလႆႈပဵၼ် ပုၼ်ႈဢၼ်ၵူၼ်းလေႇဝီႉ ဢၼ်ပႂ်ႉဢမူႉ ႁိူၼ်းၸဝ်ႈၸိူဝ်းၼၼ်ႉ တၵ်းလႆႈပိူင်ႇႁႂ်ႈလႆႈ တႄႇႁဵတ်းလုၵ်းသၢဝ်းလုၵ်းဢေႃႈ။- 6သူတၵ်းလႆႈၶၼ်ႈလိၼ် ဢၼ်ပဵၼ်ပုၼ်ႈ ဢၼ်ဝဵင်းၸဝ်ႈတၵ်းပိူင်ႇၼၼ်ႉ ၵႃႈတီႈသွင်ၽၢၵ်ႇၶၢင်ႈလိၼ် တၵ်းပုၵ်ႈၸေႃႇဢၼ် မူတ်းၸၢင်ႇၼၼ်ႉ ဝႆႉလႄႈ ၼႃႈယၢဝ်းမၼ်းတၵ်းလႆႈ မီးမိုၼ်ႇပၢႆႁႃႈႁဵင်၊ ၼႃႈပွတ်းမၼ်း ႁႃႈႁဵင်ဢေႃႈ။ တၵ်းလႆႈပဵၼ်ပုၼ်ႈ ၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင်ဢေႃႈ။
ၵႂၢၵ်ႈလိၼ်ပုၼ်ႈလုၵ်ႈၶုၼ်လုၵ်ႈၵႂၢၼ်
7ၵႃႈတီႈသွင်ၽၢၵ်ႇၶၢင်ႈ ၵႂၢၵ်ႈလိၼ်တၢင်းပုၵ်ႈၸေႃႇ ဢၼ်မူတ်းၸၢင်ႇ ဢိၵ်ႇတင်းလိၼ်ဢၼ်ဝဵင်းၸဝ်ႈပိူင်ႇၼၼ်ႉ၊ ၽၢႆႇၼႃႈၵႂၢၵ်ႈလိၼ် တၢင်းပုၵ်ႈၸေႃႇ ဢၼ်မူတ်းၸၢင်ႇ ဢိၵ်ႇတင်းၽၢႆႇၼႃႈလိၼ် ဢၼ်ဝဵင်းၸဝ်ႈပိူင်ႇၼၼ်ႉ ဢၼ်ဝႃႈ ပွတ်းၽၢႆႇတၢင်းတူၵ်း ဢိၵ်ႇတင်း ပွတ်းၽၢႆႇတၢင်းဢွၵ်ႇ ဢၼ်ၼႃႈယၢဝ်းမၼ်းတၢၼ်ႇပဵင်းၵၼ် တင်းၵႂၢၵ်ႈလိၼ်ဢၼ်ၼိုင်ႈ ဢဝ်ၵႃႈတီႈလႅၼ်သုတ်းမၼ်း ၽၢႆႇဝၼ်းတူၵ်း တေႃႇထိုင်ႁွတ်ႈ လႅၼ်သုတ်းမၼ်းၽၢႆႇဝၼ်းဢွၵ်ႇၼၼ်ႉ တၵ်းလႆႈပဵၼ်ပုၼ်ႈၶုၼ်ဢေႃႈ။- 8လိၼ်ၼၼ်ႉတၵ်းလႆႈပဵၼ်လိၼ်ဢၼ် ၶုၼ်ပိူင်ႇၵႃႈၼႂ်းမိူင်းဢီႉသရေႇလႃႉလႄႈ ၵမ်းလိုၼ်းၶုၼ်ၵဝ်တင်းလၢႆ တၵ်းဢမ်ႇလႆႈ ၼိၵ်ႈၸၢၵ်ႈငႅၼ်းသႄးၵူၼ်းၵဝ်တင်းလၢႆ။ ၶဝ်တၵ်းလႆႈဢဝ်လိၼ် ဢၼ်ယင်းၵိုတ်းယင်းၵျၢၼ်ႇၼၼ်ႉ ၽႄမႅင်ႇပၼ် တီႈမဵဝ်းဢီႉသရေႇလႃႉ ၸွမ်းလူၺ်ႈမဵဝ်းၽႂ်မဵဝ်းမၼ်းဢေႃႈ။
ၼႄးဢူႉပတေႇပုၼ်ႈလုၵ်ႈၶုၼ်လုၵ်ႈၵႂၢၼ်
9ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၶုၼ်ဢီႉသရေႇလႃႉၶဝ်ဢိူၺ်း၊ သူဢွၼ်ၵၼ် မီးတၢင်းဢၼ်ပေႇၸႂ်ဢိမ်ႇၸႂ်တႃႉ။ ဢွၼ်ၵၼ် ပႄႇပႅတ်ႈဢမူႉတၢင်းဢၼ်ႁဵတ်းပႄႉႁဵတ်းၼႅင်ႇ၊ တၢင်းဢၼ်ႁိမ်ဢဝ်ႁူင်ႇဢဝ် တင်းလၢႆသေလႄႈ ႁဵတ်းဢမူႉတၢင်းဢၼ် ၸွမ်းၼင်ႇတြႃး ဢမူႉတၢင်းဢၼ်ၸီႇယၢင်ႇသိုဝ်ႈသိုဝ်ႈတေႃႇတေႃႇတႃႉ။ ၵမ်းလိုၼ်းယႃႇပေဢွၼ်ၵၼ် ၼိၵ်ႈၸၢၵ်ႈငႅၼ်းသႄးၵူၼ်းၵဝ်တင်းလၢႆ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။- 10သူတၵ်းလႆႈဢွၼ်ၵၼ်သုင်းသွင်ႇယႃႇၸူႇ ဢၼ်မၢၼ်ႇဢၼ်မႅၼ်ႈ၊ ဢေးၽႃႇဢၼ်မၢၼ်ႇဢၼ်မႅၼ်ႈ၊ ပၢတ်ႈဢၼ်မၢၼ်ႇဢၼ်မႅၼ်ႈ ဢေႃႈ။- 11ဢေးၽႃႇဢိၵ်ႇတင်းပၢတ်ႈၼၼ်ႉ တၵ်းလႆႈတၢၼ်ႇၵၼ်ပဵင်းၵၼ်ဢေႃႈ။ သွင်ၸိူဝ်ႉသွင်ပိူင်ၼၼ်ႉ တၵ်းလႆႈဢိင်ႁေႃးမႄးသေလႄႈ၊ ဢေးၽႃႇၼၼ်ႉ တၵ်းလႆႈမီးႁေႃးမႄးသိပ်းပုၼ်ႈ ပုၼ်ႈၼိုင်ႈ၊ ပၢတ်ႈၵေႃႈတၵ်းလႆႈမီးႁေႃးမႄးသိပ်းပုၼ်ႈ ပုၼ်ႈၼိုင်ႈဢေႃႈ။- 12သၢဝ်းၵေးရႃႉ တၵ်းလႆႈပဵၼ် ၵျၢပ်ႈသၶေးလႃႉၵျၢပ်ႈၼိုင်ႈ လႄႈ သၢဝ်းၵျၢပ်ႈ၊ သၢဝ်းႁႃႈၵျၢပ်ႈ၊ သိပ်းႁႃႈၵျၢပ်ႈ တၵ်းလႆႈပဵၼ် မႃးၼႄးၼိုင်ႈ ဢေႃႈ။
ဝၼ်းပွႆးထမ်ႇမႃႉတင်းလၢႆ
(ဢွၵ်ႇ 12:1-20။ ႁဵတ်း 23:33-43)
13မိူဝ်ႈဢၼ်သူႁဵတ်းတၢင်းပုၵ်ႈၸေႃႇ ဢၼ်ယုၵ်ႉယွင်ႈၼၼ်ႉၸိုင်၊ သူတၵ်းလႆႈဢဝ် ဢေးၽႃႇႁူၵ်းပုၼ်ႈပုၼ်ႈၼိုင်ႈ ၵႃႈၼႂ်း ၶဝ်ႈသၢၼ်ၵျုင်ႇ ႁေႃးမႄးၼိုင်ႈဢေႃႈ။ ၶဝ်ႈသၢၼ်မူႉယေႃးၵေႃႈ မႂ်းတၵ်းလႆႈဢဝ်ဢေးၽႃႇႁူၵ်းပုၼ်ႈပုၼ်ႈၼိုင်ႈ ၵႃႈၼႂ်းႁေႃးမႄးၼိုင်ႈ ပုၵ်ႈၸေႃႇ ဢေႃႈ။- 14ပိင်းၺၢပ်ႈ ဢၼ်ၸၢပ်ႈသႅင်ႇၵၼ်တင်းၼမ်ႉမၼ်းၸမ်ႉ၊ တၵ်းလႆႈဢဝ်ပၢတ်ႈသိပ်းပုၼ်ႈပုၼ်ႈၼိုင်ႈ ၵႃႈၼႂ်းၵေႃးရႃႉၼိုင်ႈ ဢၼ်ပဵၼ် သိပ်းပၢတ်ႈ ဢၼ်ဝႃႈ ႁေႃးမႄးၼိုင်ႈ ၼၼ်ႉ ပုၵ်ႈၸေႃႇဢေႃႈ။- 15ၼင်ႇႁိုဝ်တၵ်းၽေႇဢပႅတ်ႈၶဝ်ၸိုင်၊ တၵ်းလႆႈဢဝ်သူဝ်းဢွၼ်ႇ ၵႃႈၼႂ်းသူဝ်းသွင်ပၢၵ်ႇ ဢၼ်မီးၵႃႈၼႂ်း တီႈဢၼ်ၼမ်ႉၼမ်၊ တီႈဢၼ်ဢီႉသရေႇလႃႉ ယၢမ်ႈၵိၼ်ယူႇၼၼ်ႉတူဝ်ၼိုင်ႈ ပုၵ်ႈၸေႃႇဢေႃႈ။ ဢၼ်ၼႆႉၸမ်ႉ တၵ်းလႆႈပဵၼ်ၶိူင်ႈပုၵ်ႈၸေႃႇ ၽေႃးၸဵၼ်ႇ၊ ယိတ်ႈဢၼ်တုတ်ႇၽႆး၊ ယိတ်ႈမိၵ်ႉသႃႇႁႃယႃႉ ပုၼ်ႈဢၼ်တၵ်းၽေႇဢပႅတ်ႈဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။- 16ၶိူင်ႈပုၵ်ႈၸေႃႇ ဢၼ်ယုၵ်ႉယွင်ႈၼၼ်ႉၸိုင်၊ ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင် တၵ်းလႆႈဢွၼ်ၵၼ်ဢဝ်သၢၵ်ႈပၼ် တီႈၶုၼ်ဢီႉသရေႇလႃႉဢေႃႈ။- 17ၶုၼ်ၼၼ်ႉၵေႃႈ တၵ်းလႆႈဢဝ်ပုၵ်ႈၸေႃႇ ယိတ်ႈဢၼ်တုတ်ႇၽႆး ၶိူင်ႈပုၵ်ႈၸေႃႇၽေႃးၸဵၼ်ႇ၊ ၶိူင်ႈပုၵ်ႈၸေႃႇဢၼ်သွၼ်းလေႃႇ ၼႂ်းဝၼ်းႁဵတ်းပွႆး၊ ဝၼ်းလိူၼ်မႂ်ႇ၊ ဝၼ်းၵမ်သိၼ်၊ ဝၼ်းဢၼ်ပရဵၵ်ႈသၢတ်ႈမဵဝ်းဢီႉသရေႇလႃႉ ၸၢင်ႈၸူႉၵၼ်တုမ်ၵၼ် ၵႃႈၼင်ႇဢၼ် ၸႅၼ်ႇတၢမ်းၵၼ်ၼၼ်ႉဢေႃႈ။ မၼ်းတၵ်းလႆႈမႄးႁဵတ်းမႄးႁႅၼ်း ယိတ်ႈဢၼ်ၽေႇဢပႅတ်ႈ၊ ၶိူင်ႈပုၵ်ႈၸေႃႇ ၽေႃးၸဵၼ်ႇ၊ ယိတ်ႈဢၼ်တုတ်ႇၽႆး၊ ယိတ်ႈမိၵ်ႉသႃႇႁႃယႃႉ၊ ႁႂ်ႈလႆႈၽေႇဢပႅတ်ႈ မဵဝ်းဢီႉသရေႇလႃႉဢေႃႈ။
18ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းဝၼ်းလိူၼ်ပထမႃႉဝၼ်းၼိုင်ႈၼၼ်ႉ၊ မႂ်းတၵ်းလႆႈဢဝ်ဝူဝ်းပေႃႈၼုမ်ႇ ဢၼ်ဢမ်ႇပႃးဢပႅတ်ႈၼၼ်ႉတူဝ်ၼိုင်ႈလႄႈ ႁႂ်ႈထႃႇၼႃႉတီႈမူတ်းၸၢင်ႇမူတ်းသႂ်ဢေႃႈ။- 19ယိတ်ႈပရေႃးႁဵၵ်ႈ တၵ်းလႆႈဢဝ်လိူတ်ႈတူဝ်ယိတ်ႈ ဢၼ်ၽေႇဢပႅတ်ႈၼၼ်ႉ ၵမ်ႈၽွင်ႈလႄႈသႂ်ႇၵႃႈတီႈ သဝ်ၽၵ်းတူ ႁိူၼ်းၸဝ်ႈ၊ ၵႃႈတီႈသီႇၸဵင်ႇ ၶူင်ႇႁၢၼ်ႉတႂ်ႈယိတ်ႈပလၢင်ႇ ဢိၵ်ႇတင်း ၵႃႈတီႈသဝ်ၽၵ်းတူတမ်ႇတိူင်း ဢၼ်ၵႃႈၼႂ်းၸိူဝ်းၼၼ်ႉဢေႃႈ။- 20ၼွၵ်ႈသေၼၼ်ႉ ၼႂ်းဝၼ်းသတ်ႉတမႃႉၵေႃႈ မႂ်းတၵ်းလႆႈပုၵ်ႈၸေႃႇ မိူၼ်ၸိူဝ်ႉၼင်ႇၼၼ် ပုၼ်ႈၵေႃႉဢၼ်ၽိတ်းပိူင်ႈ ဢိၵ်ႇတင်းၵေႃႈဢၼ်ငိူဝ်ႈငႃႉၼၼ်ႉလႄႈ ႁဵတ်းမင်ႇၵလႃႇ တၢင်းဢၼ်ၽေႇဢပႅတ်ႈ ပုၼ်ႈႁိူၼ်းၸဝ်ႈဢေႃႈ။
21ၼႂ်းလိူၼ်ပထမႃႉသိပ်းသီႇဝၼ်းၼၼ်ႉ သူတၵ်းလႆႈၶၢမ်ႇပွႆးပႃႉသၶႃႇ ဢၼ်ဝႃႈ ပွႆးၸဵတ်းဝၼ်းတဵမ်တဵမ်ၼၼ်ႉလႄႈ တၵ်းလႆႈၵိၼ် ၶဝ်ႈမုၼ်း ဢၼ်ဢမ်ႇပႃးၸိူဝ်ႉပႅင်ႈၵူၺ်းဢေႃႈ။- 22ၼႂ်းဝၼ်းၼၼ်ႉ ၶုၼ်ၼၼ်ႉ တၵ်းလႆႈဢဝ်ဝူဝ်းပေႃႈ တူဝ်ၼိုင်ႈ မႄးႁဵတ်းမႄးႁႅၼ်း ယိတ်ႈဢၼ်ၽေႇဢပႅတ်ႈ ပုၼ်ႈတူဝ်ၸဝ်ႈၵဝ်ႇ ဢိၵ်ႇတင်း ပုၼ်ႈၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင်ဢေႃႈ။- 23ၼႂ်းဝၼ်းပွႆးၸဵတ်းဝၼ်းတဵမ်တဵမ်ၼၼ်ႉ မၼ်းတၵ်းလႆႈမႄးႁဵတ်းမႄးႁႅၼ်း ဝူဝ်းပေႃႈ ၸဵတ်းတူဝ်၊ သူဝ်းပေႃႈဢၼ်ဢမ်ႇပႃးဢပႅတ်ႈ ၸဵတ်းတူဝ်ပုၼ်ႈယိတ်ႈဢၼ်တုတ်ႇၽႆး တီႈထႃႇဝရႃႉၽြႃး ဢိၵ်ႇတင်း ပႄႉဢွၼ်ႇတူဝ်ၼိုင်ႈ ပုၼ်ႈယိတ်ႈဢၼ်ၽေႇဢပႅတ်ႈ ၼႂ်းၸဵတ်းဝၼ်းၼၼ်ႉ ၵူႈဝၼ်းဢေႃႈ။- 24မၼ်းတၵ်းလႆႈ ပွင်ႁႅၼ်းပွင်မႄး ၶိူင်ႈပုၵ်ႈၸေႃႇၽေႃးၸဵၼ်ႇ ဢၼ်ဝႃႈ ၽွင်ၶဝ်ႈမုၼ်း ဢေးၽႃႇၼိုင်ႈ ပုၼ်ႈဝူဝ်းတူဝ်ၼိုင်ႈ၊ ဢေးၽႃႇၼိုင်ႈ ပုၼ်ႈသူဝ်းပေႃႈ တူဝ်ၼိုင်ႈ ဢိၵ်ႇတင်း ၼမ်ႉမၼ်းယေႈႁီႉၼႃႉ ပုၼ်ႈဢေးၽႃႇၼၼ်ႉဢေႃႈ။- 25ၼႂ်းလိူၼ်သတ်ႉတမႃႉ သိပ်းပၢႆႁႃႈဝၼ်းၼၼ်ႉ မၼ်းတၵ်းလႆႈၶၢမ်ႇပွႆးလႄႈ ႁဵတ်းၸိူဝ်ႉၼင်ႇၼၼ် ၸဵတ်းဝၼ်းတဵမ်တဵမ် ၸွမ်းၵႃႈၼင်ႇဢၼ်ႁဵတ်း ယိတ်ႈဢၼ်ၽေႇဢပႅတ်ႈ၊ ယိတ်ႈဢၼ်တုတ်ႇၽႆး၊ ၶိူင်ႈပုၵ်ႈၸေႃႇၽေႃးၸဵၼ်ႇ၊ ၶိူင်ႈပုၵ်ႈၸေႃႇၼမ်ႉမၼ်း ဢၼ်ဝႃႈမႃးယဝ်ႉ မိူဝ်ႈၵႆႈၼၼ်ႉဢေႃႈ။
നിലവിൽ തിരഞ്ഞെടുത്തിരിക്കുന്നു:
ယေႇၸၵျေႇလႃႉ 45: CBMS
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright © 2021 by OMF International, Shan Baptist Churches Fellowship