Nkanee 34
34
Asaase No Do Ahe
1Na EWURADZE kasaa kyerɛɛ Moses dɛ, 2Hyɛ Israelmba no mbra, na se hɔn dɛ, Sɛ hom du Keenan asaase no do a, (iyi nye asaase a ɔda hɔ ma hom dɛ egyapadze, mekyerɛ Keenan asaase no dɛ mbrɛ n’ahe tsetsee,) 3ɔno hom pomu afamu nkyɛn mfi Zin sar do wɔ Edom nkyɛn mu, na hom pomu ɔhe mfi Nkyen Epo ano wɔ boka afamu: 4na hom ɔhe no ndan mfa Akrabbim mfowee pomu afamu, na ontwa mu nkɔ Zin: na n’edzifir ndu Kades-barnea pomu afamu; na ɔnkɔ Hazar-adar, na ontwa mu nkɛfa Azmon: 5na ɔhe no mpon mfi Azmon nkɔ Egypt ɔwora ho, na n’edzifir ndu po no ano. 6Na anee afamu ɔhe no dze, hom wɔ po kɛse no dze yɛ ne he: iyi na ɔnyɛ hom anee ɔhe. 7Na iyi nyɛ hom kwaamu ɔhe: hom mfi po kɛse no ho nsan bepɔw Hor mfa: 8bepɔw Hor ho na hom mfi nsan mbrɛ wɔfa kɔ Hamat; na ɔhe no n’edzifir ndu Zedad: 9na ɔhe no mfir edzi nkɔ Zifron, na n’edzifir ndu Hazar-enan: iyi na ɔnyɛ hom kwaamu ɔhe. 10Na hom nsan boka he mfa mfi Hazar-enan nkɔ Sefam: 11na ɔhe no mfi Sefam nsian nkɔ Ribla, wɔ Ain no boka afamu, na ɔhe no nsian araa nkodu Kinneret pomu afamu wɔ boka afamu: 12na ɔhe no nsian nkodu Jordan do, na n’edzifir ndu Nkyen Po ho: iyi nye hom asaase dɛ mbrɛ no ho ahe tsetsee. 13Na Moses hyɛɛ Israelmba no mbra dɛ, Iyi nye asaase a hom ntwe ho tonto mfa nkyɛ no a EWURADZE ahyɛ dɛ wɔmfa mma mbusuakuw akron, nye ebusuakuw ɔfa no; 14nye Reubenmba ebusuakuw, dɛ mbrɛ hɔn egyanom efi tsetsee nye Gadmba ebusuakuw dɛ mbrɛ hɔn egyanom efi tsetsee, nye Manaasɛ ebusuakuw ɔfa no, woenya hɔn egyapadze: 15na mbusuakuw ebien no nye ebusuakuw ɔfa no enya hɔn egyapadze wɔ Jeriko Jordan egya wɔ boka afamu ɔdze kɔ wipuei no.
16Na EWURADZE kasaa kyerɛɛ Moses dɛ, 17Iyinom nye mbanyin a wɔnkyɛ asaase no mu mma hom no hɔn edzin: ɔsɔfo Eleazar, nye Nun ne babanyin Josua. 18Na hom nyi ebusuakuw biara mu ɔbapɔmba kor ma wɔnkyɛ asaase no mu. 19Na mbanyin no hɔn edzin nye yi: Juda n’ebusuakuw mu, Jefune ne babanyin Kaleb. 20Simeon ne mba ebusuakuw mu, Ammihud ne babanyin Semuel. 21Benjamin n’ebusuakuw mu, Kislon ne babanyin Elidad. 22Nye Dan ne mba ebusuakuw mu ɔbapɔmba, Jogli ne babanyin Bukki. 23Josef ne mba mu: Manaasɛ ne mba ebusuakuw mu ɔbapɔmba, Efod ne babanyin Hanniel: 24nye Efraim ne mba ebusuakuw mu ɔbapɔmba, Siftan ne babanyin Kemuel. 25Na Zebulun ne mba ebusuakuw mu ɔbapɔmba, Parnak ne babanyin Elizafan. 26Na Isakar ne mba ebusuakuw mu ɔbapɔmba, Azzan ne babanyin Paltiel. 27Na Aser ne mba ebusuakuw mu ɔbapɔmba, Selomi ne babanyin Ahihud. 28Na Naftali ne mba ebusuakuw mu ɔbapɔmba, Ammihud ne babanyin Pedahel. 29Iyinom nye hɔn a EWURADZE hyɛɛ hɔn dɛ wɔnkyɛ Keenan asaase no mu mma Israelmba no.
നിലവിൽ തിരഞ്ഞെടുത്തിരിക്കുന്നു:
Nkanee 34: MFANBRP
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Mfantse Bible © Bible Society of Ghana, 2011.