Zincimpi 18
18
1Muntu walifumishanga ku baminendi walitendelanga bya mu mutima wendi,
wakanangananga nyatilo ya kwoloka nimwayo.
2Muntu wakuyeba kutwesha ku wahilila mukalimukisho wufwako,
ngoboni wambanga tuhu munayi mutima wendi.
3Oho wubi ukwiza, lihandu kami likwiza,
pe matuka na lisheni kami bikwiza.
4Mazu amukanwa ka muntu enga ngo limpunga lya mema,
ngana zenga ngonehe kaheloke ka kashinzi kakukunkula.
5Kaliha shashiwahe kuhota muntu wamubi,
hinge kulewila mulandu muntu wakwoloka.
6Mivumbo ya muntu wakuyeba yaletanga nkani,
kami kanwa kendi kehananga mishunga.
7Muntu wakuyeba walobanga nanebye bikufuma mukanwa kendi,
kami mivumbo yendi yenga kantamba kendi niyemwine.
8Mukakutungula, mazu wendi afweka ngo byakulya byabitobe,
bikwingina mu bimamo bya lutu lwa muntu.
9Muntu wawuvwa ku mulimo wendi,
wenga kawushinda wa mukakulobesha.
10Lizina lya Nyambi ya Ngula niko kapeshi kakushuma,
muya bakwitukila bantu bakulunga ngayi bakapuluke
11Wuheti wa muntu wakuheta niwo munzi wendi wawunene wakushuma,
pe mubihanganiko byendi wawufwekeshanga ngo limota lyalitali likumulama.
12Oho muntu shilolo awe mutima wendi waliyemezanga,
ngoboni maleema ezanga munyima ya kulilimbwilisha.
13Muntu ukukumbula oho shilolo ayuvwishishe,
wekalanga na lisheni kami shileya.
14Mutima niwo washumankanishanga muntu ndi ukukola,
haya yani ukutwesha kubengezeka mutima wakupokoka?
15Muntu wa mutima waku yuvwishisha wawananga kalimukisho,
matu a bantu bangana ashinganga kalimukisho.
16Bishemo bya shinkululanga bipana bya wuya mukakupana,
kami byamuletanga ku meho a bantu babalemu.
17Muntu watatikanga kwamba shambo ha kuyatishiwa, wayuvwanikanga kupwisha,
hantu ou ukuliyatisha nendi abalika kumwipula mayipu.
18Kukuna nyela kwa manishanga nkani,
kami kwa ketulanga shambo mukati ka bantu ba kushuma bali na nkani.
19Yavwa bawushinda wobe pe nibo bakakulama ngonehe munzi wawunene uli mu limota,
ngoboni ndi ukulyamba nabo, bakakupatila bipana byabo.
20Mikabo ya kanwa ka muntu ya mwikutishanga,
wekutanga na nobyo akuteza ku mivumbo yendi.
21Lufu na wumi byekala mu ngovu za lulimi,
baya bahaka milimo ya lulimi bakalya mikabo yalwo.
22Muntu nayeke mukazi nawana shuma shashiwahe,
kami ukuwana kuyamiziziwa kuli Nyambi ya Ngula.
23Ncepwe walambililanga ngayi bamuyuvwile nceshe,
ngoboni mukakuheta wakumbulanga na wukali.
24Muntu uli na bahoni wafwanini ku monesha wuhoni,
ndaba muhoni wa kupwisha ukupitakana kawushinda.
Libuka Lya Kuyela © Bible Society of Zambia, 2020.