Yakoba 4
4
1Zinzita na mangunga mukati kenu bikufuma kuti? Kati bifwako kufuma oku ku mahungu enu akulwa mu bimamo byenu ndi? 2Mukulishoza, kami kutambula mufwako, mu kuziha na kushinga byuma. Ngoboni mu kubula kutambula, mu kulikanangana na kulwa nzita, ngoboni mu kubula kutambula, ndaba mu kubula kulomba. 3Mukulomba na kubula kutambula, ndaba mu kulomba shibi na kushinga kubiyumba ku myelembo yenu. 4Enu balume na bakazi bakubula kukulupila! Mufwako kulimuka ngayi wuhoni wa kaye wenga nkole na Nyambi ndi? Nohobene nimwendi ukushinga kwinga muhoni wa kaye ukwinga mukankole wa Nyambi. 5Kati mu kuhanganika ngayi byatikitiwile bikwamba tuntalu ngayi, “Moyo ukwikala mumwetu ukulishoza na ntalu.” 6#Zinc 3:34. Ngoboni niye ukupana nceshe za kupitakana. Nohobene ukwamba ngayi, “Nyambi ukukana bakakuliyemeza, ngoboni ukupana nceshe ku bakakulilimbwilisha.” 7Nohobene bombenu enubene kuli Nyambi. Kanenu Shatana, pe ukatina kukwenu. 8Henyenenu kuli Nyambi, niye kami ukahenyena kukwenu. Yoweshenu maboko enu, enu bakawubi yeleshenu mitima, enu baka mitima yibili. 9Kalikizenu na kulikekula na kulila, mahepo enu afutuke mbingo na ku wahilila kwenu kufutuke wulemu. 10Lilimbwilishenu enubene ku meho a Mwene, pe niye ukamikatula.
11Hinga mulitungula umo na wamina, bawushinda. Niye ukutungula kawushinda wendi na kunyanca kawushinda wendi, ukutungula ndayano na ku nyanca ndayano, ngoboni ndi ukunyanca ndayano, obe kaliha mukakutenda ndayano, ngoboni mukakunyancazo. 12Mukakwimika mulao wenga umo, ou ukutwesha kupulwisha na kunongesha, kati obe yani ukunyanca wamina?
13 #
Zinc 27:1. Tambako, enu mukwamba ngayi, “Lelo hinga nzona tukaya ku munzi wa shikananga na kwikalamo mwaka umo na kulanda na kulandisha na kuheta.” 14Ngoboni mufwako kulimuka ebye bikenga nzona. Ndaba wumi wobe wenga bishini? Wenga mbundu yiku moneka kashikati, niho yikuzimina. 15Ndaba mu ku fwanina kwamba ngayi, “Ndi Mwene ukwitabila, tukayoya na kutenda eshe, hinga shiyo.” 16Ngoboni mu ku wahilila mu matukutuku enu, ku wahilila kwanoho nimwako kwakubi. 17Nohobene ou ukulimuka kutenda shiwahe, kami ku shitenda wufwako, niye uli na wubi.
Libuka Lya Kuyela © Bible Society of Zambia, 2020.