Rm 15
15
Yanakanya ngopfu hi mhunukuloni kutlula wene hi ntshima
1Hine lava hitiyiki akupfumeleni hifanela kubyatrha lava kutrana lava ngeke swanga ha hine, na hinga djuli leswinga hi nyoxisaka. 2Mun'wana-ni-mun'wana wenu afanekela kutrhavisa wa-le-kwavu ku leswinga swinene akuva swita mutiyisa akupfumeleni. 3Hikusa na kone Yesu angadjulanga leswinga munyoxisaka. Swanga hi leswi kutraliwiki: A swifingeto swa lava afaka vakufingeta swi weli henhla kwanga. 4Kutani hinkwaswu leswinga kone Matralweni ya Kuhlawuleka switraliwi kuva ndondriso yeru, leswaku hikulehisa mbilu, ni kutiyisiwa hi matralwa, hiva ni kulavisela. 5Ingi Xikwembu Nkulukumba lweyi a kutiyisela ni kulavisela swipfaka ku Yene, angan'winyika kuyingelana kuvavisekeni avan'we ku van'wana, mi landra a xikombiso xa Yesu Kriste. 6Keleswi, i kuva hinkwenu kun'we ha ritu drin'we n'widrumisa Xikwembu Nkulukumba, Tatana wa Hosi yeru, Yesu Kriste.
Matiko hinkwawu mata drumisa Xikwembu Nkulukumba
7Hileswo-ke, yamukelanani van'wana ni van'wana, swanga hileswi Kriste ahiyamukeliki, kuva lidrumu ku Xikwembu Nkulukumba. 8Niswihlaya mfuri leswaku, Kriste ateli kutirela lava vakusoka, hinkonta ya xihlayelamfuri xa Xikwembu Nkulukumba, akuva ata hetiseka a swidumbiso leswinga yentxiwa ku vatatana; 9#Lavisa II Sm 22:50. akuva va-Matiko vadrumisa Xikwembu Nkulukumba hinkonta ya lirere drakwe; swanga hi leswi kutraliwiki:
Hiswoswo nita kudrumisa amakari ka va-Matiko.
Kutani nita kuyimbelela swidrumiso avitweni draku,
hi ku kudrumisa.
10Na swone kutraliwile vaku:
Ingiki a va-Matiko mambeni avanyoxe
kun'we ni va tiko dra Xikwembu Nkulukumba.
11Ku mbangu mun'wana kuhlayiwa leswaku:
Drumisani Hosi, n'wine hinkwenu va-Matiko,
na n'wine hinkwenu vhanu mudrumisani.
12 # Lavisa Ezy 11:10. Muprofeta Ezaya na yene ati:
Kutata wa lixaka dra Yixayi
lweyi a taka yima afuma
matiko;
a va-Matiko vata beka kulavisela ku yene.
13Ingi Xikwembu Nkulukumba, lweyi kulavisela kupfaka ku yene,
aan'witate hi kutrhava ni kurula kupfumeleni kwenu,
akuva n'wiva lava vayandriki akulaviseleni,
hi ntamu wa Moya wa Kuxwenga.
Ntiro lowu wurwexiwiki Pawulosi
14Mine, nini kudumba vamakweru, hikola kwenu, leswaku n'witali hi vunene, n'witali hi vutivi byinyingi, n'witibekiseli akuva n'wilayana van'we ni van'wana. 15Nambi swilitanu, ni n'witraleli hi kutiyanyana henhla ka timhaka leti akuva n'witiyanakanya. Niyentxi leswo hinkonta ya ntiro lowu Xikwembu Nkulukumba anirwexiki, 16akuva mutireli wa Yesu Kriste amakari ka va-Matiko. A ntirweni wa kutivisa Ivangeli ya Xikwembu Nkulukumba, leswaku va-Matiko vata kombisiwa ku Hosi swanga mhamba leyi trhavisaka ni leyi basisiwiki hi Moya wa Kuhlawuleka.
17Swanga hi vapfumeli ku Yesu Kriste, ni kutlakuxiwa kukulu a ntirweni lowu wa Xikwembu Nkulukumba. 18Hikusa mine anitiyi nhlana wa kukhanela loko kunge hi leswi Kriste aswi yentxiki ha mine akuva ni yisa va-Matiko kuyamukela Xikwembu Nkulukumba. Leswo swi yentxiwi hi maritu ni mintiho, 19hi mahlolana ni swikombiso, hi ntamu wa Moya wa Xikwembu Nkulukumba. Hi ndlela leyi na tivisa Ivangeli ya Kriste, kusukela Yerusalema ni hinkwawu matlhelo akuya tlhasa tikwaneni dra Ilirika. 20Nambi swilitanu ni tikaratile hi kutivisa ntsena a Ivangeli lomu Kriste afaka angasinatibyiwa, akuva ninga tiyaka ahenhla ka masungulo ya vambe. 21Nilani a Matralwa ya Kuxwenga maliki:
Lava afaka vangasina byeliwa
ha yene vatavona
ni lava afaka vangasinayingela
ntxhumu vatayingelisisa.
Pawulosi ayanakanya kuyendrela vakriste va-le-Roma
22Hikolahu, ni siveliwile minkama ya kutala kuta lahu ni n'wiyendrela. 23Kambe swoswi, nihetiki mintiro yanga ku matikwana lawa, nilavisela kuta ku n'wine, swanga hi leswi afaka ni navelile kuli khale. 24Nitata n'wiyendrela loko niya Xipanya. Nitibekiseli kutata n'wivona hi nkama lowo na nitava ni kunyoxa hikuva kone a makari kwenu. 25Kambe swoswi ni kongoma Yerusalema hi ntiro wa vapfumeli. 26Hileswaku a vapfumeli va-le-Makedoniya ni va-le-Akaya vatrimbi mhaka ya kuhamba xikombelo xa kupfuna vamakwavu swisiwana swa nhlengeletanu ya Yerusalema. 27Vaswikumi swili swone kuyentxa leswo, kambe hakunene afa vali ni nandru. Swanga heswi a vapfumeli va-le-Yerusalema vayavelaniki a swa moya ni va-Matiko, kutani lava vone vafanela kupfuna lavaya hi swa miri. 28Loko nitava ni bekisi mhaka leyi niva ni vanyiketa mihandru ya xikombelo, nita kongoma a Xipanya na nitaya vayendrela hi nkama lowo. 29Natiyisa leswaku, loko nitatlhasa halanu, nitata na nitali hi matovoko ya Kriste.
30Vamakweru, nan'witratriya ha Yesu Kriste ni hi lirandru anilandra a Moya wa Kuxwenga wuhinyikaka leswaku mi tlhangana kun'we na mine, n'wikukhongota hi kuhiseka ku Xikwembu Nkulukumba ha mine. 31Khongotani Xikwembu Nkulukumba akuva ni ntrhunxeka ku lava va-le-Yudeya, vanga pfumelikiki ku Kriste, ni leswaku a xipfuno lexi ni xi yisaka ku vapfumeli va-le-Yerusalema xi ngava ni kuyamukeliwa ha hombe. 32Hi ndlela leyo, nita n'wiyendrela, loko Xikwembu Nkulukumba aswirandra, na nitali hi kunyoxa, ni kukuma kuwisa kutrongo kun'we na n'wine. 33Xikwembu Nkulukumba lweyi a nyikaka kurula, ave na n'wine hinkwenu. Amen.
നിലവിൽ തിരഞ്ഞെടുത്തിരിക്കുന്നു:
Rm 15: NTX2007
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Xironga New Testament with Psalms © Bible Society in Mozambique, 2007.
