Zincimpi 21
21
1Mutima wa mwene wenga ngo kashinzi ka mema mu liboko lya Nyambi ya Ngula,
wawutengulwilanga oku nimwako akushinga.
2Nzila ya muntu yenga ya kwoloka ku meho wendi,
ngoboni Nyambi ya Ngula wapimanga mutima.
3Ntendelo ya kwoloka na kupwisha
yikutambuliwa shikuma kuli Nyambi ya Ngula kupitakana nkombela.
4Meho akuyemeza na mutima wakulilundumika,
niyo mimuni ya bakuluwa, pe nimwabyo byenga wubi.
5Bihanganiko bya muntu wakukalamana bya mu twamininanga ku kutangama,
ngoboni mukakutenda byuma wanguwangu ukenga wakushepwa.
6Kuwana wuheti mu nzila ya kwongeza,
shinafweke ngo mbundu yikukakumuka hinge ngo kantamba ka lufu.
7Mishunga ya bantu bakuluwa yikabatwala kwakutali,
ndaba ba kukana kutenda bya kupwisha.
8Nzila ya muntu uli na mulandu yenga ya kukontama,
ngoboni nyinkalo ya wa kuyela yenga ya kwoloka.
9Shashiwahe kwikala mu nkomi kuyilu ya litala,
kupitakana kwikala mu litala limo na mbuyama wa kanwa.
10Muntu wakuluwa watwalanga mutima ku byabibi,
kaliha wayuvwilanga nceshe ndambo yendi.
11Oho muntu wa wuncengwe akushushuliwa,
muntu wakuyeba ukulilongesha ngana,
oho muntu wangana akufundiziziwa, wawananga kalimukisho.
12Nyambi wenga wakulunga, wapenzesheshanga litala lya bantu bakuluwa,
pe walobeshanga bantu bakuluwa.
13Muntu wakubula kuyuvwa kulila kwa bancepwe,
naniye kami akalila kowa ou eze akamuyuvwe.
14Bishemo bya kupanina muntu kumbali kwakubula bantu byafwomonanga wukali,
lizika kanwa lya kushimba mu lyambangubo lyamanishanga wukali.
15Ndi shambo shinayatiwi mu kupwisha bantu bakulunga bawahililanga,
ngoboni bakakutenda byabibi batampwanga.
16Muntu ukushiya nzila ya ngana,
ukakatalila mu shikungulukilo sha bafu.
17Muntu wahaka myelembo ukenga ncepwe,
ou wahaka waine na byakulya bya mazi kukaheta wufwako.
18Bantu bakuluwa bakenga shikulizisho sha bantu bakulunga,
na bakakubula kukulupila bakenga shikulizo sha bantu ba kupwisha.
19Shashiwahe kuyoya mu libelelengwa,
kupitakana kwikala na mbuyama wa kanwa na kupilazama.
20Muntu wangana wakonga wuheti wa ndando yayinene mu litala lyendi,
ngoboni shibulangana wapanzanishanga ebye alinabyo nimwabyo.
21Muntu ukukonka kulunga na nceshe,
ukawana wumi na kwoloka na maleema.
22Muntu wangana walwishanga munzi wa wawunene uli mu limota bantu bangovu,
washiwululanga bipata byabo bya ku shuma biya banakulupili.
23Mukakulama nyambilo yendi,
ukulifumisha ku makando.
24Muka wuncengwe wenga mukakuliyemeza na kulilundumika,
kami wenga wa lihandu, pe walihaka niyemwine.
25Bavwa bakubula kutenda milimo,
ba kuliziha nibo bamwine.
26Muntu wakuluwa wenga wakulishoza bikati nimwabyo,
ngoboni wakulunga ukwolola liboko kupana na kubula kuyumina.
27Nyambi ya Ngula wazimba zikombela za bakakuluwa,
shinene ndi ba kutendazo na bihanganiko byabibi.
28Paki wa mahalo ukashushuliwa,
ngoboni nyambilo ya muntu wa kupwisha bakayitabila.
29Bakuluwa baliyongolanga kwinga babawahe,
ngoboni ba kupwisha bayongolanga ha zinzila zabo.
30Ngana za muntu na ku yuvwishisha na kalimukisho,
kuyavwa bifwako ndi Nyambi ya Ngula na kana.
31Ukutwesha kutwala bambishi ku nzita,
ngoboni wenga Nyambi ya Ngula wabatwesheshenga.
Libuka Lya Kuyela © Bible Society of Zambia, 2020.