1 Shamwele 2
2
Lilombelo lya Hana
1 #
Luka 1:46-55. Hana walombelele ngayi,
“Mutima wami unawahilili muli Nyambi ya Ngula.
Nyala zami zinashumini muli Nyambi ya Ngula
Nohobene nikahepa bamalamo bami,
Nohobene nikutangala
ndaba Nyambi unanyavwa.
2Kowa muntu wa kuyela ukwezeka na Nyambi ya Ngula,
kowa muntu wakulifweka nendi.
Kowa limanya lya kulifweka
na Nyambi yetu.
3Lehenu kulilundumika kwenu kwa kulitemba,
lehenu mazu a kuliyemeza.
Ndaba Nyambi ya Ngula wenga Nyambi walimuka nimwabyo,
niye ukuyata nimwabyo biya ba kutenda bantu.
4Bipando bya mukunzi bya bakanzita bangovu binapokozoko,
ngoboni ba kupopa ba kushumankana.
5Bantu aba baleliwile shiwahe ku mwaka,
hano bali na kuliheheza nibo bamwine ku byakulya,
ngoboni bakanzala kukalanduka na
nzala kami bafwako.
Mbuyama wamumba unabeleke bana babalume mutanu na babili,
ngoboni manda bantu babengi unashala mabokoboko.
6Nyambi ya Ngula wazihanga kami wabweshangamo wumi,
watwalanga bantu ku kalunga ka bafu,
na kubashangula kami.
7Washepweshanga bantu bamo pe ha kuhetesha bamina,
washepeshanga bamo na kunenehesha bamina.
8Wakatulanga ba kuyanda mu lukungu,
kami wapindulanga bakakubula shamina mu makalikiza wabo.
Wabekalikanga hamo na bana ba bamyene
na kubakatwila mu myanya ya maleema.
Ndaba mimbi ya hanci yinengi ya Nyambi ya Ngula,
hahayo niho anatendele kaye.
9Wakinganga wumi wa bantu bendi bakulunga,
ngoboni bakuluwa bakazimina mu mincimpwe,
ndaba muntu kutwesha kukoma na nyala zendi niyemwine wufwako.
10Bamalamo ba Nyambi ya Ngula bakalobeshiwa,
ukabalengumukila na mushika kufuma muyilu.
Nyambi ya Ngula ukayata kaye nimwako,
ukapana ngovu kuli mwene wendi,
na kunenehesha ngovu za wakuwabishiwa wendi.”
11Niho Elikana ayile kukwabo ku Lama, ngoboni kanuke Shamwele wekalile mu Shilo hatendela milimo Nyambi ya Ngula na kulamiwa kuli mukankombela Eli.
Bana ba Eli babalume
12Bana ba Eli babalume bengile bihulahuli, kaliha bengile bakakutina Nyambi ya Ngula. 13Hinge ku ndayano za nebye bashingilenga bakankombela ku bantu. Shengile nehe, oho muntu ukutwala nkombela yendi mu kutupula, mukamulimo wa mukankombela wezilenga na nkombola ya mincomo yihatu. Oho nyama yishili kutelekiwa, 14washonkele nkombola ya mincomo mu nyungu, pe nyama nimwayo iya yakakatililenga ku nkombola ya mincomo yengile ya mukankombela. Bana ba Ishalela nimwabo aba bezilenga ku Shilo mu kutupula zinkombela nisho batendiwilenga noho. 15Kami, hinge oho mazi shilolokale atwaliwe mu kuhokeshiwa, mukamulimo wa mukankombela wezilenga ku muntu ou watupwilenga nkombela ngayi, “Mpanike nyama yimo ya mukankombela akayohe. Unakana kutambula nyama ya kuteleka kukwobe, ndele tuhu yayibihu.”
16Ndi muntu ukukumbula ngayi, “Leha taha tutende eshe shinafwanini kami tuyohe mazi ha kutatika, nohoboni ushimbe eshe ukushinga,” mukamulimo wa mukankombela wambilenga ngayi, “Byo, unafwanini kumpanikayo hahano, ndi ukukana, nikayishimba na kukandamika.”
17Owe wubi wa bana ba Eli babalume wengile wawunene shikuma ku meho a Nyambi ya Ngula, ndaba batendeshelenga ntupu ya kuli Nyambi ya Ngula na lihandu.
Shamwele ku Shilo
18Ha shikati eshe bene kanuke Shamwele wazaminine kutendela milimo Nyambi ya Ngula, wavwalilenga shikobelo sha kuzila sha likwiza lya kulelema. 19Ha mwaka ha mwaka mandiyendi wamutungililenga lyambangubo lyalishe lya hayilu, pe wamutwalililengawo oho ayilenga na mukokwendi mu kutupula nkombela yaha mwaka ha mwaka. 20Niho Eli wafuywelelenga Elikana na mukazendi, wambile kuli Elikana ngayi, “Nyambi ya Ngula mwanga akupane bana bamina kupitila muli mbuyama owe ba kuhinga mu mwanya wa nou mwana wafungwilile kuli Nyambi ya Ngula.”
Ha kumanisha babokelenga ku munzi.
21Nyambi ya Ngula wafuywelele Hana, pe wabelekele kami bana babalume bahatu na babakazi babili. Pe kanuke Shamwele wakulilile shikuma mu mulimo wa Nyambi ya Ngula.
Eli na bana bendi babalume
22Haya Eli wengakale hikakulukazi, wayuvwile byuma nimwabyo biya batendelenga bana bendi babalume ku Baishalela pe kami batendelenga lwiholwiho na bambuyama aba batendelelenga mulimo wa Nyambi ya Ngula ku menginino a ntanda ya shikungulukilo. 23Nohobene Eli wambile kukwabo ngayi, “Shumangani mu kutendela byuma bya nehe? Bantu nimwabo banakuntongwezanga byuma byabibi ebye muli na kutenda. 24Lehenusho, enu bana bami. Eshe shinengi shuma sha shibi shikuma eshe shinakwambiwa ku bantu ba Nyambi ya Ngula. 25Ndi muntu ukubipishila minendi muntu, Nyambi ukutwesha kumwimanina, ngoboni yani ukutwesha kwimanina muntu ou ukubipishila Nyambi ya Ngula?”
Ngoboni nibo kaliha bayuvwilililenga mazu a tatiyabo, ndaba Nyambi ya Ngula wekalile na shifungo sha kubaziha.
26 #
Luka 2:52. Kanuke Shamwele wakulilenga ku mwimo na kuwana kuyamiziziwa kuli Nyambi ya Ngula naku bantu.
Kulubulula kwa kulwisha balupashi lwa Eli
27Muluwe wa Nyambi wezile na ku shimika lizu lya Nyambi ya Ngula kuli Eli ngayi, “Oho nkaka yobe Aloni na ba lupashi lwendi bengilenga bandungo kuli mwene wa Engepita naliholwele amimwine kuli Aloni. 28#Kut 28:1-4; Bal 7:35, 36. Ku mishobo nimwayo yamu Ishalela nahatile ba lupashi lwendi kwinga bakankombela bami, mu kutendanga mulimo waku kaala, wakuhokesha incence na kuvwala shikobelo sha kuzila mu kuyipwiziza kukwami. Pe nabapanikile ngovu mu kulama shitapilo sha nkombela nimwayo yaku bantu bami Ishalela ya kukombelela na mundilo. 29Kati shumangani boni mu kutilaminanga ku zinkombela naku zintupu zami na liho lya mutongo, ebye nanyepele ku bantu bami? Kati shumangani obe Eli ukulemeeka bana bobe babalume shikuma kupitakana ami na kubetabila ngayi balishuwishe nibo bamwine ha bitapilo byabiwahe bya zinkombela nimwazo eze ba kutupulanga bantu bami Baishalela? 30Eshe nisho anamba Nyambi ya Ngula, Nyambi wa Ishalela nehe ngayi, ‘Nakulupishile kunyima ngayi ba livumo lyobe na ba lupashi lwa tatiyobe bakantendelenga mulimo kwinga bakankombela ha shikati nimwasho.’ Ngoboni hano Nyambi ya Ngula unakwamba ngayi, ‘Haya kunamana,’ nika lemeeka baya ba kundemeeka na kulimbulula baya ba kundimbwilisha. 31Yuvwilila, shikati shinakwiza oho nikaziha bandumbana nimwabo ba livumo lyobe na ba lupashi lwa tatiyobe, nohobene ba kulivumo lyobe kukabula muntu ukakula kwinga kakulukazi. 32Ukayanda pe ukekala na ntalu ha mfuywezi nimwazo eze nikapanika ku bantu ba Ishalela bamina, ngoboni kukabula muntu wa ba lupashi lyobe kami ukakula kukuma ku myaka ya wukulukazi. 33Haya nikalama tuhu umo ku bazukulyobe kwinga wamumi, niye ukantendela mulimo kwinga mukankombela. Ngoboni ukenga kalila mpwepwe na kwikala na manyengo mu mutima, kami bazukulyobe nimwabo bakafwa lufu lwa mushunga. 34#1Sha 4:11. Oho bana bobe babili babalume, Hofwini na Fwinihashi, bakafwa ha mutena umo, eshe shikenga shilimukisho ngayi byuma nimwabyo ninamba bikenga bya kupwisha. 35Nikahata mukankombela ou ukenga wakulunga kukwami na kutenda byuma nimwabyo ebye nikushinga ngayi atende. Nikamupanika bazukulu, baya bakatendanga mulimo ku meho a mwene wami wakuwabishiwa shikati nimwasho. 36Waku bazukulyobe ou ukashalamo enge wanahiti ukayanga kuli mukankombela mu kumunyepa mali na byakulya na kunyepa ngayi munyintabilishe kuyavwa bakankombela, ngayi mwanga niwanengako byakulya.”
Libuka Lya Kuyela © Bible Society of Zambia, 2020.