Zincimpi 11
11
1Shipimo sha mahalo shenga sha wunyengwe kuli Nyambi ya Ngula,
ngoboni shipimo sha kupwisha yenga ku wahilila kwendi.
2Kuliyemeza kukuleta lisheni,
ngoboni kulilimbwililisha kukuleta ngana.
3Kupwisha kwa bakwoloka kukubatwaminina,
ngoboni kutengama kwa ba mahalo kuka balobesha.
4Wuheti kuyavwa ha mutena wawukali wa Nyambi wufwako,
ngoboni kulunga kwa lamwinanga muntu ku lufu.
5Kupwisha kwa muntu wakulunga kukuholeka nzila yendi shiwahe,
ngoboni wakuluwa ukuwa mu kuluwa kwendi.
6Kupwisha kwa bantu bakulunga kwa balamwinanga,
ngoboni ba kulungwa bakakwatiwa mu bihanganiko byabo byabibi.
7Oho mukawubi unafu, kowa kulumbeza kukwendi,
kami bihanganiko byendi byalobanga.
8Muntu wakulunga ukulamwiniwa ku makando,
ngoboni wakuluwa niye wafwangamo.
9Kanwa ka muntu wakubula wunyambi kanongeshanga ndambo yendi,
ngoboni bakulunga ba kulamwiniwa na kalimukisho.
10Kutangama kwa bantu bakulunga kwaleteshanga bantu bamu lukena ku wahilila,
ngoboni oho wakuluwa afwanga kwekalanga tunkelenkele twa ku wahilila.
11Na mfuywezi za muntu wakulunga, lukena lukayemeziwa,
ngoboni lukupanzanishiwa na kanwa ka muntu wamubi.
12Kunengi kuyeba ku kulimbwilisha ndambo yobe,
ngoboni muka ku yuvwishisha wa mwenanga.
13Muntu wakapele kaliha waholekanga byambo bikwambiwa kuwi,
ngoboni muntu wa kupwisha walamanga byambo.
14Litunga likuwa ndi kukubula ndayano,
ngoboni kuyo kuli bakakubela babengi kuli kupuluka.
15Muntu ukwimanina minendi ngayi ashimbe mukuli una li yaka mu wukalu,
ngoboni muntu wazimba bya nehe ukupuluka.
16Mbuyama wa nceshe wa wananga maleema,
ngoboni mulume wa mushunga wa wananga wuheti.
17Muntu wa shishemo waliyavwanga niye mwine,
ngoboni muntu wa ncili walilobeshanga niyemwine.
18Muntu wakuluwa kowa ebye awananga bya shemwa,
mukakukuba kulunga wawananga ncuungu ya kupwisha.
19Muntu wakukakatila mukulunga ukayoya,
ngoboni uya ukukonka byabibi ukafwa.
20Bantu ba mitima yayibi banengi bawunyengwe kuli Nyambi ya Ngula,
ngoboni wawahililanga na bakakwoloka.
21Mwa shikuma muntu wamubi ukashushuliwa,
ngoboni bakulunga bakalamwiniwa.
22Mbuyama wamuwahe wakubula kulilama,
nengi ngo kambalamunwe ka ngolinde kali ku muzulu wa ngulube.
23Bihanganiko bya muntu wakulunga byaletanga wuwahe,
ngoboni muntu wamubi natatilili wukali wa Nyambi.
24Mukakupana na mutima nimwawo wawezelelanga ku biya alinabyo,
ngoboni mukakuyumina ukuwezelela kuwu ncepwe wendi.
25Muka mutima wa shishemo ukatangama,
kami mukakulisha baminendi naye bakamulisha.
26Bantu ba kutanga muntu uya mukakubula kupana baminendi byakulya,
ngoboni bitandalisho byayanga ku muntu uya ukulandisha byakulya.
27Mukakushinga kutenda shiwahe, ukuyemeziwa,
ngoboni byabibi byezanga kunowo ukushingawo.
28Muntu ukukulupila mu wuheti wendi,
ukawa ngo mabizi apulumukanga mvumbi,
ngoboni wakulunga watamanga ngo libizi lya kubombola.
29Muntu ukuyandisha lupashi lwendi ukakona mpepo,
kami shileya ukenga ndungo ya baka ngana.
30Mukabo wa muntu wakulunga wenga mutondo wa wumi,
kami wakukeya ukuhenyeshela bantu kukwendi.
31 #
1Pita 4:18. Muntu wa kulunga ukutambula ncuungu hano hanci,
haya kukekala nahiti ku bakubula wunyambi na baka wubi?
Libuka Lya Kuyela © Bible Society of Zambia, 2020.