Ishaya 58
58
Kuzila kulya kwa kupwisha
1Nyambi ya Ngula wambile ngayi,
“Bilikenu na kukuwa ngo mpandula.
Tongwezenu bantu bami bya milandu yabo,
baka litala lya Yakobo,
bya wubi wabo.
2Ha mutena na mutena ba kundemesha,
ba ku wahilila kulimuka mazu wami.
Banengi litunga likutenda bya kulunga,
likutunga likubula kukana kuyata kwa Nyambi ya Ngula.
Bakunyepa kulunga kwami kwa kuyata
ba ku haka kuhenyena kwakwipi na nami.”
3Bantu bakwipula ngayi,
“Shumangani tukuzilila
kulya ndi Nyambi ya Ngula kutumona wufwako?”
Haya shumangani tukulilimbwilishila kukwendi ndi niye kupako mutima wufwako?
Nyambi ya Ngula ukwamba kukwabo ngayi,
kupwisha okwe, oho mu kuzila kulya mukutenda mwaya mitima yenu,
na kuyandisha bakamilimo benu.
4Kupwisha okwe, kuzila kulya kwenu kwamileteshanga nkani,
na kulwa na zinkoni.
Mukuhanganika ngayi kuzila kulya kwenu kwanehe,
kukuletesha ami kuyuvwilila ku malombelo wenu ndi?
5Kati okwe niko ku kuzila kulya nashinga ngayi muntu akulilimbwilisha mutena umo tuhu ndi?
Kati shili tuhu ku muntu kuzebula mutwe ngo litete,
na kuvwala bicancolo na kulifukwila mutoko ndi?
Kati niwo mutena wakuzila kulya akwitabila
Nyambi ya Ngula ndi?
6Kuzila kulya nikushinga kwenga okwe,
ku shobola mawenge a makando ku bantu ba kuyanda,
na ku mangulula nyimbwa za mpongoho,
za kubula kuyata kwakwoloka,
na kuleha bakakuyanda kuya nahiya.
7 #
Mat 25:35. Kulitapila byakulya byenu nanobo ba kufwa nzala,
na kutambula bancepwe mu matala wenu.
Nakupanika bivwalo kunobo bali na wuvwu,
na kubula kukana kuyavwa bawushindawenu baha mutima.
8Ndi mukutenda noho,
niho liyeye lyobe likabanga ngonehe watutikanga mutena ku lumenemene,
pe mukapola wanguwangu,
kami kulunga kwenu kukatwaminina kumbili yenu
wuwahe wa Nyambi ya Ngula,
ukamyenda munyima na kumi lama.
9Oho mukalombela,
pe Nyambi ya Ngula ukamikumbula mukamwihana ngayi amiyavwe pe uketabila ngayi Ami uno.
Ku mona tuhu ndi mu kufumisha hakati kenu mpongoho
na kuleha kulinizika minwe na kwamba bya kuluwa.
10Ndi mukapana byakulya muntu uli na nzala,
na kwikutisha bakakuyanda,
nihoboni mumuni wobe ukabangenga mu mincimpwe
na mincimpwe yenu yikafutuke mwana wa mutena hakati ka mutwe.
11Pe Nyambi ya Ngula ukamilamanga,
na kumipwezulula na byuma byabiwahe na kushumisha bifupa byenu.
Niho mukenga ngonehe mfuba iya bayitililanga mema amengi,
ngonehe kaheloke ka mema aya abulanga kuyuma.
12Bantu bobe bakatendulula mapembe akushikale,
mukatumbiwa ngayi muli baka kutendulula twimbi,
pe mukatendulula mamota.
Baka kuwahisha zimbanza omu akatendululiwa matala akwikala.
Ncuungu yikuwaniwa ha kulama mutena wakukatala
13Nyambi ya Ngula ukwamba ngayi,
ndi mu kulama mawulu wenu kubula kukiluka Mutena Wakukatala,
na kubula kutenda ebi bikumiwahilisha ha mutena wami wa kuyela,
ndi mu kutoya Mutena Wakukatala kwinga mutena waku wahilila,
na mutena wa kuyela wa Nyambi ya Ngula,
ndi mu kuwulemeeka na kubula kuya mu zinzila zenu,
hinge kushinga myelembo yenu,
hinge kwonzela kubwaya byowa ha mutena uyo.
14Niho mukekala na ku wahilila muli Nyambi ya Ngula,
pe nikamikatula na kumiyaka hayilu ya hano hanci nimwaho.
Nikamilisha na likona lya tatiyenu Yakobo,
ndaba eshe nisho anamba Nyambi ya Ngula na kanwa kendi.
Libuka Lya Kuyela © Bible Society of Zambia, 2020.