Yoshuwa 1
1
Nyambi ukutongweza Yoshuwa kukoma Kenaani
1Oho Moshesha mukamulimo wa Nyambi ya Ngula wafwakale, Nyambi ya Ngula wambile kuli Yoshuwa mwana Nune mukakuyavwa Moshesha ngayi, 2“Mukamulimo wami Moshesha unafu. Obe na bana ba Ishalela nimwabo lishakashakenu, muzabuke Mushinzi wa Yondana, pe muye mu litunga liya nili na kubapanika. 3#Nday 11:24-25.Nakupaniki litunga nimwalyo kuya ukalyata liwulu, obe na bantu bami nimwabo, ngonehe shiya natongwezele Moshesha. 4Zinginza za litunga lyenu zikabalika ku mabukubuku ku libelelengwa, kukakuma naku ncelele ku Mapili a Lembanoni. Zikabalika ku mushamuko ku Mushinzi wawunene wa Yufuleti na kupita namu litunga lya Bahita, kukakuma naku mponci ku Liwate lyalinene lya Menditaleniya. 5#Nday 31:6, 8; Bah 13:5.Kowa muntu ukatwesha kukukoma oho ushili kuyoya. Nikekala hamo na nobe ngonehe shiya nekalilenga na Moshesha. Nikonzelanga kwikala hamo na nobe, nifwako kuka kufutamina. 6#Nday 31:6, 7, 23.Winge wakushuma na kukanca, ndaba obe ukenga mukakwendesha aba bantu mu kutambula lino litunga elye na kulupishile ku bankakazabo ngayi nikabapanikalyo. 7Haya winge tuhu wakushuma kami winge wakukanca, pe umone ngayi ukwombatala Ndayano nimwazo akupanine mukamulimo wami Moshesha. Hinga ukakendaho hinge zimo, pe ukatangama oku nimwako ukaya. 8Ndayano eze hinga zikafuma mu mutima wobe. Lilongeshezo mwaana na wushiku kami ukwombatale mu byuma nimwabyo bya tikitiwamo. Niho ukenga waku tumpuka na kutangama. 9Anuka ngayi na kulaya winge wakushuma na kukanca. Hinga utina hinge kupopa, ndaba Ami Nyambi ya Ngula, Nyambi yobe, nili hamo na nobe oku nimwako ukuya.”
Yoshuwa ukufundiziza bantu
10Niho Yoshuwa atongwezele bakakutwaminina ba bantu ngayi, 11“Yenunga mu munkungwa na kutongweza bantu ngayi, ‘Wahishenuko byakulya, ndaba kwashalakale matena ahatu, pe mukaya na kuzabuka Mushinzi wa Yondana mu kutambula litunga liya akamipanika Nyambi ya Ngula, Nyambi yenu.’”
12Yoshuwa wambile ku mishobo ya Lubena na Ngandi naku shitika sha mushobo wa Manashe ngayi, 13“Anukenu ebye amitongwezele Moshesha mukamulimo wa Nyambi ya Ngula ngayi, ‘Nyambi ya Ngula, Nyambi yenu, ukamipanika litunga lya kukatalila. Namipaniki litunga lino.’ 14Bakazenu na bana benu na bimuna byenu bikashala kuno ku Yondana, ngoboni banzita banalishakashaka bya nzita bakazabuka na kuya kumbili ya baminabo Baishalela ngayi mwanga bakabayavwe, 15hantu nanibo kami banatambulu litunga lya ku mponci ya Yondana liya abapanikile Nyambi ya Ngula, Nyambi yenu. Oho wekalishakale shiwahe mishobo nimwayo ya Baishalela, nohoboni mukabokenga mu kuzika muno mu litunga lyenu lya ku mushamuko wa Yondana, elye amipanikile Moshesha mu ka mulimo wa Nyambi ya Ngula.”
16Bakumbwile Yoshuwa ngayi, “Tukatenda byuma nimwabyo ebye unatutongweze, pe tukaya oku nimwako ukatutuma. 17Tukakwombatala, ngonehe shiya twombatalilenga Moshesha haya Nyambi ya Ngula, Nyambi yobe, mwanga akekale hamo na nobe ngonehe ekalilenga na Moshesha. 18Muntu nimwendi wakulwisha ha ngovu zobe hinge kubula kwombatala kufundiziza kwobe ukazihiwa. Winge tuhu wakushuma na kukanca.”
Libuka Lya Kuyela © Bible Society of Zambia, 2020.