Ishaya 56
56
Nyambi ya Ngula ukutambula bantu nimwabo
1Nyambi ya Ngula ukwamba ku bantu bendi ngayi,
tendenu bya kupwisha na kulunga,
ndaba wuluno nikulamwina,
kupulwisha kwami kukamoneka.
2Uli na mfuywezi muntu ukutenda ebye,
na mwana muntu ou ukutwalilila,
ou ukulama mutena wakukatala, kubula kuwubipisha.
Wabulanga kutenda byabibi.
3Mapukwenda ba kunkonka, hinga bamba ngayi,
“Nyambi ya Ngula ukamfumisha hakati ka bantu bendi.”
Ntatula hinga amba ngayi, “Nili mutondo wakuyuma.”
4Nyambi ya Ngula ngayi,
bantatula ba kulemeeka mutena wakukatala,
aba ba kutenda ebye nikushinga,
ba kunyombatala mu kupwisha,
aba ba kulama kulimama kwami.
5Niho lizina lyobe likanukiwa mu Litala lyami,
kupitakana eshe uku fwanina kwikalilamo na bana.
Lifwako kukavulamiwa.
6Mapukwenda aba ba kunkonka,
aba ba ku haka na kulemesha mu lizina lyami.
Bakenga bakamilimo bami.
Aba ba kulemeeka mutena wakukatala,
na kubula kuwu bipisha,
na kulama kulimama kwami.
7 #
Mat 21:13; Mako 11:17; Luka 19:46. Nikabaleta ku lipili lyami lya kuyela,
nikabengisha ba ku wahilila mu Litala lyami
omu muli bantu ba kulombela kukwami.
Zintupu na zinkombela zabo za kuhokesha
bikatambuliwa ha kaala kami,
Ndaba litala lyami likatumbiwa ngayi litala lya malombelo,
lya bantu nimwabo.
8Nyambi ya Ngula,
ou waletele bantu bendi ba Ishalela ku munzi,
kubafumisha ku wuntapwa na ba kulupishi ngayi,
ukaleta bamina kwiza mu kulifungila nabo.
Kunyanca bantwamina ba Ishalela
9Nyambi ya Ngula ukutongweza bantu,
ba mishobo yamina kwiza ngo tuyamana mu kulya bantu bendi.
10Bakakutwaminina nimwabo,
bafwanina ku shiwulula bantu bami hi batushishitwa.
Kowa ebye ba kulimuka,
banafweke ngo batuwa bakubula ku boza,
banalala hanci.
Bashinga shikuma kulala na kulota.
11Banafweke ngonehe batuwa bamutongo bakubula kwikutilaho.
Aba bakakutwaminina ku yuvwishisha bafwako,
Muntu na muntu ukutenda omu akuhanganikila, mwayila mutima wendi.
12Bakwamba ku umo na wamina ngayi,
“Tushimbenu waine, nimwayo tukawana,
ndaba nzona tukekala shiwahe kupitakana lelo.”
Libuka Lya Kuyela © Bible Society of Zambia, 2020.