Ishaya 64
64
1Haya shinga unatabulu mayilu hakati na ku shulukila hanci,
ngayi mwanga mapili akakumone,
na kukanka ku meho wobe na bowa.
2Bakakanka ngonehe mundilo walashekanga ha kuhokesha nconco,
ngonehe mundilo waleteshanga mema ngayi abile.
Nobe yeka uholole lizina lyobe ku bamalamo bobe,
ngayi ukankishe matunga ku meho wobe.
3Ndaba oho watendele byuma bya kutinisha,
biya twabulile kutatilila ngayi bikamoneka.
Washulukile,
pe mapili akumonene akankile ku meho wobe.
4 #
1Koli 2:9. Ku balika kubikati bya kushikale,
kowa muntu wayuvwako hinge kumutengekela litu.
Kowa liho lyamona Nyambi washenge,
ndele obe ukutwesha kutendela baya ba kumutatililila.
5Ukuyavwa baya ba ku wahilila ha kutenda bya kulunga,
baya ba kukwanuka kwenda mu zinzila zobe,
Monenu, ngoboni oho twazaminine Kubipisha
watulamwinine kati tukutwesha kupuluka nahiti?
6Nimwetu tunafutuku kwinga bababi,
na ntendelo yetu ya kulunga ya futukakale
ngo shivwalo sha wunyengwe,
ndaba ya wubi wetu tukwinga ngonehe mabizi akulebuka,
pe kutengama kwetu ngonehe mpepo,
kukatupepwila kwashenge.
7Kowa muntu wakwihana ha lizina lyobe,
hinge kwezeka shikuma ngayi mwanga amikakatile,
ndaba unatuholekele lupala lwobe,
na kutulehela mu maboko a milandu yetu.
8Hinge shingi noho, obe Nyambi ya Ngula uli tatiyetu,
etu tuli lima, obe mbumbi,
nimwetu tuli mulimo wa maboko wobe.
9Obe Nyambi ya Ngula, hinga utukalihila shikuma,
pe hinga wanuka Kubipisha kwetu pe umone,
na kuhanganikaho, nimwetu tunengi bantu bobe.
10Zinkena zobe za kuyela zafutukakale libelelengwa.
Ziyoni wafutukakale libelelengwa
Yelushalema kami unalobeshiwi.
11Litala lyetu lyaliwahe na lya kuyela,
oku bankakazetu ba kuyemezelenga,
linahokeshiwi na mundilo,
myanya yetu nimwayo yayiwahe
yinafutuku mapembe.
12Obe Nyambi ya Ngula,
kati ushili kutulumana ha nimwabyo ebye ndi?
Kati uku mwena tuhu nee
na kubula kutendaho shuma shimina ndi?
Nakutuyandisha shikuma ndi?
Libuka Lya Kuyela © Bible Society of Zambia, 2020.