Rm 11
11
Ntlawa wa vahlawuliwa
1 # Lavisa Flp 3:5. Nangweso navutisa: Xana Xikwembu Nkulukumba atava a txukumeti tiko drakwe xana? Aswilitanu! Hikusa na mine ni mu-Israyele, wa xiloso xaka Abrahamu wa xiloso xaka Benyamini. 2Xikwembu Nkulukumba angatxukumetanga tiko drakwe, ledri angadrihlawula kehe kusunguleni. Xana n'wine an'wiswitivi leswi a Matralwa ya Kuxwenga ma hlayaka swone ha Eliya lweyi a rambelaka Israyele ku Xikwembu Nkulukumba? 3Hosi, vadlayi ni vaprofeta vaku, vambundrumuxile ni mimbangu ya kuhisela magandrelo yaku. Ne kusala vuswanga, na mine Avadjula kunidlaya. 4Kasi dravi drini ayangulo dra Xikwembu Nkulukumba xana? Dravi ledri: Nitisaleli ni ntlhanu wa makume na makume mabiri ya madzana (7000) ya vhanu lava vakukavanga khisamelanga xikwembu Baale. 5Kasi, hi ndlela yoleyo ni ku wo nkama wa swoswi yi kone nhlayunyana yitrongo ya lava vahlawuliki hi timpswalu. 6Loko avi hi timpswalu, akahavanga hinkonta ya mintiro yavu; loko ali hi ndlela yin'wana atimpswalu atingaha faneli kuva timpswalu.
7Ke hitakuyini, hileswi? Leswi va-Israyele afaka va swidjula avaswikumanga; kambe swikumiwile hi lava vahlawuliwiki; Kambe a nsalonyana wu tinonon'hwisile. 8Swanga hileswi Kutraliwiki swaku:
Xikwembu Nkulukumba avanyiki a moya wavurongo,
ni mahlu lawa ya kuka mangavoni ni tindleve
leti takuka tingayingeli,
kuko siku dra namunhla.
9Kutani na yene Davida ali:
Na yone a minkhuvu yavu amindruluki mintlhamu ni
mabohelo,
akuva vawa vatakhatisiwa.
10A mahlu yavu amamphume akuva vanga voni
ni leswaku minhlana yavu miherekisiwa hi la kungahelikiki.
Huluko dra va-Matiko
11Navutisa nangweso nili: Xana loko vakhunguvanyekile, vaweli mfuri xana? Aswivanga tanu. Akuwa kwavu wuvi nkama wa kuhuluxiwa va-Matiko, akuva ava-Yuda vatrhama ni vukwele hi van'wana. 12Xileswo, loko a xidoho xavu xindruluki kulondrovota ka misava, na kone a kuhluleka kwavu kutireli vupfundri ku man'wana matiko, ngopfu-ngopfu kundruluka kwavu atava tovoko ledri drikulu.
13Swoswi nibyela n'wine va-Matiko, mine ni mupostola wa va-Matiko, nitwalisa vutireleni byanga. 14Akuva kumbe xana a van'we ku lixaka dranga vangava ni vukwele ha n'wine, vahuluxiwa. 15Hikusa loko akutxukumetiwa kwavu, kubuyiseli kutlhanganisiwa ka misava, xana akuyamukeliwa kwavu kutava yini? Loko ange vutomi ku lava afaka vafile. 16Hileswo-ke, loko swirangana swixwengile, na yo mbila ya xwenga. Loko a mutru wu xwengile, na to tinkambu ta xwenga.
17Loko tinkambu tin'wana tiphatluliwile, kambe wene leswi unga nhlwari, utlhomiwa ansinyeni avutrham'wini bya tone; hikolahu utlhanganisiwi ni mutru uva ukuma ni nhome ya nhlwari lowu wa lisima; 18ungatxhuki utikulisa, udrela tinkambu leti tremiwiki nambi ali kutikulisa, a hi wene uphamelaka mutru, kambe a mutru hi wone wu kuphamelaka.
19Utanibyela leswaku a tinkambu leto tiphatluliwi akuva wene utlhomiwa kone. 20Switiyile. Tiphatluliwi hinkonta ya kukala kupfumela, kasi swoswi wene uyimi mbangwini lowo hikusa unikupfumela. Kambe ungatikukumuxi hinkonta ya leswo. Hikuhambana tivonele. 21Hikusa, loko Xikwembu Nkulukumba anga tretrelelanga tinkambu leti afaka tili ta ntumbuluku, na wene angatikutretrela. 22Lavisani, avunene ni kunono'nhwa ka Xikwembu Nkulukumba: Anonon'hwela lava va wiki, kambe a yentxa vunene ku wene, loko utrhama avuneneni byake, Hi ndlela yin'wana, na wene uta tremiwa. 23Nambi vone, loko vatrika kutrhama kuyaleni, vatatlhomiwa a nsinyeni; hikusa Xikwembu Nkulukumba ani ntamu wa kutlhela avatlhoma hi vumpswha nangweso. 24Hikusa leswi ungatremiwa a nhlwarini wa nhova, hikuhambana ni leswi i nga ntumbuluku, utlhomiwi anhlwarini lowu wunene. Hikolahu swa nabyala kutlhoma tinkambu ta nhlwari lowu wunene ansinyeni wa ntshima.
Kuhuluxiwa ka va-Yuda
25Hikusa anirandri vamakweru, leswaku n'wikohla hi xihundla lexi, (akuva n'wingatitxhuka n'witiyanakanya leswaku n'witlharihile). Leswaku Israyele hi tlhelo drin'we, leswaku ava-matiko hinkwavu vakondra vanhingena. 26Hikolaho, hinkwadru tiko dra Israyele dritahuluxiwa, swanga hi leswi kutraliwiki leswaku:
A Muhuluxi atapfa Siyoni
lweyi ataka trhindreta vubihi bya vana va Yakobe.
27Hi xolexi xipfumelelanu lexi nitaka xiyentxa na vone,
loko nitava nisusi swidoho swavu.
28Hi kuyelana ni Ivangeli, a va-Yuda i valala va Xikwembu Nkulukumba hinkonta yenu. Kambe vahatama vava vahlawuliwa va Xikwembu Nkulukumba hinkonta ya vakokwana vavu. 29Hikusa Xikwembu Nkulukumba asusi leswi aswi nyikaka nambi kuhlawula leswi swiyentxaka.
30Swanga hi leswi na n'wine nkama mun'wana n'wingatiyalisa ku Xikwembu Nkulukumba, kambe swoswi, leswi va-Yuda vatiyalisiki, n'wine mi yamukeli kutretrelela ka Xikwembu Nkulukumba. 31Hinkonta ya kuyala ka volavo, hi swoswi navone, volavo, swoswi vayalile akuva hikutretrelela kwenu vakuma kutretreleliwa. 32Hileswo-ke, Xikwembu Nkulukumba ayentxi leswaku hinkwavu vandruluka vabohiwa va kutiyalisa, leswaku atakombisa ku vone hinkwavu kutretrelela kwake.
33Ahikukula ka vukosi bya Xikwembu Nkulukumba ni vutivi ni vutlhari byake! I mani angaswikotaka kutlhamuxela makungu yake ni kuyingelisisa tindlela ta xone!
34Hi laha mahlayaka swinene a Matralwa mali:
I mani lwa tivaka miyanakanyu ya Hosi?
I mani lwanga swikotaka kululeka Xikwembu Nkulukumba?
35Hi mani lweyi anga swikotaka kunyika xa ntxhumu
akuva ntrhaku ata yamukela hakelo?
36Hi leswaku hinkwaswu swipfi ku Xikwembu Nkulukumba ni
hinkwaswu swi kone ha Yene na i swake.
Ku Xikwembu Nkulukumba akuve lidrumo hi minkama.
Ni minkama Amen.
നിലവിൽ തിരഞ്ഞെടുത്തിരിക്കുന്നു:
Rm 11: NTX2007
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Xironga New Testament with Psalms © Bible Society in Mozambique, 2007.
