2 Teshalonika 1
1
1 #
Mil 17:1. Ami Paulu na Shilashi na Timoteo, tukutikitila ku litengo lya bantu ba mu Teshalonika, muli Nyambi Tatiyetu na Mwene Yeshu Kilishitu.
2Nceshe na ku mwena, bikufuma kuli Nyambi Tatiyetu na Mwene Yeshu Kilishitu bikale nenu.
Kuyata kukekalako hakwiza kwa Kilishitu
3Bawushinda, etu tunafwanini kukambilila kuli Nyambi shikati nimwasho ndaba yanenu. Shinatufwanini ngayi tutende noho, ndaba ngayi kukulupila kwenu kuli na kukula shikuma na shishemo shenu nimwenu ku umo na wamina shili na kuneneha. 4Nohobene etu tuli na kuliyemeza mu matengo a Nyambi ndaba ya lunzewe lwenu na kukulupila kwenu hinge oho muli na ku mona makando na malwa munazumanana.
5Ebye nimwabyo bikulubulula ngayi kuyata kwa Nyambi kwenga kwakwoloka, ngayi mwanga mwinge ba ku fwanina Wene wa Nyambi, ou mu kuyandila. 6Nyambi wenga wa kupwisha, ukabweshela makalikiza kukwabo baya ba kumiyandisha. 7Pe ukakwangulukisha enu muli na kuyandishiwa nanetu kami ukatukwangulukisha. Ebye bikatendiwa oho Mwene Yeshu akaholoka kufuma muyilu na mangeloyi endi a ngovu mu milangi ya mundilo, 8pe ukashushula baya ba kukana Nyambi na baya bakubula kwombatala ncango zaziwahe za Mwene wetu Yeshu Kilishitu. 9Bakashushuliwa na makalikiza a mwaya myaka, bakafumishiwa ku meho a Mwene na ku wuwahe wa ngovu zendi, 10oho akeza ha mutena uyo, kwiza na kutambula wuwahe ku bantu bendi ba kuyela nimwabo na kutambula maleema ku bakakwitabila nanenu kami mukekala mukati kabo ndaba mwetabilile ncango twamitongwezele.
11Nohobene twamilombelelanga shikati nimwasho. Twanyepanga Nyambi ngayi amitwesheshe mwanga muyoye wumi uya unafwanini baya anehana. Mwanga na ngovu zendi, enzalishe bifungo byenu nimwabyo byabiwahe na kumanishilila milimo yenu ya kukulupila. 12Tukulombela ngayi lizina lya Mwene wetu Yeshu Kilishitu lilemeshiwe mumwenu nanenu mumwendi, ngonehe ku nceshe za Nyambi yetu na Mwene Yeshu Kilishitu.
Libuka Lya Kuyela © Bible Society of Zambia, 2020.