2 Shamwele 4
4
Ishi-Mbosheti ukuzihiwa
1Oho Ishi-Mbosheti, mwana Shaulu, ayuvwile ngayi Ambina wazihiwakale mu Hembuloni, watinine na bantu nimwabo ba Ishalela bekalile na bowa. 2Ishi-Mbosheti wekalile na babilolo babili, Mbaana na Lekambu, bana ba Limoni babalume, ba ku Mbeloti ku mushobo wa Mbenjamani. Aba babili batwaminininenga matanga a bakakupukula. Mbeloti walabiwilile kuli Mbenjamani. 3Bantu bazikilenga ku Mbeloti mwaka batininine ku Ngitayima, oko nikwo bashili kuzika, kuleta naku lelo.
4 #
2Sha 9:3. Muzukulya Shaulu wamina wengile Mefwimbosheti mwana Yonatana. Wekalile na myaka mutanu oho Shaulu na Yonatana bazihiwile. Oho mbuzi ya lufu lwabo yafumine ku lukena lwa Yezilelu, shibeleki wendi wamukatwile na kwituka nendi, ngoboni ndaba wekalile na ku nyankupa, niho amuwishilile hanci pe wapengele.
5Lekambu na Mbaana bana ba Limoni waku Mbeloti bakatukile kuya ku litala lya Ishi-Mbosheti pe bakakumineko ku shikati sha mwaana shikati ekalile na kukatala. 6Mbuyama wekalile ku shipana wakunokelenga aha ekalile na kupepa loto, nohobene Lekambu na Mbaana balibembwilile na kwingina mukati. 7Oho benginine mukati, bayile ku kampenci ka Ishi-Mbosheti kakulangana, bamuwanine uli mu tulo twa ngonzi, pe bamushwangile na kumuziha. Niho baketwile mutwe, bawushimbile, pe bendele wushiku nimwawo kupita mu Mukulo wa Yondana. 8Bamoneshele mutwe wendi kuli Mwene Ndavita ku Hembuloni, pe bambile kukwendi ngayi, “Mutwe wa Ishi-Mbosheti uno mwana kamalamo wobe Shaulu ou washingilenga kukuziha. Nyambi ya Ngula unetabilishi obe mwene ya ngoma, hekulyetu, kubweshela wubi ku wubi hali Shaulu na bazukulyendi lelo.”
9Ndavita wakumbwile Lekambu na Mbaana bana ba Limoni waku Mbeloti ngayi, “Nikulibeza na Nyambi ya Ngula wakuyoya, ou unandamwini ku malamo nimwawo. 10#2Sha 1:1-16. Ntumwana ou wezile kukwami ku Zikilangi na kuntongweza bya lufu lwa Shaulu wahanganikile ngayi waletelenga mbuzi yayiwahe. Namukwatile pe namuzihile. Iya yengile ncuungu yendi namupanine ha mbuzi yayiwahe. 11Bantu bakuluwa banazihi muntu wa kubula mulandu hinga alala mu litala lyendi. Haya nikubweshela hahenu na kumiziha na kumifumisha hano hanci.” 12Ndavita watongwezele bakanzita bendi, bazihile Lekabe na Mbayana, babaketwile maboko na mawulu, pe bapatikile mituntu yabo kwakwipi na liziba mu Hembuloni. Bashimbile mutwe wa Ishi-Mbosheti na kuwu funda mu shinzimbi sha Ambina kuyo ku Hembuloni.
Libuka Lya Kuyela © Bible Society of Zambia, 2020.