Ndandililo 3
3
Ungajitichisya wa mundu
1Lijoka lyaliji lyakalamuka kwipunda inyama yose ya mwikonde yaipanganyikwe ni Ambuje Akunnungu. Nipele, lijoka lyammusisye jwankongwe jula, “Ana Ambuje Akunnungu ansalile kuti, nkalya isogosi ya chitela chilichose mu ngunda wa mwana?” 2Jwankongwe ŵalijanjile lijoka lila, “Tukukombola kulya isogosi ya chitela chilichose mu ngunda wa mwana, 3nambo Akunnungu ŵatite, ‘Nkalya isogosi ya chitela chachili pasikati pa ngunda wa mwana, atamuno kuchikwaya, mwatendaga yele chinchiwa.’ ” 4Lijoka lyanjanjile jwankongwe, “Kusyene, ngamwa. 5Akunnungu ŵatite yeleyo pakuŵa akuimanyilila kuti lyuŵa lichinchilya isogosi ya chele chitela cho meeso genu chigaunukuche, ni ŵanyamwe chimme mpela Akunnungu, nchimanyililaga yambone ni yangalimate.”
6Jwankongwe jula paiweni kuti isogosi ya chitela chila ili yambone kwa chakulya, nombe isalele mmeeso, ŵaganisisye kuti ili yambone kukola umanyilisi. Nipele ŵakaŵile chisogosi ni kulya, iyoyo peyo ŵampele ŵankwawo juŵaliji pamo nawo, nombejo ŵalile. 7Papopo ŵaunukulikwe meeso gao, ŵaimanyilile kuti ŵaliji matakope. Kwayele ŵalitotele masamba ga chitela chachikuŵilanjikwa ntini ni kuliunichila.
8Nipele katema ka ligulo ŵapilikene nsindo wa Ambuje Akunnungu achendaga mu ngunda wa mwana, nombewo ŵalisisile pa itela kuti Ambuje Akunnungu anaawone. 9Nambo Ambuje Akunnungu ŵambilasile che Adamu, ŵatite, “Nli kwapi?” 10Nombejo ŵajanjile, “Nampilikene nli nkwenda mu ngunda wa mwana, najogwepe ni kulisisa pakuŵa ndili matakope.” 11Ambuje Akunnungu ŵambusisye, “Ŵaani ŵansalile kuti ndi matakope? Ana ndile isogosi ya chitela chinankanyisye nkalya?” 12Mundu jula ŵajanjile, “Jwankongwe jumumbele kuti aŵe pamo ni une ni juŵambele chisogosi cha chitela cho noneji nalile.”
13Pelepo Ambuje Akunnungu ŵambusisye jwankongwe jo, “Kwachichi ntesile yeleyo?” Jwankongwe jo ŵajanjile, “Lijoka linambwisye, noneji ndile.”
Akunnungu akutangasya ulamusi
14Nipele Ambuje Akunnungu ŵalisalile lijoka lyo, “Pakuŵa ntesile yele, nnweseche kupunda inyama yose ya kulangwa ni ya mmatinji. Chinkwaŵe kwa lutumbo lwenu ni kulya luundu moŵa gose ga umi wenu. 15Chimiche umagongo pasikati jenu ni jwankongwe, ni pasikati ja uŵelesi wenu ni uŵelesi wa jwankongwe. Nombewo chankase ntwe wenu nomwe chimwalume chindende chao.”
16Nipele ŵansalile jwankongwe jo, “Chinampundisye chilungusi cha kuŵeleka ni chimbeleche ŵanache kwa chilungusi. Chimbe ni lungw'anu lwa ŵankwenu nombewo chantawale.”
17Nipele Ambuje Akunnungu ŵansalile che Adamu, “Pakuŵa mwapikanile ŵankwenu ni kulya chisogosi cha chitela chinankanisye kuti nkalya, kwayele, kwa kuleŵa kwenu, lisi lilweseche. Kwa kupanganya masengo ga kulimba chinkole chakulya, moŵa gose ga umi wenu. 18Litaka chilimele miiŵa ni michongwe, nomwe chindye maponda ga mungunda. 19Kwakupanganya masengo ga kulimba gakunkoposya chitukuta chinkole chakulya mpaka pachimbuje mu litaka munkopochele, pakuŵa nangumbile ni litaka, nomwe chimbujile sooni mu litaka.”
20Che Adamu ŵammilasile ŵankwakwe che Hawa, pakuŵa ŵaliji achikulu ŵa ŵandu wose. 21Ambuje Akunnungu ŵaapanganyichisye che Adamu ni ŵankwakwe iwalo ya lipende ni kwatakusya.
Che Adamu ni che Hawa akuŵinjikwa mungunda wa mwana
22Nipele Ambuje Akunnungu ŵatite, “Sambano mundu ju aŵele mpela uwe, akuimanyilila yambone ni yangalimate. Akaika kukaŵa chisogosi ya chitela cha umi ni kulya, pakuŵa alyaga chatame moŵa gose pangali mbesi.” 23Nipele, Ambuje Akunnungu ŵamminjile che Adamu mu ngunda wa mwana wa Edeni, kuti akalilime litaka muŵagumbikwe. 24Pakumala kumminga che Adamu, Ambuje Akunnungu ŵachiŵisile chepanganyikwe chachili ni mapapiko chachikuŵilanjikwa Likelubi ku ngopochelo lyuŵa kwa Edeni lili likamulile lipanga lyalikukolela mooto lyalikugalauka akuno ni akunokuno, kulindilila litala lyalikwaula ku chitela cha umi.
നിലവിൽ തിരഞ്ഞെടുത്തിരിക്കുന്നു:
Ndandililo 3: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
