Efweshe 2
2
Kufuma ku kufwa kuya ku wumi
1 #
Kolo 2:13. Mwaka mwafwile mu moyo ndaba ya milandu na wubi. 2Ha shikati shiyo mwendelenga mu byabibi kukonka ngana za kano kaye, kami mwombatalile Shatana, mwene wa ngovu za mu mbimbayilu. Ou niye ukutenda milimo ha shikati shino ku bantu bakulwisha Nyambi. 3Shikati shiyo, etu kami twekalile nehi nibo, twatendelenga byuma byashingilenga zinyutu na bihanganiko byetu. Ndaba ya neshe na wuntu wetu twafwanina ku wukali wa Nyambi nehi bamina.
4Ngoboni Nyambi ndaba ya kuhanya kwa shishemo na nceshe zendi zazinene atuhakile nazo, 5hinge oho twengile bafu ndaba ya wubi wetu, unatushangulu hamo na Kilishitu. Na nceshe za Nyambi zinamipulwishi. 6Mu kulifungila kwetu hamo na Kilishitu, Nyambi watushangwile hamo na Yeshu Kilishitu, pe unatupana mwanya muyilu. 7Nyambi watendele ebye ngayi amoneshe kaye kakwiza wuheti wendi wawunene wa nceshe na shishemo shendi kukwetu muli Kilishitu Yeshu.
8Ndaba ya nceshe za Nyambi mukapuluka ndaba ya kukulupila. Mufwako kupuluka ndaba ya milimo munatende, ngoboni na shishemo sha Nyambi. 9Muntu wufwako kupuluka ndaba ya milimo yendi, kutina muntu aliyemeze. 10Nyambi niye watulengele, watulengele muli Kilishitu Yeshu ngayi tutende milimo yayiwahe, eye atupanine mwaka ngayi tuyitende.
Kwinga umo muli Kilishitu
11Enu Bakamatunga, anukenu eshe mwekalile mwaka. Bayunda ba kulitumba ngayi bakamukanda, ndaba ya shiheka ba kutenda ha zinyutu zabo, kami enu ba kumitoya ngayi bakakubula kuya kumukanda. 12Anukenu ngayi ha shikati shiyo kaliha mwalimukile Kilishitu. Mwekalile bayeni mu litunga lya Ishalela na kubula shitapilo eshe Nyambi a kulupishile. Mwekalile mu kaye kwakubula kulumbeza na kubula Nyambi. 13Ngoboni wuluno, muli Kilishitu Yeshu, enu mwaka mwekalile kwakutali na Nyambi munahenyeshiwi hahepi ndaba ya mukeza wa Kilishitu.
14Kilishitu niye wenga ku mwena kwetu, ou unafutulu Bayunda na Bakamatunga kwinga umo, ha kulitupula kwendi unahandulu limota lya mukati lya kutapulula mukatiketu. 15#Kolo 2:14. Wamanishile Ndayano za Moshesha hamo na mazu na biheka byazo, watendele eshe ngayi kufuminina ku iya mishobo yibili, ngayi alengeho mushobo umo, wawupya, wakwikala mumwendi ngayi alete ku mwena. 16#Kolo 1:20. Kilishitu wafwile ha shishempakano ngayi amanishe nzimbo, ngayi na shiyo shishempakano akulize iya mishobo yibili kwinga umo mu lutu lwendi na kuyibwesha kuli Nyambi. 17#Isha 57:19. Kilishitu wezile na ku shimikila ncango zaziwahe za ku mwena kukwenu Bakamatunga mwekalile kwakutali na Nyambi na ku Bayunda bekalile hahepi nendi. 18Kupitila muli Kilishitu etu nimwetu, Bayunda na Bakamatunga, tuli na kuhenyena na Moyo umo kuli Tate.
19Nohobene wuluno, enu Bakamatunga, kaliha muli bayeni na banyambangizi, ngoboni mukwinga ba shihemuwilo shimo na bantu ba Nyambi, kami muli lupashi lwa Nyambi. 20Enu munatungiwi ha mwimbi wa bantumwana na bamiluwe, kami Kilishitu Yeshu niye mwine wenga limanya lya mu mbango. 21Mumwendi litala nimwalyo likutungiwa mu kushuma shiwahe, kami likukula ngayi linge Litala lya Nyambi wa kuyela. 22Mumwendi enu kami mu kutungiwa hamo na bamina, ngayi mwinge litala lya Nyambi.
Libuka Lya Kuyela © Bible Society of Zambia, 2020.