Okhuma 35
35
Nlamulo na eSaabadu
1Moisesi aathukumanyiha muloko wootheene wa aYixrayeli, aneerela: “Itthu Yave oolamulenlaaweni opaka ti iya: 2Ontthuniheriwa ovara muteko wa mahuku mathannamosa, mene nihuku nanaathannameeli nikhaleke nihuku nootteelananyu, eSaabadu ya wiitthuuwa wa Yave. Akhalaru mutthu aneera avare muteko nihuku nno, vekhaikhai iiviweke. 3Hata muhiiseeleru mooro mmavaatenimwanyu nihuku na eSaabadu.”
Ikaruma sa etabernaakulu
4Moisesi aaheerela muloko wootheene wa aYixrayeli: “Yave olamulenle ha: 5‘Mumveleelele Yave sa sooreelasanyu. Ootheene yaale eniikhaleno murima woolikaneene eruuhe yoomvaha Yave sooveleela sa eyuuma yoorikaxa, eparatha*” ni ebronze*; 6ikuwo sooxeera, sa kanka ni sookankela, ikuwo sootteettheya, mapururu a ipuri; 7ixapala sa amaankhoro sooningiwa moota wooxeera, ixapala soohukhiwa; 8makhura a sooliveira* oomwaleelela, itthu sooreerela sintakansiwano makhura oottikitthelano ni erubani* yoowunkhelaxa; 9ni onikisi* ni maluku makina oowaaraxa weera ettottheleliwe vamooxikoottini a esaserdoti ni ya vakakasani. 10Ootheene ooweraxa variyariwanyu eweeke ni epakeke sootheene Yave olamulenlaawe: 11Etabernaakulu* ni Eheemaaya ni yookhuneeleliwaaya, ivarelelosaya, acikhaaya, mikoombasaya, amarimbwaaya ni nyettosaya; 12Arka* ni ikoposaya, yookhuneelano ya Wiiraana ni eluttu enkuttelela; 13meesa ni ikoposaya ni ikarumasaya sootheene, ni epaawu ya Okhala*; 14onyaari woomwaleelano ni ikarumasaya, mithuko ni makhura oomwaleelano; 15altaari* a erubani* ni ikoposaya, makhura oottikitthelano ni erubani* yoowunkhelaxa; eluttu yookuttelelano mulako wa etabernaakulu; 16altaari* a sooveleela soohisa ni nivalinaya na ebronze*, ikoposaya ni ikarumasaya sootheene; ebasiya ya ebronze* ni mweettwaaya; 17iluttu sa omokoni wa nipuwa ni amarimbwaaya ni nyettosaya ni eluttu ya vamulako wa nipuwa; 18mikuro sa etabernaakulu* ni sa nipuwa ni mikhoyisaya; 19soowara simvareliwa muteko aarumeelaka vaNipuroni Nootteela* – soowara sootteela sa musaserdoti* Aharoni ni sa anamwanaawe asilopwana awo yaarumeelaka ntoko asaserdoti*.”
Sooveleela sa etabernaakulu*
20Vahoolowaya muthukumano wootheene wa aYixrayeli waavenya aaraawewo Moisesi. 21Ootheene yaari oolikaneene, enyesereriheliwaka ni mirimasaya, yaamuruuhela Yave sooveleela sa muteko wa Eheema ya Muthukumano*, wa mitekosaya sootheene ni wa soowara sootteela. 22Ootheene yiivaherenre, okhuma alopwana mpaka athiyana, yaaruuhela iyuuma soorikaxa soohiyanahiyana ntoko iyuuma sa laamba, axiveeve, annela ni ipangiiri. Ootheene yaale yaahoonihera iyuumasaya soorikaxa ntoko sooveleela soowiinainihiwa wa Yave. 23Ootheene yaarino ikuwo sooxeera, sa kanka ni sookakela, ikuwo sootteettheya, mapururu a ipuri; ixapala sa amaankhoro sooningiwa yooxeera hoye hoye ixapala soohukhiwa, yaaruuha. 24Yaawo yoonihenre sooveleela sa eparatha* hoye hoye ebronze* yaaruuha ntoko sooveleela wa Yave ni ootheene yaarino itthaabwa sa mwiri wa akaasiya* weera sivareliwe wakhalaru muteko yaaruuhatho. 25Asithiyana ootheene yaawera, yaatthava ni matataawe, enaruuha yeeyo yaatthamvaaya – ikuwo sooxeera, sa kanka ni sookankela ni nliinya nootteettheya. 26Asithiyana ootheene yaatthuna ni yaawera yaatthava mapururu a ipuri. 27Ahooleli yaaruuha onikisi* ni maluku makina oowaaraxa weera ettottheleliwe vamooxikoottini a esaserdoti ni ya vakakasani, 28itthu sooreerela ni makhura a sooliveira* oomwaleelano, makhura oottikitthelano ni a erubani* yoowunkhelaxa. 29aYixrayeli asilopwana ni asithiyana ootheene yaatthuna yaamuruuhela Yave sooveleela ni otthunawaya wa miteko sootheene Yave aalamulenlaawe opaka mwa Moisesi.
Bezaleli ni Oholiyabi
30Vano Moisesi aaweerela aYixrayeli: “Moone, Yave oomuthanla Bezaleli, mwaana a Uri, mwaana a Huri a epuumba ya Yuda, 31anamusariha Munepa wa Muluku amvahaka miruku, wiiwexexa, osuwela ni akhili a miteko. 32Aamvaha akhili awo weera acaambule akwaniheraka iyo avarelaka muteko eyuuma yoorikaxa, eparatha* ni ebronze*, 33ni weera aattule maluku attotthelaka, nitho weera avarele muteko itthaabwa wa sakhalaru miteko sa ettottho. 34Aamvahatho yoowo vamoha ni Oholiyabi, mwaana a Ahisamaki a epuumba ya Dani, moota woowaaxuttiha akina. 35Aahaasariha ootheenaawo owera miteko soohiyanahiyana ntoko anamaratta, anamasomela miteko, anamaxora a nliinya nootteettheya ni ikuwo sa kanka, sookankela ni sooxeera ni ntoko anamatthava. Awo yaangwerasa osomela ni opaka wakhalaru muteko wa oratti.
നിലവിൽ തിരഞ്ഞെടുത്തിരിക്കുന്നു:
Okhuma 35: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
