Mukakushimikila 5
5
Hinga ukulupisha shawangu
1Lamenu nyendelo yenu oho mu kuya ku Litala lya Nyambi, kuhenyenako na kuyuvwilila kunengi kwakuwahe shikuma kupitakana kutupula nkombela ngonehe batendanga bileya, ndaba kulimuka bafwako ngayi bali na kutenda byabibi. 2Hinga unyankupa kwamba, hinge kututwisha lizu lya kukulupisha kuli Nyambi. Ndaba Nyambi wekala muyilu, kami obe wekala hano hanci. Nohobene hinga uvulisha mazu amengi. 3Ndaba milo yezanga na kulifulankana kwa nyinkalo na bileya batampanyanga mazu amengi. 4#Nyi 66:13-14. Oho ukuhaha luhaho kuli Nyambi hinga wihala kupana shiya wakulupisha. Ndaba Nyambi ku wahilila na bileya wufwako. Pana biya walihahila. 5Shinengi shashiwahe shinga wabula kukulupisha kupitakana ngayi ukulupishe na kubula kupana. 6Witabila ngayi nyambilo yobe yikutwale mu wubi, kami hinga wamba ku meho a ntumwana ngayi, “Shengile kupukala,” kati shumangani ukupilamisha Nyambi, ndaba ya kulihaha kwobe kwa mahalo na Kubipisha milimo ya maboko wobe? 7Mukuvula kwa milo na mazu akutampanya kowa ebye ukuwanamo, ngoboni shuma shashiwahe kutina Nyambi.
Kulyatilila na kupwisha
8Ndi mu ku mona ba kuyanda mu litunga mwekala bali na ku balyatilila, kami ba kubayata na shihota na ku bakanina ha byuma byabo binabafwanini, hinga mukomoka ha shuma shanehe, ndaba shilolo uli nanou uli hayilu yendi, ngoboni babilolo nimwabo ba kulamiwa na shilolo wamunene. 9Shinengi shuma shashiwahe ku litunga ndi mwene niyemwine ukulama ndayano na nzila yayiwahe yakwendeshelamo byuma.
10Ou uku haka mali kukanyikwa mali wufwako, hinge ou uku haka wuheti na nkambiko kukanyikwabyo wufwako. Nanebye kami binengi byuma byabikalu kubiyuvwishisha. 11Oho wuheti ukuvula bakakuwulya babengi, haya mwine wuheti ukawanaho bishini? Niye ukabapenza tuhu. 12Mukakutenda mulimo hinge niho a kulya byabishe hinge byabingi ngoboni walangananga tulo twatuwahe, ndi mukakuheta a kulya kwikuta, afwako kulala ndaba ya bihanganiko byendi byabingi.
13Kuli sha kukolesha ku mutima eshe namono hano hanci, wuheti ou akoweza mwine ha kuwutamwina, 14kami ou wuheti ukuwuyawa nimwawo ha kuwu tendesha shibi, ha kuwana ngayi niye nengi tata muntu, ukekala mabokoboko kwakubula sha kuyavwa mwanendi. 15#Yobo 1:21; Nyi 49:17; 1Tim 6:7. Ngonehe ahemuwile mu livumo lya bamandiyendi, ukaboka nahiya kami muhelengwa ngonehe ezile na kubula kushimba shuma mu liboko lyendi sha ku milimo yendi. 16Naneshe kami sha kukolesha ku mutima. Shakwinga ngayi ngonehe ezile nisho kami akaya, haya unawanaho bishini ha mulimo wendi wakutanda mpepo? 17Matena wendi nimwawo anamanini mu mincimpwe, mu manyengo, makando na malweli.
18Mona! Eshe nisho namono ngayi, shashiwahe ku muntu nimwendi ngayi alye na kunwa na kulikuwa ebye anatendenga ha shikati sha kuyoya kwendi kwakushe kuya amupanikile Nyambi. Eshe nisho Nyambi anayongolo ha muntu. 19Ku muntu nimwendi uya Nyambi anapana wuheti na ntutu, unamupana na ngovu za kulikuwawo, ukakeyukila mu milimo yendi, eshe shenga shishemo sha Nyambi. 20Nyambi unayaka ku wahilila mu mutima wendi, pe afwasho shikati sha kuhanganika bya nyoyelo yendi.
Libuka Lya Kuyela © Bible Society of Zambia, 2020.