Yoshuwa 8
8
Ishalela ukukona Ayi
1Nyambi ya Ngula wambile kuli Yoshuwa ngayi, “Hinga wutina hinge kutampwa. Ushimbe banzita nimwabo pe uye nabo ku lukena lwa Ayi. Nikakupana ngovu za kukoma mwene, pe bantu bendi na lukena na litunga bikenga byobe. 2Mukatenda ku Ayi na mwene wamo ngonehe shiya mwatenda ku lukena lwa Yeliko na mwene wamo. Ngoboni shitika shino, mu kutwesha kutenda lipuku na bimuna binge byenu. Liwahishenu kubelaminina lukena kunyima na kululwisha na kulubazumuna.”
3Nohobene Yoshuwa walishakashakile kuya ku Ayi na banzita nimwabo. Wahatileho bantu ba kukanca 30,000 pe wabatumineko wushiku. 4Pe wabatongwezele ngayi, “Holamenu ku nciza yimo ya lukena, pe hinga mukekala shikuma kwakutali. Kami liwahishilenu kulwa. 5Niho ami na banzita balihamo na nami tukalalabila ku lukena. Oho bakatutika kwiza na kutulwisha, tukafutuka na kwituka, ngonehe twatendele ku shikati sha kutatika. 6Bakatutanda hantu tunabatwala kwakutali na lukena. Pe bakahanganika ngayi, ‘Tuli na kwituka kukwabo ngonehe twatendele ha kutatika.’ 7Niho mukaholoke oku mwaholama na kukwata lukena. Nyambi ya Ngula, Nyambi yenu, ukalupanika kukwenu. 8Oho mwashimbakale lukena, luhokeshenu ngonehe shiya amilayelele Nyambi ya Ngula.” 9Nohobene Yoshuwa wabatumine, pe bayile ku mwanya wakuholama na kutatilila kuyo ku mponci ya Ayi mukati ka Ayi na Mbetele. Yoshuwa walanganine wushiku uyo ku munkungwa.
10Pe Yoshuwa wapindukile lumenemene, niho ehanine banzita hamo. Niho niye na bakakutwaminina Ishalela babatwalile ku Ayi. 11Niye hamo na banzita ekalile nabo bayile kululumana ku menginino amanene a lukena, pe batendele munkungwa, ku ncelele ya Ayi, oku kwekalile mbuwa mukati kabo na Ayi. 12Washimbile bantu ba kukuma ku 5,000, pe wabayakile mu myanya yakuholama ku mponci ya lukena, mukati ka Ayi na Mbetele. 13Niho bakwalikile banzita mu myanya yabo, banzita bamu munkungwa wawunene bakwalamine ku ncelele ya lukena nanobo baholamine ku mponci. Ngoboni Yoshuwa wushiku uyobene wakunkulukilile mu mukulo. 14Oho mwene wa mu Ayi amonene bantu ba Yoshuwa, wanyankupile kutenda. Niye na bantu bendi nimwabo bayile ku mbuwa ya Yondana mu kulwisha Ishalela ku mwanya umo ngonehe mwaka. Kaliha walimukile ngayi bakamulwisha kami ku muhoko wa kunyima. 15Yoshuwa na bantu bendi balyongezele kutampwa, pe betukile na kuya ku litunga lyanyuminine. 16Bantu nimwabo bamu lukena lwa Ayi behaniwile hamo na kubakonka, pe oho batandilenga Yoshuwa, pe Yoshuwa wabatwalile kwakutali na lukena. 17Kowa mulume wa washalile mu Ayi hinge Mbetele bayile na kukonka Baishalela. Lukena lwashalile tuhu lwa shwee lwa kubula muntu wakululama.
18Niho Nyambi ya Ngula ambile kuli Yoshuwa ngayi, “Yinika mulinga wobe ku Ayi. Nili na kukupanikalwo.” Pe Yoshuwa watendele ngonehe atongweziwile. 19Oho akatwile tuhu liboko lyendi, bantu obo baholaminenga baholokele shawangu wangu, pe betukilile mu lukena, pe balupukwile. Pe wanguwangu bahokeshele lukena. 20Oho bantu bamu Ayi bashetukile kunyima, niho bamonene tuhu wishe hiututuma unakakwata naku mbimbayilu. Babulile kuwana nzila ya kushilila, ndaba Baishalela aba betukilile ku litunga lyanyuminine batengulukilile kuziha bantu bamu Ayi. 21Oho Yoshuwa na bantu bendi bamonene ngayi bamina banakomo lukena, kami ngayi nilwo luli na kuhoka, batengulukile kuziha bantu bamu Ayi. 22Baishalela aba bekalile mu lukena bezile na kulwa ku ngunga. Nohobene bantu bamu Ayi baliwanine banazingulukiwi nciinci na Baishalela. Kami kowa wapulukilemo hinge kupanza. 23Ngoboni bakwatile mwene wamu Ayi, pe bamutwalile kuli Yoshuwa.
24Oho baishalela bazihile bantu nimwabo omu mu litunga lyanyuminine oko batandiwilile, niho babokele ku Ayi, pe bazihile aba bekalileko. 25Wingi wa bantu nimwabo bazihiwile ha mutena uyo bengile 120,000 balume na bambuyama. 26Pe Yoshuwa wazaminine kwinika mulinga wendi ku Ayi, kami kaliha wawutulile hanci hantu noho bantu nimwabo bazihiwile. 27Baishalela balitentekelele bimuna na wuheti uya wapukuliwile mu lukena, ngonehe Nyambi ya Ngula atongwezele Yoshuwa. 28Yoshuwa wahokeshele lukena lwa Ayi, pe walushiyile hi lipembe naku mutena walelo lushili noho. 29Washwangile mwene wamu Ayi ha shitondo pe wamushiyile kuyo hantu naku mazolo. Ha kulela kwa mutena Yoshuwa wabatongwezele ngayi bafumishe lutu lwa mwene na kuluyumbila hanci ngayi lutwaliwe ku lipangati lyamu lukena. Pe niho balundikileho mushiinzi wawunene wa mamanya, ou ushiliko nalelo.
Bakulaba ndayano ha lipili lya Embalu
30 #
Nday 27:2-8; Kut 20:25. Nohobene Yoshuwa wazikilile, Nyambi wa Ishalela kaala, ha Lipili lya Embalu. 31Wakatendele ngonehe ndayano za Moshesha mukamulimo wa Nyambi ya Ngula apanikile Baishalela, ngonehe shikwambiwa ku mazu a Moshesha ngayi “Kaala kakuzika na mamanya awa a kubula ku shendulula na bitendesho bya byondo.” Batupwile zinkombela za kuhokesha na zinkombela za kulilumikila. 32Kuyo Yoshuwa wanungwililile ndayano za Nyambi ziya atikitile Moshesha ha mamanya oho Baishalela bamonako. 33#Nday 11:29; 27:11-14.Baishalela nimwabo, hamo na bakakutwaminina babo na babilolo na bakakuyata, kuyakako kami na mapukwenda hakatikabo bemanine ha zimbalila zibili na Likwati lya Kulimama kwa Nyambi ya Ngula, hinga bapenza zimpala zabo ku bakankombela Ba balevi aba balishimbile. Shitika sha bantu bemanine kupenzesha myongo yabo ku Lipili lya Embalu na lipili lya Ngelizima. Moshesha mukamulimo wa Nyambi ya Ngula walimenekele kubatongweza kutendanga eshe oho ndi shikati shabo shakumakale sha kutambula mfuywezi. 34Yoshuwa walabile ndayano za Nyambi nimwazo na kubilikiza na mfuywezi na shikuto, ngonehe shiya byatikitiwa mu libuka lya mazu a Nyambi. 35Yoshuwa walabile mazu nimwawo awa abatongwezele Moshesha, ku Baishalela baya nimwabo bakungulukile, kufungila kumo na bambuyama hamo na batwanuke na mapukwenda bazikilenga hakati kabo.
Libuka Lya Kuyela © Bible Society of Zambia, 2020.