Levitiku 19
19
Ikano mwaha wa sookhovelela soohiyanahiyana
1Yave aamwerela Moisesi: 2“Mwaleele muthukumano wootheene wa aYixrayeli: ‘Mukhale ootteela niwoko Miyo, Yave Mulukwaanyu, ti Ootteela. 3Khula mutthu a nyuwosa aattittimihe amayawe ni atithawe nitho iSaabadusaka. Miyo ti Yave Mulukwaanyu. 4Muhitthare miluku soowootha naari muhiipakele miluku sa iyuuma soohaniwa. Miyo ti Yave Mulukwaanyu. 5Mwaampakelaka Yave yooveleelela murettele, mpake yeeyo weera yaakhuleliwe mweereliwaka nyuwo. 6Eyo ekhuuriwe munihukuni mumveleelaanyu hoye hoye waaxiiye; seiyo sineera sihale mpaka nihuku nanaararu sihisiweke. 7Sakhalaru sa seiyo sineera sikhuuriwe vanihukuni nanaararu, sinookhala soohitteela ni khasaakhuleleya. 8Yoowo aneera akhuure seiyo onoohaawa mootakhalanimwawe niwoko ooveiha yeeyo eri yootteela wa Yave; mutthu owo onoomalamalihiwa mmulokonimwawe. 9Nyuwosa mwaahephaka mmattamwanyu, muhihephe mpaka mukotihenraanyu olima naari muhittottattotte simmoramora sa ohephawanyu. 10Muhihephe emattaanyu ya iwuuva* emaara yanaaveeli naari muhittottattotte iwuuva* simmoramora. Munghiyereke oohaawa ni namarwa. Miyo ti Yave Mulukwaanyu. 11Muhiiye, muhoothe; muhilokotthane. 12Muhilipele moota woolokotheya mwa Nsinanaka muveihaka hiiho Nsina na Mulukwaanyu. Miyo ti Yave. 13Muhimuhooxe mukhwiinyu naari muhimwiiyere. Muliveke nlivo na namuteko onaakhela vanihukuni muhimpisihereke mpaka waaxiiye. 14Muhimulaphe oohiiwa hoye hoye muhimwiikaathere nluku nninkwakwathula oohoona, mene mmoove Mulukwaanyu. Miyo ti Yave. 15Muhivirikanyihe ekhaikhai mwaathorihaka, muhimuthorihele oohaawa ni nthalu naari muhaathorihele asitokweene ni nthalu, mene munthorihele mukhwiinyu ni ekhaikhai. 16Muhimwaramwaxe soowaapa eriyari ya mulokwaanyu. Muhipakeru etthu enoopopiha okumi wa mukhwiinyu. Miyo ti Yave. 17Muhimuthanye munninyu mmurimanimwanyu. Munghiihe mwaattamwanaanyu mweekhaikhaiyini weera muhikhalanetho nthowa. 18Muhaasaase wiinlela ikukuttula naari muhimunyoonyeriwe mukina a mulokwaanyu, vaheera munsivele mukhwiinyu ntoko muniisivelaanyu. Miyo ti Yave. 19Mwiiwelele ikanosaka. Muhaathelanyihe axinama oovirikana. Muhaale izo nyoota miili mmattamwanyu. Muhiware ekuwo yoovaxavaxiwa. 20Mulopwana akonano epottha ethiyana etthomeriwe ni mulopwana mukina, mene ehoopoliwe hata ehitapuxiwe, vano attaruxiweke moota ontthuneyaaya. Vaheera awosa ehiiviwe, niwoko epottha eyo khayaatapuxiwe. 21Wa soothesene mulopwana owo amuruuheleke Yave napunci vamulako wa Eheema ya Muthukumano ntoko yooveleelela nthowa. 22Musaserdoti* amukuxeke napunci a yooveleelela nthowa amurehererelaka wiiwanana ni Yave vamaithoni wa Yoowo mwa yoottheka opankaawe, ni yootthekaawe enooleveleliwa. 23Mwaavolowaka mweelaponi, munaphatteya wakhalaru mwiri wa soowiima, moonele weera soowiimasaya ti soohitthuniheriwa. Moonele seiyo ntoko soohitthuniheriwa wa iyaakha tthaaru; iyo sihiciweru. 24Vayaakhani yanaaxexe soowiimasaya sootheene sinookhala sootteela; sooveleela sa omuttottopela Yave. 25Vaheera vayaakhani yanaathanu muceeke soowiimasaya. Moota hiiho soohephasanyu sinimwaandyerereya. Miyo ti Yave Mulukwaanyu. 26Muhikhuureru enama ni ephome. Muhaase ihako hoye hoye itthu sa okhwiri. 27Muhicemele hata muhicemelele ireru. 28Muhiithikilase niwoko na anamakhwa naari muhiipophe. Miyo ti Yave. 29Muhimuverule mwaninyu muthiyana muntatuxaka puuta niwoko hiiho elapo enoohokoleela opuuta, esareyakano sootakhala. 30Muthokorore iSaabadusaka ni muttittimihe Nipuronaka Nootteela*. Miyo ti Yave. 31Muhiwaasaaseru yaale anaahera ihako hoye hoye anuuluma ni anamakhwa, niwoko munoovalihiwa ni yaawosa. Miyo ti Yave Mulukwaanyu. 32Ngweemelele anamuuluvala ni mwaattittimihe asitokweene a muloko; mmoove Mulukwaanyu. Miyo ti Yave. 33Namarwa aakhalaka mweelaponimwanyu, muhimuhasule. 34Namarwa onkhala ni nyuwosa mmoonelekemo ntoko muYixrayeli. Munsivele ntoko muniisivelaanyu niwoko mwaari anamarwa wExipitu. Miyo ti Yave Mulukwaanyu. 35Mwaaphimaka orakama, olemela hoye hoye waattawaya, mvarele muteko muringo wa ekhaikhai. 36Mvareleke muteko miringo sa ekhaikhai mwaaphimaka soolemela sa irooro, mpaka sa maahi maahi. Miyo ti Yave Mulukwaanyu kookhumihaleni wExipitu. 37Mwiiwelele ikanosaka sootheene ni malamulowaaka ootheene ni mutthareke yaawo. Miyo ti Yave.’”
നിലവിൽ തിരഞ്ഞെടുത്തിരിക്കുന്നു:
Levitiku 19: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.