awEfeso 2
2
Okumi onyowani mwa Kristu
1Nyuwo mwaari ookhweene mwa sootakhalasanyu ni sootthekasanyu, 2mwa seiyo mweettelaanyu, muttharihaka mukhalelo wa elapo ya vathi ela, aani mwaamuttharaanyu mutokweene a ikuru sa opheyoni, munepa owo omvara muteko vaanaano mwa yaawo ankhala ni ettiyamaaru. 3Khalayeene hiyo ootheene naakhalatho variyari wa yaawo, nimaalihaka sootthuna sa erutthwaahu, nittharaka soohaawelasaya ni soowuupuwelasaya. Ntoko ootheene akina, naaritho wa eyareliwaahu oophwanela isara. 4Wa soothesene, Muluku areene oosareya ni ikharari, oonivaha okumi vamoha ni Kristu 5niwoko na osivelaxawawe onisivenlaawe hiyo naaraahu nlelo ookhweene mwa sootakhala. Nyuwo moovuluxiwa niwoko na mahala! 6Muluku oonivenyereriha vamoha ni Kristu ni oonikilaathiha ni Yoowo mmapuroni a wiirimu mwa Kristu Yeesu, 7weera oonihere mihakhu soohilikanxereya sa mahalaawe mwa ihuhu sineera sirwe, mahala awo yooniheriwe wa hiyo mwa Kristu niwoko na oreerawawe murima. 8Nyuwo moovuluxiwa niwoko na mahala, munroromeloni, ni iwo khoongwa wa nyuwo, ti yamahala ya Muluku, 9aani khoongwa niwoko na miteko, weera ahikhale mukina aneera iivuwihe. 10Vano, nri ephattuwelo ya Muluku, epakiwe mwa Kristu Yeesu weera nipake miteko sooreera, mwa seiyo Muluku onirehererenlaawe toko weera hiyo nivareke.
Omutthu onyowani mwa Kristu
11Tivawo, muupuweleke weera khalayeene mwaari amalapo a eyareliwaanyu, ni mwiitthaniwa ‘oohiineliwa’ ni yaawo aniixiitthana ‘oowiineliwa,’ etthu epakiwe mweerutthuni ni matata a atthu. 12Muupuweleketho weera ehuhuweene yeele khamwaakhanleno Kristu, mmwalamwalihiweene ni muloko wa aYixrayeli, mureene anamarwa mwaha wa wiiraana wa yoororomelihiwa, khamwaakhanlenotho oweherera etthu, naari Muluku mweelaponimu. 13Vanonto, mwa Kristu Yeesu nyuwo khalayeene mwaari ottaiwene, mohaattamiheriwa niwoko na ephome ya Kristu. 14Owo ti murettelaahu, atatuxaka miloko miili iye mmoharu. Owo oophwata exiri ya wiittana yoomwalamwaxa, 15ananarihaka mweerutthunimwawe malamulo a soonyesereriwa ni ikano. Otthunawawe waari owera mwa Yoowo mwaneenaawe wa miloko miili mutthu munyowani mmoha, apakaka murettele, 16ni wiiraanyiha miloko miili iye ni Muluku mwa erutthu emoha. Eyo owenre niwoko na muttanda, mwa yoowo Owo oophwata wiittana iwe. 17Owo aaweenle olaleiya murettele wa nyuwo mwaari ottaiwene ni wa yaawo yaari vakhiviru. 18Vano, niwoko na Yoowo, ooweeli hiyo nookhalano evolowelo wa Atiithi mwa Munepa mmoharu. 19Tivawo, nyuwo khamuhiyonotho anamarwa ni amalapo, mene muri maneethi vamoha ni ootteela ni mipatta sa emusi ya Muluku, 20mutekiweene vasulu wa mathipelo a arummwa ni maprofeeti, Yeesu Kristu areene nluku noottittimiheyaxa na empa ela. 21Vasulu wa Yoowo empa yootheene yootekiwa ni enunnuwa, weera ethatuwe empa yootteela mwa Apwiya. 22Mwa Yoowo nyuwotho muntekiwa vamoha weera muthatuwe vaate wa Muluku mwa Munepaawe.
നിലവിൽ തിരഞ്ഞെടുത്തിരിക്കുന്നു:
awEfeso 2: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.