Yoshuwa 17
17
Litunga lyapanikiwile ku mushobo wamina wa Manashe
1Mbalila ya litunga lya ku mponci ya Yondana lyapanikiwile ku ba lupashi bamo batutikile kuli Manashe mwana Yoshefwa wa mweli. Makiya tata Ngiliyande wengile mwana Manashe wamukulwane. Makiya wengile kanzita wampupo, nohobene matunga a Ngiliyande na Mbashani apanikiwile kukwendi. 2Litunga lya ku mponci ya Yondana kami lyapanikiwile ku ba lupashi lwa Manashe aba bashalilile, ba Ambiyeza na Heleki na Ashiliyele na Shekemu na Hefwa na Sheminda. Aba bengile bazukulya Manashe babalume, mwana Yoshefwa pe bengile bakulwane ba mapashi. 3Zelofwehandi mwana Hefwa, mwana Ngiliyande, mwana Makiya, mwana Manashe kaliha bekalile na bana babalume ndele tuhu bana babambuyama. Mazina wabo bengile Mahila na Nowa na Hongila na Milika na Tilaza. 4#Kul 27:1-7.Bezile kuli mukankombela Eliza na kuli Yoshuwa mwana Nune naku bakakutwaminina pe bambile ngayi, “Nyambi ya Ngula watongwezele Moshesha ngayi atupane mbalila ya litunga ngayi mwanga tukone hamo na bawushinda wetu.” Nohobene, ngonehi ambile Nyambi ya Ngula, bapanikiwile litunga hamo na bawushinda wabo. 5Nisho shuma shiya Manashe atambwilile bitapilo likumi kufungila ku matunga a Ngiliyande na Mbashani ku mushamuko wa Yondana, 6ndaba ngayi bazukulyendi babambuyama hamo nanaba babalume bapanikiwile litunga. Litunga lya Ngiliyande lyapanikiwile ku bazukulya Manashe baya bashalilile.
7Manashe na Asha balitapilile nginza yimo ku Mikemetati, ku mushamuko wa Shekemu. Niho nginza yashangwile ku mabukubuku ku bantu ba ku Eni Tapuwa. 8Litunga lya zinguluka Tapuwa lyengile lya Manashe, ngoboni munzi wa Tapuwa waha nginza wenga wa bazukulya Efulemu. 9Nginza niho yashangwile na kukunkuluka ku kashinzi ka Kana. Minzi yaku mabukubuku a kashinzi yenga ya Efulemu hinge ndi yekala mu litunga lya Manashe. Nginza ya Manashe yalulumana hambalila ya ncelele ya kashinzi na kumanina ku liwate lya Menditeleniya. 10Efulemu wekalile ku mabukubuku, pe Manashe wekalile ku ncelele, liwate lya Menditeleniya lyengile nginza yaku mponci. Asha wekalile ku ncelele, Ishaka wekalile ku mushamuko. 11Mu matunga a Ishaka na Asha, Manashe washimbile Mbeti Sheyini na Imbilemu na tunzi twazingulukako, kuwanikila kumo na Ndoli, ou wekala ha shibumbo sha liwate na Endola na Tanaki na Mengindo na tunzi twazingulukako. 12#Bak 1:27, 28. Ngoboni bantu ba Manashe kaliha batweshele ku tandamo bantu baya bekalilenga mu minzi oyo, nohobene Bakenaani bazaminine kuzikamo. 13Hinge oho Baishalela bekalile na ngovu shikuma, kaliha batandile Bakenaani nimwabo, ngoboni babakandamikile kubatendela milimo.
Efulemu na Manashe waku mponci ya Yondana ba kunyepa litunga lyamina
14Bazukulya Yoshefwa bambile kuli Yoshuwa ngayi, “Shumangani kati unatupanikili tuhu mbalila yimo ya litunga ngayi tuyikone? Tuli babengi shikuma, ndaba Nyambi ya Ngula unatutandalishi.”
15Yoshuwa wakumbwile ngayi, “Ndi muli babengi shikuma, pe ndi litunga lya binkanda lya Efulemu lyalishe shikuma kukwenu, kankalalenu ku lishaka mwanga mukalitetele ha kuzika mu litunga lya Bapelizi na Balefwayima.”
16Bazukulya Yoshefwa bambile ngayi, “Litunga lya binkanda kulikonkana tufwako, ngoboni Bakenaani bazika mu zimbuwa bali na makoloyi a byondo nanobo kami bazika mu Mbeti Sheyini na minzi ya zingulukako nanobo bazika mu mukulo wa Yezilelu.”
17Yoshuwa wambile ku mishobo ya Yoshefwa kuli Efulemu na Manashe waku mponci ngayi, “Mwa shikuma kuyo muliko babengi, kami mwenga bangovu shikuma, kutwesha kwikala na shitapilo shimo sha litunga mufwako. 18Litunga lya binkanda likenga lyenu. Hinge lingi lishaka, mukaliwahisha likenga likona lyenu kubalika kunkumo yimo kukakuma ku yamina. Nehe boni Bakenaani, hinge ndi bekala na makoloyi a byondo, hinge ndi benga bantu bangovu shikuma, muka batandamo nimwabo.”
Libuka Lya Kuyela © Bible Society of Zambia, 2020.