Ishaya 36
36
Baashiliya ba kutinisha Yelushalema
(2 Bamyene 18:13-27; 2 Byambo 32:1-19)
1Mu mwaka wa 14 wakulela kwa mwene Hezekiya, Shenakelimba mwene wa Ashiliya walwishile zinkena za Yunda zazingulukiwa na bipata na kuzikoma. 2Mwene waku Ashiliya watumine Lambishake kanzita wa mukulwane kufuma ku Lakishi kuya kuli mwene Hezekiya ku Yelushalema na nzita yayinene. Niho ayile na kwimana mu mukwakwa hahepi na lilomba liya lyaletelenga mema aku liziba lya ku nkambamo. 3Babilolo bezile na kuliwana nendi bengile aba, Eliyakimu mwana Hilikiya, ou wengile mukulwane waku musheke na Shembina mukakutikita wamu shinzanza na Yowa mwana Ashafwi ou wengile mukulwane mukakulama bya likota lya wene. 4Lambishake wabambilile ngayi, “Tongwezenu Hezekiya ngayi, mwene wamunene wa Ashiliya unamba ngayi, ‘Kati unakinki mutima hati? 5Kati ukuhanganika ngayi mazu owa anengi ngana za nzita ndi? Kati wakinki mutima hali yani, ngayi utweshe kumfutulukila? 6#Ezek 29:6-7. Mona, uli na kukinka mutima hali Engepita, uyo muwana wa litete wakumunguka, ou ukutwesha kutubula liboko lya muntu nimwendi ukuyendaminaho. Eshe nisho ali Fwalo wa Engepita ku nimwabo ba kukinka mutima hahendi.’”
7Ngoboni ndi mukwamba kukwami ngayi, “Twakinka mutima hali Nyambi ya Ngula, Nyambi yetu,” Kaliha niye Nyambi, ou mwene yenu. Hezekiya wahandwile na ku shandola myanya yendi ya hayilu na tuula twendi oho atongwezele zinkena za Yunda na Yelushalema kulemesha ku naka kaala ka mamanya. 8Haya yekenu muliyuvwashane na hekulyami, mwene wa Ashiliya, ngayi mwanga nikamipanike bambishi 2,000 ndi mukaliwanina baka ku bakandama. 9Haya mu kutwesha nahiti ku shintulula mukulwane wa nzita mukati ka bakamilimo bahekulyami babashebashe, oho mu kukinka mutima ha makoloyi na bakakukandama bambishi ba Engepita? 10Kati mu kuhanganika ngayi nezi na kulwisha litunga lyenu na kulilobesha kwakubula kuyavwa kwa Nyambi ya Ngula ndi? Nyambi ya Ngula niye wantongwezele ngayi, yanga ukalwishe litunga liyo na kulilobesha.
11Niho Eliyakimu na Shembina na Yowa bambile kuli Lambishake ngayi, “Lombela na kwamba ku bakamilimo bobe mu lulimi lwa Shialamayiki, ndaba nilwo lulimi tukuyuvwa, hinga wamba kukwetu mu lulimi lwa Shihebelu ngayi bantu bali ha mamota bayuvweko.”
12Ngoboni Lambishake wambile ngayi, “Kati mu kuhanganika ngayi enu na mwene yenu niko anantumu mwene wamunene mukwamba awa mazu tuhu ndi? Byo, nili na kwamba kami ni ku bantu aba banekala ha mamota, baya eze balye mazilo amu mavumo abo na mema aha zinyutu zabo hamo nanenu.”
13Niho Lambishake emanine na kubilika na lizu lyalinene mu lulimi lwa Yunda ngayi, “Yuvwililenu ku mazu a mwene wamunene, mwene wa Ashiliya. 14Mwene ngayi, ‘Hinga mwitabila Hezekiya kumyongeza, ndaba wufwako kukatwesha kukamilamwina. 15Hinga mwitabila Hezekiya kumyongeza ngayi mukinke mutima hali Nyambi ya Ngula na kwamba ngayi, “Mwa shikuma Nyambi ya Ngula ukatulamwina, olu lukena lufwako kukapanikiwa ku maboko a mwene wa Ashiliya.” 16Hinga muyuvwilila kuli Hezekiya. Yekenu tuliyuvwashane bya ku mwena na nami, mwakatenda noho muntu nimwendi mukati kenu ukalya shinyanca na nkuyu zendi, kami nimwendi muntu mukati kenu ukanwa mema amu lishima lyendi, 17hantu na kezi na kukamitwala ku litunga lya kulifweka na litunga lyenu, litunga lya mikolobozi ya shinyanca lya kupana waine. Litunga lili na loto lwa kutendaho mankende. 18Keyenu kutina Hezekiya ami shanwisha na kwamba ngayi, “Nyambi ya Ngula ukatulamwina.” Kati kuli banyambi ba mishobo yashenge, aba balamwini litunga lyendi kulifumisha ku maboko a mwene wa Ashiliya ndi? 19Kati banyambi ba Hamati na Alipandi balikuti? Hinge banyambi ba Shefwalavayimu balikuti? Kati balamwinaho Shamaliya mu liboko lyami ndi? 20Yani mukati ka naba banyambi nimwabo ba nawa matunga baya banalamwini matunga abo kuwafumisha mu maboko ami, ngayi Nyambi ya Ngula akalamwine Yelushalema kumufumisha mu maboko ami?
21Ngoboni bamwenene hulutuu, kami kowa ou wakumbwileko lizu, ndaba mwene Hezekiya wambile ngayi, “Hinga mu mukumbula.” 22Niho Eliyakimu mwana Hilikiya wengile mukulwane waku musheke na Shembina mukakutikita wa mushinzanza na Yowa mwana Ashafwi, ou wengile mukulwane mukakulama bya likota lya wene, bezile kuli Hezekiya hinga batabozola bivwalo byabo na kumutongweza mazu a Lambishake.
Libuka Lya Kuyela © Bible Society of Zambia, 2020.