Ishaya 8
8
Mwana Ishaya ukwinga shilimukisho ku bantu
1Nyambi ya Ngula wambile kukwami ngayi, “Shimba litapa lyalinene utikiteho na zitaku ziku moneka shiwahe ngayi, ‘Maha-Shalalu-Hashi-Mbazi.’#8:1 Lizu elye mu Shihebelu likutontoloka ngayi Pukula shawangu, tola nyankupa. 2Shimba bapaki ba kupwisha, mukankombela Uliya na Zakaliya mwana Yembelekiya.”
3Niho nalanganine na mukazami, pe wemitile na kubeleka mwana wa mulume. Nyambi ya Ngula niho ambile kukwami ngayi, “Mutumbe lizina lya Maha-Shalalu-Hashi-Mbazi, 4ndaba oho shilolo alimuke kwamba ngayi, ‘Tata’ hinge ‘Mama’, wuheti wa Ndamashika nebi byapukuliwile mu Shamaliya bikashimbiwa na mwene wamunene wa Ashiliya.”
Mwene wamunene wa Ashiliya uli na kwiza
5Nyambi ya Ngula wambile kukwami kami ngayi, 6“Ndaba aba bantu banakana mema a Shilo, awa akunkulanga shiwahe na ku wahilila na Lezina na mwana Lemaliya wa mulume, 7nohobene, wuluno nikuleta hahabo mwene waku Ashiliya na wuwahe wendi nimwawo, ngonehe libazi lyalinene shikuma lya mema a mushinzi wa Yufuleta. Pe mema akayita na kwinzalisha bibumbo nimwabyo. 8Libazi likakupula litunga lya Yunda, likakunkula na kuyita shikuma, likakuma na mu ncingo.”
Nyambi uli na netu! Mbando zendi zikatandubuka na kufwika litunga nimwalyo.
9“Pokokenu mitima enu bantu, tinenu! Tengekenu matu wenu, enu bantu nimwenu mu kufuma ku matunga akwakutali! Mwa shikuma kuliwahishila nzita, ngoboni tinenu! Mwa shikuma kuliwahishila nzita, ngoboni tinenu! 10Yongolenu bya nzita, ngoboni kayongo kenu ku kwata ku muhunga kafwako. Mu kufundiziza, ngoboni kufundiziza kwenu kutendiwa kufwako, ndaba Nyambi uli na netu.”
Nyambi ya Ngula ukushuza bantu kupitila muli muluwe
11Nyambi ya Ngula wambile nehe kukwami na liboko lyendi lya ngovu lyekalile hahami, wantongwezele ngayi hinga wenda mu nzila ya naba bantu. Wambile ngayi, 12#1Pita 3:14-15. “Hinga mu lilumikila mu biyongola bya bantu bamina, kami hinga mwikala na bowa na biya ba kutina nibo. 13Ngoboni Nyambi wa Makunge niye mukatoya ngayi wa kuyela, niye tuku fwanina kutina tuhu na kuyuvwila bowa. 14#1Pita 2:8. Pe ukenga mwanya wa kuyela, ngoboni ku matala wubili wawo a Ishalela akenga limanya likapukalisha bantu na limanya likabawisha, lukenga lunyimbwa na linkwina ku bantu bamu Yelushalema. 15Bantu babengi bakapukazalaho, bakawa pe baka mungozoka, bakamanyikiwa na kutwaliwa.”
Kushuza kwa kulwisha kuya na kukwata bapashi
16Vunga libuka lya kuzenga lili na wupaki wami, kanta kufundiziza kwami na kupanika ku bandongesha bami. 17#Bah 2:13. Nika tatililanga Nyambi ya Ngula, ou naholeke lupala lwendi ku baka litala lya Yakobo, pe nika kulupila mumwendi.
18 #
Bah 2:13. Mona, ami nili hamo na bana aba Nyambi ya Ngula anampana, tunengi bilimukisho ku Ishalela bya kufuma kuli Nyambi wa Makunge, ou wazika ha lipili lya Ziyoni.
19Pe oho bantu bakakutongweza ngayi, “Yenunga mukepwizize ku bakakutaha na bakakukwata bapashi, baka kuyebeta na kwamba bya kulavwata.” Kati bantu shifwako ku bafwanina kuya na kwipula kuli banyambi babo ndi? Kati shumangani mukwipula bapashi ha babomi?
20Yuvwililenu kufundiziza na wupaki wa Nyambi ya Ngula. Ku mona ndi babulu kwamba ngo eshe likwamba elye lizu, pe ku sha kwa mutena kukamoneka kukwabo wufwako.
Shikati sha Makando
21Bantu bakaya na kupita mu litunga nimwalyo hinga bapopa na kufwa nzala. Bakapilamishiwa pe bakakuta Mwene yabo na Nyambi yabo na kupenza meho wabo kuyilu, 22na kuconcomeka hanci, ngoboni monenu, bakapopa tuhu na ku mona mincimpwe. Mincimpwe ya malwa, pe mu mincimpwe ya kutinisha nimo bakabashindikila.
Libuka Lya Kuyela © Bible Society of Zambia, 2020.