Malékuse 4

Esagá nò nà mbyè mmó

(Matio 13.1-15; Lukase 8.4-10)

1Yěsô la gíŋe ńzye lézí’i pʉ̀a nò Ssé á ngʉ̀ŋe ntse Galilea, anùɔ lá’ tóo lejʉ́ŋ yé tà ńgyɔ́ɔn tɛ’, tà á kúu tsɛ̀ɛ kanú’ gie áa tsɛ̀ɛ ntse, ńnéŋe. Alá’ tyé ngʉ̀ŋe ntse. 2Á la lɔg *sagá nò ńzí’i wɔ́b menò tà é gyɔ́ɔn gyɔ̌ɔn, ńne ńzí’i wɔ́b ńgɔɔn ngie: 3Pi zẅí’te ńjú’, atsɔ̌ nyìŋ lǎ’ ńgʉa ḿma’ mbyè mmó, 4ńtóo mma’á, etsɔ́ memvòm gwe ngʉ̀ŋe mánzsè, meshʉ́ŋ tó ńdagte ḿpfɛ́. 5Etsɔ́ memvòm gwe nà jʉ’ʉ metóon, á jʉ’ gie tsetsá’ té wó tɛ’ wɔ́, ńtɔ́g sá’ á nue é la zébe zebé. 6Nèm gÿo ńtʉ́a mboŋó, ńtuɔ, é júm, á nue menŋàŋ la tè lyɛɛ ssé wɔ́. 7Metsɔ́ memvòm gwe tsɛ̀ɛ legǐ tepòŋ. Legǐ tepòŋ gÿo ńdu ssé, éfóme mɛ̌, é té zém. 8Metsɔ́ memvòm gwe nà jʉ’ʉ tsetsá’a mbòŋo, ńgú’, éshʉ́a mboŋó. Metsɔ́ metsiŋe gwɔ́ ná mvòm móm ntá, metsɔ́ ná móm ntɔgɔ́, metsɔ́ ná nkÿo. 9Yěsô cʉ́me ngie: Nyìŋ lɔɔn ńgẅiin metuŋó lélɔg ńjú’u nò, á jú’.

Yěsô lɔgɔ sagá nò shwóŋó mélà’a kɔ́?

10Alá’ gÿo ńgʉa, pʉ̀a pie pɔ́ la zɔɔn ńgwɔ́ lejʉ́ŋ Yěsô pâ *ngàŋa kwò yé ntsɔ̀b pʉ́a nê legém cʉ́’ nzèm, ńzɛ́te yé ngie à kyagte *mesagá nò éshwóŋó wɔ́b. 11Á gɔɔn mbwo pɔ́b ngie: E Ssé lá gÿo ngie pi pɛ̂ zɔ zsé nò nénʉ́ nà lefùɔ sé gie áa lelyěen. Tá á gʉa ná petsɔ́ pʉ̀a pie pɔ́ té nà gí nùɔ wɔ́, pɔ́ jú’ yɔ́b pɔ́ ndà’ ngie mé lɔg sagá nò ńgɔɔn nò.

12Á gwɔ́ pú’u, tá ńgwɔ́ pá’ mé la ŋwe’e ngie:

pɔ́ ge ne líe jʉ’, é ké le mmó gyá

é ne jú’u jʉ’, pɔ́ le jú’ tà ńjú’ wɔ́

Á gwe’e pé’e á té pú’u wɔ́, mbà pɔ́ piŋe mbwo Ssé,

á lege menò tepòŋ mɔ́b#4.12 Es 6: 9-10 .

Anò gie esagá nò nà mbyè mmó lɔgɔ ńgɔɔn.

13Yěsô piŋ ńgɔɔn né pɔ́b ngie: Pi tě ńjú’u yɔɔn *sagá nò wɔ́ pá’ɔɔn, tà piŋ jú’ metsɔ́ pɔ́ lêkɔ́?

14Nyìŋ gẅie à pyě mmó, à pye shwóŋè Ssé 15Mbyè mmó gie e gwě ngʉ̀ŋe mánzsè, lɔgɔ ńgwɔ́ pʉ̀a pie pɔ́ jú’u shwóŋè Ssé, Sátà gwóon ńtó, éfó tsɛ̀ɛ ntʉ́m wɔ́b ńkẅile. 16Mbyè mmó gie e gwě jʉ’ʉ metóon lɔgɔ ńgwɔ́ pʉ̀a pie pɔ́ jú’u shwóŋè Ssé, ésẅɛte ńzẅíŋ nê lekág. 17Tá’, á té lyɛ menŋaŋ tsɛ̀ɛ ntʉ́m pɔ́b wɔ́, á nue pɔ́ gwɔ́ pɔ́ pʉ̀a lyɛ’ɛ́ lá’, mé gwɔ́ tà ńzye lékʉ́e wɔ́b, ńnyɛɛ wɔ́b ngɔ́’ mélà’ nò Ssé, pɔ́ gwóon ńgwá’. 18Mbyè mmó gie e gwě tsɛ̀ɛ megǐ tepòŋ, lɔgɔ ńgwɔ́ pʉ̀a pie é jú’u shwóŋè Ssé, 19ńgÿo ńzye lémÿɔg menò njÿó, nkáb zye léfʉte wɔ́b, pɔ́ ne ńtsɔ́ɔn setsɔ́ shúm tà ńgyɔ́ɔn, sɛ̌ shúm gÿo shwóŋè Ssé maga ntʉ́m pɔ́b té zém ntɔ̌ɔn. 20Mbyè mmó gie e gwě nà tsetsá’a mbòŋo, lɔgɔ ńgwɔ́ pʉ̀a pie pɔ́ jú’u shwóŋè Ssé, ńzẅíŋ, ḿbiŋ ńně ńgÿo pá’ nò Ssé ne ńzɛ́te, ńdɔgɔ ńgee mvfò, pɔ́ lɔgɔ ńgwɔ́ pá’ mbyè mmó gie tsɔ̌ mvòm gwɔ̌ sá’ tó ńná memvòm móm ntá, yetsɔ̌ ná móm ntɔgɔ́, yetsɔ̌ ná nkÿo.

Esagá nò ná lâm

Pi laga twó gí nà ntí gie pi lɔgɔ ńjú’u nò Ssé.

(Lukase 8.16-18)

21Yěsô gíŋe ńgɔɔn mbwo pɔ́b ngie: Tà a lɔɔn ńgwɔ́ nyìŋ lɔgɔ lâm ńtó, ḿbiŋ ńdɔg ngwʉ̌ŋ ńkábte, kà ńtÿɔ́g pɔ́ kesse kǔ wɔ́? Mé té tÿɔ́g pɔ́ nà jʉ’ gie mé pú ńgyá wɔ́ leen? 22Akɔ́ɔkɔ́ɔ gie áa lélyěen fʉ̀’ɔɔn wɔ́, á gwɔ́ pɔ́ gie mé ge nyɛ mé gyá, anò gie áa fʉ̀’ɔɔn ńgwɔ́ ntsèm, mé ge kyɛ́’ shwóŋó mángyɛ̌. 23Nyìŋ lɔɔn ńgẅiin metuŋó lélɔg ńjú’u nò, á jú’.

24Yěsô gíŋe ńgɔɔn né pɔ́b ngie: Pi lɔɔn ńzẅí’te nò Ssé pi jú’ tà ńjú’. Anò gie pi nyɛté ńjú’ mboŋó, nzẅìŋ gẅie nyìŋ lɔ̌g ńnéŋe twó ńjú’u nò Ssé, ée wɛ̌ tá à gÿo ńdɔg náa zsé nò mbwo ngàŋ, tà ńgíŋe ńkẅi’i. 25Nyìŋ gẅie à gẅiin mmó, mé ge gÿo kẅi’i, nyìŋ gẅie à tè gẅiin, mé kẅé méjʉ’ gẅie à zɔɔn ńgẅiin.

Esagá nò nà mbyè mmó gie e ne ńgú’u.

26Yěsô gíŋe ńgɔɔn ngie: *Lefùɔ Ssé gwá’a mbyè mmó gie nyìŋ ma’á nɔ̀ɔn yé la, 27à gwɔ̌ tà ḿma’, ńgʉa, kà à ne ńdyé lyě wɔ́, kà à tè ne ńdyé wɔ́ wɔ́, mbà shúm ne ńgú’u zsǒ pɔ́ tsẅɛ́’, à tè zsé mmó gie á gÿo tá é gú’ wɔ́. 28Tsetsá’ gílé yé zɔ gÿo mbyè mmó sá’, ńgú’, éshʉ́a metsɔ̀’, ḿmú’te. 29Metsɔ̀’ gÿo ńtʉ, angàŋa nɔ̀ɔn cʉ́’ ńtúm pɔ́ pʉ̀a nká’ ńdag shúm, mélà’mie afʉ̀’ʉ lélag shúm kǔ’.

Esagá nò nà mélesɔɔn mbyè mmó

(Matio 13.31-32; Lukase 13.18-19)

30Yěsô gíŋe ńgɔɔn ngie: À lɔɔn ńgwɔ́ pege lɔgɔ kɔ́ ḿbí fʉ̀’ pá’ *Lefùɔ Ssé ée pú’u, ńgwɔ́ pege lɔgɔ yɛ̌ *sagá nò ńtyɛ’te? 31É leen sẅé mbyè mmó gie e kɔ̌g pá’ tsɔ̌ ntí lesɔ́ɔn sésɔ́g#4.31 À lɔgɔ ńgwɔ́: Moutarde . Mé gwaa ma’, é pú ńkɔ́g ńcʉa metsɔ́ membyè shúm léjÿó sie mé pye nká’. 32Tá mé ké ńgwɔ́ tà ḿbye, ésá’, ḿbú ńgú’ ńcʉa setsɔ́ shúm léjÿó ntsèm sie ée tsɛ̀ɛ nká’, éshʉ́a memáa mbwó, ḿbú ńgú’, éshú’ tà ńgwɔ́ gie à lɔɔn ńgwɔ́ meshʉ́ŋ ně ńtóo ḿbá’a menkʉ̀a mɔ́b tsoló.

33Wɔɔn aa pá’ Yěsô lɔ̌ɔn ńzí’i pʉ̀a mmó pú’u, ńdɔgɔ pɔ́ mesagá nò pá’ mɔɔn, tá shwóŋó nò Ssé, éshwóŋó nà ntí gie ńgwɔ́ lá’ á ku’u lé jú’. 34À lɔ̌ɔn tě shwóŋó wɔ́b nò té lɔg pé *sagá nò wɔ́, ńgwɔ́ fʉ̀’ gie pâ *ngàŋa kwò yé zɔ̌ cʉ́’ ńgwɔ́, á pú ńkyagte shwóŋó wɔ́b pá’ é lɔgɔ ńgɔɔn.

Yěsô gÿǒ fóm zá’a

(Matio 8.23-27; Lukase 8.22-25)

35Á gÿo ńgwɔ́ ncwò nzém lyɛ’ó, Yěsô gɔɔn mbwo *ngàŋa kwò yé ngie: Pege túm ntse, ńgʉa nà yetsɔ̌ nzǐŋ. 36*Ngàŋa kwò yé nyé nùɔ lá’ jʉ’ó, ńkẅɛ́te yé tsɛ̀ɛ kanú’ gie á kɔ’ɔ́ tsòló ńně ńzí’i pʉ̀a nò Ssé, ńdɔgɔ yé ńgʉa. Pâ metsɔ́ mekanú’ la púte ńně ńgee, 37atsɔ̌ máamáa fóm ńnéŋe tà ńzye lécʉ’, ntse ne ḿbʉe ńkúu tsɛ̀ɛ kanú’, tà á cʉ́’ʉ ńgee pé ńdúe, 38Yěsô gwɔ́ nzèm, ńjʉ́’ʉ nà mmó ńně ńdyé, *ngàŋa kwò yé gwɔ́ zyeen yé ńgɔɔn ngie: Andè, tsye ɔ̀ tè ne ńgyá pá’ pege gee ńkwé lɔɔn wɔ́ kà? 39Yěsô zyeen, ńcÿɔ́gɔ fefà pɔ́ ntse, ńtsẅi ngie: Á kǔ’ pɛ́’ɛ̀, pi láŋte! Afóm gwóon ńzá’a, ntse té gíŋe ńcʉ’ʉ wɔ́. 40Yěsô leen ńké ńgɔɔn mbwo *ngàŋa kwò yé ngie, pi sěen ḿbɔ́gɔ kɔ́, pi fɔ̌ɔn ńnyé pɔ́ tè záb ntʉ́m ná mèŋ kà. 41Pɔ́ pú ńkẅi’i ńcÿɔ’, ńně ńgɔɔn tsetsɛ̀ɛ pɔ́b ngie, yɔɔn lìi nyìŋ gwɔ́ pɔ́ lêkɔ́? Tà mbɔɔ fóm pâ ntse jú’u ncwò wé?

നിലവിൽ തിരഞ്ഞെടുത്തിരിക്കുന്നു:

Malékuse 4: NGBM

ഹൈലൈറ്റ് ചെയ്യുക

പകർത്തുക

താരതമ്യം

പങ്ക് വെക്കു