2 aKorinto 7
7
1Oosiveleya, woonaka weera nookhalano soororomelihiwa iya, niirapihe mwa sootheene simvaliha erutthu ni munepa, nikwaniheraka ntteelihonahu niwoko na omoova Muluku.
Ohakalala wa Pawulo
2Munivahe nipuro mmurimanimwanyu. Khaawo nimpahunlaahu, khaawo nimunanarihalaahu, khaawo nimpuhenraahu. 3Nkinghima yeeyo weera koothoriheni. Kohooleelani weera muri mmurimanimwahu moota wooweera noolikana okhwa, hoye hoye okhala vamoha ni nyuwo. 4Kohoororomelani vancipale. Wiivuwihawahu mwaha wa nyuwo ti otokotoko. Kinniixoona olipihiwa vancipale murimaaka, ohakalalawaka woosareya mwa soohooxa sootheene. 5Vano, naaphiyalaahu oMasedoniya, khaniitthuuwale, mene naahaaxiwa ni moota wootheene, eyo tiiyo soohooxa sa omokoni, ni woova wa mpuwa. 6Wa soothesene, Muluku onaapepesa oomaniwa, aanipepesa ni ophiya wa Titu. 7Khoohiyono paahi ni ophiyawawe, menetho ni opepesa nyuwo mwaampepesaanyu yoowo. Owo aanithalihera sa wunkheliwawanyu ni miyo, othananawanyu ni okeeteteelawanyu, moota wooweera ohakalalawaka kohaandyeereriwa vancipale. 8Hata ekarattaaka yoothananihani, nkinrukunxa murima. Kaaroorukunxaru murima – niwoko kinoona weera ekarattaaka yohoothananihani, hata wa ehuhu vakhaani – 9vano kinghakalala, khoohiyono niwoko nyuwo moothananihiwa, mene niwoko othananawanyu wohoorukunxani mirima. Vano, nyuwo moothanana ntoko Muluku aatthunaawe, tivawo nyuwo muhinanarihiwaanyu ni hiyo hata vakhaani. 10Othanana ntoko otthuna wa Muluku onruwera orukunxa murima onkeliha moovuluwani, ni othanana iwo woovira, mene othanana wa elapo ya vathi onruwera okhwa. 11Moone othanana wu ntoko otthuna wa Muluku onruweraaya mwa nyuwo: nthiti heeni, ohaawela heeni okhala oohikhala ni milattu, onyoonyiwa heeni, woova heeni, munkhela heeni, weeteteya heeni, olipiha murima heeni woomuttaruxa yoowo ori ni nthowa! Mwa sootheene nyuwo mohoonihera weera khamunono milattu mwaha wa yeeyo. 12Hiiho nkoolepenleni niwoko na yoowo opanke yoonanara, hata niwoko na yoowo onanaringhe, mene weera ohoolo wa Muluku nyuwo muwere woona asineenaanyu moota heeni munikhalenlaanyu nthiti. 13Noohakalalihiwa niwoko na sootheene iya. Ohiya olipihiwa murima, noohakalalaxa womoona Titu, ahakalalaka niwoko munepaawe wiitthuuwihiwe ni nyuwo ootheene. 14Miyo kaamuleela weera kiniivuwiha mwaha wa nyuwo, ni nkuuliwe muru. Ntoko sootheene nooleenlaahuni saaraaya sa ekhaikhai, ovuwa nraahuno mwaha wa nyuwo ohoolo wa Titu wohooniheratho ekhaikhai. 15Vano, woosivelaniwawe ori wootepaxa, uupuwelaka weera nyuwo ootheene mwaari oowiiwelela, mmwaakhelaka ni woova ni othukumela. 16Kinoohakalala niwoko kinoowera woororomelani mwa soothesene.
നിലവിൽ തിരഞ്ഞെടുത്തിരിക്കുന്നു:
2 aKorinto 7: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.