Yakoba 2
2
Kushiwulula ha shihota
1Bawushinda wami, ngo bakakukulupila muli Mwene wetu Yeshu Kilishitu Mwene wamuwahe, hinga mwikala na shihota na bantu. 2Ndaba ndi ku shikungulukilo shenu kukeza muntu uli na kambalamunwe ka ngolinde na bivwalo byabiwahe, kami ndi kukeza mukakushepwa na bivwalo byabibi, 3nanenu mu kupana maleema ou ukuvwala bivwalo byabiwahe na kwamba kukwendi ngayi, “Yikala muno mu mwanya uli shiwahe,” na kwamba ku mukakushepwa ngayi, “Yimana oku obe,” hinga ngayi, “Yikala kuno ku malyatilo a mawulu ami,” 4nka muli na shihota mukati kenu, kami munafutuku bakakuyata na bihanganiko byabibi.
5Yuvwililenu, bawushinda wami ba kuhakiwa! Nka Nyambi unahata bakakushepwa ba litunga lino benge bakakuheta mu kukulupila na bakakukona wene ou a kulupishile kukwabo ba kumuhaka? 6Ngoboni enu munakende bakakushepwa. Nka bakakuheta ba kumiyandisha na kumi kokela ku nkuta? 7Nka nibo bakuhandula lizina elye lyaliwahe mu kutumbiwa nalyo?
8 #
Bal 19:18. Ndi mukwinzalisha ndayano za Wene, ngonehe byatikitiwile ngayi, “Haka ndambo yobe ngonehe walihaka obe mwine,” mukutenda shiwahe. 9Ngoboni ndi mu kuhota bantu, mukutenda wubi na kuyatiwa ku ndayano ngo bakakushanuka. 10Ndaba nimwendi ukuholeka ndayano nimwazo, ngoboni akiluku mu shuma shimo uli na mulandu ku nimwazo. 11#Kut 20:13, 14; Nday 5:17, 18. Ndaba ou wambile ngayi, “Hinga utenda wumambe,” wambile kami ngayi, “Hinga uziha.” Nohobene ndi ukubula kutenda wumambe, ngoboni ukuziha, unafutuku kwinga mukakukiluka ndayano. 12Ambenu noho na kutenda noho ngo aba bakayatiwa na ndayano za ku shoboloka. 13Ndaba ukayatiwa na kubula nceshe, ou unabulu kuyuvwa nceshe, nceshe zikulishamba ha kuyata.
14Kukuyavwa nahiti, bawushinda wami, hinga muntu ukwamba ngayi unakulupili, ngoboni ukubula milimo? Kati kukulupila kukutwesha kumupulwisha ndi? 15Ndi kawushinda wa mulume hinga wa mukazi uli na wuvwu na kubula byakulya bya ha mutena. 16Na umo kukwenu ukwamba kukwabo ngayi, “Yenu mu ku mwena, tukuminenu na kwikuta!” Ngoboni kubapana mufwako byuma bya kuliyavwa nabyo ku kuyavwa bishini? 17Nahiyo kukulupila ndi kukubula milimo, kunafu, ndi kukwikala ninkayako.
18Kampe muntu ukwamba ngayi, “Obe uli na kukulupila na nami nili na milimo.” Nikakumbula ngayi, “Moneshe kukulupila kwobe kwakubula milimo. Nanami nika ku monesha kukulupila kwami na milimo yami.” 19Obe ukukulupila ngayi kuli Nyambi umo, ukutenda shiwahe, mayimbwe kami a kukulupila na kukanka. 20Ngoboni, obe muntu wowa, kampe ukushinga kulimuka ngayi kukulupila kwakubula mulimo kunafu ndi? 21#Shit 22:1-14. Nka Abulahama tatiyetu wolokeshiwile na milimo oho akombelelele Ishaki mwanendi ha kaala? 22Kati mu ku mona ngayi kukulupila kwatendele hamo na milimo yendi na kukulupila kwendi kwalembulukile na milimo ndi? 23#Shit 15:6; 2Bya 20:7; Isha 41:8. Byatikitiwile byambile ngayi, Abulahama wakulupilile Nyambi, pe ndaba ya kukulupila, Nyambi ya Ngula wamutambwile kwinga wakulunga, kami niye watumbiwile ngayi muhoni wa Nyambi. 24Nohobene mu ku mona ngayi muntu ukwolokeshiwa na milimo, kaliha na kukulupila pele. 25#Yosh 2:1-21. Nahiyo kami Lahambu, niye mukalwiholwiho wolokeshiwile na milimo oho ekalile na kutambula bakakuhokela, kami wabafumishile na nzila yashenge. 26Ndaba ngo lutu lwa kubula moyo lunafu nahiyo kami kukulupila kwakubula milimo kunafu.
Libuka Lya Kuyela © Bible Society of Zambia, 2020.