Mnt 24
24
Pawulosi atiyangulela mahlweni ka Felikisi
1Ntrhaku ka ntlhanu wa masiku, Ananiya, muprista lwenkulu aya Khezareya, kun'we ni van'we ku vakulu va tiko, na mun'we wa mukhaneli valiki i Tertulo, vayakombisa a swakurambela Pawulosi amahlweni ka hosi. 2Atiki avitaniwa, Tertulo asungula kumurambela aku: Leswi hikumiki kurula loku kukulu ha wene, ni leswi a mayentxela lawa ya kululama mahumexeliwiki tiko ledri hi vutlhari byaku, 3hi tindlela hinkwatu, ni hi minkama hinkwayu, hiswiyamukela, na hitlangelile ngopfu swinene, we mutxhaviseki Felikisi. 4Kambe, akuva ningakukhomi hikukuhetela a nkama, nakukhongota leswaku uyingela hi vumbilu byaku a maritunyana yeru. 5Hi kumile leswaku a nuna lweyi i ntungu. Apfuxa madzolonga amakari ka va-Yuda lava vanga misaveni hinkwayu, mfuri i mufambisi wa dondronyana yimpswha ya va-Nazarete. 6Adringisiki ni kunyamisa Tempele, kutani himukhoma, [hi djula kumuyavanyisa hi kulandra a nawu weru. 7Kambe kuhumeleli ndruna Lisiya, atatamuwutla hi ntamu amavokweni yeru, 8hi kuhlaya leswaku lava vamurambelaka vafaneli kuta ku wene.] Na wene, loko utamuvutisa, utaswitiva hinkwaswu leswi himurambelaka ha swone. 9A va-Yuda van'wana na vone vayima ni mukhaneli, vatiyisa leswaku hi swone leswo hinkwaswu. 10Pawulosi, kuti loko a hosi amukwehletela akuva avulavula, ayangula aku: Leswi nitivaka leswaku uvi mutremi wa tiko ledri hi malembe ya kuhlawa, nitiyangulela hi kudumba loku kuhundrisaka, 11hikusa ungaswitiva leswaku, amasinahundra khume dra masiku na mabiri na nintlhantukeli Yerusalema akuva niyagandrela. 12Avanikumanga a Tempeleni na nikanetana ni mhunu, kumbe ni hlengeleti vhanu, nipfuxa dzolonga, amasinagogeni, nambi ku mbangu wun'wana amutini, 13mfuri a vhanu lava avana kuswikota a kutiyisa ku wene leswi vanirambelaka ha swone swoswi. 14Kambe nitatihlayela leswi ku wene: Mine nitirela Xikwembu Nkulukumba wa vatatana veru hi kulandra Ndlela leyi yimpswha, leyi valiki i dondronyana ya kuhambuka, na nipfumelaka ku hinkwaswu leswi swifambelanaka ni Nawu (wa Moxe), swikumekaka ni le ku vaprofeta, 15ningani kulavisela loku na vone vanganaku, ku Xikwembu Nkulukumba, ka leswaku ku tava ni kupfuka ka hinkwavu a va kufa, valulami swanga hi lava vamfani. 16Hileswo-ke na mine nikhinyela minkama hinkwayu kuva ni lipfalu ledri dribasiki, amahlweni ka Xikwembu Nkulukumba ni le ku vhanu. 17Kuhundriki malembe manyingi, nibuyeli, kubuyisa a swihanano ku tiko dra kweru ni kutatahamba a timhamba. 18Avi nkameni wolowo vanikumiki na nitibasisile a Tempeleni, na ningena xitrhungu, mfuri ningena pongwe. 19Kone afa kuni van'we va va-Yuda va kupfa hi le Aziya, lava aswifanekeli kuva ali lana ku wene, akuva vanirambela, loko vani mhaka ku mine. 20Kumbe avahlayi ni volava, a nandru lowu vawukumiki ku mine, loko ni yimisiwi amahlweni ka Huvu, 21loko dringali ritu drin'we, ledri ningahuwelela loko ni yimisiwi amakari kwavu, ledri dra ku: Niyavanyisiwa amahlweni kwenu namuhla hinkonta ya kupfumela ka kupfuka ka vafi.
22Kolahu Felikisi, leswi ativisisiki swinene a dondro leyi ya Ndlela ya Hosi avatlhelisa aku: Loko Lisiya, lweyi wa ndruna, atava atlhasile, nitakambisisa a timhaka tenu. 23Felikisi aleleta a ndruna ya dzana leswaku Pawulosi abekiwa bohelweni, kambe alondrisiwa ha hombe, ni kupfumeleliwa leswaku ayamukela a wupfunu bya va makwavu.
Pawulosi a bohelweni
24Loko kuhundri masikunyana, Felikisi atlhasa ni nkatakwe Durusila, lweyi afaka ali mu-Yuda, avitana Pawulosi amuyingela ahlaya swakupfumela ku Yesu Kriste. 25Kambe loko Pawulosi aha mudrungulela swa vululami, kutikhoma, ni kuyavanyisa loku kutaka, Felikisi asungula kururumela, abyela Pawulosi aku: Tifambele kutani. Nitatlhela nikuvitana na kone, loko nikumi nkama. 26Felikisi afa kambe alavisela leswaku Pawulosi atamunyika mali, hi laha-ke afaka amuvitana ha kanyingi, vakhanela kun'we. 27Kuku kuhundra malembe mabiri, Porkiyu Festu abekiwa mufuni matrhan'wini ya Felikisi. Kambe Felikisi leswi afaka adjula a kuseketeliwa hi va-Yuda, atrika Pawulosi a kubohiweni.
നിലവിൽ തിരഞ്ഞെടുത്തിരിക്കുന്നു:
Mnt 24: NTX2007
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Xironga New Testament with Psalms © Bible Society in Mozambique, 2007.
