Zincimpi 31
31
Mazu a ngana a manda muntu
1Awa niwo mazu a mwene Lemuwele waku Masha, aya amulongeshele mandiyendi.
2Kati bishini obe mwanami Lemuwele?
Obe mwanami wakulibelekela munyima ya malombelo ami kuli Nyambi.
3Hinga umanishila ngovu zobe ku wunjenge,
na mali wobe ha bambuyama banalobeshe bamyene.
4Obe Lemuwele yuvwilila shiwahe, bamyene kaliha bafwanina kunwa waine,
hinge batulela kaliha banafwanini kunwa mukuku.
5Ndaba ndi ba kunwa pe ba kuvulama ndayano,
na kutengamisha binafwanini bakakuyanda.
6Malovu anafwanini bantu baya bakushinga kufwa,
hinge ku bantu baya bali mu makando amanene.
7Balehenu banwe bavulame wuncepwe wabo,
kami bakabula kwanuka makando wabo.
8Wambileko bantu baya bakubula kutwesha kwamba nibo bamwine,
wimanine binafwanini bakakuyanda na naba banabibulu.
9Bambileko na kuyata mu kulunga,
yimanina byambo bya bancepwe nanebye bya bakakuyanda.
Kuyemeza kwa mukazi wakuyekiwa
10Mukazi wa mwombela yani ukutwesha kumuwana?
Niye wenga wa ndando yayinene kupitakana wutale.
11Mukokwendi wamukulupila shikuma,
kumutamwina wufwako.
12Matena akuyoya kwendi nimwawo
watendelanga mukokwendi byuma byabiwahe, kaliha byabibi.
13Washingashinganga wutonge wa wushako wa mukoko na katatalanzenze,
kami watendanga milimo hinga awahilila na maboko wendi.
14Nafweke ngonehe bishepe byabinene bya bakamikwebo,
wafumishanga byakulya byendi kwakutali.
15Wapindukanga lumenemene oho kushili ku shipa na kutendela byakulya bya lupashi lwendi,
ukutongweza bakamilimo bendi ba bambuyama bya ku fwanina kutenda.
16Wapenzesheshanga ha mfuba akushinga kulanda na mali aya awananga,
walimishanga mfuba na kukunamo mikolobozi ya shinyanca.
17Mukazi mukakulikwatisha shikuma
wakushuma na kutenda milimo shikuma.
18Wamonanga ngayi wawaninanga ha ndando yendi,
wushiku mu litala lyendi lumuni kaliha lwazimanga.
19Wapohelanga wutonge wendi na kuwu zengela ku shitondo,
kami maboko wendi akwatanga shitondo sha litebelela.
20Wekala na shishemo ku bancepwe,
na ku bakakuyanda.
21Kaliha watinanga mashika mupepo ha lupashi lwendi,
ndaba balupashi lwendi nimwalwo wabavwalikanga bivwalo bya kutukumina.
22Walitungilanga bya kulifwika,
bya kuvwala byendi byenga bya likwiza lya kulelema na likwiza lya kufumbuluka.
23Mukokwendi bamulimuka ku mapangati,
oho akwikala mukati ka bakulwane ba mu munzi.
24Watunganga bivwalo na mikunzi
na kubilandisha ku bakamikwebo.
25Wenga wa nyala na maleema,
pe kaliha walikekulanga habya shikati sha kumbili.
26Wambanga bya ngana,
kami walongeshanga bya nceshe.
27Wamonanga nyinkalo ya lupashi lwendi shiwahe,
kami kaliha walyanga byakulya bya kubula kutendela milimo.
28Bana bendi ba kukatuka na kumutongweza ngayi, mawa, muli na mfuywezi.
Mukokwendi kami ukumuyemeza ngayi,
29“Kubali bakazi babengi batendanga byuma byabiwahe,
ngoboni obe unabapitakana nimwabo.”
30Kulelema kwa lutu kwongezanga, kami wuwahe wenga wowa,
ngoboni mukazi wakuyuvwila Nyambi ya Ngula bowa ukayemeziwa.
31Mupane ncuungu ku nobyo akutenda nimwabyo,
mwanga ayemeziwe ku bantu ndaba ya milimo yendi.
Libuka Lya Kuyela © Bible Society of Zambia, 2020.