2 Shamwele 6
6
Likwati lya Kulimama likuletiwa ku Yelushalema
(1 Byambo 13:1-14; 15:25; 6:6, 43)
1Ndavita kami wakungwile bakanzita bangovu bamu Ishalela hamo, bantu 30,000. 2#Kut 25:22. Pe Ndavita wabatwamininine kuli Mbaale mu Yunda mu kuleta Likwati lya Kulimama lya Nyambi. Elye likutumbiwa na lizina lya Nyambi wa Makunge, ou wekalanga mukati ka makelumbi. 3#1Sha 7:1-2. Balishimbile ku litala lya Ambinandambu ku Ngimbiya ha shinkanda na kuliyaka ha shikocikala shashipya. Uza na Ahiyo bana ba Ambinandambu babalume bendeshele shikocikala. 4Kumbili ya likwati lya Nyambi ya Ngula kwendelenga Ahiyo. 5Ndavita na Baishalela nimwabo bashindilenga na kwimbila na ngovu zabo nimwazo mu kulemeeka Nyambi ya Ngula. Bekalile na kumbeta tumbuli na tuhanzi na pala na mashokomba na tulimba twatushe.
6Oho bakumine ku likotwelo lya Nakoni, mapulu balituntwile, pe Uza wolwele liboko wakwatile ku Likwati lya Kulimama. 7Hohobene Nyambi ya Ngula, Nyambi wapilaminine Uza pe wamuzihile ndaba ya kalimbwilisho kendi. Pe niho Uza afwilile kuyo, kunkumo ya Likwati lya Kulimama. 8Ndavita wapilamine ndaba Nyambi ya Ngula washushwile Uza na wukali. Kufuma haya mwanya uyo watumbiwile ngayi Pelezi Uza#6:8 Pelezi Uza:Lizina elye mu Shihebelu likutontolola ngayi Kushushula kwa Uza..
9Ndavita wekalile na bowa wakutina Nyambi ya Ngula. Niho alyambashanine ngayi, “Nikutwesha nahiti kushimba Likwati lya Kulimama?” 10Pe Ndavita wafungile ngayi hinga a shimba likwati ku litwala ku Yelushalema, niho ashintulukile mu nzila na kulitwala ku litala lya Ombendi Endoma, ou wekalile ku lukena lwa Ngati. 11#1Bya 26:4-5. Likwati lyekalile kuyo zingonda zihatu. Nyambi wafuywelele Ombendi Endoma na ba lupashi lwendi.
12Mwene Ndavita wayuvwile ngayi Nyambi ya Ngula unafuywele ba lupashi lwa Ombendi Endoma na nimwabyo biya ekalile nabyo ndaba ya Likwati lya Kulimama. Niho Ndavita wayile na kulishimba ku litala lya Ombendi Endoma na kulitwala ku Yelushalema na kupinga shimbo shashinene. 13Oho bantu aba bashimbile Likwati lya Kulimama bendakale zintambo mutanu na yimo, Ndavita wabemikile niho akombelele kuli Nyambi ya Ngula nkombela ya nkunzi na namani wa kushuwa. 14Ndavita, wavwalile likwiza lya kulelema lya mukankombela na ku mangaho mukunzi, washindilenga na ngovu zendi nimwazo mu kulemeeka Nyambi ya Ngula. 15Pe haya, Ndavita na Baishalela nimwabo batwalile Likwati lya kulimama, ku Yelushalema hibaya na kuwulumwina tunkelenkele twa ku wahilila na kutendoka kwa zimpandula.
16Oho Likwati lya Kulimama lya kumine mu lukena, Mikale mwana Shaulu, watilaminine mu limpananga pe wamonene mwene Ndavita heza na ku shinda na kukilozoka ku meho a Nyambi ya Ngula, pe wamuhandwile mu mutima wendi. 17Baletele Likwati lya Kulimama ku ntanda eye aliwahishilile Ndavita na kuliyaka mukati. Niho bakombelele zinkombela za kuhokesha na zinkombela za kulilumikila ku meho a Nyambi. 18Oho Ndavita amanishile kutupula zinkombela wafuywelele bantu mu lizina lya Nyambi wa Makunge. 19#1Bya 16:43. Pe wabatapishilile byakulya nimwabo. Wapanine balume nimwabo na bambuyama nimwabo mu Ishalela mupumpa wa linkende na shituntula sha nyama ya kuyoha na nkuyu za kuyanika. Niho bantu nimwabo bayile ku minzi yabo.
20Nohobene Ndavita oho abokele ku munzi na kushangwisha balupashi lwendi. Mikale mwana Shaulu wa mbuyama watutikile ha munkanda na kumu shimbawila. Pe wamushilawizile ngayi, “Mwene wa Ishalela lelo unalikatulu niye mwine. Nalishampulu niyemwine ngo showa ku meho a bakamilimo ba bambuyama na babilolo bendi.”
21Ndavita wakumbwile Mikale ngayi, “Nashindinga na kulemeeka Nyambi ya Ngula, ou wahatile ami mu mwanya wa tatiyobe na ba lupashi lwendi ku nyaka kwinga mukakutwaminina wa bantu bendi Ishalela. Pe nishili ku shinda kulemeeka Nyambi ya Ngula, 22pe nishili kulishampula amimwine shikuma. Kampe obe una hanganiki ngayi nili showa, ngoboni baya bambuyama unatoyo ba kupana lileema shikuma hahami.”
23Pe Mikale mwana Shaulu, hinga atangile kwikala na bana hinge umo kutwala na kukufwa kwendi.
Libuka Lya Kuyela © Bible Society of Zambia, 2020.