Nyimbo 78
78
Nyambi na Bantu bendi
Lwimbo lwa Ashafwi
1 #
Mat 13:35. Yuvwililenu, ebye nikumilongesha, enu bantu bami,
bangulenu matu kunebye nikwamba.
2Nikayahamisha kanwa kami mu
zinguli na kutontolola byambo bya ku mwaka.
3Byuma twayuvwile na kubilimuka,
byuma ebye batutongwezele batatizetu.
4Kukabilimba ku banabetu tufwako,
ngoboni tukabitongweza ku shihemunwino sha kumbili,
bya ngovu za Nyambi ya Ngula na milimo yendi yayinene na byuma bya kukomokesha anatende.
5Nyambi wapanine mazu wendi ku Baishalela na ndayano ku bazukulya Yakobo.
Wambilile bankakazetu ngayi balongeshe mazu wendi ku bana babo,
6nohobene ngayi shihemunwino sha kumbili mwanga bakalilongeshebyo,
nanibo kami mwanga bakalongeshe bana babo.
7Ha kutenda nehe, mwanga bakakulupile muli Nyambi pe bakabule kuvulama ebye anatende,
pe bakwombatalenga ndayano zendi shikati nimwasho.
8Bakabule kukafweka ngonehe bankakazabo,
shihemunwino sha mafutufutu na kubula kwombatala,
aba babulile kushumisha kukulupila kwabo muli Nyambi,
kami kaliha bengile bakulunga kukwendi.
9Baefulemu, bakakulwa na bipando bya mikunzi,
bashintulukile ha mutena wa nzita.
10Kaliha balamine kulimama kwabo na Nyambi,
ngoboni bakanine kwombatala ndayano zendi.
11Bavulamine ebye atendele,
na bikomokesho ebye abamoneshele.
12Ku meho a bankakazabo,#Kut 7:8; 12:32.
Nyambi watendele bikomokesho mu mbuwa ya Zowani mu litunga lya Engepita.
13Watapulwile liwate niho abapitishile mukati kalyo, #Kut 14:21-22.
wemikile mema awa engile ngonehe kashinko.
14Ku shikati sha mwaana wabatwamininine na likumbi,#Kut 13:21-22.
kami ku wushiku wabatwamininine na liyeye lya mundilo.
15Wapabwile mamanya mu libelelengwa,#Kut 17:1-7; Kul 20:2-13.
wabapanine mema amengi banwine ngo amu mampunga.
16Watutwishile tushinzi twa mema mu limanya,
pe mema akunkwile ngo amu mushinzi.
17Ngoboni bazaminine kubipishila Nyambi,
kami mulibelelengwa bafutukile na kulwisha Wakukangana.
18Bezekele Nyambi mu mitima yabo,#Kut 16:2-15; Kul 11:4-23, 31-35.
ha kumulomba byakulya biya bashingile kulya.
19Bambile mazu a kulwisha Nyambi ngayi,
“Kati Nyambi ukutwesha kupana byakulya muno mu libelelengwa ndi?
20Hinge ngayi wakamine ha limanya,
pe mema ashabukile na ku hwenta.
Kati ukutwesha kami kutupana byakulya ndi?
Hinge kuholwela bantu bendi nyama ndi?”
21Oho Nyambi ya Ngula abayuvwile wapilamine,
niho alwishile Yakobo na mundilo,
pe wukali wendi wakulwisha Ishalela wanenehele,
22ndaba babulile kukulupila muli Nyambi,
kami kaliha bamukulupilile ngayi ukabapulwisha.
23Wambilile makumbi kuyilu,
pe bipana byalyo bya shinkulukile.
24Wa bapanikile muhaku wa mpeka wa fumine ku yilu,#Yowa 6:31.
naku ba pulumwina maana ngayi balye.
25Nohobene bantu balile byakulya bya mangeloyi,
wabapanine byabingi kupitakana ebye bashingilenga.
26Wapepokeshele mpepo ya ku mushamuko mu mayilu,
na ngovu zendi waletele mpepo yaku mabukubuku.
27Watumine tuyoni ku bantu bendi twatwingi,
ngonehe lihekelela lya ha shibumbo sha liwate.
28Niho Nyambi awishilile tuyoni mukati ka zintanda za bantu bendi,
hahepi na munkungwa wabo.
29Bantu balile na kwikuta,
ndaba Nyambi wabapanine ebye bashingilenga.
30Ngoboni oho shilolo banyikwe biya bashingilenga,
oho byakulya bishili mu tunwa twabo,
31Nyambi wabapilaminine na kuziha balume babo bangovu,
na bandumbana babawahe ba Ishalela.
32Hinge ndi ebye nimwabyo byaholokele,
bantu batwalilileho Kubipisha.
Hinge ndi kwekalile bikomokesho bantu kaliha bamukulupilile.
33Nohobene wamanishile matena wabo ngonehe mpepo,
na kumanisha wumi wabo na malwa akubabazumuna.
34Oho Nyambi aleteshele ngayi bamo hakati kabo bazihiwe, obo bashalileho, bafutikilile kukwendi.
Batengulukile na kulombela kukwendi na shitima.
35Banukile ngayi Nyambi niye Limanya lyabo,
kami ngayi Nyambi Wakukangana niye mukakuba kuliza.
36Ngoboni bamwongezele,
kowa sha kupwisha bambile.
37Kaliha bengile ba kupwisha kukwendi,
kaliha bengile bakulunga kukulimama kwabo naniye.
38Nyambi wengile wa nceshe ku bantu bendi.
Wabayatilile wubi wabo pe kaliha wabalobeshele.
Bikati byabingi wabweshelengamo
wukali wendi.
39Wanukile ngayi banengi bantu ba lutu lwa wuntu,
bakufweka ngo mpepo yikuya na kupepoka na kubula ku bokamo.
40Bikati byabingi bamufutulukilile mu libelelengwa
na kumupilamisha.
41Bamwezekele Nyambi, kakengikengi,
bayuvwishile kukola ku mutima, wa Kuyela wa Ishalela.
42Bavulamine liboko lyendi,
eshe abalamwinine ku bamalamo babo.
43Oho atendele milimo yendi ya kukomokesho mu litunga lya Engepita,
na bilimukisho mu Zowani!
44Wafutwile mema amu mishinzi yabo kwinga mukeza,#Kut 7:17-21.
nohobene kaliha batweshele kunwa mema a mishinzi yabo.
45Watumine banzinzi mukati kabo, #Kut 8:1-6, 20-24.
baya babayandishilenga na mambotwe
aya alobeshele litunga lyabo.
46Watumine mikumbi mu kulya mbuto#Kut 10:12-15.yabo
na mikabo yamu mafuba abo yanongele ku mikumbi.
47Walobeshele mikolobozi yabo ya
shinyanca na mvula wa mamanya#Kut 9:22-25.
kami mitondo yabo ya mikuyu yayumine ku mashika.
48Wazihile zingombe zabo na
mvula wa mamanya na bambelele babo na lumuni lwa mvula.
49Wabamoneshele makando amanene
na ku bakalihila shikuma na wukali wendi,
ebye byezile ngo bantumwana ba lufu.
50Kaliha wabweshele wukali wendi hinge ku tetelela myoyo yabo,
ngoboni wabazihile na wulweli wa ku kwanga ku pangiwa.
51Wazihile bamyeli babo nimwabo
babalume #Kut 12:29.ha minkanda nimwayo ya Engepita mu zintanda za Hamu.
52Niho afumishile bantu bendi ngo mulishani wa bambelele,#Kut 14:26-28.
pe wabendeshele mukati ka libelelengwa.
53Wabatwamininine shiwahe, pe kaliha batinine,#Kut 14:26-28.
ngoboni liwate lya kupwile bamalamo babo.
54Wabaletele mu litunga lyendi lya kuyela,#Kut 15:17; Yosh 3:14-17.
ku lipili liya akomene na liboko lyendi lya shilyo.
55Watandilemo aba bazikilemo
oho bantu bendi bayilenga na kulikaka,#Yosh 11:16-23.
watapilile litunga kwinga likona lyabo mukati ka Baishalela na kupana makunka wabo ku bantu bendi.
56Ngoboni bafutulukilile Nyambi Wakukangana #Bak 2:11-15. na kumwezeka.
Kaliha bombatalile ndayano zendi,
57ngoboni bengile bamafutufutu na kubula kupwisha ngonehe batatizabo,
bapopele ngo shipando sha mukunzi shinatentebele.
58Bamupilamishile oho bapehelelenga
ku myanya yabo ya kulemeshela banyambi bowa,
pe na tunankishi twabo twa kubaza bamuyuvwishile lihungu.
59Oho Nyambi ayuvwile wapilamine shikuma,
pe niho akanine bantu bendi Baishalela.
60Wakanine mwanya wendi wa kuyela mu Shilo, #Yosh 18:1; Yel 7:12-14; 26:6.
munkungwa uya ekalilenga mukati kabo.
61Wetabilishile bamalamo babo kutola Likwati lya Kulimama, #1Sha 4:4-22.
shimonekesho sha ngovu zendi na wuwahe wendi.
62Wapilamine na bantu bendi, na kwitabila ngayi bazihiwe
na mukwale ku bamalamo babo.
63Bandumbana bazihiwile mu nzita,
batunkanga babulile kwa kuyekiwa.
64Bakankombela bafwile ku mukwale,
kami bamfwile babo kaliha babetabilishile kulila.
65Niho Hekulu wapindukile ngo unafumu ha tulo,
wengile ngo mulume wa ngovu unakolwo waine.
66Watandile bamalamo bendi na ku bakoma,
pe bekalile na lisheni lya kubula kumana.
67Ngoboni wakanine bazukulya Yoshefwa,
kaliha wahatile mushobo wa Efulemu.
68Ngoboni wahatile mushobo wa Yunda na lipili lya Ziyoni
elye ahakile shikuma.
69Wazikile mwanya wendi wa kuyela, ngonehe mayilu,
wawushumishile ngonehe ha shuma naho hanci,
mwaya myaka.
70Wahatile muka mulimo wendi Ndavita,#1Sha 16:11-12; 2Sha 7:8; 1Bya 17:7.
wamufumishile ku matanga a bambelele,
71oku alaminenga bambelele bendi,
niho amwingile mwene wa Ishalela,
na mulishani wa bantu ba Nyambi.
72Ndavita wabalamine na mutima wakubula nguma,
wabatwaminine shiwahe.
Libuka Lya Kuyela © Bible Society of Zambia, 2020.