Yoshuwa 19
19
Litunga lyapanikiwile kuli Shimiyoni
1Mushobo wawubili uya watambwile litunga bengile ba lupashi lwa Shimiyoni. Litunga lyabo lyakakumine mukati ka litunga liya lyapanikiwile ku mushobo wa Yunda. 2#1Bya 4:28-33. Kukwalyo kwafungiliwile na Mbelishemba na Shemba na Molanda, 3na Haza Shuwali na Mbala na Ezema, 4na Elitolandi na Mbetule na Homa, 5na Zikilangi na Mbeti Makamboti na Haza Shusha, 6na Mbeti Lebayoti na Shaluheni. Yengile minzi likumi na yihatu, kuyakako na tunzi twazingulukako.
7Kwekalile kami Ayina na Limoni na Eta na Ashani, yengile minzi yinaa, kuyakako na tunzi twazingulukako, 8kuyakako na tunzi nimwato twazinguluka minzi yiya yikakuma naku Mbaalati Mbela, hinge Lama, ku mabukubuku. Elye nilyo lyengile litunga liya batambwile ba lupashi lwa Shimiyoni kwinga likona lyabo. 9Ha kuwana ngayi shitapilo sha litunga lya mushobo wa Yunda shengile shashinene kupitakana eshe bashingilenga. Nohobene mbalila yimo ya litunga lya Bayunda yapanikiwile ku mushobo wa Shimiyoni.
Litunga lyapanikiwile kuli Zembuloni
10Mushobo wawuhatu uya watambwile litunga bengile ba lupashi lwa Zembuloni. Litunga batambwile lyakakuminine ku Shalindi. 11Kufuma kuyo ku nginza yashangwile ku mponci kukakuma naku Malela, pe yakakumine naku Ndembesheta naku kashinzi kaku mushamuko wa Yokiniyamu. 12Mu nciza ya Shalindi nginza yashangwile ku mushamuko, yakakumine naku nginza ya Kishiloti Tambola, niho yakakumine naku Ndembelati, kukakuma naku Yafwiya. 13Yafumine kuyo yashangwile ku mushamuko kukakuma naku Ngati Hefwa naku Eti Kazini, kukakuma naku Limoni niho yabokele ku mbalila ya Neya. 14Niho yatengulukilile ku ncelele na kululumana ku Hanatoni, pe yakamaninine ku mukulo wa Ifwitahela. 15Kufungilako na Katahi na Nahalali na Shimiloni na Indala na Mbetelehema, yengile minzi likumi na yibili na tunzi twazingulukako. 16Eye minzi na tunzi twazingulukako, yekalile mu litunga elye batambwile ba lupashi lwa mushobo wa Zembuloni kwinga likona lyabo.
Litunga lyapanikiwile kuli Ishaka
17Mushobo wawunaa uya watambwile litunga bengile ba lupashi lwa Ishaka. 18Litunga lyabo lyafungilile minzi ya Yezilelu na Keshuloti na Shunema, 19na Hafwalayima na Shiyoni na Anahalata, 20na Labita na Kishiyoni na Embezi, 21na Lemeti na Enganima na Eni Handa na Mbeti Pazezi. 22Nginza yakakumine naku Tambola na Shahazuma na Mbeti Shemeshi, yakamaninine ku Yondana. Yengile minzi likumi na mutanu na umo na tunzi twazingulukako. 23Eye minzi na tunzi twazingulukako yekalile mu litunga elye batambwile ba lupashi lwa Ishaka kwinga likona lyabo.
Litunga lyapanikiwile kuli Asha
24Mushobo wa mutanu uya watambwile litunga bengile ba lupashi lwa Asha. 25Litunga lyabo lyafungilile minzi ya Helikati na Hali na Mbeteni na Akishafwi, 26na Alamu Meleki na Amandi na Mishale. Ku mponci nginza yakakumine naku lipili lya Kamela naku mushinzi Shiho Limbina. 27Niho yapenzeshele ku mushamuko na kululumana ku Mbeti Ndangoni, ya kakumine ku Zembuloni naku mukulo wa Ifwitahela ku nzila yaku ncelele kukakuma naku Mbeti Emeki na Neyela. Kufuma kuyo, yashangwile ku ncelele kukakuma naku Kambulu, 28naku Embiloni na Lehombu na Hamoni na Kanahe, kukakuma naku Shindoni. 29Niho nginza yashangwile kuya ku Lama, yakakumine ku Tile, lukena lwa kembi, niho yashangwile kuya ku Hosha, yakakuminine ku Liwate lya Menditeleniya. Kufungilako Mahalambi na Akizimbi, 30na Uma na Afweki na Lehombi. Yengile minzi makumi abili na yibili hamo na tunzi twazingulukako. 31Eye minzi na tunzi twazingulukako yekalile mu litunga elye batambwile ba lupashi lwa Asha kwinga likona lyabo.
Litunga lyapanikiwile kuli Nafwitali
32Mushobo wa mutanu na umo uya watambwile litunga bengile ba lupashi lwa Nafwitali. 33Nginza yabo yabalikilile ku Helefwa, ku mutondo wa Oka mu Zananimu, kukakuma ku Andami Nekemba na Yambinelu kukakuma naku Lakumi, yakuminine ku Yondana, 34niho yashangwile ku mponci ku Azinoti Tamba, kufuma kuyo yakakumine ku Hukoki. Balitabwilile zinginza na Zembuloni ku mabukubuku na Asha ku mponci ku mushamuko wa Yondana. 35Minzi ya twimbi yengile Zindimu na Zele na Hamati na Lakati na Kineleti, 36na Andama na Lama na Hazola, 37na Kendeshi na Endileyi, Eni Hazola, 38na Yiloni na Mingindala Eli na Holemu na Mbetanati na Mbeti Shemeshi. Yengile minzi likumi na mutanu na yinaa, hamo na tunzi twazingulukako. 39Eye minzi na tunzi twazingulukako yekalile mu litunga elye batambwile ba lupashi lwa Nafwitali kwinga likona lyabo.
Litunga lyapanikiwile kuli Ndani
40Mushobo wa mutanu na yibili uya watambwile litunga bengile ba lupashi lwa Ndani. 41Litunga lyabo lyashimbililile na Zola na Eshitawolu na Ili Shemeshi, 42na Shaalambini na Ayaloni na Itila, 43na Eloni na Timina na Ekiloni, 44na Eliteke na Ngimbetoni na Mbaalati, 45na Yehundi na Mbene Mbalaki na Ngati Limoni, 46na Meyalikoni na Lakikoni, kuyakako hamo na litunga lya zinguluka Yopa. 47#Bak 18:27-29. Ngoboni ba lupashi lwa Ndani bawanine ukalu ha kupukula litunga lyabo, pe niho bayile ku ncelele ku munzi wa Leshemu naku wulwisha. Bapukwile munzi na kuziha bantu bekalilemo, niho bawufutwile kwinga wabo. Bazikilemo na kuwu tumba ngayi Ndani nehe lizina lya nkaka yabo Ndani. 48Minzi eye nimwayo na tunzi twazingulukako, yengile ya ba lupashi lwa Ndani eye batambwile kwinga likona lyabo.
Litunga lyapanikiwile kuli Yoshuwa
49Oho bantu ba Ishalela bamanishile kutapishila litunga, bapanikile Yoshuwa mwana Nune mbalila yimo ya litunga kwinga likona lyendi. 50Ngonehe ambile Nyambi ya Ngula, bamupanikile munzi ou anyepele wa Timinati Shela mu litunga lya binkanda lya Efulemu. Watendulwile munzi pe wazikilemo.
51 #
14:2. Mukankombela Eliza na Yoshuwa mwana Nune na bakakutwaminina mapashi a mishobo ya Ishalela bapanikile eze zimbalila za litunga na kukuna nyela ya kwipula kuli Nyambi ya Ngula ku munzi wa Shilo, ku menginino a ntanda yaku meho a Nyambi ya Ngula. Eshe nisho bamanishile kutapishila litunga.
Libuka Lya Kuyela © Bible Society of Zambia, 2020.