2 Pita 3
3
Shikulupisho sha kwiza kwa Mwene
1Bakakuhakiwa, lino nilyo liñwati lya wubili nikumitikitila. Namitikitila mañwati awa, kupindula mitima yenu ya kuyela na kumyanukisha. 2Nikushinga ngayi mwanuke mazu bambile mwaka bamiluwe ba kuyela na ndayano za Mwene na Mupulwishi kupitila muli bantumwana benu. 3#Yun 18. Shuma sha kutatika mwafwanina ku yuvwishisha eshe, ngayi ha matena aku kotoka kukeza bakawuncengwe, bakakukonka mahungu abo, bakakukumangiza, 4na kwamba ngayi, “Shikulupisho sha kwiza kwendi shili kuti? Ndaba hinga bafwila batatizetu, byuma nimwabyo binekala ngonehe byekalile kufuma ku kulenga kwa kaye.” 5#Shit 1:6-9. Bakutenda ntalu na kuvulama shuma eshe ngayi na lizu lya Nyambi, mayilu ekalile mwaka na hanci hemanine hayilu ya mema, kami kazika mu mema. 6#Shit 7:11. Kami na nawa mema, kaye aka kekalileko mwaka, kakupukile na libazi, kami kalobele. 7Kami na nelye lizu, mayilu na hanci ebye biliko shikati shino, binatatilili mundilo ha Mutena wa Kuyata na kuloba kwa bakawubi.
8 #
Nyi 90:4. Ngoboni, bakakuhakiwa, hinga muvulama eshe shuma ngayi mutena umo kuli Mwene unengi ngo myaka likulukazi limo na myaka likulukazi limo yinengi ngo mutena umo. 9Mwene kwihalisha wufwako shikulupisho shendi, ngonehe bantu bamo ba kutoya ngayi kwihala, ngoboni uli na lukakatila kukwetu na kubula kushinga ngayi muntu wamina alobe, ngoboni ngayi nimwabo batenguluke.
10 #
Mat 24:43; Luka 12:39; 1Tesh 5:2; Kuh 16:15. Ngoboni Mutena wa Mwene ukeza ngo mwizi, pe mayilu akapita na miyoyo yayinene na byuma bikanyangumuka na mundilo na hanci na milimo yaho bikapeluka.
Kuyavwa kwa kulibalakanya
11Ha kuwana ngayi byuma nimwabyo ebye bikanyangumuka, haya munafwanini kwinga bantu banahiti? Munafwanini kwinga bantu banyinkalo ya kuyela na ya Wunyambi, 12oho munakutatilila kwiza kwa Mutena wa Nyambi, oho mayilu akabanga na kunyangumuka na mundilo! 13Ngoboni kuya na shikulupisho shendi tukutatilila mayilu amapya na hanci hahapya, haya mwekala kwoloka.
14Nohobene, bakakuhakiwa, ndaba mu kutatilila byuma bya noho, zundaminenu ngayi muwaniwe kukwendi mu ku mwena, bakubula libala, hinge nyanco. 15Limukenu shuma eshe ngayi lukakatila lwa Mwene wetu lwenga kupuluka, ngonehe Paulu kawushinda wetu wakuhakiwa amitikitilile na ngana eze Nyambi amupanikile. 16Unatikiti mu mañwati endi nimwawo, kutoya byuma ebye mumwawo. Muya mu mañwati endi muli byuma bimo byabikalu kubiyuvwishisha, ebye bakakubula kulilongesha na bakakubula ku shuma mu kukulupila ba kupeteka, kutwala ku kuloba kwabo nehi kami ba kutenda ku byamina byatikitiwa. 17Nohobene, enu bakakuhakiwa, ndaba munalimuku ebye byuma, keyenu kutina enu kami mushanuka na kuyongala kwa bakawubi na kuwa ku kushumankana kwenu. 18Ngoboni kulenu mu nceshe na mu kalimukisho ka Mwene na Mupulwishi wetu Yeshu Kilishitu. Kukwendi kwikale wuwahe shikati shino na mwaya myaka! Ameni.
Libuka Lya Kuyela © Bible Society of Zambia, 2020.