ယေႇၸၵျေႇလႃႉ 39
39
ၶုၼ်ၵေႃးၵႃႉလႆႈတူၵ်းသုမ်း
1ပိူဝ်ႈၼႆလႄႈ လုၵ်ႈၵူၼ်းဢိူၺ်း၊ မႂ်းႁဵတ်းပရေႃးၽႅတ်ႈသေလႄႈ ႁေႃးလၢတ်ႈတီႈၵေႃးၵႃႉလႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၶုၼ်ၵေႃးၵႃႉ ဢၼ်ပဵၼ်ၶုၼ်မိူင်းရေႃးသႃႉ၊ မႄႇသႅၵ်ႉ၊ တူႉပလႃႉၼႆႉဢိူၺ်း၊ ၵဝ်ယူႇၽၢႆႇၼိုင်ႈတင်းမႂ်းဢေႃႈ။- 2ၵဝ်တၵ်း ႁႂ်ႈမႂ်းဝၢႆႇၶိုၼ်းငႅၵ်းၶိုၼ်းလႄႈ ဢဝ်မႂ်းသႂၢင်းသေလႄႈ ႁႂ်ႈမႂ်းၶီႇဢွၵ်ႇသေ ၵႃႈတီႈၼႃႈတၢင်းႁွင်ႇ ၼၼ်ႉလႄႈ ဢဝ်မႂ်းသူင်ႇႁွတ်ႈၵႃႈၼိူဝ်လွႆ ဢီႉသရေႇလႃႉတင်းလၢႆဢေႃႈ။- 3မိူဝ်ႈၼၼ်ႉ ၵဝ်တၵ်းပေႃႉၽတ်ႉၵၢင်ႇ ဢွၵ်ႇသေ ၵႃႈတီႈမိုဝ်းၶွၼ်သၢႆႉမႂ်းလႄႈ ႁႂ်ႈပိုၼ်တူၵ်းသေ ၵႃႈၼႂ်းမိုဝ်းၶွၼ်ၶႂႃမႂ်းဢေႃႈ။- 4မႂ်းဢိၵ်ႇတင်း တပ်ႉမႂ်းၵႃႈမီး တင်းမဵဝ်းၵူၼ်းၼမ်ၼႃႇ ဢၼ်ပႃးတီႈမႂ်းၸိူဝ်းၼၼ်ႉ တၵ်းဢွၼ်ၵၼ်လူမ်ႉတၢႆၵႃႈၼိူဝ်လွႆ ဢီႉသရေႇလႃႉၸိူဝ်းၼၼ်ႉဢေႃႈ။ ၵဝ်တၵ်း ဢဝ်မႂ်းဢၢပ်ႈပၼ် ပုၼ်ႈဢၼ်ၼူၵ်ႉႁၢႆႉ ၵူႈၸိူဝ်ႉၵူႈမဵဝ်း ဢိၵ်ႇတင်း တူဝ်ထိူၼ်ႇႁၢႆႉတင်းလၢႆ တၵ်းၶူပ်း တၵ်းၵိၼ်ဢေႃႈ။- 5မႂ်းတၵ်းလူမ်ႉတၢႆ ၵႃႈၼႂ်းတီႈပၢင်ႇတီႈပဵင်းဢေႃႈ။ ၵဝ်လၢတ်ႈဝႆႉယဝ်ႉ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။- 6ၵဝ်တၵ်းပွႆႇၽႆးၵႂႃႇ ၵႃႈၼိူဝ်မိူင်းမႃႇၵေႃးၵႃႉ ဢိၵ်ႇတင်း ၶဝ်ၸိူဝ်းဢၼ်ယူႇလူင်ႉလီလွတ်ႈလီ ၵႃႈတီႈၵုၼ်ၼႂ်းၼမ်ႉ ၸိူဝ်းၼၼ်ႉလႄႈ ၶဝ်တၵ်းလႆႈႁူႉလွင်ႈဢၼ် ၵဝ်ပဵၼ် ထႃႇဝရႃႉၽြႃးဢေႃႈ။- 7ၼင်ႇၼၼ်လႄႈ ၵဝ်တၵ်းႁႂ်ႈၼႃႇမႃႉ ၸိုဝ်ႈသဵင်မျၢတ်ႈၵဝ် ၸွတ်ႇသႃႈႁူင်ႁၢင်း ၵႃႈၼႂ်းၵူၼ်းၵဝ် မဵဝ်းဢီႉသရေႇလႃႉဢေႃႈ။ ၵမ်းလိုၼ်းၵဝ်ဢမ်ႇပၼ်ဢၶႂၢင်ႉ ႁႂ်ႈၼႃႇမႃႉၸိုဝ်ႈသဵင်မျၢတ်ႈၵဝ် လႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇလႃးလႃး။ ၵူၼ်းတၢင်ႇၸိူဝ်ႉတၢင်ႇမဵဝ်း တင်းလၢႆ တၵ်းလႆႈႁူႉလွင်ႈဢၼ် ၵဝ်ပဵၼ် ထႃႇဝရႃႉၽြႃး ၽြႃးဢၼ်မူတ်းၸၢင်ႇ ဢီႉသရေႇလႃႉဢေႃႈ။- 8လႆႈသမ်ႉ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ဢမူႉၼၼ်ႉၸမ်မႃးယဝ်ႉ။ တၵ်းပျေႉၸုမ်ႇယဝ်ႉ။ မိုဝ်ႉဝၼ်းၼႆႉပဵၼ် မိုဝ်ႉဝၼ်းဢၼ် ၵဝ်မီးဢမိင်ႉဝႃႈဢွၵ်ႇသူပ်းဝႆႉထႃႈ ၼၼ်ႉယဝ်ႉ။- 9ၶဝ်ၸိူဝ်းဢၼ် ယူႇၵႃႈၼႂ်း ဝဵင်းဢီႉသရေႇလႃႉတင်းလၢႆၼၼ်ႉ တၵ်းဢွၼ်ၵၼ်ဢွၵ်ႇလႄႈ ဢဝ်လၢၵ်ႈၼၢၵ်ႈတိုၵ်းသိုၵ်းဢၼ်ဝႃႈ ၶိူင်ႈႁႄႉလၢၵ်ႈၼၢၵ်ႈလူင်၊ ၶိူင်ႈႁႄႉလၢၵ်ႈၼၢၵ်ႈဢွၼ်ႇ၊ ၵၢင်ႇ၊ ပိုၼ်၊ ၶွၼ်ႉ၊ ႁွၵ်ႇ တင်းလၢႆ သႂ်ႇၽႆးလႄႈ ၽႆးမႆႈပႅတ်ႈယူႇသေလႄႈ တၵ်းလႆႈဢဝ်တုတ်ႇၽႆးပႅတ်ႈယူႇ ၸဵတ်းပီႊတဵမ်တဵမ်ဢေႃႈ။- 10ၼႂ်းၶိင်ႇမိူဝ်ႈၼၼ်ႉ ၶဝ်ဢမ်ႇလႆႈဢဝ် ၽိုၼ်းၵဵပ်းၽိုၼ်းၵႃႈၼႂ်းသူၼ်ၼႂ်းႁိူၵ်ႈ။ ဢမ်ႇလႆႈပမ်ႈဢဝ်ၽၼ်းဢဝ်ၽိုၼ်း ၵႃႈၼႂ်းထိူၼ်ႇၼႂ်းၶိူဝ်း။ ၶဝ်တၵ်းလႆႈဢွၼ်ၵၼ် ဢဝ်ၶိူင်ႈလၢၵ်ႈၼၢၵ်ႈတိုၵ်းသိုၵ်း ၸိူဝ်းၼၼ်ႉ သႂ်ႇၽႆးသုမ်ၽႆးဢေႃႈ။ ၶဝ်တၵ်းဢွၼ်ၵၼ်ယႃႉပႅတ်ႈ ၶဝ်ၸိူဝ်းဢၼ်ယႃႉပႅတ်ႈၶဝ် ၼၼ်ႉလႄႈ ႁိမ်ဢဝ်ဢုၵ်ႉၸႃႇၶူဝ်းလဵင်း ၶဝ်ၸိူဝ်းဢၼ် ႁိမ်ဢဝ်ၶဝ်ၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။
တၢင်းဢၼ်သၢင်းၵျူဝ်ႇတူဝ်တၢႆၶုၼ်ၵေႃးၵႃႉ
11ၼႂ်းမိုဝ်ႉဝၼ်းၼၼ်ႉ ၵဝ်တၵ်း ပၼ်ပႃႇႁဵဝ်ႈၵႃႈၼႂ်းမိူင်း ဢီႉသရေႇလႃႉ ဢၼ်ဝႃႈ ၶူင်ႈႁူၺ်ႈၶဝ်ၸိူဝ်းဢၼ် ၵႂႃႇတင်းပႆတၢင်းဢၼ်မီးၽၢႆႇဝၼ်းဢွၵ်ႇပၢင်ႇလၢႆႇၼၼ်ႉ တီႈၵေႃးၵႃႉဢေႃႈ။ ပႃႇႁဵဝ်ႈၼၼ်ႉ တၵ်းႁၢမ်ႈတၢပ်ႈႁႄႉၶႅၼ် ၶဝ်ၸိူဝ်းဢၼ်ၵႂႃႇတၢင်းပႆတၢင်းၼၼ်ႉလႄႈ ၶဝ်တၵ်းဢဝ်ၵေႃးၵႃႉ ဢိၵ်ႇတင်း ၵူၼ်းမၼ်းၼမ်ၼႃႇၼၼ်ႉ ၽင်ၵႃႈတီႈၼၼ်ႈလႄႈ ႁွင်ႉႁဵၵ်ႈတီႈၼၼ်ႈၸိုဝ်ႈ ၶူင်ႈႁူၺ်ႈႁႃႇမုၼ်ႇၵေႃးၵႃႉဢေႃႈ။- 12ၵူၼ်းမဵဝ်းဢီႉသရေႇလႃႉတင်းလၢႆ တၵ်းဢွၼ်ၵၼ်ဢဝ်ၶဝ်ၽင် ၸဵတ်းလိူၼ်တဵမ်တဵမ် ႁႂ်ႈမိူင်းလႆႈမူတ်းသႂ်ဢေႃႈ။- 13ၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင် တၵ်းၽွမ်ႉၵၼ်ဢဝ်ၶဝ်ၽင်လႄႈ ၶဝ်တၵ်းဢွၼ်ၵၼ်ႁွတ်ႈထိုင် တၢင်းဢၼ် ႁူင်ႁၢင်း ၼႂ်းမိုဝ်ႉဝၼ်းဢၼ် မုၼ်ၽုင်းၵဝ်ၵီႈၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။- 14ၶဝ်တၵ်းလႆႈဢွၼ်ၵၼ် ဢဝ်ၶဝ်ၸိူဝ်းဢၼ်တၵ်းလႆႈႁဵတ်းယူႇ သေႇသေႇၼၼ်ႉ ၶၢၼ်းဝႆႉႁႂ်ႈၶဝ်လႄႇၵႂႃႇ ၵႃႈၼႂ်းမိူင်းၵူႈတီႈၵူႈလႅၼ် ႁႂ်ႈလႆႈဢဝ်တူဝ်တၢႆၶဝ်ၸိူဝ်းဢၼ် ၵႂႃႇတၢင်းပႆတၢင်းဢၼ်ယင်းၵိုတ်းယင်းၵျၢၼ်ႇ ၵႃႈၼိူဝ်ၼႃႈလိၼ်ၼၼ်ႉ ၽင်ဢေႃႈ။ ပူၼ်ႉသေၸဵတ်းလိူၼ် ၼၼ်ႉ သေယဝ်ႉ၊ ၶဝ်ၼၼ်ႉ လႆႈဢွၼ်ၵၼ်လႄႇသွၵ်ႈလႄႇႁႃဢေႃႈ။- 15ၶဝ်ၸိူဝ်းဢၼ်လႄႇၵႂႃႇ ၵႃႈၼႂ်းမိူင်းၼၼ်ႉ တၵ်းလႆႈ ၵႂႃႇတၢင်းပႆတၢင်းလႄႈ မိူဝ်ႈဢၼ်ထူပ်းႁၼ်လုပ်ႇၵူၼ်းၼၼ်ႉၸိုင်၊ ၶဝ်တၵ်းလႆႈဢွၼ်ၵၼ်ပၵ်းသဝ် တီႈမၢတ်ႈတီႈတွင်းဝႆႉ ၵႃႈတီႈႁိမ်းလုပ်ႇၼၼ်ႉ တေႃႇထိုင်ႁွတ်ႈၶဝ်ၸိူဝ်းဢၼ် ဢဝ်ၽင်ၼၼ်ႉ ဢဝ်ၽင် ၵႃႈၼႂ်းၶူင်ႈႁူၺ်ႈႁႃႇမုၼ်ႇၵေႃးၵႃႉၼၼ်ႉဢေႃႈ။- 16ဝဵင်းဢၼ်တႄႇၵႃႈတီႈၼၼ်ႈၵေႃႈ တၵ်းလႆႈ ၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ဝဵင်းႁႃႇမုၼ်ႇလႄႈ ၶဝ်တၵ်းလႆႈဢွၼ်ၵၼ်ႁႂ်ႈ မိူင်းၸဝ်ႈမူတ်းသႂ် ၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ။- 17လုၵ်ႈၵူၼ်းဢိူၺ်း၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ မႂ်းလၢတ်ႈတီႈၼူၵ်ႉ ၵူႈၸိူဝ်ႉၵူႈမဵဝ်း ဢိၵ်ႇတင်း တရိၵ်ႈသၢၼ်ႇထိူၼ်ႇ ၵႃႈမီးလႄႈဝႃႈ၊ သူၸူႉၵၼ်တုမ်ၵၼ် သေလႄႈမႃးတႃႉ။ သူဢွၼ်ၵၼ်လုၵ်ႉသေ ၵူႈတီႈၵူႈလႅၼ် ၸူႉၵၼ်တုမ်ၵၼ်မႃးၵႃႈတီႈ ပွႆးယိတ်ႈ ဢၼ်ၵဝ်ႁဵတ်းဝႆႉပုၼ်ႈသူ ဢၼ်ဝႃႈ ယိတ်ႈလူင်ၵႃႈၼိူဝ်လွႆ ဢီႉသရေႇလႃႉတင်းလၢႆ ႁႂ်ႈလႆႈၵိၼ်ၼိူဝ်ႉလႄႈ သူတ်ႉလိူတ်ႈတႃႉ။- 18သူတၵ်းလႆႈဢွၼ်ၵၼ်ၵိၼ်ၼိူဝ်ႉၶဝ်ၸိူဝ်းဢၼ်ႁႅင်းယႂ်ႇ တင်းလၢႆလႄႈ သူတ်ႉလိူတ်ႈၶုၼ်လေႃးၵီႇတင်းလၢႆ၊ ၼိူဝ်ႉလိူတ်ႈ သူဝ်းပေႃႈ၊ သူဝ်းဢွၼ်ႇ၊ ပႄႉပေႃႈ၊ ဢုၵ်ႉသၽႃႉဝူဝ်းငၢၼ် ဢၼ်လဵင်ႉႁႂ်ႈပီးႁႂ်ႈမၼ်း ၵႃႈတီႈမိူင်းပႃႇသၢၼ်ႇၸိူဝ်းၼၼ်ႉဢေႃႈ။- 19သူတၵ်းလႆႈဢွၼ်ၵၼ်ၵိၼ် ၵွၼ်ႈၶႆၵွၼ်ႈမၼ်း ဢိမ်ႇတဵမ်ၼႃႇလူင်လၢင်လႄႈ ဢွၼ်ၵၼ်သူတ်ႉလိူတ်ႈ တေႃႇထိုင်ႁွတ်ႈထၼ်ႈပေႃးမဝ်းလဝ်ႈ မဝ်းၵမ် ၵႃႈတီႈပွႆးယိတ်ႈ ဢၼ်ၵဝ်ႁဵတ်းဝႆႉပုၼ်ႈသူဢေႃႈ။- 20ၼင်ႇၼၼ်လႄႈ သူတၵ်းလႆႈဢွၼ်ၵၼ်ၵိၼ်မႃႉ၊ ႁူဝ်ႁၢၼ်ၵူၼ်းသိုၵ်းၶီႇမႃႉ၊ ၶဝ်ၸိူဝ်းဢၼ်ႁႅင်းယႂ်ႇၼႃႇ၊ ၶဝ်ၸိူဝ်းဢၼ်ပဵၼ် ၵူၼ်းသိုၵ်းၵူႈၸိူဝ်ႉၵူႈမဵဝ်း ၸိူဝ်းၼၼ်ႉ ဢိမ်ႇတဵမ်ၼႃႇလူင်လၢင် ၵႃႈတီႈၶူင်ႇတီႈၵိၼ်ၵဝ်ဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။
တၢင်းဢၼ်ၶိုၼ်းတႄႇတင်ႈမိူင်းဢီႉသရေႇလႃႉ
21ၵဝ်တၵ်းႁႂ်ႈမုၼ်ၽုင်းၵဝ်ထၢင်ႇသႃး ၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်း တင်းလၢႆလႄႈ ၵူၼ်းၵူႈၸိူဝ်ႉၵူႈမဵဝ်း တၵ်းလႆႈႁၼ် လွင်ႈတၢင်းဢၼ်ၵဝ်ၸီႇယၢင်ႇႁဵတ်း တင်းမိုဝ်းဢၼ်ၵဝ်တၢင်ႇသႂ်ႇ ၵႃႈၼိူဝ်ၶဝ် ၼၼ်ႉဢေႃႈ။- 22ၼင်ႇၼၼ်လႄႈ ၵူၼ်းမဵဝ်းဢီႉသရေႇလႃႉတင်းလၢႆ တၵ်းလႆႈႁူႉလွင်ႈဢၼ်ၵဝ်ပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈ ၶဝ် ၼၼ်ႉဢေႃႈ။- 23ၵူၼ်းတၢင်ႇၸိူဝ်ႉတၢင်ႇမဵဝ်း ၸိူဝ်းၼၼ်ႉ တၵ်းလႆႈႁူႉလွင်ႈဢၼ် ၵူၼ်းမဵဝ်းဢီႉသရေႇလႃႉတင်းလၢႆ လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ၵွပ်ႈပိူဝ်ႈဢပႅတ်ႈၶဝ် ၼၼ်ႉဢေႃႈ။ ၵဝ်ဝၢႆႇၼႃႈပႅတ်ႈၶဝ် ၵွပ်ႈပိူဝ်ႈ ဢၼ်ၶဝ်ၽိတ်းပိူင်ႈၵဝ် ၼၼ်ႉလႄႈ ဢဝ်ၶဝ်ဢၢပ်ႈပၼ် ၵႃႈၼႂ်းမိုဝ်းရၢၼ်ႇသူႇ သေလႄႈ ၶဝ်ၵႃႈမီးလႆႈလူမ်ႉတၢႆ လူၺ်ႈလၢပ်ႇလူၺ်ႈလႅဝ်းဢေႃႈ။- 24ၵဝ်ႁဵတ်းၸွမ်းတၢင်းဢၼ် ၶဝ်ၵူဝ်ႈၵိူၵ်ႇ ဢိၵ်ႇတင်း တၢင်းဢၼ်ၶဝ်ပူၼ်ႉလိူဝ် ၸိူဝ်းၼၼ်ႉလႄႈ ဝၢႆႇၼႃႈၵဝ်ပႅတ်ႈသေၵႃႈတီႈၶဝ်ယဝ်ႉ။- 25ပိူဝ်ႈၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းဢဝ်မဵဝ်းယႃႇၵုပ်ႈ ဢၼ်လႆႈ ၶၢမ်ႇတၢင်းဢၼ်သိမ်းဢဝ်ၵႂႃႇၼၼ်ႉ ၶိုၼ်းမႃးလႄႈ ဢဵတ်းလူၸွႆႈထႅမ်မႃႉၸႃႉ ၵူၼ်းမဵဝ်းဢီႉသရေႇလႃႉ တင်းသဵင်ႈတင်းလူင် သေလႄႈ မီးၸႂ်ဢၼ်ႁႅင်းယႂ်ႇၼႃႇပုၼ်ႈ ၼႃႇမႃႉၸိုဝ်ႈသဵင်မျၢတ်ႈၵဝ်ဢေႃႈ။- 26ၶဝ်တၵ်း လႆႈၶၢမ်ႇတၢင်းဢၼ်သရေႇၶဝ်လူႉ ဢိၵ်ႇတင်း ဢပႅတ်ႈၵႃႈဢၼ်ၶဝ် ၽိတ်းပိူင်ႈၵဝ်ၼၼ်ႉ ၼႂ်းမိူဝ်ႈဢၼ်ၶဝ်ယူႇၵႃႈၼႂ်းမိူင်းၶဝ် လူင်ႉလီလွတ်ႈလီယူႇလႄႈ ဢမ်ႇမီးၵေႃႉဢၼ်ႁႂ်ႈၶဝ်လႆႈၵူဝ်လႆႈႁႄၼၼ်ႉ၊- 27ဢိၵ်ႇတင်း ၼႂ်းမိူဝ်ႈဢၼ် ၵဝ်ႁွင်ႉဢဝ် ၶဝ်ဢွၵ်ႇသေ ၵႃႈၼႂ်းမဵဝ်းၵူၼ်း တင်းလၢႆ မႃးလႄႈ ႁႂ်ႈၶဝ်ဢွၵ်ႇသေ ၵႃႈၼႂ်းမိူင်းဢၼ်ရၢၼ်ႇသူႇၶဝ်ယူႇ ၸိူဝ်းၼၼ်ႉ သေလႄႈ ၵဝ်ႁွတ်ႈထိုင် တၢင်းဢၼ်မူတ်းၸၢင်ႇ သိုဝ်ႈၼႃႈတႂ်ႈတႃ မဵဝ်းၵူၼ်းၼမ်ၼႃႇၼၼ်ႉဢေႃႈ။- 28ၵွပ်ႈပိူဝ်ႈဢၼ်ၵဝ် ႁႂ်ႈၶဝ်လႆႈ ၶၢမ်ႇတၢင်းဢၼ် ၵူၼ်းတၢင်ႇၸိူဝ်ႉတၢင်ႇမဵဝ်း သိမ်းဢဝ်ၵႂႃႇၼၼ်ႉ ဢိၵ်ႇတင်း ၵွပ်ႈပိူဝ်ႈဢၼ်ၵဝ် သမ်ႉႁွင်ႉ ဢဝ်ၶဝ်မႃးၸူႉၵၼ်တုမ်ၵၼ် ၵႃႈတီႈမိူင်းတီႈဢၼ်ၶဝ်ယူႇၵဝ်ႇၵဝ်ႇ သေလႄႈ ဢမ်ႇႁႂ်ႈသေၵေႃႉသေၵူၼ်း လႆႈၵိုတ်းၵျၢၼ်ႇဝႆႉၼၼ်ႉ လႄႈ ၶဝ်တၵ်းလႆႈ ႁူႉလွင်ႈဢၼ်ၵဝ်ပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈ ဢေႃႈ။- 29ၵမ်းလိုၼ်း ၵဝ်တၵ်းဢမ်ႇဝၢႆႇၼႃႈၵဝ်ပႅတ်ႈၶဝ်လႃးလႃး။ လွင်ႈမၼ်းၸမ်ႉ ၵဝ်ဢဝ်ဝီႉၺိၺ်ႇၵဝ် သွၼ်းလေႃႇၵႃႈၼိူဝ် ၵူၼ်းမဵဝ်းဢီႉသရေႇလႃႉတင်းလၢႆယဝ်ႉ။ ၸဝ်ႈထႃႇဝရႃႉၽြႃး မီးဢမိင်ႉဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
നിലവിൽ തിരഞ്ഞെടുത്തിരിക്കുന്നു:
ယေႇၸၵျေႇလႃႉ 39: CBMS
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright © 2021 by OMF International, Shan Baptist Churches Fellowship