Zincimpi 29
29
1Muntu nimwendi bakwambila shikati nimwasho,
ngoboni niye hinga akaluhisha mutima wendi,
pe wanguwangu ukaloba pe wufwako kukamoneka.
2Oho kalela wakulunga akwendesha litunga, bantu ba ku wahilila,
ngoboni oho kalela wakuluwa akwendesha litunga bantu ba kushunga.
3Ou uku haka ngana, wawahilishanga tatiyendi,
ngoboni muntu wakulilama na balwiholwiho wapanzanishanga wuheti wendi.
4Mwene ukwendesha litunga lyendi mu kwoloka, waletanga ku mwena,
ngoboni ou ukutambula lizika kanwa walobeshangalyo.
5Muntu ukwongeza ndambo yendi,
ukulitandubwila kanyanzi ku mawulu endi niyemwine.
6Muntu wakuluwa wa livwimanga lunyimbwa lwa milandu niyemwine,
ngoboni muntu wakulunga wembilanga na kutangala.
7Muntu wakulunga walimukanga likona lya mukakushepwa,
ngoboni muntu wakuluwa kaliha wekalanga na kalimukisho kaku yuvwishisha bya nehe.
8Muntu wawuncengwe wahokesheshanga munzi,
ngoboni muntu wangana watulumanishanga wukali.
9Ndi muntu wangana ba kulikananganisha na wakuyeba,
wakuyeba wapilamanga na kukendula, kami kaliha wamwenanga.
10Bakakuyita mukeza bazimba muntu wakubula mulandu,
nibo bashinga tuhu kuziha bakwoloka.
11Muntu wakuyeba wamoneshanga kupilama kwendi,
ngoboni muntu wangana wakwatanga mutima.
12Ndi kalela ukuyuvwilila mahalo,
pe babilolo bendi nimwabo bakenga bakuluwa.
13Ncepwe namukakulyatilila minendi bakwezekela hamo,
Nyambi ya Ngula niye wabalengele nimwabo.
14Ndi mwene ukuyata shiwahe mukakushepwa,
litanda lyendi likashuma mwaya myaka.
15Lunyanzi lwa kuzipola kanuke lwamupananga ngana,
ngoboni kanuke wakuleliwa mpoza waletelanga mandiyendi lisheni.
16Oho bakuluwa bali mu ngovu za kwendesha litunga, wubi wahanyanga,
ngoboni bakulunga bakekala na ku mona kuwa kwabo.
17Keyesha mwanobe, pe ukakuletela ku mwena,
kami ukawahilisha mutima wobe.
18Bantu bakubula kutwamininiwa na lizu lya Nyambi, ba kuloba,
ngoboni mfuywezi za uya ukulama mulao wa Nyambi.
19Mukamulimo kutwesha kukeyeshiwa na mazu anahiya wufwako.
Hinge ndi nayuvwu ebye bakwamba ngoboni kuyakako ngana wufwako.
20Muli kulumbeza shikuma muli muntu wakuyeba
kupitakana muntu wakwamba na kulokomoka.
21Ou ukulela mukamulimo wendi ku balika kuwanuke,
akakula ukakona byuma bya hekulyendi nimwabyo.
22Muntu wamukali washonkomonanga ngunga,
kami muntu wakapilamina waleteshanga wukalu na kulyamba.
23Muntu mukakulilundumika washepeshiwanga,
ngoboni mukakulilimbwilisha mu mutima wawananga maleema.
24Wakulilumikila na mwizi, wazimba wumi wendi,
ndaba oho akuyuvwa shambo walibezanga ngoboni niye ku shimika wufwako.
25Kuyuvwila muntu bowa kwenga kulivwima lunyimbwa,
ngoboni mukakukulupila muli Nyambi ya Ngula ukekala shiwahe.
26Bantu bashinganga kuyemeziwa kuli kalela,
ngoboni kuli Nyambi ya Ngula niko ba kuwana kupwisha.
27Muntu wakubula kupwisha wenga wa wunyengwe ku muntu wakulunga,
ngoboni muntu wa nzila ya kuluwa wenga wawunyengwe ku muntu wakulunga.
Libuka Lya Kuyela © Bible Society of Zambia, 2020.