Yoshuwa 15
15
Shitapilo sha litunga lya Yunda
1Balupashi lwa mushobo wa Yunda batambwile mbalila ya litunga lya kumine ku mabukubuku ku nkumo shikuma yaku mabukubuku a libelelengwa lya Zini, ku nginza ya Endoma. 2Yili na nginza yaku mabukubuku ya kulwa mabukubuku a Liwate lya Mushele, 3Pe yashangwile kulwa mabukubuku ha kufuma ku nzila ya Ncinencine ya Akilambimu na aku Zini. Yalulumanine ku mabukubuku a Kandeshi Mbaneya, kupita ku Hezeloni na kukuma ku Anda, hiyikufutuka kulumba ku Kalika, 4kukakuma naku Azimoni, hiyi kukonka mushapa ha nginza ya Engepita kukakuma naku Liwate lya Menditeleniya oku kwakuminine nginza. Oyo yengile nginza yaku mabukubuku.
5Nginza yaku mushamuko yengile Liwate lya Mushele, lyayile kukakuma naku ncangilo ya Yondana.
Nginza yaku ncelele yatatikilile ha shibumbo sha liziba, ha ncangilo ya Yondana, 6yakakumine naku Mbeti Hongila, niho yashangwile ku ncelele ya Mbeti Alamba, kukakuma ku Limanya lya Mbohani. Mbohani wengile mwana Lubena wa mulume, 7niho yapitile ku mukulo wa Akani, kukuma naku Ndembila, pe hiyikufutuka kupenza ku ncelele na kulumba ku Ngilingale, hambalila ya Andumimi ku mukulo ku mabukubuku. Niho yashangwile na kululumana ku tuheloke twa Enishemeshi na kulumba ku Enilongela, 8pe yapitile namu mukulo wa mwana Hinoma ku mbalila yaku mabukubuku a shinkanda oku kwekalile lukena lwa Bayembushi (niko ku Yelushalema). Niho nginza yalulumanine na kukankalala hayilu ya shinkanda ku mbalila ya mukulo wa Hinoma, ku mamaninino a mukulo wa Lefwayima ku ncelele. 9Kufuma kuyo yashangwile ku tuheloke twa Nefwitowa na kukuma ku zinkena za hahepi na lipili lya Efweloni. Kuyo yafutukile kulumba ku Mbaalaha hinge Kiliyati Yeyalima, 10oku yatengulukilile na kuya ku mponci ya Mbaalaha ku Sheya, kulumba ku litunga lya Yeyalima (hinge ngayi Keshaloni) na kukunkulukila ku Mbeti Shemeshi, kuya na kupitakana Timina. 11Niho nginza yashangwile ku shinkanda sha ku ncelele ya Ekiloni, yafutukile na kulumba ku Shikeloni na kupitakana lipili lya Mbaalaha, kukakuma ku Yambinelu. Yakakuminine ku liwate lya Menditaleniya, 12elye liwate nilyo lyengile nginza yaku mponci.
Eye niyo nginza yengile ya ba lupashi lwa Yunda.
Kalembu ukukoma Hembuloni na Ndembila
(Bakakuyata 1:11-15)
13Ngonehe Nyambi ya Ngula atongwezele Yoshuwa, mbalila ya litunga lya Yunda lyapanikiwile kuli Kalembu mwana Yefuna. Watambwile Hembuloni, lukena lwengile lwa Alimba tata Anaki. 14Kalembu watandile bazukulya Anaki mu lukena, bengile ba mavumo a Sheshayi na Ahimani na Talimayi. 15Oho bafumine kuyo wayile mu kulwisha bantu ba ku munzi wa Ndembila munzi ou batoyelenga ngayi Kiliyata Shefwila. 16Kalembu wambile ngayi, “Nikapana mwanami Akisha ngayi ayekiwe ku mulume ou ukatwesha kulwisha na kupukula lukena lwa Kiliyata Shefwila.” 17Otiniyele mwana Kenazi mukonzo wa Kalembu, wapukwile uya munzi, nohobene Kalembu wayekiwishile mwanendi Akisha kuli Otiniyele. 18Ha mutena wa shifupawenga Otiniyele wamukandamikile ngayi anyepe tatiyendi mfuba, pe oho ashulukile ha mbongolo yendi, Kalembu wamwipwile ngayi, “Kati ukushinga bishini?” 19Wakumbwile ngayi, “Ntandalishe na maziba amo a mema, ndaba litunga wampana lya nyuminine.” Nohobene Kalembu wamupanine tuheloke twa kuyilu na tuheloke twa ku nceto.
20Elye nilyo litunga liya batambwile ba lupashi lwa Yunda kwinga likona lyabo. 21Minzi ya kwakutali yaku mabukubuku yiya yengile yabo, oyo yekalile kwakwipi na nginza ya Endoma yengile Kambizelu na Endeli na Yangule 22na Kina na Ndimonaha na Andanda 23na Kendeshi na Hazola na Itinani 24na Zifu na Telemu na Mbiyaloti 25na Hazola Handata na Keliyoti na Heziloni (hinge ngayi Hazola) 26na Amami na Shema na Molanda 27na Haza Nganda na Heshimoni na Mbeti Peleti 28na Haza Shuwali na Mbelishemba na Mbiziyotiya 29na Mbaalaha na Iyimu na Ezema 30na Elitolandi na Keshilu na Homa 31na Zikilangi na Mandimana na Shanshana 32na Lembawoti na Shilihima na Ayina na Limoni. Nimwayo yengile minzi makumi abili na mutanu na yinaa kuyakako na tunzi twazingulukako.
33Minzi ya ku nceto ya twina yengile Eshitawolu na Zola na Ashina 34na Zanowa na Eni Nganima na Tapuwa na Enamu 35na Yalimuti na Andulama na Shoko na Azeka 36na Shalayima na Anditayima na Ngendela na Ngendelotayima. Minzi nimwayo yengile likumi na yinaa kuyakako na tunzi twazingulukako.
37Kwekalile kami Zenani na Handasha na Mingindala Ngandi 38na Ndilena na Mizipa na Yokitelu 39na Lakishi na Mbozika na Engiloni 40na Kamboni na Lahimamu na Kitilishi 41na Ngendeloti na Mbeti Ndangoni na Naama na Makenda. Minzi nimwayo yengile likumi na mutanu na umo, kuyakako na tunzi twazingulukako.
42Kwekalile kami Limbina na Etayala na Ashani 43na Ifwita na Ashina na Nezimba 44na Keyila na Akizimbi na Malesha. Minzi nimwayo yengile mutanu na yinaa, kuyakako na tunzi twazingulukako.
45Kwekalile Ekiloni na minzi yendi na tunzi, 46na minzi nimwayo na tunzi hahepi na Ashindondi, kufuma ku Ekiloni kukuma naku Liwate lya Menditeleniya.
47Kwekalile Ashindondi na Ngaza na minzi yabo na tunzi, kukuma naku kashinzi ha nginza ya Engepita naha shibumbo sha Menditeleniya.
48Mu litunga lya binkanda mwekalile Shamila na Yatiya na Shoko 49na Ndana na Kiliyati Shana, (hinge ngayi Ndembila) 50na Anambi na Eshitemo na Anima 51na Ngosheni na Holoni na Ngilo. Minzi nimwayo yengile likumi na umo, kuyakako na tunzi twazingulukako.
52Kwekalile kami Luma na Nduma na Eshani, 53na Yanumu na Mbeti Tapuwa na Afweka, 54na Humita na Kiliyati Alimba hinge ngayi Hembuloni na Ziyo. Minzi nimwayo yengile mutanu na yinaa, kuyakako na tunzi twazingulukako.
55Kwekalile Mawoni na Kamela na Zifu na Yuta 56na Yezelela na Yokindamu na Zanowa, 57na Kayina na Ngimbiya na Timina. Minzi nimwayo yengile likumi, kuyakako na tunzi twazingulukako.
58Kwekalile Haluhula na Mbeti Zula na Ngendoli 59na Maalati na Mbeti Anoti na Elitekoni. Minzi nimwayo yengile mutanu na umo kuyakako na tunzi twazingulukako.
60Kwekalile Kiliyati Mbaalu, hinge Kiliyati Yeyalima na Lamba, nimwayo minzi yengile yibili kuyakako na tunzi twazingulukako.
61Mulibelelengwa mwekalile Mbeti Alamba na Mindini na Shekaka 62na Nimbishani, munzi wa Mushele na Engendi. Minzi nimwayo yengile mutanu na umo kuyakako na tunzi twazingulukako.
63 #
Bak 1:21; 2Sha 5:6; 1Bya 11:4. Ngoboni bantu ba Yunda kaliha batweshele ku tandamo Bayembushi, aba bazikilenga mu Yelushalema. Bayembushi bashili kuzikamo nihano hamo na bantu ba Yunda mu Yelushalema.
Libuka Lya Kuyela © Bible Society of Zambia, 2020.