Yoshuwa 23
23
Kulaya kwa Yoshuwa
1Shikati shashinene shapitile, oho Nyambi ya Ngula wakatalishakale Baishalela ku bamalamo babo babazingulukile, ku shikati shiyo Yoshuwa wengile hikakulukazi shikuma. 2Nohobene wehanine Baishalela nimwabo na bakulwane nimwabo na bakakutwaminina na bakakuyata, hamo na babilolo ba bantu, pe wambile ngayi, “Hano nengakale kakulukazi shikuma. 3Munamono byuma nimwabyo biya Nyambi ya Ngula, Nyambi yenu, atendakale ku matunga awa nimwao ndaba yanenu. Nyambi ya Ngula, Nyambi yenu, unamilwili. 4Monenu taha napaniki litunga ku mishobo yenu kwinga likona lyenu na matunga amina ashalako kuyakako na matunga aya nakoma mwaka, kubalikila ku mbalila yaku mushamuko ku Mushinzi wa Yondana kukuma naku mponci ku Liwate lya Menditeleniya. 5Nyambi ya Ngula, Nyambi yenu, ukabatampwisha pe ukabatandila kwakutali aha mu kuya na kulikaka. Mukatambula litunga lyabo, ngonehe amikulupishile Nyambi ya Ngula, Nyambi yenu. 6Nohobene shumenu na kwombatala na kutenda byuma nimwabyo biya byatikitiwa mu libuka lya Ndayano za Moshesha. Hinga mu zishiya na kupenzesha ku liboko lya shilyo hinge lya shimoho. 7Pe hinga mukalifungila hamo na mishobo ya bantu aba banashala mukati kenu, hinge kutoyanga mazina a banyambi babo, hinge kuliyavwisha mazina wabo ha kubeza, hinge kulemesha obo banyambi, hinge kulamba kukwabo. 8Ngoboni lilumikilenu kuli Nyambi ya Ngula ngonehe mwekalilenga kukuma naku lelo. 9Nyambi ya Ngula unatandamo matunga amanene a ngovu aha mwayile na kulikaka, kukuma na lelo, kowa muntu unatweshe kwimana na kumi lwisha. 10Muntu na muntu wakukwenu ukutwesha kukapalanganisha likulukazi limo lya bantu, ndaba Nyambi ya Ngula, Nyambi yenu, niye uli na kumi lwila, ngonehe a kulupishile. 11Haya mwinge ba kushangama, muhake Nyambi ya Ngula, Nyambi yenu. 12Ndi mu kubula kwinga bakulunga na kuliwana na matunga aya ashalileko mukati kenu na kuliyekela nabo, 13pe limukenu ngayi, Nyambi ya Ngula, Nyambi yenu, ufwako kukatandamo eye mikoka aha mu kuya na kulikaka. Ngoboni, nibo bakenga ngo bamalamo kukwenu ngonehe lunyimbwa hinge linkwina, kami bakenga ngonehe mpafwa ya shilangwa ha myongo yenu, hinge ngo mihongela mu meho wenu. Eshe shikekala naku mamaninino hantu mu namaninini nimwenu mu litunga lino lyaliwahe amipanikile Nyambi ya Ngula, Nyambi yenu.
14“Haya shikati shami sha kufwa shili hahepi. Muntu na muntu wakukwenu ukulimuka mu mutima wendi namu moyo wendi ngayi, Nyambi ya Ngula, Nyambi yenu, unapana byuma nimwabyo byabiwahe biya amukulupishile. Nimwabyo biya a kulupishile binalamiwi, kowa shikulupisho shimo shinakwangana. 15Ngoboni ngonehi shiya alamine bikulupisho nimwabyo biya a kulupishile kukwenu, pe niye kami ukaleta kashushwilo nimwako kukwenu, hantu naminongeshe muno mu litunga lyaliwahe anamipaniki. 16Ndi enu kulama kulimama okwe amilayile Nyambi ya Ngula, Nyambi yenu mufwako, pe ndi mukaya na kutendela milimo banyambi bashenge na kulamba kukwabo, mu kupilama kwendi ukamishushula. Pe wanguwangu kowa umo kukwenu ukashalamo mu litunga lino lyaliwahe liya amipanikile.”
Libuka Lya Kuyela © Bible Society of Zambia, 2020.