Balevi 25
25
Mwaka wakukatala kwa litunga
(Ndayano 15:1-11)
1 #
Kut 23:10-11. Nyambi ya Ngula wambile kuli Moshesha hayo ha lipili lya Shinayi ngayi, 2“Tongweza bantu ba Ishalela eze ndayano ngayi, oho mukengina mu litunga elye ali na kumipana Nyambi ya Ngula, mukalemeeke Nyambi ya Ngula na kubula kulima mafuba wenu ha mwaka wa mutanu na yibili. 3Mukakuna mafuba wenu, pe mukashanza mafuba wenu a shinyanca na kukungula mbuto yenu nimwayo ha myaka mutanu na umo. 4Ngoboni mu mwaka wa mutanu na yibili ukenga wakukatala kwa litunga, mwaka wafunguliwila kuli Nyambi ya Ngula. Hinga mukashanga mafuba wenu, hinge ku tetela mikolobozi yamu mafuba wenu a mikabo ya shinyanca. 5Hinga mukateza mbuto yangwila, hinge kubuyisha mikabo yaku mikolobozi yenu ya shinyanca ya kubula ku tetela, unengi mwaka wakukatala kwa litunga. 6Hinge ndi mwaka uyo litunga likabula kulimiwa, likapana byakulya kukwenu naku bandungo benu naku bakamilimo benu naku mapukwenda aba mwazika nabo, 7naku bimuna byenu naku tuyamana twalishaka twa mu litunga lyenu. Bakalya byuma nimwabyo biya bikamena.”
Mwaka wa Kushoboloka
8“Mukalabe bikati mutanu na bibili kuvulisha na myaka mutanu na yibili, wingi wayo nimwayo yikwinga myaka 49. 9Niho ha mutena wawulikumi wa ngonda ya mutanu na zibili ha mutena wakukuliza, mukatume muntu akashibe mpandula mu litunga nimwamo. 10Mu ntendelo eye mukemika mwaka wawu 50 naku wuyaka kunkumo na ku shimikila ku shoboloka mu litunga nimwalyo ku bantu bazikamo. Ukenga mwaka wa ku shoboloka, oho muntu na muntu ukaboka ku wuheti wendi naku ba lupashi lwendi. 11Hinga mukakuna mafuba wenu, hinge kuteza mbuto yiya yangwila ya kulimenena, hinge kubuyisha mikabo ku mafuba wenu a shinyanca a kubula ku shanziwa. 12Mwaka nimwawo ukenga wa kuyela kukwenu, mukalyanga tuhu ebye bya kubula kukuna, bikayimanga mu mafuba wenu.
13“Mu mwaka ou wakushoboloka muntu nimwendi ukaboka ku litunga lyendi. 14Niho oho mukalandisha mfuba ku minenu wa ka Ishalela hinge ku landa mfuba kukwendi, hinga mukamukeyela. 15Oho ndando yikemikiwa kutwala ha wingi wa myaka mfuba yikatwesha kuyima mbuto oho shilolo mwaka wakulubula ukume. 16Ndi yili na myaka yayingi ndando boni yikaya hayilu, ngoboni ndi yili tuhu na myaka yayishe ndando kami yikaboka ku nceto, ndaba ngayi ebye binalandishiwi nilwo tuhu lukahu lwa tutikanga muya mu mfuba. 17Hinga mukakeyela minenu wa Kaishalela, ngoboni mukatine Nyambi, ndaba Ami Nyambi ya Ngula, Nyambi yenu.”
Byabikalu mu mwaka wakukatala
18“Nohobene mukende mu zintambo zami namu kufundiziza kwami ngayi mwanga mukekale shiwahe mu litunga. 19Litunga likayima mbuto yalyo, kami mukawana ebye mwa shinga kulya nimwabyo, pe mukekala shiwahe. 20Ngoboni ndi mukepula ngayi, ‘Tukalyanga bishini ku mwaka wa mutanu na abili ndi kubula kukuna mafuba, kami kukungula mbuto tufwako?’ 21Nyambi ya Ngula ukafuywela litunga ha mwaka wa mutanu na umo ngayi mwanga litunga likalete byakulya bya ku fwanina kulya ha myaka yihatu. 22Oho mukakuna mafuba wenu ha mwaka wa mutanu na yihatu, mukekala na kulya ebye mwatezele ha mwaka wa mutanu na umo. Kami mukekala na kulya kwa ku fwanina hantu mbuto eye mukakuna uya mwaka yinateziwi.”
Bya kulibweshela
23Kaliha munafwanini kulandishilila limvu ndaba kaliha lyenga lyenu, nilyo linengi lyami, kami enu munafweke ngo bayeni na mapukwenda aba banetabilishiwi kulimamo. 24Oho limvu linalandishiwi, ngovu za mwine walyo wakutatika kulilanda kami na kulibwesha zikafwanina kulimukiwa. 25Ndi minenu wa Kaishalela ukenga wakuyanda pe ukakandikiziwa kulandisha mbalila ya limvu lyendi, kawushinda wa ha mutima ukali kuliza. 26Muntu wakubula kawushinda wakulikuliza, pe kampe kumbili niye mwine ukenga wakuliwanina, ukekala na byuma pe uku fwanina kuli kuliza kami. 27Ha shambo shiyo ukafwanina kuyumbila muntu ou walilandile mali anafwanini ku myaka yiya yinashalili hantu mwaka wakushoboloka wakumbili unakumu, oho akatwesha kubwesha mbalila ya limvu lyendi. 28Ngoboni ndi ukabula mali aku fwanina kubweshela kami, likekala mu ngovu za nowo walilandile hantu ku mwaka wakushoboloka mwaka wa 50 wakumbili. Ha mwaka uyo nilyo lika boka kami ku mwine walyo wakutatika.
29Ndi muntu ukalandisha litala mu munzi wa kembi, uli na ngovu za ku fwanina kulibweshela kami mu mwaka wakutatika kubalika ku mutena uya alilandishile. 30Ngoboni ndi kulibweshela kami mu mwaka tuhu umo ufwako, ukayawa ngovu za kuheta kami liya litala, pe litala likenga wuheti wa mukakulanda mwaya myaka kami naku bihemwinino byendi, kukaboka ha mwaka wa kushoboloka bifwako. 31Ngoboni matala aha munzi wakubula kembi anengi ngonehe mafuba. Mwine wawo wakutatika uli na ngovu za kuwabwesha kami, pe akabokeshiwa mu mwaka wakushoboloka. 32Hinge kwingi noho Balevi bali na ngovu za kukubweshela wuheti wabo mu minzi yabo shikati nimwasho. 33Ndi litala lya mu munzi wa kembi linalandiwi ku kalevi, kami kuboka lifwako, liku fwanina ku bokeshiwa mu mwaka wakushoboloka myaka 50, ndaba matala a Balevi baheta mu minzi enga wuheti wabo mwaya myaka hakati ka bantu ba Ishalela. 34Ngoboni mabuyishilo azinguluka ku minzi ya Balevi kukalandishiwa afwako, niwo wunengi wuheti wabo mwaya myaka.
Bya kupana mikuli bancepwe
35 #
Nday 15:7-8. Ndi minenu Kaishalela mwazika nendi hahepi unashepwe, kami kutwesha kuliwanina niye mwine ufwako, mu ku fwanina kumupana ngonehe mwapananga bayeni na mapukwenda ngayi mwanga akazamine kwikala nanenu hahepi. 36Hinga mukayumbisha nkambiko, ngoboni mukatine Nyambi yenu pe mukalehe minenu Kaishalela akekalenga na nenu hahepi. 37#Kut 22:25; Nday 23:19-20.Hinga mukamupana mukuli wa mali wa kumushingila nkambiko, hinga muka mu keyela ha byakulya biya mukamulandisha. 38Ami Nyambi ya Ngula, Nyambi yenu, ou wamifumishile mu litunga lya Engepita ngayi mwanga nimipane litunga lya Kenaani, kami ngayi nikenge Nyambi yenu.
Kushoboloka kwa bandungo
39Ndi minenu mwazika nendi wa kaishalela wengakale hi waku shepwa shikuma, ha kulilandisha kukwenu, hinga mukamupana mulimo wa kwinga ndungo. 40Mukekala nendi kwinga ngo muntu wakuleta na kumitendela milimo kukuma ku mwaka wawu 50 myaka ya ku shoboloka. 41Ku shikati shiyo niye na bana bendi ukamishiya na kuboka kukwabo naku wuheti wa ba lupashi lwendi. 42Bantu ba Ishalela benga bandungo bami, aba nabafumishile mu litunga lya Engepita. Kaliha ba ku fwanina kulandishiwa kwinga bandungo. 43Hinga mubekalika na shilala, ngoboni mukatine Nyambi yenu. 44Ndi mukashinga bandungo mukatwesha kubalanda ku matunga anamizinguluku. 45Mukutwesha kami kulanda ba mapukwenda, aba bazika hakati kenu na mapashi wabo mwekala nabo. Shinene batwanuke aba bahemuwila mu litunga lyenu mwanga bakenge wuheti wenu. 46Kami mukatwesha kuka bashiya kwinga likona lya bana benu aba bakenga bandungo mu kuyoya kwabo nimwako. Ngoboni enu kaliha mwafwanina kwikalika na shilala baminenu Baishalela.
Kulilandisha kwa Kaishalela ku lipukwenda
47Ndi muyeni hinge lipukwenda ou mwazika nendi ukwinga wakuheta, hamina minenu wa kaishalela ukenga waku shepwa, pe ukalilandisha niyemwine kwinga ndungo ku uya lipukwenda hinge ku umo wa lupashi lwendi. 48Niho oho walilandishakale, ukalishobolola, umo ha bayayizendi na bakonzo bakamushobolola, 49hinge kanyantu kendi, hinge mufwala wendi hinge wamina ku bawushinda wendi baha mutima bakatwesha kumushobolola. 50Niye na muntu uya wa mulandile bakafwanina kulaba myaka kubalika shikati shiya alilandishile kutwala ku mwaka wakushobolola wakumbili, kami ukatoya ndando ya kumushobolola kwezeka ngo ndando bapananga ku mukamulimo. 51Hinge kunashala myaka yayingi uku fwanina ku shimba shitapilo sha ndando ya kuhetiwa kukuma ha wingi wa myaka yinashala. 52Hinge kunashala myaka yayishe hantu mwaka wakushoboloka, bakalaba hamo nendi na kuhingisha ndando ya myaka yinashalako. 53Ukekala nendi ngo muntu wa milimo ya kuhola ha mwaka ha mwaka, hekulyendi ku fwanina ku mwikalisha na shilala ufwako. 54Ndi kumushobolola mu zinzila zanehe ufwako niye na bana bendi bakafwanina kushoboloka ku mwaka wawu 50#25:54 Mu Shihebelu ngayi Njumbili, mwaka wakushoboloka. wakushoboloka wakumbili. 55Kaishalela kutwesha kwinga ndungo ufwako ndaba bantu ba ishalela banengi bandungo bami. Banengi bandungo bami baya nafumishile mu litunga lya Engepita, Ami Nyambi ya Ngula, Nyambi yenu.
Libuka Lya Kuyela © Bible Society of Zambia, 2020.