2 Shamwele 13
13
Aminoni na Tamale
1Ambishalome mwana Ndavita wekalile na mpanzendi wamuwahe wa muzike, watumbiwile Tamale. Aminoni mwana Ndavita wamina walishozelengaye. 2Wamuminininenga mate shikuma pe wafumishileho na kukola, ndaba shamonekele kwinga shashikalu kukwendi ha kumuwana, ngo shiheka sha kankanga, walamiwilenga kubula kuliwananga na balume. 3Ngoboni Aminoni wekalile na minendi Yehonandambu mwana Shama yayiyendi Ndavita, mulume walikeyelela. 4Yonandabe wambile kuli Aminoni ngayi, “Unengi mwana mwene hayaboni, kati bishini na ku monanga ku moneka kuhomba?”
Wakumbwile ngayi, “Nikuminina mate Tamale, mpanza mukonzo wami Ambishalome.”
5Yonandabe wambile kukwendi ngayi, “Lyongeze kukola, pe uye mu kulala. Oho tatiyobe akwiza mu kuku mona, wambe kukwendi ngayi, ‘Hekulu, ntongwezelenu mpanzami Tamale eze na kumpana byakulya. Nikumushinga ngayi eze na kutenda byakulya okwe nikutwesha kumumona, pe niho abipane kukwami.’” 6Niho Aminoni alyongezele ngo wakolelenga na kuya mu kulala.
Mwene Ndavita wayile mu kumumona, Aminoni wambile kukwendi ngayi, “Hekulu, ambila Tamale kwiza na kubumba mankende amashe okwe nikutwesha kumumona, pe niho abipanike kukwami.”
7Niho Ndavita atumine lizu mu musheke kuli Tamale ngayi, “Yanga ku litala lya Aminoni mu kumutendela byakulya.” 8Nohobene wayile kuyo pe wamuwanine nalangana. Watolele muvuba, wawuwahishile, pe wabumbile mankende okwe atweshele kumumona. Niho ayohele mankende 9pe wawafumishile mu shivulu ngayi alye, ngoboni kaliha walile. Aminoni wambile ngayi, “Tongweza bantu nimwabo ngayi baye.” Pe nimwabo batutikilemo. 10Niho Aminoni ambile kuli Tamale ngayi, “Leta mankende kuno ku wulili wami pe uwampane.” Watolele mankende pe wayile kukwendi. 11Ngoboni oho amupaninewo, wamukwatile pe wambile kukwendi ngayi, “Yeka ku wulili nilalenobe.”
12Tamale wambile kukwendi ngayi, “Nakana. Hinga unkandamika kutenda shuma sha lisheni nehe. Shinengi sha shibi. 13Kati nikatwesha nahiti kupenza bantu? Pe ukashampuka shikuma mu Ishalela. Enu yaya, kambenu tuhu kuli mwene, pe nikwamba kupwisha ngayi ukampana kukwobe.” 14Ngoboni Aminoni kaliha wamuyuvwililile, pe haya wekalile na ngovu za kumupitakana, wamukwatile na kulala nendi.
15Aminoni wekalile na nzimbo yayinene kukwendi, haya wamuzimbile kupitakana ngonehe eshe amuhakilenga ha kutatika. Wambile kukwendi ngayi, “Tutika ha munkanda.”
16Ngoboni Tamale wakumbwile ngayi, “Enu yaya ami nakana. Ndaba eshe sha kuntanda nehe sha shibi shikuma kupitakana eshe unatende.”
Ngoboni Aminoni kaliha wayuvwileko. 17Wehanine mukamulimo wendi pe wamwambilile ngayi, “Tutwisha owe mushimbi ha munkanda, pe mwanga upateko.” 18Mukamulimo wamututwishile ha munkanda na kupatako.
Tamale wavwalile shivwalo sha wene shashitali shekalile na maboko amatali, bivwalo bavwalilenga bana ba bamyene babambuyama bakubula kuyekiwa mu matena akunyima. 19Niho Tamale alifukwilile mutoko ku mutwe wendi, watabwile shivwalo shendi, shashitali shiya avwalile na kuli kwatilila mbimba mutwe, haya na kulila. 20Oho mpanzendi Ambishalome amumonene wamwipwile ngayi, “Obe mpanzami, kampe Aminoni unalala nobe ndi? Hinga ulinyenga shikuma noho. Unengi mpanzobe wa ku livumo lyashenge, pe haya obe hinga utongwezako muntu.” Niho Tamale ekalilenga mu litala lya Ambishalome, wengile wakuhomba na winka shikati nimwasho.
21Oho Mwene Ndavita ayuvwile eshe shatendiwile, wapilamine shikuma.#13:21 Mu mabuka amo ashikale banawezeleleko, ngayi Mwene Ndavita kaliha wamushushwile ndaba wamuhakile, ha kwinga mwana wa mweli. 22Pe Ambishalome wazimbile Aminoni shikuma ha ku kilukila mpanzendi Tamale, pe ngayi hinga mwaka akatanga kukalikumbula lizu na Aminoni.
Ambishalome ukubwesha wubi ku wubi
23Munyima ya myaka yibili Ambishalome washeheshelenga bambelele bendi ku Mbaalu Hazo hahepi na munzi wa Efulemu. Wehanine bana ba mwene Ndavita babalume nimwabo kwikalako. 24Wayile kuli Mwene Ndavita pe wambile kukwendi ngayi, “Obe Mwene ya Ngoma, nili na kushinga ku sheha bambelele bami. Kati ku fwanina shifwako ngayi obe na babilolo bobe mwize na kwikala ku shimbo eshe ndi?”
25Mwene wakumbwile ngayi, “Byo mwanami. Shikwinga shashikalu shikuma kukwobe ndi nimwetu tukuyako.” Ambishalome wamukandamikile, ngoboni mwene kaliha wamwitabilile, pe watongwezele Ambishalome ngayi ayenga, ngoboni wamutandalishile.
26Ngoboni Ambishalome wambile ngayi, “Shashiwahe, pe boni yitabilisha bayaya ba Aminoni kuyako.”
Mwene wamwipwile ngayi, “Shuma ngani eshe Aminoni akuyilako?” 27Ngoboni Ambishalome wazaminine kumukandikiza hantu noho Ndavita etabilishile Aminoni na bana bendi bamina babalume nimwabo kuya na Ambishalome.
Ambishalome wawahishile mayambwayambwa akwinga ngo mwene. 28Pe wafundizizile bakamilimo bendi ngayi “Monesheshenu Aminoni oho wanwakale shikuma, pe namitongweza tuhu ngayi, muzihenu, hinga mwikala na bowa. Nikalitabila ngayi nashitendele. Kancenu pe hinga mu shintazala.” 29Nohobene bakamilimo bayuvwile ebye ambile Ambishalome pe bazihile Aminoni. Pe wingi wa bana ba Ndavita babalume nimwabo bakandamine ha bambishi wabo pe batinine.
30Oho bashili kwenda ha kuboka ku lukena, Ndavita bamutongwezele ngayi, “Ambishalome unazihi bana bobe babalume nimwabo kowa ni umo unashalako.” 31Mwene wemanine, watabwile bivwalo byendi mu wunginga, pe waliyumbilile hanci. Bakamilimo bemanine kuyo nendi batabwile bivwalo byabo. 32Ngoboni Yehonandambu, mwana Shama mukonzo wa Ndavita, wambile kukwendi ngayi, “Hekulu, kuziha bana bobe babalume nimwabo wufwako, ndele tuhu Aminoni niye unazihiwi. Watweshanga kulimuka ntoneno ya Ambishalome ngayi wekalile na mutima wakutenda eshe kufuma haya Aminoni alalile na mpanzendi Tamale. 33Hekulu hinga ukulupila mbuzi ngayi bana bobe babalume nimwabo banafu, ndele tuhu Aminoni niye unazihiwi.”
34Shikati shiya bene Ambishalome watinine.
Niho, kanzita wekalile ha mulimo wakulama wamonene likunge lyalinene lya kulishilenga kunkumo ya lipili ku nzila yaku Holanayima. Wayile kuli mwene mu kushimika ebye anamono. 35Pe Yehonandambu wambile kuli Ndavita ngayi, “Bana ba bamyene ba kumakale ngonehe anamba mukamulimo wobe.” 36Aha amanishile tuhu kwamba noho, bana ba Ndavita benginine mukati, batatikile kulila. Pe kami mwene Ndavita na babilolo bendi balilile shikuma.
Ambishalome ukuboka kukwabo
37Ngoboni Ambishalome watinine na kuya kuli Talimayi mwene wamu Ngeshula, mwana Amihundi na kwikalako myaka yihatu. Pe Ndavita walilile mwanendi Aminoni shikati shashitali. 38#2Sha 3:3.Ambishalome wayile kuli Ngeshula, pe wakekalile kuyo myaka yihatu. 39Mwene Ndavita washingilenga shikuma kami ku mona mwanendi Ambishalome, ndaba bantu bamubengezekele ha lufu lwa Aminoni.
Libuka Lya Kuyela © Bible Society of Zambia, 2020.