Ngalatiya 3
3
Ndayano hinge kukulupila
1Enu Bakangalatiya bakuyeba! Katiyani unamilowo? Namimoneshele shiwahe ngayi Yeshu Kilishitu wakolekiwile. 2Nikushinga ngayi muntongweze shuma shimo, kati mwatambwile Moyo na milimo ya ndayano, hinge ndi mwayuvwile ncango zaziwahe, pe niho mwakulupilile? 3Kati munayebe nahiti? Mwatatikile na Moyo, haya munakushinga ngayi mumanishilile na ngovu za wuntu ndi? 4Kati ebye nimwabyo munayandili bya nahiya tuhu ndi? Kati mwa shikuma binengi bya nahiya tuhu ndi? 5Kati Nyambi unamipana Moyo wendi na kutenda bikomokesho mukati kenu, ndaba ya kutenda milimo ya ndayano ndi, hinge ndi ndaba mwakulupilile ncango zaziwahe ziya mwayuvwile?
6 #
Shit 15:6; Lom 4:3. Anukenu Abulahama, ngonehe kwatikitiwa ngayi, “Abulahama wakulupilile Nyambi, pe ndaba ya kukulupila, Nyambi ya Ngula wamutambwile kwinga wakulunga.” 7#Lom 4:16. Nohobene limukenu ngayi baya bakukulupila, nibo bakwinga bana ba Abulahama. 8#Shit 12:3. Kami byatikitiwa mwaka bikwamba ngayi Nyambi ukaolokesha Bakamatunga na kukulupila. Ncango zaziwahe zabilikiwile kuli Abulahama ngayi, “Mumwobe matunga nimwawo akawana mfuywezi.” 9Nohobene bakakukulupila bali na mfuywezi hamo na Abulahama mukakukulupila.
10 #
Nday 27:26. Ndaba nimwabo bakwombatala milimo ya ndayano, bali mu nceto ya shikuto. Ndaba kwatikitiwa ngayi, “Uli na shikuto sha Nyambi muntu nimwendi ukubula ku zamina kutenda byuma nimwabyo byatikitiwa mu libuka lya ndayano.” 11#Hamba 2:4. Haya kunamoneke shiwahe ngayi kowa muntu unaolokeshiwi na ndayano ku meho a Nyambi. Ndaba kwatikitiwa ngayi, “Bakakwoloka bakayoya na kukulupila.” 12#Bal 18:5. Ndayano kaliha zekala ha kukulupila. Ngoboni, “Muntu ukutenda ebye byuma, ukayoya nabyo.”
13 #
Nday 21:23. Kilishitu watukulizile ku shikuto sha ndayano, watoyiwile ngayi wakukutiwa ndaba ya netu. Ndaba kwatikitiwa ngayi, “Nimwendi ukukolekiwa ha mutondo unakutiwi.” 14Yeshu watendele eshe ngayi mwanga mfuywezi eze a kulupishile Nyambi kuli Abulahama, zipanikiwe ku Bakamatunga kupitila muli Yeshu Kilishitu. Nohobene ngayi na kukulupila, tutambule Moyo uya Nyambi a kulupishile.
Ndayano na bikulupisho
15Bawushinda, nikwamba ngonehe batendanga bantu, ndi bantu babili banaliyuvwu ha shuma, pe ba kutikita bya kushumisha biya banaliyuvwu, kowa muntu wakubikiluka hinge kuwezelelako. 16#Shit 12:7. Nyambi wakulupishile Abulahama na kuli muzukulyendi. Kaliha wambile ngayi kuli “bazukulyendi”, kutontolola bantu babengi, ngoboni wambile ngayi kuli “muzukulyobe” watoyele umo, niye Kilishitu. 17#Kut 12:40. Shuma nikwamba eshe, ndayano zezile munyima ya myaka myanda yinaa na myaka makumi ahatu, kaliha zikumanisha kulimama kuya ashumishile mwaka Nyambi, kami kaliha zikutwesha kumanisha shikulupisho shendi. 18#Lom 4:14. Ndaba ndi shishemo sha Nyambi sha kundama ku ndayano, pe kaliha shinakundama ku shikulupisho. Ngoboni Nyambi washipanine kuli Abulahama na shikulupisho.
19Haya ndayano zikutenda bishini? Ndayano zengile za kuwezelelako ndaba ya byabibi. Zapanikiwile ndaba ya wubi kutwala hakwiza kwa muzukulu wa Abulahama, uya wengile wa shikulupisho. Ndayano zayakiwile shiwahe na mangeloyi, kupitila muli mukakwimanina. 20Mukakwimanina kaliha ukwimanina tuhu muntu umo, ngoboni Nyambi niye umo.
Ebye zikutenda ndayano
21Kati ndayano zikulwisha bikulupisho bya Nyambi ndi? Byo, kaliha noho! Ndaba shinga kuli ndayano zikutwesha kupana wumi, shinga muntu nimwendi unengi wakwoloka kuli Nyambi kupitila mu ndayano. 22Ngoboni byatikitiwa bikwamba ngayi, kaye nimwako kali mu nceto ya wubi, nohobene ngayi mwanga shikulupisho sha shishemo shili ha kukulupila muli Yeshu Kilishitu, mwanga shipanikiwe ku baya bakwitabila.
23Ngoboni oho shikati sha kukulupila shilolo shize, ndayano zatuyakile mu wulungo, kukuma na ku shikati oho kukulupila kwaholokele. 24Nohobene ndayano zekalile na ngovu za kututwaminina kukuma na kuli Kilishitu, ngayi twinge bakwoloka mu kukulupila. 25Wuluno kukulupila kunezi, pe etu kutwesha kwikala mu nceto ya ndayano tufwako.
26Ndaba enu nimwenu muli bana ba Nyambi kupitila mu kukulupila kwenu muli Yeshu Kilishitu. 27Ndaba nimwenu oho mwazubilishiwile muli Kilishitu, munavwala Kilishitu enu bamwine. 28Kowa Kayunda hinge Mukamatunga, kowa ndungo hinge mukakushoboloka, kowa mulume hinge mbuyama, ndaba nimwenu munengi umo muli Kilishitu Yeshu. 29#Lom 4:13. Kami ndi enu muli Bakakilishitu, pe muli bazukulu ba Abulahama, kami mukatambula shikulupisho sha Nyambi.
Libuka Lya Kuyela © Bible Society of Zambia, 2020.