Balevi 23
23
Bimbo bya wunyambi
1Nyambi ya Ngula wambile kuli Moshesha ngayi, 2“Tongweza bantu ba ishalela ha bimbo bya kwimikiwa, ebye ba kalamanga kwinga bimbo bya kuzila. Obyo bimbo binengi ebye.
3 #
Kut 20:8-10; 23:12; 31:15; 34:21; 35:2; Nday 5:12-14. “Mukekala matena mutanu na umo eye mukatendanga milimo yenu, ngoboni anukenu ngayi mutena wa mutanu na abili unengi wakukatala nimwako oku mukekala.”
Shimbo sha kupitilila na Mankende a kubula mumena
(Kulaba 28:16-25)
4“Ebye nibyo bimbo bya Nyambi ya Ngula bikatendiwanga ha shikati sha hatiwa sha kuzila. 5#Kut 12:1-13; Nday 16:1-2. Shimbo sha kupitilila shikapingiwa kulemeeka Nyambi ya Ngula kubalika kukulela kwa mutena ha mutena wa likumi na kanaa wa ngonda wakutatika. 6#Kut 12:14-20; 23:15; 34:18; Nday 16:3-8. Ha mutena wa likumi na mutanu Shimbo sha Mankende A kubula Mumena shikatatika, kami ha matena mutanu na abili ku fwanina kulya mankende akuvuba na mumena mufwako. 7Ha mutena wakutatika wa matena awa mukekala na shikungulukilo sha kuzila sha kulemesha, kami hinga mukatenda mulimo wenu waha mutena ha mutena. 8Ngoboni mukakombelelenga zinkombela zenu za byakulya na mundilo kuli Nyambi ya Ngula, ha matena mutanu na abili. Ha mutena wa wu mutanu na abili mukekala kami na shikungulukilo sha kuzila sha kulemesha, pe kami kukatenda mulimo wenu waha mutena ha mutena mufwako.”
Shimbo sha mikabo ya kutatika
9Nyambi ya Ngula wambile kuli Moshesha ngayi, 10“Tongweza bantu ba Ishalela ngayi oho bakakuma mu litunga liya nili na kubapana Ami Nyambi ya Ngula, pe ha kuteza mbuto yenu, twalenu shikuta sha kutatika kuli mukankombela. 11Pe mukankombela ukashiyengayengesha kuli Nyambi ya Ngula, kwinga nkombela ngayi enu mwanga mutambuliwe. Mukankombela ukashiyengayengesha oho mutena wakukatala wapitakale. 12Ha mutena owo mukayengeyengesha ntupu ya shikuta sha mbuto, kami kakombelelenu shikungwe wa mbelele wa mwaka umo uya wakubula muhendo kwinga nkombela ya kuhokesha kuli Nyambi ya Ngula, 13hamo na makilo abili a muhunga waku vwela na mazi a olive bikakombeleliwe na mundilo kwinga nkombela ya byakulya. Livumba lya neye ntupu likuwahililisha Nyambi ya Ngula. Mukaleta kami ntupu ya lita yimo ya waine. 14Hinga mukalya ku mbuto yimo yayikata hinge yayibihu hinge ya kuyoha hinge kuvuba mankende, hantu oho munalete eye ntupu kuli Nyambi. Kufundiziza oku kukalamiwenga ku bihemunwino nimwabyo oku mukekala.”
Shimbo sha ha kuteza loto
(Kulaba 28:26-31)
15 #
Kut 23:16; 34:22; Nday 16:9-12. “Labenu zishunda mutanu na zibili kubalika ku mutena wakukatala uyo mwaletele shikuta shenu sha mbuto ya kuyengayengesha kuli Nyambi ya Ngula, 16pe ha mutena wawumakumi mutanu oho Matena aku katala ya wu mutanu na abili yapitakale, pe mukaleta kuli Nyambi ya Ngula mbuto yamina yayikata. 17Lupashi na lupashi lukaleta mipumpa yibili ya mankende kuli Nyambi ya Ngula kwinga ntupu ya ku yengayengesha. Mupumpa na mupumpa ukavubiwa na mumena, ha muhunga wa makilo abili na kuwa yoha, pe akapanikiwa kuli Nyambi ya Ngula kwinga ntupu ya kutatika kuteza ku mbuto. 18Shikungulukilo shikaleta mankende hamo na bikungwe bya bana bambelele ba mwaka umo, mutanu na babili, nkunzi umo na bikungwe bya bampongo babili, bakubula muhendo. Bakakombeleliwa kwinga nkombela kuli Nyambi ya Ngula. Bakakombelela nkombela eye hamo na ntupu ya mpeka na ntupu ya waine ha mundilo. Livumba lya neye nkombela likuwahililisha Nyambi ya Ngula. 19Kami mukakombelela shikungwe wa mpongo umo kwinga ntupu ya ha wubi na bana bambelele babili ba mwaka umo kwinga nkombela ya ha kulilumikila. 20Mukankombela Ukayengayengesha bana ba bambelele babili hamo na mankende a kutatika kuteza ku mbuto kwinga nkombela ya kuyengayengesha kuli Nyambi ya Ngula kwinga ya bakankombela. Eze zinengi zinkombela za kuyela. 21Ha mutena uyo hinga mukatenda milimo yenu yaha mutena ha mutena, ngoboni mukekala na shikungulukilo sha kuzila sha kulemesha. Bihemunwino byenu nimwabyo bikalama oku kufundiziza, howa ndaba hinge ndi mwazika kuti.”
Shimbo sha zishunda mutanu na Zibili
(Kulaba 29:1-6)
22 #
Bal 19:9-10; Nday 24:19-22. “Oho mukateza mafuba wenu, hinga mukateza mbuto ya kunkumo ya mfuba, kami hinga mukaboka munyima na kuteza mapumpwa a mbuto yiya ya ku shalamo, bishiyenu binge bya bantu ba kuyanda na mapukwenda. Ami Nyambi ya Ngula, Nyambi yenu.”
Shimbo sha ha zimpandula
(Kulaba 29:1-6)
23Nyambi ya Ngula wambile kuli Moshesha kutongweza bantu ba ishalela ngayi, 24“Ha mutena wakutatika wa ngonda wa mutanu na zibili mukalame mutena wawunene wakukatala, pe mukekale na shikungulukilo sha kuzila sha kulemesha, oho mukayuvwa zimpandula hi zitendoka. 25Hinga mukatenda milimo yenu, kami mukatupule ntupu ya byakulya ha mundilo kuli Nyambi ya Ngula.”
Mutena wakukuliza
(Kulaba 29:7-11)
26 #
Bal 16:29-34. Nyambi ya Ngula wambile kuli Moshesha ngayi, 27“Tongweza ba Ishalela ngayi, mutena wa likumi wa ngonda wa mutanu na zibili, unengi mutena wa kukuliza waha mwaka ha mwaka watendiwanga ha kuliyelesha. Ha mutena uyo mukazile kulya. Mukekale na shikungulukilo sha kuzila na kulemesha, pe mukakombelele nkombela ya byakulya kuli Nyambi ya Ngula. 28Hinga mukatenda mulimo ha mutena uyo ndaba niwo unengi mutena wakulikuliza ku meho a Nyambi ya Ngula. 29Muntu nimwendi wakubula kuzila kulya ha mutena uyo, ukafumishiwa ku bantu ba Nyambi. 30Kami muntu nimwendi ukatenda milimo ha mutena uyo, Ami Nyambi ya Ngula nikamulobesha hakati ka bantu bendi. 31Oku kufundiziza kukakona ku bihemunwino nimwabyo, howa ndaba hinge ndi mwazika kuti. 32Mutena uno ukenga mutena wawunene wakukatala, mutena uyo mukazile kulya. Pe mukalame mutena uno wawunene kubalika kukulela kwa mutena wa mutanu na anaa wa ngonda, kukuma kukulela kwa mutena wa likumi wa ngonda.”
Shimbo sha minkungwa
(Kulaba 29:12-40)
33Nyambi ya Ngula wambile kuli Moshesha ngayi, 34#Nday 16:13-15. “Tongweza ba ishalela ngayi, Shimbo sha minkungwa shikabalika ha mutena wawulikumi na mutanu wa ngonda wa wu mutanu na zibili na kutwala ku matena mutanu na abili. 35Ha mutena wakutatika wa matena awa mukekala na shikungulukilo sha kuzila sha kulemesha, kami hinga mukatenda milimo yenu yaha mutena ha mutena. 36Ha mutena wa mutanu na abili mukakombelela zintupu za byakulya kuli Nyambi ya Ngula. Ha mutena wa mutanu na kahatu, mukekala kami na shikungulukilo sha kuzila, pe mukakombelela nkombela ya byakulya kuli Nyambi ya Ngula. Niwo unengi mutena wakuzila, kami kukatenda milimo mufwako.
37“Ebye binengi bimbo bya wunyambi ha kulemeeka Nyambi ya Ngula, oho mukekala na bikungulukilo bya kuyela bya kulemesha, pe mukakombelela zinkombela za ha mundilo na zinkombela za kuhokesha na zintupu za mpeka na zintupu za waine, ngonehe bikashingiwa ha mutena ha mutena. 38Ebye bimbo bikafunguliwila ku matena nimwawo a Nyambi ya Ngula. Yakukatala na zintupu zenu na zinkombela zenu za kuhahulula luhaho na zinkombela zenu za kupana na kufunga, eze mukapana kuli Nyambi ya Ngula. 39Oho mwatezakale mafuba wenu mukapinga shimbo eshe ha matena mutanu na abili, ha kubalika ha mutena wawulikumi na mutanu wa ngonda ya wu mutanu na zibili. Mutena wakutatika ukenga mutena wawunene wakukatala. 40Ha mutena uyo mukashimba mikabo yayiwahe yaku mitondo yenu, kami mukashimbe myahi ya mikabo yayiwahe ya ku mitondo yenu, kami mukashimbe myahi ya munkomona na myahi yaku mitondo ya mabizi na myahi yaku matoya akutepukila ha mema, pe mukatangale ku meho a Nyambi ya Ngula, Nyambi yenu mu matena mutanu na abili. 41Mukapinge shimbo eshe ha matena mutanu na abili ha mwaka ha mwaka. Oku niko kufundiziza mukalamanga ku bihemunwino byenu nimwabyo. Mukapinganga mu ngonda ya mutanu na zibili. 42Bantu nimwabo ba ishalela bakekala mu minkungwa matena mutanu na abili, 43ngayi bihemunwino byenu mwanga bikalimuke ngayi Nyambi ya Ngula, wekalishile bantu ba ishalela mu minkungwa ya kukwatiziza oho abafumishile mu Engepita. Ami Nyambi ya Ngula, Nyambi yenu.”
44Nohobene eshe nisho Moshesha afundizizile bantu ba Ishalela kulama bimbo bya kwimikiwa bya Nyambi ya Ngula.
Libuka Lya Kuyela © Bible Society of Zambia, 2020.